Tơlơi Tơbiă 36
36
1“Bêsalel, Ôhôliap laih anŭn ƀing kơhnâo bruă, Yêhôwa hmâo pioh laih amăng pran jua gơñu tơlơi kơhnâo rơgơi, laih anŭn tơlơi thâo hluh kiăng kơ ngă pơgiơ̆ng abih bang bruă pơdơ̆ng pơjing Sang Yang Rơgoh Hiam djơ̆ tui hăng khul tơlơi hơgĕt Yêhôwa hmâo pơtă laih.”
Ƀing Ană Plei Pla Israel Pơyơr hăng Pran Jua Čơmah
2Tui anŭn, Môis iâu Bêsalel, Ôhôliap laih anŭn abih bang ƀing mơnuih kơhnâo bruă Yêhôwa hmâo pioh laih amăng pran jua gơñu, hrŏm hăng ƀing mơnuih hmâo jua mĭn čong čiăng, kiăng kơ ngă bruă pơdơ̆ng sang khăn. 3Ƀơi anăp Môis, gơñu mă tŭ abih bang mơnơ̆ng pơyơr mơ̆ng ƀing ană plei pla Israel hmâo ba rai pơyơr brơi kơ bruă ngă Anih Rơgoh Hiam. Samơ̆, yua kơ rĭm mơguah ană plei pla ăt dŏ ba rai nanao pơ Môis mơnơ̆ng pơyơr hăng pran jua khăp, 4yua kơ anŭn yơh abih bang ƀing kơhnâo bruă hlăk dŏ ngă bruă Anih Rơgoh Hiam khŏm pơdơi hĭ bruă. 5Gơñu nao bưp Môis hăng laĭ “Ƀing ană plei pla ba rai lu rơbeh hloh kơ bruă Yêhôwa pơtă laih brơi ngă” 6Tui anŭn Môis khŏm pơtrŭn asăp kơ gơñu pơthâo brơi djŏp anih jưh: “Rơkâo kơ abih bang ƀing đah rơkơi ƀôdah đah kơmơi anăm pơyơr mơnơ̆ng hơgĕt dơ̆ng tah kơ bruă pơdơ̆ng pơjing anih rơgoh hiam.” Tui anŭn arăng khă pơgăn ƀing ană plei pla ba rai mơnơ̆ng pơyơr dơ̆ng tah; 7yua kơ gơnam gơñu pơyơr ƀu djơ̆ kơnơ̆ng kơ tum đôč samơ̆ rơbeh hloh dơ̆ng kơ abih bang bruă.
Pơdơ̆ng Sang Khăn
(Tơb 26:1-37)
8Amăng ƀing mơnuih mă bruă, đơ ƀing thâo ngă bruă leng kơ pơgop hrŏm pơdơ̆ng pơjing sang khăn. Gơñu mơñam pluh blah khăn păng hăng mrai hơbuă, mrai mơtah, mrai mriah jŭ, mriah huč, hmâo kơteh rup čêrubim hăng tơlơi bruă kơhnâo hiam biă mă 9Rĭm khăn păng glong năng ai pluh dua met, tơda ñu dua met; abih bang leng kơ hmâo hrŏm pơkă hơnơ̆ng kar kaĭ. 10Ñu pơklep rĭm rơma blah khăn păng hrŏm hơbĭt; 11akă gơwang hăng ia mơtah ƀơi gơnă khăn păng hnal tuč kơ grop khăn păng tal hlâo. Laih anŭn ăt ngă hrup anŭn mơ̆n ƀơi gơnă khăn păng blŭng hlâo kơ grop khăn păng tal dua. 12Gơñu kă rơma pluh boh gơwang ƀơi gơnă khăn păng tal hlâo laih anŭn rơma pluh gơwang ƀơi gơnă khăn păng hnal tuč kơ grop khăn păng tal dua; rĭm gơwang dŏ pơklă tơdruă. 13Gơñu ăt ngă rơma pluh kơnuĕ hăng mah, giơ̆ng anŭn guĕ glaĭ rĭm khăn păng kiăng kơ sang khăn pơklep hĭ jing sa.
14Gơñu ăt pơklep pluh sa blah khăn păng hăng blâu bơbe kiăng ngă mơnal gom ƀơi ngŏ sang khăn; 15Rĭm blah khăn păng glong năng ai pluh klâo met, tơda ñu năng ai dua met; amăng abih bang pluh sa blah khăn păng leng kơ hmâo pơkă hơnơ̆ng kar kaĭ. 16Gơñu pơklep rĭm khăn păng anai jing dua grop; sa grop rơma blah laih anŭn sa grop năm blah. 17Gơñu kă rơma pluh boh gơwang ƀơi gơnă khăn păng hnal tuč kơ grop khăn păng tal hlâo, laih anŭn rơma pluh boh gơwang ƀơi gơnă khăn păng tal hlâo kơ grop khăn păng tal dua. 18Gơñu ăt ngă rơma pluh boh kơnuĕ hăng kong kiăng guĕ dua blah khăn păng gom hrŏm hơbĭt kiăng ngă kơ sang khăn jing hĭ sa.
