Čơdơ̆ng Phŭn 17
17
Tơlơi Khăt Klĭ Jing Gru Kơnăl Kơ Kơnol Pơgop
1Tơdang Abram hmâo dua rơpăn pluh dua rơpăn thŭn, Yêhôwa pơrơđah rai kơ ñu laih anŭn laĭ: “Kâo jing Ơi Adai Dưi Kơtang; rơbat nao bĕ ƀơi anăp Kâo laih anŭn hơdip hiam klă hlom ƀom. 2Kâo či pơjing kơnol pơgop hăng ih, laih anŭn ngă brơi kơnŭng djuai ih lu jai.” 3Abram bon kŭp ƀơi lŏn. Ơi Adai laĭ kơ ñu: 4“Gah kơ Kâo, anai jing kơnol pơgop Kâo pơjing hăng ih: Ih či jing ơi adon kơ lu kơnŭng djuai. 5Arăng ƀu či iâu ih jing Abram#17:5 Abram kiăng pia: “ama hmâo tơlơi pơpŭ”. dơ̆ng tah, samơ̆ anăn ih či jing Abraham#17:5 Abraham kiăng pia: “ama kơ lu kơnŭng djuai”. yua kơ Kâo pơjing ih jing ama kơ lu kơnŭng djuai.#Rôm 4:17. 6Kâo či brơi ih tơkeng rai lu ană bă, mơ̆ng ih či hmâo rai lu djuai mơnuih, laih anŭn ƀing pơtao ăt či tơbiă rai mơ̆ng ih mơ̆n. 7Kâo či pơjing kơnol pơgop hăng ih laih anŭn hăng kơnŭng djuai ih mơ̆ng rơnŭk anai truh pơ rơnŭk pơkŏn; yua kơ anai jing kơnol pơgop hlŏng lar kiăng kơ Kâo jing Ơi Adai ih laih anŭn kơ kơnŭng djuai ih.#Luk 1:55. 8Kâo či brơi kơ ih hăng kơnŭng djuai ih lŏn ƀing gih hlăk dŏ ră anai, jing abih čar Kanaan, jing dram gơnam kơ ih hlŏng lar. Kâo či jing Ơi Adai gơñu.”#Bruă 7:5.
Phĕt Khăt Klĭ
9Ơi Adai laĭ kơ Abraham: “Ih pô hăng kơnŭng djuai ih khŏm djă pioh kơnol pơgop Kâo mơ̆ng rơnŭk anai truh pơ rơnŭk pơkŏn. 10Anai jing kơnol pơgop Kâo, tơlơi ƀing gih khŏm djă pioh, jing kơnol pơgop tơ̆ng krah Kâo hăng ih laih anŭn hăng ƀing kơnŭng djuai ih tơdơi anai; Anŭn jing abih bang ƀing đah rơkơi amăng ƀing gih khŏm tŭ tơlơi khăt klĭ.#Bruă 7:8; Rôm 4:11. 11Brơi ƀing gih khăt hĭ klĭ gom ƀơi akŏ dŏ añă đah rơkơi, anŭn či jing gru kơnăl kơ kơnol pơgop tơ̆ng krah Kâo hăng ƀing gih. 12Găn kơ lu rơnŭk mơnuih, abih bang ƀing đah rơkơi amăng ƀing gih, wơ̆t dah tơkeng rai amăng sang ƀôdah hmâo blơi mă hăng prăk mơ̆ng ƀing tuai, ƀu djơ̆ mơ̆ng kơnŭng djuai ih pô, tơdơi kơ hrơi tơkeng sapăn hrơi leng kơ khŏm tŭ tơlơi khăt klĭ. 13Mơnuih hmâo tơkeng rai amăng sang wơ̆t hăng mơnuih arăng hmâo blơi mă hăng prăk leng kơ khŏm tŭ tơlơi khăt klĭ. Tui anŭn, tơlơi kơnol pơgop Kâo ƀơi drơi jan ƀing gih či jing kơnol pơgop hlŏng lar. 14Đah rơkơi pă ƀu tŭ tơlơi khăt klĭ, kiăng laĭ ƀu khăt ôh klĭ gom akŏ dŏ añă đah rơkơi, arăng či puh pơđuaĭ hĭ ñu mơ̆ng ƀing ană plei pla, yua kơ pô anŭn hmâo ngă pơrai hĭ laih tơlơi kơnol pơgop Kâo.”
