LÓʼKAS 24
24
Yə́sus ayóndɛg
(Maʼt 28.1-10; Mə́l 16.1-8; Sɛ́a 20.1-10)
1Na pɛbáŋɛn pɛ́ koany kó a wɔɔ́s ó na oʼto na oʼto ó sɔ́ndɛʼ, pagɛ́ɛd páyɛ́ɛ́n a kəəniʼ na pugúd pó píísóbóni. 2Pɛ́ɛ́bóan lɛ́ nɛdáán nɛ́ píígúb unuʼ ó kəəniʼ na nɛ́lɛ́, nɛándɛ nimíngílídiə́n a ɛbá. 3Pááság kosɔd kɔ a kəəniʼ. Pádɛʼkáaboan kɛlóŋ kɛ́ Sə́dúk Yə́sus kɔ. 4Nto yɔɔbɔn yaáság koyog. Pálɛ anɛ́ɛ́n kɔ náan a, pɔɔd pábaan pááság kobolónɛn, pilə́ə́ pɛɔ́bɔn pɛ́yɛ́ɛ əguwəŋə kuwəŋə́ə́n. 5Wɛɛ́y úyíbugúmin, pááság kudum nti yɔɔbɔn a nsí. Náa pɔɔd póob pɔ́nɔ́ na pɔ́lɛ́: «Tuə́ áa puə́giim əguunə káanɛ a ondáŋ ó pɛlóŋ mɔɔd nyɔ́ alɛɛ́ ongóm? 6Táá, əndigi áanɛ, amóndɛg. Áyɔ́ŋɛ́an nkə kɛ́ ayɛ́bodɛánɛ ná ayɛ́ɛ a Kalilə́ə. 7Yiísə́ə́ lɛ́: “Kɛ́anyɔ́ŋɛn lɛ́ pálɛg Mɔɔ́n o mɔɔd a ɔmbɔg á pɛɛlɛ mabɛ́, pámoóbaŋan a ɔmbásá, ə́gu, ná yíim yóndɛg a mɔɔ́s mádáád.” » 8Áay aa páyáyóŋɛ́ɛ́ anɛ́ɛ́n nkə kɛ́ Yə́sus ayɛ́bodɛánɛ. 9Pə́yíím pálon a kəəniʼ, pááság kuúli agɛɛn adɛ́anɛ na pɔɔ́n pá maʼtom pá pówád na úmmuʼ, na paaʼkan tɛn piim, nkə kɛ́ɛg kɛ́ pɛ́ɛ́dála. 10Páyɛ́ɛ lɛ́ na Malɛ́a ntóón ɛ Magdala, na Yowánaʼ, na Malɛ́a wo ŋŋí ɛ Sɛ́ag. Pagɛ́ɛd pə́mmú tɛn pá páyɛ́ɛ kɔ na pɔ́lɛ́, pɛ́dɛánɛ na pɔɔ́n pá maʼtom əgín yoom ɛgo ímuʼ. 11Náa, pɔɔ́n pá maʼtom pə́diʼkə́əgəə́liʼtini nkə kɛ́ pagɛ́ɛd póob páyɛ́ɛ əgusəə. Pɔ́lɛ́ páyɛ́ɛ afɛga lɛ́ pálɛ agosɔyɔ tɔgɛ́ɛ́ tó pɔɔd pá nto yɔɔbɔn yaáʼkolɛáŋɛ́ɛ́. 12Ɔmbɔ́ náan, Píɛ aáság kodɛ́ɛmɛn, amɛ́ɛn a kəəniʼ na ɔʼtɛ́d. Ná ayɛ́ɛ́n əgiig kɔ, yɛɛ́bódɛm agá agofɛ́bɛna. Əgín mbɔ́m na mbɔ́m áa yɛɛ́dála kɔ. Əyúúli a noádɛʼ ɔmbɔg a oʼto, əə́gəə́wúunəni na nkə kɛ́ kɛ́yásánɛ́ɛ́.
