KENESE 26
26
Ko Nofo Isaako i te Fenua o Kela
1Ne toe poko te oge i te fenua, mai tua o te oge tela ne poko i aso o Apelaamo. Ne fano a Isaako ki a Apimeleko, te tupu o tino Filisitia, i Kela. 2A te Aliki ne fakasae atu ki a Isaako kae ne fai atu ki a ia penei, “Sa fano ki Aikupito; nofo i te fenua tenei, te koga e manako au ke nofo koe i ei. 3#Kene 22.16-18Nofo i konei, kae ka fakatasi atu au ki a koe kae fakamanuia foki koe. Ka tuku atu ne au ki a koe mo tou gafa te kogā fenua katoa tenei. Ka masaua faeloa ne au taku feagaiga ne fai ki tou tamana ko Apelaamo. 4Ka fakatokouke ne au tou gafa ke pela mo te uke o fetu i te lagi, kae ka avatu ne au ki a latou te fenua katoa tenei. Ka 'mai a malo katoa ki a au ke fakamanuia atu latou e pela mo te fakamanuiaga ne au tou gafa. 5Ka fakamanuia ne au a koutou i a Apelaamo ne fakalogo kae tausi ki aku tulafono mo fakatonuga katoa.”
6Tena, nofo eiloa Isaako i Kela. 7#Kene 12.13; 20.2Ne fesili atu a tino i kona e uiga ki a Lepeka, tena avaga; kae tali atu a ia me ko tena tuagaene. Ne seki taku ne ia a Lepeka ko tena avaga, me e mataku i a ia ma tamate ne tagata i kona kae o'mai o puke Lepeka me ko ia eiloa ko tinogali. 8Ko tai leva eiloa te nofoga a Isaako i kona, kae i te sua aso fua nei, a te Tupu ko Apimeleko ne kilokilo ifo mai tena famalama lavea ei ne ia a Isaako mo Lepeka e moe tasi. 9Ne uga te fekau a Apimeleko ki a Isaako ke fanatu, fai atu ei a ia penei, “A te fafine tena ko tau avaga. Ai a ne fai ei koe pela me ko tou tuagaene?”
Muna a Isaako, “Au ne taofi pela me kafai e taku tonu ne au me ko taku avaga ko au ka tamate.”
10Muna a Apimeleko, “Se a te mea tenei ko fai mai ne koe ki a matou? Moi ne moe se tino i oku tino mo tau avaga penei ko maua matou ne te agasala, e pogai mai i a koe.” 11Ne fai te folafolaga a Apimeleko ki tino katoa penei, “So se tino e fai fakamasei ki te tagata tenei io me ko tena avaga e tamate.”
12Ne toki fatoaga Isaako i te fenua tena, kae i te tausaga tena, i te taimi o te taukai, te mea ne maua ne ia e fakaselau taimi te uke i mea ne toki ne ia, me i a ia ne fakamanuia ne te Aliki. 13Ne tumau eiloa tena manuia, tela ko oko eiloa i tena maumea. 14Ko oko foki eiloa i te uke o ana lafu mamoe mo lafu pulumakau, mo tavini, tela la, ko kai 'sano faka eiloa a tino Filisitia ki a ia. 15Tela ne tanu ei ne latou a vaikeli katoa kola ne keli ne tavini a Apelaamo i aso koi ola ei Apelaamo.
16Ne fai atu a Apimeleko ki a Isaako penei, “Vau o fano keatea mai te motou fenua. A koe ko gasolo eiloa o malosi atu i a matou.” 17Tela ne tiakina ei ne Isaako te koga tena, kae fano o fakatu ana faleie i te Vanu o Kela, te koga tela ne nofo ei a ia i se taimi toetoe. 18Ne toe keli aka ne ia a vaikeli kola ne keli i aso o Apelaamo, kola ne tanu ne tino Filisitia i te matega o Apelaamo. Ne toe fakaigoa foki eiloa ne Isaako a vaikeli kona ki igoa kola ne fakaigoa ei ki ei ne tena tamana.