Ơi Adai ƀuăn pha brơi Isak kơ Abraham hăng HʼSara
15Ơi Adai laĭ kơ Abraham: “Bơ kơ HʼSarai, bơnai ih, anăm ih iâu ñu HʼSarai dơ̆ng tah yua kơ anăn ñu jing HʼSara.#17:15 HʼSara: Amăng tơlơi Hêbrơ boh hră anai kiăng pia: “hơbia”. 16Kâo či brơi tơlơi mơyun hiam kơ ñu, laih anŭn mơ̆ng ñu Kâo či brơi kơ ih sa čô ană đah rơkơi. Kâo či brơi tơlơi mơyun hiam kơ ñu, ñu či jing amĭ kơ abih bang djuai mơnuih; ƀing pơtao kơ ƀing djuai mơnuih leng kơ tơbiă rai mơ̆ng ñu.” 17Abraham tŏ tơŭt bon kŭp akŏ ƀơi lŏn, klao laih anŭn pơmĭn amăng pran jua: “Sa čô mơnuih hmâo sa rơtuh thŭn laih ăt dưi hmâo ană dơ̆ng mơ̆n hă? HʼSara hmâo dua rơpăn pluh thŭn laih ăt dưi tơkeng ană dơ̆ng mơ̆n hă?” 18Abraham laĭ kơ Ơi Adai: “Yua hơgĕt ƀu brơi Ismael jing hĭ pô tŏ tui kâo?” 19Ơi Adai laĭ: “Ƀu djơ̆ tui anŭn ôh, HʼSara, bơnai ih či tơkeng brơi kơ ih sa čô ană đah rơkơi, laih anŭn ih či pơanăn ñu jing Isak.#17:19 Isak: Boh hră anai amăng tơlơi Hêbrơ kiăng pia: “klao”. Kâo či pơjing tơlơi kơnol pơgop hăng ñu, jing tơlơi kơnol pơgop hlŏng lar brơi kơ kơnŭng djuai ñu. 20Bơ Ismael, Kâo či hmư̆ tơlơi ih iâu laĭ. Anai nê, Kâo či brơi tơlơi mơyun hiam kơ ñu, ngă brơi ñu hmâo lu ană bă. Ñu či jing ama kơ pluh dua čô ană pơtao, laih anŭn Kâo či ngă brơi ñu jing hĭ sa kơnŭng djuai prŏng. 21Samơ̆ Kâo či pơjing tơlơi kơnol pơgop hăng Isak, pô HʼSara či tơkeng brơi kơ ih ƀơi bơyan anai amăng thŭn pơ anăp.” 22Pơhiăp giơ̆ng, Ơi Adai đuaĭ hĭ mơ̆ng Abraham laih anŭn đĭ pơ adai.
23Hrơi anŭn mơtam, Abraham khăt klĭ brơi kơ Ismael, ană đah rơkơi ñu, hăng abih bang ƀing đah rơkơi, hmâo tơkeng laih amăng sang ñu ƀôdah hmâo blơi mă laih hăng prăk, djơ̆ kar hăng tơlơi Ơi Adai hmâo pơtă laih kơ ñu. 24Abraham hmâo dua rơpăn pluh dua rơpăn thŭn hlăk ñu tŭ tơlơi khăt klĭ; 25ană đah rơkơi ñu Ismael hmâo pluh klâo thŭn hlăk ñu tŭ tơlơi khăt klĭ; 26Abraham laih anŭn Ismael tŭ tơlơi khăt klĭ hrŏm amăng sa hrơi anŭn. 27Abih bang ƀing đah rơkơi pơkŏn, ƀing tơkeng rai amăng sang ƀôdah hmâo blơi mă hăng prăk mơ̆ng ƀing mơnuih tuai, leng kơ tŭ tơlơi khăt klĭ hrŏm hăng ñu.
Избрани в момента:
Čơdơ̆ng Phŭn 17: JRA2016
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2016 United Bible Societies. All rights reserved.