Sɛ́aŋ 3
3
Nɛʼkodɛ́ɛm ayɛ́ɛ́n aboan Yə́sus na udúg
1Mɔɔd nyummú niiŋ lɛ́ Nɛʼkodɛ́ɛm ayɛ́ɛ mɔɔd nyɔ́ a ondáŋ ó Pafalɛsɛyɛ́ɛŋ. Ayɛ́ɛ tɛn a ondáŋ ó ponnom pó pɔɔd a nigúu nɛ́ Yúdɛn. 2A udúg wúmmú, ayɛ́ɛ́n aboan Yə́sus, náa ɔnɔ́ na nyɔ́lɛ́: «Kɛlág, tɛálɛŋ lɛ́ wɛ olɛ nyɔ́ Táán əyíím ádom lɛ́ yíim abɛyáaʼkananɛ pɛbán, lɛ́ mɔɔd na mɔɔd ɔdɛɔ́gɔ ogɛɛlɛ piə́wúunəniʼ pɛ́ pɛálɛ́ʼkán wɔnɔ́ pɛ́ɛb pɛ́ olɛɛ́ agɛɛlɛ ná Táán ɔdɛɔ́gɔ na nyɔ́lɛ́.» 3Yə́sus əyímuyúlísíni ɔnɔ́: «A fɔ́lɔ́b ndagodɛ́anɛ lɛ́ mɔɔd ɔdɛɔ́gɔ ogodála Nɛlaamɛʼ nɛ́ Táán ná ədiə́biə́nin kə́mmú kawa.» 4Náa Nɛʼkodɛ́ɛm ɔnɔ́ na nyɔ́lɛ́: «Tuə́ áa mɔɔd əə́ʼkulun náanɛ, ə́yiʼkini kəə́bíən əə́? Alɛ ogosɔd kə́mmú a kaadɛ ká ŋŋí, ná yíiʼkini kəə́bíən ə?» 5Yə́sus əyímuyúlísíni ɔnɔ́: «A fɔ́lɔ́b fɔ́lɔ́b ndagodɛ́anɛ lɛ́ mɔɔd ɔdɛɔ́gɔ ogosɔd a Nɛlaamɛʼ nɛ́ Táán ná ədiə́biə́nin a məní na a Uŋun wó Ufúlúʼtú. 6Nyɔ́ əmə́biə́níí a nɛ́ pɔɔd pə́əgəə́bíənə, alɛ mɔɔd. Nyɔ́ Uŋun ómɛ́ɛ́lɛ lɛ́ yə́bíən, alɛ wo Uŋun. 7Udiyə́wúnə́níí a wɔnɔ́ ná mbágodɛánɛ nyɔʼkɔ́: “Kíəguunə lɛ́ mɔɔd yə́bíən kə́mmú kawa.” 8Kigud kɛáfɛma kɛnɔ kɛ́ kɛ́anyɔ́ŋɛn. Waagoob ndum yəəŋ náa, odɛálɛŋ ə́lə́ə́ áa kɛ́lɛɛ́ əgiim kɛ́dɛ́ɛmɛn, ɔmbɔ́ lɛ́ ə́lə́ə́ áa kɛ́lɛɛ́ agɛɛn. Taa, náan tɛn aa kɛ́lɛɛ́ agaásan na ungim nyɔ́ Uŋun ómɛ́ɛ́lɛ lɛ́ yə́bíən.» 9Náa Nɛʼkodɛ́ɛm ɔnɔ́ na nyɔ́lɛ́: «Tuə́ áa kɛ́ɛg kɛ́lɛɛ́ kɛ́ kaáyɛ́ɛlɛ ə́?» 