Yə́sus yɛɛ́lónɛn paaʼkan pə́ə́ŋ pábaan a ngə́ ɛgɛɛn a Ɛmayúus
(Mə́l 16.12-13)
13Náan aa wɔɔ́s ogo wóow, paaʼkan pábaan páyɛ́ɛ agɛɛn a ɛyaa ɛ́ nigúu yímmú pɔ́ɔdɔ́ŋɔn lɛ́ Ɛmayúus. Nigúu nɛ́go nɛ́ɛn nɛ́yɛ́ɛ laálá na Yolósalɛm, náanɛ wɔnɔ́ áwaʼ ɛ́baan yɛ ongɛn. 14Əgín pɛbán pɛ́ pɛ́yásánɛ́ɛ́ a mədúg móom aa páyɛ́ɛ əgiim pɔ́sɔyɔ na ngə́ na ngə́. 15Pálɛ anɛ́ɛ́n kɔ əgiim pɔ́ɔ́cɔcɔb náan a, Yə́sus nyɔ́lɛ́nyɔ́amɔɛ́d aáság kiim əbugóʼki lɛ́ pádáŋananɛ ondáŋ. 16Páyɛ́ɛ agomodɛ́ʼtɛg, náa yoom ɛgo yáaboyɛ́ɛlɛ lɛ́ pádɛndɛ́ŋ lɛ́ nyɔ́lɛ́ aa alɛɛ́nɔ.
17Aáság kubuŋíən ɔnɔ́ na pɔ́lɛ́ əə: «Kɛbán igə aa polɛɛ́ əgiim pósɔyɔ náan na ngə́ na ngə́ ə́?» Pááság kodɛ́lɛm, nti suúúm. 18Náa sɔ́g nyummú, niiŋ lɛ́ Kɛlɛyoʼpáas, əə́muyúúlisini ɔnɔ́: «A pɔɔd piim pá a Yolósalɛm, əgín wɛɛ́nyɔ́əsíŋ áa odɛálɛŋɛɛ́ nkə kɛ́ kɛ́yásánɛ́ɛ́ a mədúg móonɛ yi?» 19Náa ɔnɔ́ na pɔ́lɛ́: «Nkə aa kɛ́yásánɛ́ɛ́ ə́?» Pááság kumuyúlisini pɔ́nɔ́: «Nkə kɛ́ kɛ́yáyɛ́lɛ́ɛ́ na Yə́sus mɔɔ́n ó Násalɛd a! Ayɛ́ɛ ɔndɔɛgɛʼ pɛbán o Táán o toɛn. Yiílóódi nkə kɛ́ alɛɛ́ a əngis á Táán na a əngis á pɔɔd, a tɔgɛ́ɛ́ tó ayɛ́ɛ agosɔyɔ, na a pɛbán pɛ́ ayɛ́ɛ agɛɛlɛ. 20Puʼkúm pó payaaganɛʼ pɛfɔny na palaamɛʼ pə́ə́s páyɛ́moólɛ́g lɛ́ ná pábaasɛ kɛbán kiə́ŋ lɛ́ páamoyóon, pámáamoóbaŋan a ɔmbásá. 21Pəsi tɛyɛ́ɛ tɛándaamɛna pɛda na nyɔ́lɛ́ lɛ́, nyɔ́lɛ́ aa alɛɛ́ mɔɔd nyɔ́ aágaáŋɛn Ɛ́sɛlayɛl. Náa mɔɔ́s mádáád áa móonɛ tɛándɛɛ́ a mɔ́lɛ́ wɔnɔ́ ná pɛbán pɛ́ɛb pɛ́yásánɛ́ɛ́. 22A fɔ́lɔ́b, tɛmáwándáá na ngab ɛ pagɛ́ɛd yimmú a ondáŋ wə́ə́s. Pámɛ́ɛn a kəəniʼ na pɛbáŋɛn pɛ́ koany, 23pámboanɛn kɛlóŋ, pááság kimbuúlini əgiim abɛdɛ́anɛ lɛ́ məŋun má maʼtom mámábolónɛn kɔ, mááság kobodɛ́anɛ lɛ́ alɛ ongóm. 24Pɔsɔ́sɔ́g pə́ə́s tɛn pə́mmú pámɛ́ɛn kɔ a kəəniʼ, pááboan pɛbán piim əgín wɔnɔ́ ná pagɛ́ɛd póob páyɛ́bɛdɛánɛ, pámboanɛn kɛlóŋ kiə́ŋ.»
