Tơlơi Tơbiă 1
1
Ană Israel hmâo tơlơi pơrơngai mơ̆ng tơlơi ngă hlŭn pơ Êjip
(1:1 – 15:21)
Tơlơi Ană Israel Lar Đĭ
1 #
Čơd 46:8-27. Anai jing anăn ƀing ană đah rơkơi Israel hmâo tui laih Yakôp nao pơ čar Êjip hrŏm hơbĭt hăng sang anŏ ñu: 2Ruben, Simêôn, Lêwi, Yuđa, 3Isakar, Sabulôn, Benjamin, 4Đan, Naptali, Gat, laih anŭn Aser. 5Abih bang ană tơčo Yakôp jing tơjuh pluh čô;#1:5 Sa sŏp hră pơblang so hơđăp: tơjuh pluh rơma (Bruă 7:14). bơ kơ Yôsep hmâo dŏ laih amăng čar Êjip.
6Giơ̆ng anŭn Yôsep, ƀing adơi ayŏng ñu laih anŭn ƀing mơnuih tal hrŏm rơnŭk anŭn ƀrư̆ ƀrư̆ djai hĭ. 7#Bruă 7:17.Samơ̆ ană tơčo Israel tơkeng rai lu tui tañ biă mă, mrô mơnuih đĭ jai lu hloh lar bă djŏp tring laih anŭn gơñu jing hĭ kơtang biă mă.
Ană Israel jing hlŭn tơnap biă mă
8 #
Bruă 7:18. Hlăk anŭn hmâo sa čô pơtao phrâo tơgŭ đĭ wai lăng čar Êjip, ñu ƀu thâo krăn Yôsep ôh. 9Ñu laĭ hăng ană plei pla ñu “Anai nê ană plei pla Israel jing lu laih anŭn kơtang hloh kơ ƀing ta 10#Bruă 7:19.Bơ bĕ! Brơi ƀing ta ngă kơ gơñu hăng tơlơi kơhnâo, hwĭ kơ gơñu lar tui mrô mơnuih laih anŭn tơ hmâo tơlơi pơblah, gơñu či pơgop hăng ƀing ayăt ƀing ta kiăng pơblah hăng ƀing ta laih anŭn tơbiă đuaĭ mơ̆ng čar” 11Yua kơ anŭn yơh, ƀing mơnuih Êjip dưm ƀing khua wai lăng bruă kiăng ngă pơtơnap kơ gơñu hăng bruă kơtraŏ, brơi gơñu man plei Pithôm laih anŭn plei Ramse kiăng kơ ngă atông brơi kơ Pharaôn. 12Samơ̆ mơnuih Êjip jai ngă pơtơnap kơ gơñu dơ̆ pă, mrô mơnuih Israel jai đĭ kơtang hăng bă lar hyu dơ̆ anŭn mơ̆n. Ƀing mơnuih Êjip hwĭ kơ ană plei pla Israel. 13Anŭn yơh ƀing Êjip brơi ƀing ană plei pla Israel mă bruă gleh biă mă. 14Gơñu pơtơnap ƀing Israel hăng tơlơi gleh mă bruă luk lŏn, ngă lŏn čeh, laih anŭn djŏp mơta bruă amăng hmua. Abih bang bruă ƀing Êjip leng kơ brơi ană Israel ngă hăng tơlơi gleh glăn biă mă.
Pharaôn kiăng pơrai hĭ ană plei Israel
15Pơtao čar Êjip pơđar kơ ƀing đah kơmơi ƀuai mơnuih Hêbrơ, sa čô anăn HʼSipra laih anŭn anăn pô pơkŏn anăn gơ̆ HʼPuah. 16Ñu laĭ: “Tơdah ƀing gih mă ƀing đah kơmơi Hêbrơ tơkeng, tơdah ƀing gih ƀuh ƀơi kơƀang tơkeng jing ană đah rơkơi, brơi pơdjai hĭ ñu bĕ; tơdah đah kơmơi, brơi pioh ñu dŏ hơdip.” 17Samơ̆ ƀing đah kơmơi ƀuai hwĭ pơpŭ kơ Ơi Adai, ƀu ngă tui ôh tơlơi pơtao Êjip pơđar kơ gơñu; gơñu ăt pioh ƀing ană đah rơkơi dŏ hơdip. 18Pơtao čar Êjip iâu ƀing đah kơmơi ƀuai laih anŭn tơña gơñu: “Hyư̆m ƀing gih ngă tui anŭn lĕ? Yua hơgĕt pioh glaĭ ƀing ană đah rơkơi dŏ hơdip?” 19Ƀing đah kơmơi ƀuai laĭ glaĭ: “Yua kơ ƀing đah kơmơi Hêbrơ ƀu hrup hăng ƀing đah kơmơi Êjip ôh; gơñu jing kơtang biă mă laih anŭn tơkeng hlâo kơ ƀing đah kơmơi ƀuai truh”. 20Ơi Adai brơi tơlơi pap kơ ƀing đah kơmơi ƀuai; mrô mơnuih Israel đĭ lar laih anŭn gơñu jing hĭ kơtang biă mă. 21Yua kơ ƀing đah kơmơi ƀuai hwĭ pơpŭ kơ Ơi Adai, tui anŭn Ơi Adai brơi kơ sang gơñu hmâo dưi pơdrŏng đĭ. 22#Bruă 7:19.Pharaôn pơđar kơ abih bang ană plei pla ñu: “Brơi ƀing gih glŏm hĭ abih bang ană đah rơkơi Hêbrơ phrâo tơkeng amăng ia krong Nil, bơ kơ ană đah kơmơi pioh lui hơdip.”
Избрани в момента:
Tơlơi Tơbiă 1: JRA2016
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2016 United Bible Societies. All rights reserved.