Tơlơi Tơbiă 26
26
Rup Sang Khăn
(Tơb 36:8-38)
1“Brơi ih yua pluh blah khăn păng kơpal pioh ngă Sang Khăn. Bơnal mơñam hăng mrai hơbuă, mrai mơtah, mrai mriah huč laih anŭn mriah jŭ hmâo kơteh khul rup Čêrubim hăng bruă kơhnâo hiam. 2Abih bang khul bơnal anŭn leng kơ mơdơ̆ soh sel: Yong ñu pluh dua met, da ñu dua met. 3Rĭm kơ rơma blah bơnal pơgop glaĭ ñu jing sa per, rơma blah adih ăt kar kaĭ mơ̆n. 4Brơi ih akă khul gơwang hăng mrai mơtah ƀơi kơtuai bơnah kơ bơnal gah rơngiao hnal tuč kơ per bơnal tal sa; laih anŭn ăt ngă hrup hăng anŭn mơ̆n ƀơi kơtuai bơnah kơ bơnal hnal tuč kơ per bơnal tal dua. 5Laih anŭn ăt akă rơma pluh boh gơwang ƀơi bơnal tal sa laih anŭn rơma pluh boh gơwang ƀơi kơtuai bơnah bơnal hnal tuč kơ per bơnal tal dua; khul boh gơwang dua gah khŏm klă anăp tơdruă. 6Brơi ih ăt ngă mơ̆n rơma pluh boh kơnuĕ hăng mah, giơ̆ng anŭn guĕ khul mơnal pơgop glaĭ gơñu kiăng kơ Sang Khăn akă glaĭ jing ha sa.
7Brơi ih pơgop glaĭ pluh sa blah bơnal ngă hăng blâu bơbe kiăng ngă mơnal tap ƀơi ngŏ Sang Khăn. 8Abih pluh sa blah khăn leng hmâo mơdơ̆ kar kaĭ: Yong ñu hmâo năng ai klâo pluh met, da ñu năng ai dua met. 9Brơi ih pơgop glaĭ hĭ khul mơnal khăn anai jing hĭ dua per: Sa per rơma blah laih anŭn sa per năm blah; Samơ̆ khŏm lŏp hĭ jing dua mơnal tal năm ƀơi anăp sang khăn. 10Giơ̆ng anŭn ăt akă rơma pluh boh gơwang ƀơi kơtuai bơnah bơnal hnal tuč kơ per bơnal tal sa, laih anŭn rơma pluh boh gơwang ƀơi kơtuai bơnah bơnal blŭng hlâo kơ per bơnal tap tal dua. 11Ih ăt ngă rơma pluh boh kơnuĕ ngă hăng kong pơmŭt ñu amăng gơwang laih anŭn akă glaĭ dua per bơnal anŭn kiăng kơ sang khăn lir hĭ jing sa. 12Črăn rơbeh, jing sa mơkrah mơnal rơbeh kơ bơnal tap, či gom gah klon Sang Khăn. 13Yong kơ bơnal tap rĭm gah rơbeh năng ai ha mơkrah met či klŭp trŭn kiăng gom hĭ dua gah djeo Sang Khăn.
14Ih ăt ngă sa blah bơnal tap ngă hăng klĭ triu tơno añrŭ ia mriah laih anŭn sa blah mơnal ngă hăng klĭ akan hiam gom đĭ hăng ngŏ.