25Yə́sus aáság kusəə ɔnɔ́ na pɔ́lɛ́: «Podɛɔ́gɔ na oʼto! Podɛɔ́gɔ əgəə́bisig kəə́liʼtini nkə kiim kɛ́ palɔɛgɛʼ pɛbán pá Táán Píísə́ə́! 26Kɛ́dɛʼkɛ́ɛ lɛ́ Məsíi áyaŋ anɛ nto ná ə́díin ɔsɔd a nugəm nuə́ŋ ə́?» 27A ngim yɛ́ɛy anɛ́ɛ́n áa ayɛ́boyásɛ́nan nkə kiim kɛ́ kíyə́sə́líí a oʼto wə́ə́ŋ, a Kálaʼtaʼ ɛ Táán, kəə́bə́ə́ a nkə kɛ́ Moyíis yiídílə, kɛɛnanan a nkə kɛ́ palɔɛgɛʼ pɛbán pá Táán píísə́ə́.
28Ná páyɛ́ɛ pándɛ ndúmiʼ na nigúu nɛ́go nɛ́ páyɛ́ɛ agɛɛn a nɛ́lɛ́, Yə́sus aáság kɛɛlɛ wɔnɔ́ nyɔ́lɛ́ alɛ agɛɛn kə́mmú yuudi na ongɛn. 29Pááság komoyɛ́ɛlɛ lɛ́ adɛsán, pɔ́nɔ́ na nyɔ́lɛ́: «Niób nɛándɛ kɔ, kɛnɛŋ sɔɔŋ mbin ídə́əŋ, lɔb na pəsi.» Aáság kosɔd əguləndin na pɔ́lɛ́. 30Ná páyɛ́ɛ pə́ʼkuləndin agonɛ́ɛnɛ, Yə́sus aáság kudə́əmini pɛlɛ́ɛd, amɛ́ʼkɛn pisoyidiʼ na Táán, aábɛ́ŋa, amáboyɛ́ʼkɛn. 31A kɛnɛŋ kɛ́ɛg aa əngis yɔ́ɔ́bɔn ə́yə́buə́níí, pááság komoólɛŋ. Náa, nyɔ́lɛ́ aáság kusə́ngilid a əngis yɔ́ɔ́bɔn. 32Pə́ə́bə́ə́ kosɔyɔ kɔ pɔ́lɛ́ na pɔ́lɛ́, pɔ́nɔ́: «Adɛ́ a ntɛ́m yəəs a kaadɛ, tɛyɛ́ɛ wɔnɔ́ tígu tɔnyɔ́g kɛnɛŋ kɛ́ ayɛ́ɛ agosɔyɔ na pəsi a ngə́, aábɛyásɛnan nkə kɛ́ kɛ́lɛɛ́ a Kálaʼtaʼ ɛ Táán á?»
33Pááság koság kodɛ́ɛmɛn əguúlini a Yolósalɛm. Pɛ́ɛ́bóan paaʼkan pá pówád na úmmuʼ, na pɔsɔ́sɔ́g pɔ́ɔ́bɔn kɛnɔ kɛ́ páyágɔnyɛdɛn, 34pɔ́ɔsɔyɔ pɔ́nɔ́: «Sə́dúk alɛ ongoóndɛ́gáán fɔ́lɔ́b! Omólódíí na Simɔ́ɔŋ.»
35Pɔ́lɛ́ tɛn pááság kobodɛ́ananɛ nkə kɛ́ kɛ́másánɛ́ɛ́ na pɔ́lɛ́ a ngə́, na wɔnɔ́ ná pə́míim agaálɛŋ lɛ́ nyɔ́lɛ́ aa alɛɛ́nɔ a kɛnɛŋ kɛ́ aábɛ́ŋa pɛlɛ́ɛd.