19Gơñu ăt ngă mơ̆n sa blah mơnal gom hăng klĭ triu tơno añrŭ ia mriah laih anŭn sa blah mơnal gom hăng klĭ akan hiam gom gah rơngiao.
20Gơñu pơdơ̆ng pơnăng sang khăn hăng kơyâo akasi. 21Rĭm pŏk hnap pơnăng glong năng ai pă met, tơda ñu năm pluh năm sentimet. 22Amăng rĭm pŏk hnap hmâo dua boh bluh pioh pơkĕ glaĭ abih bang hnap. Abih bang hnap pơnăng amăng Sang Khăn leng kơ ngă hrup hăng anŭn soh sel.
23Gơñu ngă pơnăng kơ sang khăn tui anai: dua pluh pŏk hnap brơi kơ gah dơnŭng; 24gah yŭ kơ dua pluh pŏk anŭn gơñu ngă pă pluh boh bluh hăng prăk, gah yŭ kơ rĭm pŏk hnap hmâo dua boh bluh kiăng djơ̆ hrŏm hăng dua boh akŏ truă laih anŭn dua boh bluh gah yŭ kơ sa pŏk hnap tŏ tui či djơ̆ hrŏm hăng dua boh akŏ truă hnap tŏ tui. 25Pơnăng gah adih, jing gah kơdư kơ Sang Khăn, gơñu ăt ngă dua pluh pŏk hnap mơ̆n, 26laih anŭn pă pluh boh bluh truă hăng prăk; gah yŭ kơ rĭm hnap leng kơ hmâo dua boh bluh truă, laih anŭn hnap tŏ tui ăt hmâo mơ̆n dua boh bluh truă. 27Pơnăng gah klon kơ sang khăn, jing gah yŭ; gơñu ngă năm pŏk hnap; 28Ƀơi dua akiăng gah klon kơ sang khăn gơñu ngă dua pŏk hnap. 29Dua pŏk hnap anŭn dưi pơklep hrŏm mơ̆ng yŭ truh pơ ngŏ, ƀơi gơwang tal sa. Abih dua akiăng ñu leng kơ ngă hrup anŭn. 30Yua kơ anŭn yơh, hmâo sa păn pŏk hnap laih anŭn pluh năm bluh truă hăng prăk gah yŭ rĭm pŏk hnap hmâo dua boh bluh truă. 31Gơñu ăt ngă mơ̆n khul kơyâo găn hăng kơyâo akasi: rơma ƀĕ brơi kơ khul pŏk hnap gah anai kơ Sang Khăn, 32rơma ƀĕ kơyâo găn kơ rĭm pŏk hnap gah adih kơ sang khăn laih anŭn rơma ƀĕ pơkŏn gah klon kơ Sang Khăn, jing gah yŭ. 33Gơñu ngă kơyâo găn tơ̆ng krah dŏ kơplah wah sa mơkrah gah ngŏ kơ rĭm hnap kiăng kơ kă mơ̆ng akŏ anai truh pơ akŏ gah adih. 34Gơñu lom hăng mah rĭm pŏk hnap laih anŭn ngă gơwang hăng mah kiăng krơ̆ng khul kơyâo găn; rĭm kơyâo găn ăt lom hăng mah mơ̆n.
35Gơñu ăt ngă mơ̆n sa blah khăn păng hăng mrai hơbuă, mrai mơtah, mrai mriah jŭ, mrai mriah huč, kơteh rup čêrubim hăng bruă kơhnâo hiam biă mă; 36Giơ̆ng anŭn pơdơ̆ng khul khăn păng hăng pă ƀĕ tơmeh ngă hăng kơyâo akasi lom hăng mah, rĭm kơnuĕ tơmeh ăt lom hăng mah mơ̆n laih anŭn tuh kia pă boh bluh truă hăng prăk kơ pă ƀĕ tơmeh anŭn.
37Gơñu ăt mơñam mơ̆n sa blah khăn păng bah amăng sang khăn hăng mrai hơbuă, mrai ia mơtah, mrai mriah huč laih anŭn mrai mriah jŭ hmâo kơteh laih hăng bruă kơhnâo hiam; 38Gơñu ăt ngă mơ̆n rơma ƀĕ tơmeh hmâo kơnuĕ giơ̆ng anŭn lom hăng mah rĭm akŏ tơmeh laih anŭn rĭm kơyâo găn klep hrŏm hơbĭt, bơ kơ rơma bluh tơmeh arăng ngă hăng kong.
Избрани в момента:
Tơlơi Tơbiă 36: JRA2016
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2016 United Bible Societies. All rights reserved.