10Yə́sus əyímuyúlísíni ɔnɔ́: «Wɛ, ondɛŋɛn pɛbán pɛ́ɛb a! Wɛ nyɔ́ a Ɛ́sɛlayɛl, pámágoólɛŋ lɛ́ olɛɛ́ kɛlág kɛ́ kɛgóón á! 11A fɔ́lɔ́b fɔ́lɔ́b ndagodɛ́anɛ lɛ́, pəsi tɛlɛ agosɔyɔ nkə kɛ́ tɛálɛŋ. Tɛlɛ agodɛ́lɛm mbaasɔ́ a nkə kɛ́ tɛádála. Kɔmɔɛ́d lɛ́ pəŋi podɛɔ́gɔ anyɔ́ŋɛn kəə́liʼtini mbaasɔ́ yəəs. 12Pudiə́liʼtinini pɛbán pɛ́ a nsí pɛ́ ndɛɛ́ agobodɛ́anɛ, pɛ́ a mɔɛn anɛ́ɛ́n óoʼ, mbaʼkobodɛ́anɛ pɛ́lɛ́, puəgəə́liʼtini ə́? Ndóo. 13Mɔɔd na mɔɔd adɛ́mbág a mɔɛn a nó Táán, ná kɛ́sánɛn əgín lɛ́ Mɔɔ́n o mɔɔd nyɔ́ əyíím ə́suu kɔ́gɔ́ɔg! 14Wɔnɔ́ ná a nigúu nɛ́ nifələ́ə́n, Moyíis yɛɛ́dóŋ uʼkud ó kisúg kɛ́ pɔlɔ́ɔnsɛ a kingə́ŋ a mɔɛn#3.14 Kɛ́lɛ náan a kálaʼtaʼ yɛ Ɔmb 21.9 , náan tɛn aa kíəgəə́yúunə lɛ́ pádoŋ Mɔɔ́n o mɔɔd a kingə́ŋ a mɔɛn 15lɛ́ ná ungim nyɔ́ yaágɛ́nɛ́ɛ́ oʼto na nyɔ́lɛ́, yɛ́ɛn na ɔlaa ó pɛnɛŋ piim. 16Ɛɛ́ɛ, Táán yɛɛ́láŋ kɔnyɔ́ŋɛn pɔɔd pá a nsí yɛ́ɛnɛ, aábod amáboyɛ́ʼkɛn kɛmbóg kiə́ŋ kɛ́ Mɔɔ́n agɛɛlɛ lɛ́ ungim nyɔ́ amáág oʼto na nyɔ́lɛ́, ədingwú, yɛ́ɛn agá na ɔlaa ó pɛnɛŋ piim. 17Kɛ́lɛ lɛ́, Táán ədiʼkə́əgiim ádom Mɔɔ́n a nsí lɛ́ yíim ɔyɔmɛ pɔɔd, ndóo. Náa, ayɛ́moodóm lɛ́ yíim aboyɔ́ɔyɛ. 18Nyɔ́ amáág oʼto na Mɔɔ́n o Táán, pádɛámoyɛ́ʼkɛn nsɔ́ɔ́. Náa, nyɔ́ adɛágɛnɛɛ́ oʼto na nyɔ́lɛ́, nyóon aándɛ na nsɔ́ɔ́ lɛ́ adɛʼkáyaág oʼto na kɛmbóg kɛ́ Mɔɔ́n o Táán. 19Ɛgom yɛ́ ígódíí pɔɔd wɔnɔ́ póob aa yɛ́ɛnɛ ɛ́lɛɛ́ lɛ́: Kɛmoámoáŋ kíyíím a nsí, pááság kaásoŋ agá mbin agaáyɛn kɛ́lɛ́ lɛ́ pɛbán pɛɔ́bɔn pɛ́ páyɛ́ɛ agɛɛlanɛ pɛ́yɛ́ɛ pɛbɛ́. 20Kɛ́lɛ lɛ́, mɔɔd ungim nyɔ́ alɛɛ́ agɛɛlanɛ kɔbɛ́, aabɛnɛn kɛmoámoáŋ, adɛágaáyɛʼtɛnɛ kɛnɔ kɛ́ kɛ́lɛɛ́ lɛ́ aadammana lɛ́ pɛbán piə́ŋ pɛ́ pɛbɛ́ pɛ́alon táán. 21Kɔmɔɛ́d lɛ́ nyɔ́ alɛɛ́ əguyə́ən pasáád, agɛɛn kɛnɔ kɛ́ kɛmoámoáŋ kɛ́lɛɛ́ lɛ́ ná pádála moááŋ lɛ́ nkə kɛ́ alɛɛ́ agɛɛlɛ kɛ́lɛ a unuʼ úmmuʼ na Táán.»
