Lik Ejiptơ 31
31
Pồ bơtào ală cau gơnoar ơn phan duh khoai
1Yàng Jehôwa đơs tai mơ Môise lah: 2“Do, Añ neh sac rwah Besalel, kòn klau Uri, sau Hur dê, tòm jơi bơtiàn Juda, 3mơ Añ neh ai khai in bềng lìu Hwềng#31:3 Rct: gơnap gơnoar. Yàng Tom Trồ dê, bal mơ bơta chài rgơi, mơ git jak tòm ală broă lơh mơ tê, 4nàng lơh gơs ală phan mơ màh, mơ priă, mơ kòng, 5nàng koh mơ tep lŭ màng, nàng lơh chi mơ lơh jơh ală broă cau chài lơh mơ tê. 6Rlau mơ hơ̆, Añ neh pồ bơtào dô nă cau nàng dong kòl khai, hơ̆ la Ôhôliap, kòn klau Ahisamak, tòm jơi bơtiàn Dan. Añ kung neh ai bơta chài rgơi jơh ală cau lơh broă mơ tê, tồ lơh jơh ală broă mơ Añ neh sồr mê: 7hơ̆ la Sàl Tòm Mat, Đài Cơng Tàng bal mơ bơnap bơta tơwài glài ơn hơđang Đài, mơ jơh ală phan ndai ngui tòm sàl, 8cơnòng mơ ală phan ngui bal mơ gơ; jơng đèng mơ màh ngan mơ ală phan ngui bal mơ gơ, cơnòng chu kơlhô, 9cơnòng ơn phan ơn duh khoai chu pơrguc mơ ală phan ngui bal mơ gơ, thùng dà mơ jơng gơ dê, 10mơ ală ồi ào tàñ, ồi ào sàng goh Arôn in la cau gơnoar ơn phan duh khoai, mơ ală ồi ào ală kòn klau khai in tòm tŭ bol khai lơh gơnoar broă ơn phan duh khoai, 11mơñà bong mơ ƀô bơlhu kơlhô Tiah Sàng Goh in. Bol khai pal lơh gơs jơh ală phan jat jơnau Añ neh sồr mê.”
Bơta boh lam ngai Saƀat
12Yàng Jehôwa đơs tai mơ Môise lah: 13“Đơs tĕ mơ làng bol Israel: ‘Bol mê pal prap gàr ală ngai Saƀat Añ jê. Bơta hơ̆ rơp la dô nơm tềl digùl Añ mơ bol mê jơl tus di ală rài tơnơ̆, nàng bol mê rơp git lah Añ la Yàng Jehôwa, la Bơtau lơh bol mê in gơlik gơs sàng goh. 14Prap gàr tĕ ngai Saƀat, bơh la dô ngai sàng goh bol mê in. Cau lơi ò prap gàr ngai hơ̆ gen pal kong lơh glài tơnchơt; cau lơi lơh dô nơm broă lơi tòm ngai hơ̆ gen rơp kong tă tơlik bơh di làng bol. 15#Lik 20:8-11; 23:12; 34:21; 35:2; Leb 23:3; Yalw 5:12-14.Cau pal lơh sir broă he dê tòm prau ngai, mơya ngai poh la ngai Saƀat ơm rlô, ơn is sàng goh Yàng Jehôwa in. Tòm ngai Saƀat dilah cau lơi lơh dô nơm broă lơi gen rơp kong lơh glài tơnchơt. 16Làng bol Israel pal prap gàr ngai Saƀat, pơjum sa kah kirsơnre ngai hơ̆ jơl tus di ală rài tơnơ̆ be dô bơta ho bal gam sùm sùm. 17#Lik 20:11.Hơ̆ rơp la dô nơm tềl gam sùm digùl Añ mơ làng bol Israel in, bơh Yàng Jehôwa neh crơng gơs ală tap trồ mơ tiah tòm prau ngai, mơ tòm ngai poh Kơnràñ ò lơh broă mơ ơm rlô.’”
18Tòm tŭ Yàng Jehôwa neh sir đơs mơ Môise hơđang mơnơm Sinai rau, Kơnràñ ai khai in bàr nơm mpàn bơta Cơng Tàng, la ală mpàn lŭ neh gơs jơnau cih bơh ràs tê Yàng Tom Trồ dê.
Избрани в момента:
Lik Ejiptơ 31: KPM2018
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2018 United Bible Societies. All rights reserved.