Lik Ejiptơ 13
13
Ơn Yàng in kòn klau tơnhoa
1Yàng Jehôwa đơs mơ Môise lah: 2#Khà 3:13; Luk 2:23.“Ơn tĕ Añ in kòp nă kòn klau tơnhoa hala kòp nơm phan poan jơng dam deh sơnròp. Kòp nă kòn sơnròp tòm làng bol Israel gơrê bal mơ Añ, bulah kòn mơnus hala phan poan jơng kung behơ̆ sơl.”
3Gen Môise đơs mơ làng bol lah: “Prap kah tĕ kirsơnre ngai do, la ngai bol mê lik klàs bơh di Ejiptơ, lik klàs bơh di lơgar ơm dĭ, tài bơh Yàng Jehôwa neh ngui tê gơnoar pràn tă bol mê lik klàs bơh hơ̆. Bañ sa phan lơi gơs kañ. 4Ngai do, di kơnhai Abip,#13:4 Kơnhai Abip La kơnhai dùl jat sră cih kơnhai cau Juda, hơ̆ la pơgap digùl kơnhai pe tus digùl kơnhai poan cau «Tây» dê. bol mê lik lòt. 5Tòm tŭ Yàng Jehôwa cèng bol mê mut lơgar làng bol Kanaan, làng bol Hetit, mơ làng bol Jebusit, la lơgar mơ Kơnràñ neh srat să ho nền mơ ồng pàng bol mê dê rơp ai bol mê in, la lơgar gơhòr bềng lìu dà toh mơ dà lơwe, gen bol mê pal kah prap bơta pơjum duh khoai tòm kơnhai do. 6Tòm poh ngai pal sa piang lă ò gơs kañ; tus di ngai poh pal gơs bơta pơjum sa duh khoai Yàng Jehôwa. 7Pal sa piang lă ò gơs kañ tòm poh ngai hơ̆; digùl bol mê bañ gơs phan lơi gơs kañ, kung bañ gơs kañ di tiah lơi tòm dơlam nhàr lơgar bol mê dê. 8Tòm ngai hơ̆ yal tĕ kòn klau bol mê in lah: ‘Añ lơh behơ̆ tài bơh bơta Yàng Jehôwa neh lơh añ in tòm tŭ añ lik lòt bơh di Ejiptơ.’ 9Bơta kah prap do rơp lơh gơs dô nơm tềl sơnio di tê mê, lơh gơs dô bơta tơngkah wơl di bìng liang mê dê la bơta boh lam Yàng Jehôwa di ơm di bơr bol mê, bơh Yàng Jehôwa neh ngui tê gơnoar pràn tă tơlik bol mê klàs bơh Ejiptơ. 10Kòp nam di di tŭ neh lơh nền, bol mê pal kah prap bơta sồr lam do.”
Bơta Ơn Kòn Tơnhoa
11“Tơnơ̆ mơ tŭ Yàng Jehôwa neh cèng bol mê mut tòm lơgar Kanaan mơ ai lơgar hơ̆ bol mê in jat be Kơnràñ neh srat să ho nền mơ bol mê bal mơ ồng pàng bol mê dê, 12#Lik 34:19-20; Luk 2:23.gen bol mê pal ơn Yàng Jehôwa in kòp kòn tơnhoa lik bơh kơndul mè dê. Jơh ală phan poan jơng dam deh sơnròp gơrê bal mơ Yàng Jehôwa. 13Ai tĕ dô nơm belàt kòn nàng tơwài kòp nơm alàng kòn deh sơnròp, mơya dilah bol mê ò tơwài gen pal dơrpă ngko gơ. Bol mê kung pal tơwài kòp nă kòn klau tơnhoa tòm mpồl ală kòn klau bol mê dê. 14Tòm ală ngai rơp tus, tòm tŭ kòn klau bol mê dê lùp lah: ‘Bơta do gơs jơnau gơtha lơi taih?’ gen ho tĕ lah: ‘Hơ̆ la tài bơh Yàng Jehôwa neh ngui tê gơnoar pràn tă cèng bol he lik klàs bơh di Ejiptơ, bơh di lơgar ơm dĭ. 15Tòm tŭ Pharaôn kơldang nùs ò lòi bol he in lik lòt gen Yàng Jehôwa neh tơnchơt jơh ală kòn tơnhoa tòm Ejiptơ, bơh kòn mơnus tus di phan poan jơng. Tài bơh hơ̆ tàng añ ơn Yàng Jehôwa in kòp nơm phan dam deh sơnròp lơh gơs phan ơn duh khoai, mơ tơwài kòp nă kòn klau tơnhoa tòm ală kòn klau añ jê.’ 16Mơ bơta hơ̆ rơp gơs dô nơm tềl di tê bol mê dê, dô nơm rùp sơnio di bìng liang bol mê dê nàng tơngkah mê in lah Yàng Jehôwa neh ngui tê gơnoar pràn tă bol he lik klàs bơh di Ejiptơ.”
Lòt gan Dàlềng Pơrhê
17Tòm tŭ Pharaôn neh lòi làng bol lik lòt, Yàng Tom Trồ ò lam bol khai jat gùng lòt gan lơgar Philistin, bulah la gùng rềp rlau. Bơh Yàng Tom Trồ neh đơs lah: “Dilah bol khai tìp bơta tòmlơh, bol khai rơp tòmgơl nùs mơ rê wơl hơ Ejiptơ.” 18Behơ̆ Yàng Tom Trồ lam bol khai lòt pơdar jat gùng tòm ƀlàng ngềt ngơt, hơ đah Dàlềng Pơrhê.#13:18 Dàlềng Pơrhê: (Js: “Dàlềng Proh”), sơnio bơh: (1) Dô bă tơnau mơ tiah bŏ nàk digùl đah pơnah bồ kwil dàlềng Sues mơ dàlềng «Địa Trung Hải»; do la kơnhwàl geh đơs tòm ală bơta neh gơlik gơs geh yal wơl tòm Lik 13. (2) Kwil dàlềng Sues mơ kwil dàlềng Akwaba. Làng bol Israel lik bơh di Ejiptơ, rcang sir kung be lòt tòmlơh. 19#Sơnròp 50:25; Jôs 24:32.Môise cèng ntìng ƀồc Jôsep bal mơ khai, tài bơh Jôsep neh sồr ală kòn klau Israel dê srat să ho nền bơta hơ̆. Khai neh đơs lah: “Yàng Tom Trồ ngan rơp tus dong tă bol mê; gen bol mê pal cèng ală ntìng ƀồc añ jê bal mơ bol mê bơh di tiah do.”
20Tơnơ̆ mơ tŭ neh lòt bơh Sukôt, bol khai bơtào sàl tòm Etham, di gah ƀlàng ngềt ngơt. 21Tòm trồ ngai Yàng Jehôwa lòt hơđap bol khai tòm dô nơm jrong mhwal nàng lam gùng bol khai lòt; mơ trồ mang tòm dô nơm jrong ồs nàng sòl pơnđàng bol khai in, tồ bol khai rgơi lòt gùng tòm ngai hala tòm mang. 22Jrong mhwal tòm trồ ngai mơ jrong ồs tòm trồ mang ò tòmgơl tiah gơ dê di đap làng bol.
Избрани в момента:
Lik Ejiptơ 13: KPM2018
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2018 United Bible Societies. All rights reserved.