19Ne keli ne tavini a Isaako se vaikeli i te vanu, maua ei ne latou te vai. 20Ne finau a tausi mamoe o Kela mo tausi mamoe a Isaako, kae fai aka penei, “A te vai tenei e o matou.” Tela ne fakaigoa ei ne Isaako te vaikeli tena ko “Finauga.”
21Ne toe keli ne tavini a Isaako te sua vaikeli, kae ne tupu foki te finauga i te vaikeli tena, tela ne fakaigoa ei ne Isaako ko “Fai fili.” 22Ne tiakina ne ia te koga tena o fano o toe keli te sua vaikeli. E seki ai se kinauga i te vaikeli tena, tela ne fakaigoa ei ne ia ko “Saolotoga.” Muna a Isaako, “Ko tuku mai nei ne te Aliki te saolotoga ki a tatou o nofo i te fenua tenei, kae ka manuia tatou i konei.”
23Ne tiakina ne Isaako te koga tena o fano ki Pelesepa. 24I te po tena, ne fakasae atu te Aliki kae fai atu penei, “Au ko te Atua o tou tamana ko Apelaamo. Sa mataku; au e fakatasi atu ki a koe. Ka fakamanuia ne au a koe kae fakatokouke tou gafa e pela eiloa mo taku feagaiga ki taku tavini ko Apelaamo.” 25Ne faite ne Isaako se fata-fai-taulaga i kona kae tapuaki atu ki te Aliki. Ne fakatu ona faleie i kona, kae ne toe keli ne ana tavini se vaikeli i kona.
Ko te Feagaiga a Isaako mo Apimeleko
26 #
Kene 21.22
Ne malaga mai a Apimeleko mo tena tagata poto ko Ausata, mo Pikolo te takitaki o tena kautau mai Kela o olo atu ki a Isaako. 27Ne fesili atu a Isaako penei, “Ai a ko o'mai ei koutou ki a au i te taimi nei, kae tela ko oti ei ne afuli ne koutou au mai te otou fenua?”
28Ne tali atu latou penei, “Ko iloa nei ne matou i te Aliki e fakatasi mo koe, tela ne mafaufau aka ei matou ke fai se feagaiga malu i te va o tatou. 29Tauto mai ke mo a e fai taua mai koe ki a matou, e penei mo matou e seki fai taua atu eiloa ki a koe. Matou ne alofa atu ki a koe, ne tuku atu koe ke fano mo te filemu. Ko iloa tonu nei i a koe ne fakamanuia ne te Aliki.” 30Ne fakatoka ne Isaako se kaiga, tela ne kai kae inu fakatasi ei latou. 31I te taeao o te sua aso, ne fakasolosolo ei latou o fai olotou tautoga, e fakamautakitaki ei te olotou feagaiga. Ne fakatofa atu a Isaako ki a latou, tela ne mavae ei latou mo te fealofani.
32I te aso tena, ne o'mai a tavini a Isaako o fai atu ki a ia i te vaikeli ko oti ne keli ne latou. Muna a latou, “Ko maua ne matou te vai.” 33Ne fakaigoa ei ne Isaako te vaikeli ko “Tauto.” A te fa'kai ko Pelesepa#26.33: Pelesepa: Te uiga o te igoa tenei faka Epelu “Vaikeli o te Tautoga” io me “Vaikeli o te Fitu” (onoono foki ki te Kene 21.31). ne fakaigoa ki te igoa o te vaikeli tena.
Ko Avaga a Esau
34E tusa mo te fasefulu tausaga o Esau, kae avaga ki tamafine Heti e tokolua, ko Iutiti te tama fafine a Peeli, mo Pasemeta te tama fafine a Eloni. 35Ne puapuaga te olaga o Isaako mo Lepeka i te tokolua kona.
Избрани в момента:
KENESE 26: Tusi Tapu
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Tuvalu Revised Bible © Bible Society in the South Pacific