Sɛ́aŋ Ɔsɔgɛnaʼ pɔɔd pɔ́lɛ́ ná Yə́sus
22A ngim yɛ́ɛy, Yə́sus aáság kɛɛn a nigúu nɛ́ Siudə́ə na paaʼkan pə́ə́ŋ. Ayɛ́ɛ́lɛ kɔ mayaa má mədúg na pɔ́lɛ́, aágɛɛ́ʼkɛnan pɔɔd ɔsɔgɛn. 23Sɛ́aŋ ayɛ́ɛ tɛn agosɔgɛna pɔɔd a kɛnɔ kímmú pɔ́ɔdɔ́ŋɔn lɛ́ Ɛnɔ́ɔn, ndúmiʼ na Səlíim lɛ́ məní máyɛ́ɛ a kɛnɔ kɛ́ɛg miíŋ. Pɔɔd páyɛ́ɛ agɛɛnan kɔ, aáboósɔgɛna. 24Páyɛ́ɛ pə́díʼkumin Sɛ́aŋ agomoyáág a yoog yɛ njaan a kɛnɛŋ kɛ́ɛg. 25Ɛyaa yɛ́ ɔsáŋ yíídə́əŋ kɔ lɛ́ na paaʼkan pá Sɛ́aŋ na sɔ́g mɔɔ́n ó Yúdɛn nyummú wɔnɔ́ pɔ́lɛ́. Óyɛ́ɛ a oʼto ó pɛbán pɛ́ kəə́fúŋi nkó wɔnɔ́ a mandoŋá mɔ́ɔ́bɔn. 26Pááság kɛɛn aboan Sɛ́aŋ, náa pɔ́nɔ́ na nyɔ́lɛ́: «Kɛlág, adɛ́ olɛ agaáyɔ́ɔ́ŋɛ mɔɔd nyóon nyɔ́ poyɛ́ɛ kága na nyɔ́lɛ́ nsɛ́ɛ́ ɛ noom nó Siuludɛ́ɛŋ a? Nyɔ́ wɛɛ́dɛ́lɛ́mɛn mbaasɔ́ á? Taa, alɛ agosɔgɛna tɛn pɔɔd kə́gə́ən. Ungim aándagɛɛnan əgín kɔ́gɔ́ɔg ná alɛɛ́.» 27Sɛ́aŋ əyíbuyúlísíni ɔnɔ́: «Mɔɔd ɔdɛɔ́gɔ ogaábaaŋɛ a yoom, ná Táán adɛmoyɛ́ʼkɛnɛn yɛ́lɛ́. 28Pəŋibáamɔɛ́d polɛ págodɛ́lɛm mbaasɔ́ poɔʼkɔ́ nyiísə́ə́ lɛ́: “Mɛ, ntɛɔ́gɔ Məsíi, náa ndɛ nyɔ́ pɛ́ɛ́yáŋ adom yuudi na nyɔ́lɛ́#3.28 Kɛ́lɛ náan a kálaʼtaʼ ɛ Məl 3.1. Pódála tɛn a yɛ́ɛnɛ 1.20 ” 29Mɔɔd nyɔ́ aágóan ɔʼkɛ́ɛd, nyɔ́lɛ́ aa alɛɛ́ onom wo ɔʼkɛ́ɛd. Sɔ́sɔ́g wəəŋ alɛ agá lɛ́ ádɛ́lɛm a ɛbá yə́ə́ŋ, yóób nkə kɛ́ alɛɛ́ əgusəə. Aanyɔ́ga lɛ́ alɛ agoob nɛŋo nɛ́ onom wo ɔʼkɛ́ɛd. Táá tɔnyɔ́g tóam aa tóod. Túyə́ə́gín na mɛ a ɔʼtɛ́m síɛ́ɛ́d. 30Kíəguunə lɛ́ nyɔ́lɛ́ aa ə́ʼkuŋií, mɛ ndáasɔɔ.»
Nyɔ́ alɛɛ́ əgiim a mɔɛn
31«Sɔ́g nyɔ́ alɛɛ́ əgiim a mɔɛn, amááyɛn ungim. Nyɔ́ alɛɛ́ lɛ́ alɛ wo nsí, alɛ o pɛbán pɛ́ a nsí, ɔɔsɔyɔ tɛn pɛbán pɛ́ nsí. Nyɔ́ alɛɛ́ əgiim a mɔɛn, 32alɛ adɛ́lɛm a mbaasɔ́ yɛ nkə kɛ́ aádála, na nkə kɛ́ amóób. Kɛbán kímuʼ, mɔɔd na mɔɔd alɛ ədimuyə́líʼtíníí. 33Nyɔ́ əmə́líʼtíníí mbaasɔ́ yəəŋ, oóloodi moááŋ a nyóon lɛ́ nkə kɛ́ Táán əə́səə kɛ́lɛ fɔ́lɔ́b. 34Táán ayɛ́ʼkɛn Uŋun wó Ufúlúʼtú a fug na nyɔ́ əyíím ádom. Tɔgɛ́ɛ́ tó Táán áa alɛɛ́ əgusəə. 35Sɛ alɛ anyɔ́ŋɛn Mɔɔ́n, amámoyɛ́ʼkɛn toɛn a moom muim. 36Nyɔ́ amáág oʼto na Mɔɔ́n, nyóon alɛ na ɔlaa ó pɛnɛŋ piim. Nyɔ́ aásáŋɛ́nɛ kaag oʼto na Mɔɔ́n, nyóon adɛndɛ́ɛ́ kɛɛn na ɔlaa wóow. Ilúún ɛ́ Táán íligi əgín a nkó yəəŋ.»
Избрани в момента:
Sɛ́aŋ 3: yatDBL
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Wycliffe Bible Translators Inc, 2015