Nakoaia Ibonga 7
7
Te Angab'ai Ni Kabomwi
1Aikai tuua i bukin te karea ni kabomwi, ake a rangi n tabu. 2E na riai n tiringaki te man i bukin te karea aei n iteran te baonikarea are mai meaang, ike a tiringaki iai maan i bukin te karea are te kab'anin, ao e na tataariaki iai iteran te baonikarea ake aua. #7.2 te karea are te kab'anin: Noora kab'arab'araan 1.1-3. 3A na riai ni kanakoaki taian nenea aikai ni kareanaki i aon te baonikarea: nenean te buki, te nenea are e rabun taiani kanoannano, 4taiani kirine ao taian nenea ake i aoia, ao m'akoron te ato ake a raraoi. 5E na riai te ibonga n kabuoki taian nenea ni kabane i aon te baonikarea b'a te karea are te am'arake nakon te UEA. Bon te karea ni kabomwi. 6A na riai ni kanna m'aane ni kabane ake a nako man taian utu ni ibonga, ma e na riai ni kanaki n te tabo are tabu,#7.6 te tabo are tabu: Te tabo ni kabowi n te Um'antabunrianna (Noora 6.16,17). i bukina ngke e rangi n tabu.
7Iai te tua teuana ae e konaa ni kamanenaaki nakon te karea i bukin te karea i bukin te bure ao te karea ni kabomwi: bon te iriko ni man are aia b'ai ibonga are e karaoa te angakarea. 8E na anga te aba kunin te man are te karea ni kabuokaki #7.8 karea ni kabuokaki: Noora kab'arab'araan 1.1-3. b'a ana b'ai te ibonga are karaoa te angakarea. 9Aia b'ai naba ibonga ake a karaoa te angakarea nakon te Atua, taiani karea are te uita #7.9 taiani karea are te uita: Noora kab'arab'araan 2.1. are e kam'aaki n te ainumuum, ke e katauraoaki n te baan n tintin. 10Ma taian karea are te uita ni kabane ake a tuai ni kuukanna, b'a e aoria ngkana e renganaki ma te oera ke e m'au, a b'ainaki irouia kaain Amora ni kabane ake taian ibonga ao e na riai n tib'aaki raoi i marenaia.
Te Karea n Raoi
11Aikai taiani kaetieti i bukin te karea n raoi #7.11 te karea n raoi: Noora kab'arab'araan 3.1. ake a kaotaki nakon te UEA. 12Ngkana arona b'a iai te m'aane ae e karaoa te karea aei b'a te karea ni kaaitau nakon te Atua, ao e na riai ni kaotia, n reitaki ma te man are e na kareanaki, te angab'ai are te kariki are e aki itinaki: e konaa n ae te kariki are e mmani ae e karaoaki man te buraawa ae e renganaki ma te oera, ke te berena ae e bururuaki aona n te oera, ke te keeke ae e karaoaki n te buraawa ae e renganaki ma b'aan te oriwa. 13N raonaki ma anne, e na riai naba n anga te kariki ae e karaoaki ma te iti. 14E na riai ni kaota teuana m'akoron te aekaki ni kariki nako b'a te karea ae e kaokoroaki i bukin te UEA; bon ana b'ai te ibonga are e anaa raraan te man ma n tatauriia iai te baonikarea. 15E na riai ni kanaki irikon te man n te bong n angakarea; bon akea nikirana teuana ae e na katukaki nakon te bong are i mwiina.
16Ngkana arona b'a e roko te aomata ma te karea n raoi b'a kakoroan nanon ana taeka ni bau, ke bon oin ana karea n anganano, a na aki kanaki ni kabane n te bong are e karaoaki iai te angakarea, ma ngkana iai nikirana a na manga kanaki nakon te bong are i mwiina. 17E na riai ni kabuokaki te am'arake are e tiku nakon te katenibong. 18Ngkana arona b'a e kanaki te am'arake n te katenibong, ao e na aki butim'aea ana karea te aomata anne te Atua. E na aki warekaki te karea anne b'a raoiroina, ma e na atongaki b'a kam'araana, ngkana iai ane e kanna, e na manga bon okiraki ni mwiina. 19Ngkana arona b'a e boo rab'atan te iriko ni man ma te b'ai teuana ae e kam'araa, e na riai n aki kanaki, ma e riai ni kabuokaki.
E na kanaki te iriko ni man iroun temanna ae e aki kam'araa 20ma ngkana e kanaki iroun te aomata ae e kam'araa, ao e na aki atongaki te aomata anne b'a ana Aomata te Atua. 21Ngkana arona b'a e kanaki naba te iriko ni man ae te karea aei i mwiin boona ma te b'ai teuana ae e kam'araa, tao b'ain rab'atan te aomata ke te man ae e kam'araa, ao e na aki atongaki te aomata anne b'a ana Aomata te Atua.
22Aikai Tuua ake e anga te UEA nakon Moote 23i bukiia Iteraera, Akea nenean te kao, te tiibu, ke te kooti ae na kanaki. 24E na aki kanaki nenean te man aika kawakawa ae e mate i bon i rouna ke e tiringaki irouia mannikaakang, ma e konaa ni kabonganaaki i bukin te iango teuana. 25E na aki atongaki b'a ana Aomata te Atua te aomata ane e kana nenean te man are e na kareanaki nakon te UEA b'a te karea are te am'arake. 26N taabo nako ike a maeka iai Iteraera, a na aki roko n te kamanenaa raraan te mannikiba ke te man i bukin te am'arake. 27Ane e urua te tua aei, e na aki atongaki b'a ana Aomata te Atua.
28Aikai Tuua ake e anga te UEA nakoni Moote 29i bukiia Iteraera:
A riai aomata nako akana a anga karea n raoi n uota m'akorona b'a te b'aintangira ae e kaokoroaki nakon te UEA, 30ao e na uoti n oin baina b'a te karea are te am'arake. E na riai ni uota nenean te man ma b'aab'aana ma n tabekiarake #7.30 tabekiarake: Ke ni katioa, ke ni kaotia. b'a te karea are te b'aintangira ae kaokoroaki nakon te UEA. 31E na riai te ibonga ni kabuoka te nenea i aon te baonikarea, ma e na b'ainaki m'akorona are b'aab'aana irouia ibonga. 32E na kanakoaki rangan te man are te angaatai b'a te buoka 33nakon te ibonga are e anga raraan ao nenean te karea n raoi. 34Bon te b'aintangira ae e onoti b'aab'aan te man, ao rangana te angaatai bon te buoka are E a tia n anaia te UEA mairouia Iteraera ma n anganiia ibonga. Aio te b'ai ae a riai Iteraera n anga nakoia ibonga n taai nako ni boong aika a na roko. 35Anne m'akoron te am'arake are e anganaki te UEA are e anganaki Aaron ma natina m'aane n te bong are a katabuaki iai b'a ibonga. 36E mwiokoia Iteraera te UEA n te bong arei b'a a na anganiia m'akoron te karea aei. Bon te tua ae a riai Iteraera n ongotaeka nako iai n taai nako ni boong aika a na roko.
37Ao akanne tuua i bukin taiani karea ni kabuokaki, taiani karea are te uita, taiani karea ni kab'arabure, taiani karea ni kabomwi, taiani karea ni katabutabu, ao taian karea n raoi. 38E anga tuua aikai te UEA nakon Moote i aon te Maunga are Tinai i nanon te rereua n te bong are e tuangiia iai Iteraera b'a a na moana karaoan karea aikai.
Избрани в момента:
Nakoaia Ibonga 7: KNVB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте