Матфейица бицараб Рохалил хабар 14
14
14 бетӏер
Яхӏя аварагасул хвалил хӏакъалъулъ
1Гьеб заманаялда Галилеялъул ханлъун вукӏарав Гьеродида рагӏана Гӏисал хӏакъалъулъ. 2Гьес жиндирго нукарзабазда абуна:
– Яхӏя авараг ватизе ккола гьев, хваралъуса вахъун вачӏун, гьединлъидал гьес рихьизарулел руго гьел мугӏжизаталги.
3Гьев Гьеродица кквезеги ккун, рахсалги ран, гвандиниве рехун вукӏана Яхӏя авараг. Гьелъие сабаблъун ккана Гьеродил вац Филиппил йикӏарай чӏужу Гьеродиада. 4Яхӏяца гьесда абулеб букӏиндалха дуца гьей ячине бегьуларилан. 5Яхӏя чӏвазе бокьун букӏана Гьеродие. Амма халкъалъукьа хӏинкъана, киназго гьев авараглъун рикӏкӏунев вукӏиндал.
6Гьерод гьавураб къо кӏодо гьабулеб рохалилъ Гьеродиадал яс цее яхъун кьурдана. Гьелдаса разилъарав Гьеродица 7гьей ясалда гьедун абуна, дуе бокьараб сайигъат кьезе хӏадурав вугин, цӏар чӏвай дургоян. 8Эбелалъ малъун гьей ясалъ абуна, гьаниб гъадрида жаниб лъун, Яхӏя аварагасул бетӏер кьейилан. 9Хан пашманлъана. Амма гьалбадеридаги рагӏун гьедараб гьа хвезабизе бокьичӏого, кьейилан амру гьабуна гьес. 10Гвандиниве чи витӏун Яхӏял бетӏер къотӏизабуна Гьеродица. 11Гъадриниб лъун босун бачӏана бетӏер ва ясалъухъе кьуна, гьелъги жиндирго эбелалъухъе босун ана. 12Цинги Яхӏял муридаз гьесул жаназа, нахъеги босун, хабалъ букъана, ва лъугьа-бахъаралъул хӏакъалъулъ Гӏисада бицине ана гьел.
Гӏисаца щуазарго чи гӏорцӏизавула
13Гьеб хабар рагӏидал Гӏиса, росодаги рекӏун, гӏадан-чи гьечӏеб бакӏалде ана халкъалдаса ватӏалъун. Гьев аравлъи лъараб мехалъ шагьараздаса гӏадамал ракъдадасан ана гьесда хадур. 14Ракъдаде лъугьараб мехалъ Гӏисада гьениб бихьана гӏемераб халкъ. Гӏиса гьезда гурхӏана ва унтарал сахлъизаруна. 15Бакъанимех гӏагарлъулеб букӏана. Гӏисада аскӏоре рачӏун гьесул муридаз абуна:
– Гӏадан-чиго гьечӏеб бакӏ бугин гьаб, сордоги тӏаде щолеб бугин, нахъе айилан абе гьал гӏадамазда, росабалъе ун жидеего квен-тӏех босизе.
16Гӏисаца гьезда абуна:
– Гьел кирениги ине ккеларо. Нужеца кваназаре гьел.
17Муридаз абуна жидехъ щуго чедги кӏиго ччугӏаги гурони гьечӏилан.
18Гьеб жиндихъе босун рачӏаян абуна Гӏисаца гьезда. 19Харда тӏад гӏодор чӏаян гьел гӏадамаздаги лъазабун, Гӏисаца щуябго чедги кӏиябго ччугӏаги кодобе босана, зобалаздехун вуссун квантӏе дугӏа гьабуна ва бек-бекун муридазухъе кьуна. Гьезги гӏадамазе бикьана. 20Киналго гӏорцӏизегӏан кванана, нахъе хутӏарал кесказулги анцӏила кӏиго гьегь цӏезабуна. 21Руччабиги лъималги малъичӏого, щуазаргогӏанасев чи вукӏана гьенив.
Гӏиса лъеда тӏасан вилълъун вачӏуна
22Гьеб халкъ нахъе биччалалде Гӏисаца муридал ритӏана, росодаги рекӏун, ралъдал добцояб рахъалде цере-цере айилан.
23Халкъги нахъе биччан, Гӏиса живго цохӏо магӏарде вахана Аллагьасе гьари-дугӏаялъе. Маркӏачӏубер рукӏкӏараб мехалъги живго цохӏо гьенив вукӏана Гӏиса. 24Дозул раса хӏорил рагӏалдаса чанго километралъ рикӏкӏалъун букӏана. Данде гьури букӏун карачелаз раса хьвагӏезабулеб букӏана. 25Жеги хъахӏлъи рехилалдего ралъдал лъеда тӏасан вилълъун Гӏиса гьезда хадув ана. 26Лъеда тӏасан вилълъун вачӏунев гьесда бер чӏвайдал, муридал хӏинкъун хаган хутӏана. Хваразул рухӏ бугин гьебиланги абун, гӏемерго хӏинкъиялъ ахӏдезе лъугьана.
27– Дун вуго! Нуж расги хӏинкъуге! Къвакӏун чӏа! – ян ахӏана гьебсагӏат гьезде Гӏисаца.
28– Я, Бетӏерчӏахъад! Нижеда цеве вугев чи мун ватани, лъеда тӏасан дуда данде вачӏине амру гьабе диеги, – ян абуна Пётрица гьесда.
29– Вачӏа! – ян абуна Гӏисаца.
Росониса къватӏиве вахъун, лъеда тӏасан ун Гӏисада аскӏове щвана Пётр. 30Амма кутакаб гьури речӏчӏун бачӏунеб бихьун, гьев хӏинкъана, гъанкъизехъин вукӏана.
– Я, Бетӏерчӏахъад! Дун хвасар гьаве! – ян ахӏдана гьев Гӏисаде.
31– Ле иман дагьав инсан! Щай дур рекӏелъе щаклъи лъугьараб? – анги абун, гьебсагӏат квер бегьун ккуна Гӏисаца гьев.
32Гьел кӏиялго росонире лъугьиндал, гьури къатӏана.
33– Хӏакъикъаталдаги мун Аллагьасул Вас вуго! – ян, гьесие бетӏер къулана росода рукӏараз.
Геннесареталдаги сахлъизарула унтарал гӏадамал
34Добаб рагӏалдеги рахун гьел щвана Геннесареталъул ракьалде. 35Гьеб бакӏалъул гӏадамазда Гӏиса лъана. Гьев вачӏун вугилан тӏолабго сверухълъиялда лъазабизе чагӏи ритӏана. Киналго унтарал росун, рачун рачӏана гьесухъе. 36Дур гӏабаялъул гӏертелалда квер хъвазегӏаги тейилан гьарулеб букӏана гьез. Гьелда квер хъваралщиналги сахлъулел рукӏана.
Избрани в момента:
Матфейица бицараб Рохалил хабар 14: AvrNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Библия таржама гьабиялъул институт Москва 2008