Yə́sus yɛɛ́lónɛn paaʼkan pə́ə́ŋ pá pówád na úmmuʼ
36Pálɛ anɛ́ɛ́n agosɔyɔ kɔ ɔ, Yə́sus nyɔ́lɛ́nyɔ́amɔɛ́d foáy, aáʼkodɛ́lɛm a kɛgaágadɛ kɛɔ́bɔn, ɔnɔ́ na pɔ́lɛ́: «Kiwiiyiʼ kíɛn na pəŋi aá!» 37Wɛɛ́y úyíbugúmin, pə́əliminə kwag kwag kwag, páyɛ́ɛ agofɛg lɛ́ kiíd áa kɛáʼkobolónɛnɛɛ́. 38Ayɛ́bodɛánɛ ɔnɔ́ na pɔ́lɛ́: «Tuə́ áa polɛɛ́ náan, poágaáwánda? Polɛ na musuŋ a ntɛ́m yaaŋan a? 39Táláan ɔmbɔg yáam, na ambaan yáam. Mɛ áa ndɛɛ́nɔ! Ɛ́ʼtɔ́bɔ́ɔn ná pódála lɛ́ kiíd kíʼkóodi pumog, kɛ́diɛn na pigú wɔnɔ́ ná mɛ nkódíí.» 40Ná yiísə́ə́ náan, aáság kubuúloodi pufə́ŋ pó óndoʼ a ɔmbɔg na a ambaan yə́ə́ŋ. 41Wɔnɔ́ ná páyɛ́ɛ ntɛ́m na tɔnyɔ́g síɛ́ɛ́d, pə́əgəə́wúunəni, páyɛ́ɛ pádɛ́mman kəə́liʼtini. Náa ɔnɔ́ na pɔ́lɛ́: «Puʼkóodi yoom ɛ́ konɛ áay a?» 42Pááság komoyɛ́ʼkɛn kɛsom kɛ́ nsú kɛ́ kɛmoaŋɛ́náán. 43Aáság kusiəd, aánɛ́ a əngis yɔ́ɔ́bɔn.
44Náa ɔnɔ́ na pɔ́lɛ́: «Táá nkə kɛ́ njɛ́bodɛánɛ aa kɛ́ɛnɛ ná njɛ́ɛ nkə́ligi na pəŋi, nyɔʼkɔ́: Nkə kiim kɛ́ kíyə́dílə́ə́ a pɛcɛm pɛ́ Moyíis, na a pagálaʼtaʼ pá palɔɛgɛʼ pɛbán pá Táán, na a kálaʼtaʼ ɛ pɛʼkwáá a kidíídí kɛ́am, kígóódi lɛ́ kɛ́as.» 45Áay aa əyíbubúən nsiŋ agɛɛlɛ lɛ́ póob pɛbán pɛ́ pɛ́lɛɛ́ a Kálaʼtaʼ ɛ Táán. 46Aáság kusəə ɔnɔ́ na pɔ́lɛ́: «Táá nkə kɛ́ kɛ́lɛɛ́ kidiídílə́ aa kɛ́ɛnɛ lɛ́: Məsíi ogóódi lɛ́ ánɛ ntɔ́b, ə́gu ná a mɔɔ́s mádáád, yíiʼkini kiim álon a kəəniʼ ongóm#24.46 Pódála tɛn náan a kálaʼtaʼ yɛ Ɛsa 53; Osə́ 6.2 47A niiŋ niə́ŋ, a nsí ngim, kəə́bə́ə́ a Yolósalɛm, pálɛ́ɛ́ kolɔɛgɛ lɛ́ pɔɔd págasɛ ɔlaa wɔ́ɔ́bɔn ná Táán ə́buúlisin mabɛ́ mɔ́ɔ́bɔn. 48Pəŋi aa polɛɛ́ wɛ́sɛnɛg a nkə kɛ́ɛg kiim. 49Mɛ, ndəəgiim mpodómɛn nkə kɛ́ Mbáa ayɛ́bogágɛn. Kɛbán kímuʼ, pudinyúúd pólon agosan, pólɔb áanɛ a pálɛ́ɛg yɛ́ɛnɛ, súʼtə́ə́ ná toɛn tó tólɛ́ɛ́ kubuyíminií a mɔɛn túəgiim.»
Yə́sus yɛɛ́bág a mɔɛn
(Mə́l 16.19-20; Pig 1.9-11)
50Yə́sus aáság kolon pálɛ́ɛg na pɔ́lɛ́ agɛɛn ndúmiʼ na Pɛʼtaníi. Yiídə́ə́míni ɔmbɔg a mɔɛn, aáság kobosɛ́a. 51Alɛ anɛ́ɛ́n agobosɛ́a a, kaádanan koɔ́bɔn a kóog, əə́bə́ə́ kobag a mɔɛn. 52Náa a pɔ́lɛ́, ná páyɛ́ɛ pə́ʼkumudúmin əndu a udi, pááság kuúlini a Yolósalɛm na tɔnyɔ́g tuim. 53Páyɛ́ɛ pɛnɛŋ piim a Tɛ́mpɛl, páanyáadɛ Táán.
Избрани в момента:
LÓʼKAS 24: yatDBL
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Wycliffe Bible Translators Inc, 2015