Čơdơ̆ng Phŭn 50
50
Tơlơi Dơr Yakôp
1Yôsep tơkui trŭn ƀơi ƀô̆ mơta ama ñu, ñu hia laih anŭn čŭm ama ñu. 2Yôsep pơđar kơ ƀing ơi ia jrao hlăk dŏ djru bruă kơ ñu, đăm drơi jan ama ñu hăng ia jrao ƀâu hiam, laih anŭn ƀing ơi ia jrao hmâo đăm laih drơi jan Israel. 3Gơñu khŏm ngă bruă anai amăng pă pluh hrơi, yua kơ anŭn jing khul hrơi brơi kơ bruă arăng đăm drơi jan mơnuih djai. Ƀing Êjip kơ-ŭ kơyăm kơ Yakôp amăng tơjuh pluh hrơi.
4Tơ khul hrơi kơ-ŭ kơyăm hmâo abih hĭ laih, Yôsep laĭ hăng ƀing khua moa amăng sang Pharaôn: “Tơdah kâo hmâo tơlơi pap ƀơi anăp ƀing gih, kâo rơkâo kơ ƀing gih laĭ hăng Pharaôn tui anai: 5Ama kâo brơi kâo khŏm ƀuăn rơ̆ng tui anai: ‘Anai nê, kâo jĕ či djai laih. Brơi ih dơr bĕ kâo amăng pơsat kâo hmâo ƀoh laih pơ čar Kanaan.’ Hnŭn yơh ră anai, brơi bĕ kâo nao pơ anŭn kiăng dơr ama kâo, giơ̆ng anŭn kâo či wơ̆t glaĭ.”#Čơd 47:29-31. 6Pharaôn laĭ: “Nao dơr bĕ ama ih tui hăng tơlơi ñu hmâo brơi ih ƀuăn rơ̆ng laih.”
7Tui anŭn, Yôsep nao pơ Kanaan kiăng dơr ama ñu. Nao hrŏm hơbĭt hăng ñu hmâo abih bang ƀing ding kơna Pharaôn, ƀing kong tha amăng sang pơtao, ƀing kong tha amăng čar Êjip, 8hrŏm hơbĭt hăng abih bang mơnuih amăng sang anŏ Yôsep, ƀing ayŏng adơi ñu, laih anŭn ƀing lơ̆m kơ sang anŏ ama ñu. Kơnơ̆ng ƀing ană anĕt, triu, laih anŭn rơmo ƀing gơñu đôč dŏ glaĭ amăng tring Gôsen. 9Hmâo dơ̆ng mơ̆n khul rơdeh aseh laih anŭn ƀing tơhan đĭ aseh nao hrŏm hơbĭt hăng ñu. Jing sa tơpul mơnuih lu biă mă yơh. 10Tơ gơñu truh pơ anih Atat prăh pơdai, gah ngŏ kơ ia krong Yurdan, gơñu ngă tơlơi čŏk hia hăng tơlơi rơngot hơning prŏng biă mă. Yôsep kơ-ŭ kơyăm kơ ama ñu amăng tơjuh hrơi. 11Ƀing Kanaan jing ƀing ană plei pla amăng čar anŭn, ƀuh tơlơi kơ-ŭ kơyăm amăng anih Atat prăh pơdai, gơñu laĭ: “Anai jing tơlơi kơ-ŭ kơyăm rơngot prŏng kơ ƀing Êjip.” Yua kơ anŭn yơh arăng iâu anih anai jing Abel Misram,#50:11 Abel Misram: Anăn anai hmâo dơnai arăng pơđok hrup hăng boh hră Hêbrơ kiăng pia jing “tơlơi kơ-ŭ kơyăm mơnuih Êjip”. gah ngŏ kơ ia krong Yurdan.
12Tui anŭn, ƀing ană đah rơkơi Yakôp hmâo ngă hĭ laih tui hăng tơlơi ama gơñu hmâo pơtă. 13#Bruă 7:16.Gơñu ba Yakôp ñu glaĭ pơ čar Kanaan, dơr ñu amăng par boh pơtâo ƀơi hmua Makpêla, jĕ Mamrê, anih Abraham hmâo blơi laih mơ̆ng Êprôn, mơnuih Hitit, pioh ngă anih dơr ƀing djai. 14Giơ̆ng kơ hmâo dơr laih ama gơñu, Yôsep hăng ƀing ayŏng adơi ñu hrŏm hơbĭt hăng ƀing mơnuih nao hrŏm hăng gơñu wơ̆t glaĭ hĭ pơ čar Êjip.