15Brơi ih pơdơ̆ng khul hnap hăng kơyâo akasi kiăng ngă pơnăng sang khăn. 16Rĭm pŏk hnap glong ñu năng ai pă met, da ñu năm pluh năm sentimet. 17Rĭm pŏk hmâo dua bluh truă kiăng kơ truă pơgop glaĭ khul hnap hrŏm hơbĭt. Abih bang khul pơnăng sang khăn ih leng kơ ngă kar hăng anŭn soh sel. 18Brơi ih ngă dua pluh pŏk hnap brơi kơ gah dơnŭng Sang Khăn; 19gah yŭ dua pluh pŏk hnap anŭn, brơi ih ngă pă pluh bluh truă ngă hăng prăk; gah yŭ rĭm pŏk hnap hmâo dua bluh truă krĭp hăng dua bluh truă, laih anŭn dua bluh truă gah yŭ kơ hnap tŏ tui či krĭp hăng dua boh bluh hnap tŏ tui klon. 20Brơi ih ăt ngă mơ̆n dua pluh pŏk hnap brơi kơ gah kơdư sang khăn, 21laih anŭn pă pluh bluh truă ngă hăng prăk, rĭm pŏk hnap hmâo dua bluh truă, laih anŭn hnap tŏ tui ăt hmâo dua bluh truă mơ̆n. 22Brơi ih ăt ngă mơ̆n năm pŏk hnap brơi gah yŭ kơ Sang Khăn. 23Laih anŭn ngă dua pŏk hnap brơi kơ dua akiăng gah klon Sang Khăn; 24Gơñu či dưi pơtŏ glaĭ hrŏm bĭt mơ̆ng gah yŭ truh pơ ngŏ hăng sa boh gơwang hăng glong kơ abih bang. Abih dua akiăng khŏm ngă tui anŭn soh sel. 25Tui anŭn, hmâo sapăn pŏk hnap laih anŭn pluh năm bluh truă ngă hăng prăk, gah yŭ kơ rĭm pŏk hnap hmâo dua bluh truă laih anŭn hnap tŏ tui ăt kar kaĭ mơ̆n.
26Ih ăt ngă khul kơyâo găn ngă hăng kơyâo akasi: rơma ƀĕ brơi kơ khul hnap dŏ gah anai kơ Sang Khăn; 27rơma ƀĕ brơi kơ khul hnap dŏ gah adih kơ Sang Khăn laih anŭn rơma ƀĕ pơkŏn dơ̆ng dŏ gah klon kơ Sang Khăn, jing gah yŭ. 28Kơyâo găn tơ̆ng krah, dŏ kơplah wah ha mơkrah hăng ngŏ kơ khul hnap, či truă mơ̆ng akŏ anai truh pơ akŏ gah adih. 29Brơi ih ăt lom hnap hăng mah laih anŭn ngă khul gơwang hăng mah kiăng kơ krơ̆ng djă kơyâo găn. Brơi ih ăt lom mơ̆n khul kơyâo găn hăng mah. 30Ih khŏm pơdơ̆ng sang khăn djơ̆ tui hăng rup Kâo hmâo kơčrâo brơi laih kơ ih ƀơi čư̆.
31Brơi ih ngă khăn păng hăng mrai hơbuă mơtah, mriah jŭ, mriah huč, hmâo kơteh khul rup Čêrubim hăng bruă kơhnâo hiam; 32yol hĭ khăn păng anŭn ƀơi pă ƀĕ tơmeh ngă hăng kơyâo akasi lom hăng mah, pơdơ̆ng ƀơi pă bluh tơmeh ngă hăng prăk; khul kơnuĕ tơmeh leng kơ ngă hăng mah. 33#Hêb 6:19; 9:3-5.Brơi ih ƀăk khăn păng anŭn ƀơi khul kơnuĕ, giơ̆ng anŭn ba Hip Kơnol Pơgop mŭt amăng lăm khăn păng. Khăn păng anai či djru ƀing gih thâo pơkah Anih Rơgoh hăng Anih Rơgoh Hloh. 34Brơi ih pioh kơhnơ̆p tơlơi pap ƀơi Hip Kơnol Pơgop amăng Anih Rơgoh Hloh. 35Brơi ih ăt pioh mơ̆n kơƀang gah rơngiao kơ khăn păng ƀơi gah kơdư Sang Khăn, laih anŭn pioh gơ̆ng apui kơđen pơklă anăp hăng kơƀang ƀơi gah dơnŭng sang khăn.
36Ƀơi bah amăng Sang Khăn brơi ih ăt ngă mơ̆n sa blah khăn păng hăng mrai mơtah, mriah jŭ, laih anŭn mriah huč, mrai hơbuă, hmâo kơteh laih hăng tơlơi bruă kơhnâo hiam; 37laih anŭn ih ngă brơi khăn păng anai rơma ƀĕ tơmeh ngă hăng kơyâo akasi lom hăng mah; khul kơnuĕ ñu ăt ngă hăng mah mơ̆n laih anŭn tuh brơi kơ ñu rơma bluh tơmeh ngă hăng kong.”
Избрани в момента:
Tơlơi Tơbiă 26: JRA2016
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2016 United Bible Societies. All rights reserved.