Yôsep Pơalum Ƀing Ayŏng Adơi Ñu
15Ƀing ayŏng Yôsep ƀuh ama gơñu djai, gơñu laĭ hăng tơdruă gơñu: “Hyư̆m ngă tơdah Yôsep ăt dŏ djă pioh pran jua hil kơ ƀing ta laih anŭn rŭ nua kơ khul tơlơi sat ƀing ta hmâo ngă laih kơ ñu?” 16Gơñu pơkiaŏ mơnuih nao laĭ kơ Yôsep: “Hlâo kơ djai, ama ih hmâo pơtă laih tui anai: 17‘Brơi kơ ƀing gih laĭ bĕ hăng Yôsep tui anai: Rơkâo kơ ih pap brơi bĕ khul tơlơi soh laih anŭn tơlơi sat ƀai ƀing ayŏng ih hmâo ngă laih tơdang gơñu kiăng ngă sat kơ ih.’ Tui anŭn, ră anai rơkâo kơ ih pap brơi bĕ kơ ƀing ding kơna kơ Ơi Adai ama ih.” Tơ hmư̆ khul tơlơi pơhiăp anŭn, Yôsep hia. 18Ƀing ayŏng ñu nao bon ƀơi anăp ñu laih anŭn laĭ: “Anai nê, ƀing gơmơi kơnơ̆ng jing ding kơna ih đôč” 19Samơ̆ Yôsep laĭ kơ gơñu tui anai: “Anăm ƀing gih hwĭ ôh! Hyư̆m ngă kâo dưi pơblih kơ Ơi Adai mơ̆? 20Ƀing gih pơmĭn kiăng ngă sat kơ kâo, samơ̆ Ơi Adai ngă brơi tơlơi anŭn jing hĭ tơlơi hiam, kiăng ngă bruă hiam hrup hăng tơlơi hlăk truh hrơi anai, anŭn jing kiăng pơklaih tơlơi hơdip lu mơnuih. 21Tui anŭn, anăm ƀing gih hwĭ ôh, kâo či čem rong ƀing gih laih anŭn ană bă ƀing gih.” Yôsep pơalum ƀing ayŏng ñu laih anŭn ñu yua boh pơhiăp tơdu rơun pơhiăp hăng ƀing gơñu.
Yôsep Djai
22Yôsep laih anŭn sang anŏ ama ñu dŏ hơdip amăng čar Êjip. Yôsep hơdip sa rơtuh pluh thŭn. 23Yôsep dưi ƀuh ƀing ană tơčo Êphraim truh pơ rơnŭk tal klâo, laih anŭn wơ̆t hăng ƀing ană Makir, ană Manasê, ăt hmâo tơkeng rai laih ƀơi tơŭt Yôsep.
24Yôsep laĭ hăng ƀing ayŏng adơi ñu: “Kâo giăm djai yơh, samơ̆ sĭt biă mă Ơi Adai či čuă ngui ƀing gih, atăt ƀing gih tơbiă mơ̆ng čar anai kiăng wơ̆t glaĭ pơ lŏn čar Ñu hmâo hơtŏm ƀuăn laih hăng Abraham, Isak, laih anŭn Yakôp.” 25#Tơb 13:19; Yôs 24:32; Hêb 11:22.Yôsep brơi ƀing ană Israel ƀuăn rơ̆ng tui anai: “Tơ Ơi Adai atăt ba ƀing gih nao pơ lŏn čar anŭn, brơi ƀing gih čơkung ba bĕ klang kâo mơ̆ng anai.” 26Tui anŭn, Yôsep djai, ñu hmâo dŏ hơdip sa rơtuh pluh thŭn. Arăng yua ia jrao ƀâu hiam đăm drơi jan ñu laih anŭn pioh hĭ ñu amăng sa boh bong amăng čar Êjip.
Избрани в момента:
Čơdơ̆ng Phŭn 50: JRA2016
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2016 United Bible Societies. All rights reserved.