KENESE 27
27
Ko Fakamanuia Iakopo ne Isaako
1A Isaako nei ko toeaina kae ko kivi foki. Ne uga tena fekau ki tena tama matua ko Esau ke fanatu kae fai atu ki a ia penei, “Taku tama!”
Ne tali atu Esau penei, “lo.”
2Muna a Isaako, “Au nei ko matua kae ko pili foki o mate. 3Puke tau kausana mo au matasana, kae fano ki te vao o ta mai se manu mo oku kai. 4Ka oti ko tunu mai ei ne koe te meakai 'lei tela e fiafia au ki ei, ko aumai ei ki a au. Ka oti au ne kai i ei ko tuku atu ei taku toe fakamanuiaga ki a koe ka koi tuai au o mate.”
5A Lepeka ne fakalogologo i te faipatiga a Isaako ki a Esau. Tela la, i te fanoga a Esau o sala te manu ma Isaako, 6ne fai atu a Lepeka ki a Iakopo penei, “Au nei ne fakalogologo ki pati a tou tamana ki a Esau, e penei ana pati, 7‘Sala mai se manu vaefa lei i te kai, tunu ko aumai ei ki a au. Ka oti au ne kai ki ei ko tuku atu ei taku fakamanuiaga ki a koe i mua o te Aliki, ka koi tuai au o mate.’ 8Muna a Lepeka, “Kiloke taku tama, fakalogo mai o fai te mea e fai atu ne au.” 9Fano o puke mai e lua tamā kouti putaputa mai te lafu, ke tunu ne au te vaega meakai tela e fiafia malosi ki ei tou tamana. 10Ka ave ne koe te meakai tena ki a ia ke kai ki ei, ko tuku atu ei tena fakamanuiaga ki a koe ka koi tuai a ia o mate.”
11Muna a Iakopo ki tena matua, “E iloa ne koe i a Esau se tagata fulufulua ka ko au e mole fua toku pakili. 12Kafai e puke mai toku tamana ki a au ka iloa ei ne ia i a au e fanatu o fakaloiloi a ia. Ka maua fua ei ne au se fakamalaiaga i lo se fakamanuiaga.”
13Ne tali atu tena matua, “Taku tama, so se fakamalaiaga e fai atu ki a koe e paku ki luga i a au, 14kae fano koe o fai te mea e fai atu ne au.” Tena, ne fano ei a Iakopo o aumai a te ava kouti ki a Lepeka, tunu ei ne Lepeka te vaega meakai tela e fiafia sale ki ei a Isaako. 15Oti aka, puke atu Lepeka ki gatu gali o Esau kola e tausi ne ia i te fale, o fakapei atu ki a Iakopo. 16Ne ufi foki ne ia a lima o Iakopo ki fulufulu o kouti, pela foki tena ua. 17Ne tuku atu ne ia te meakai gali ki a ia ke fano mo ia ki a Isaako, fakatasi mo falaoa kola ne tao ne ia.
18Ne fanatu a Iakopo ki tena tamana kae fai atu penei, “Toku tamana!”
Ne tali atu a Isaako, “Io, ko oi koe na?”
19Ne tali atu a Iakopo, “Au ko Esau, tau tama matua; ko oti ne fai ne au te mea e manako koe ki ei. Nofo ake o kai tau manu tenei ne aumai ne au, ko te mea ke tuku mai tau fakamanuiaga.”
20Muna a Isaako, “Taku tama, ne vave maua pefea ne koe te manu?”
Ne tali atu a Iakopo, “Te Aliki tou Atua ne fesoasoani mai ki a au.”
21Muna a Isaako ki a Iakopo, “Fakamolemole, mumea mai ke puke atu au ki a koe. Koe na ko Esau eiloa?” 22Ne mumea atu Iakopo ki a Isaako, tela ne pukepuke mai ki a ia kae fai mai penei, “A tou leo e pela mo te leo o Iakopo, ka ko ou lima e pela mo lima o Esau.” 23Ne seki iloa eiloa ne Isaako me ko Iakopo, me i lima o Iakopo ko fulufuluā pela mo lima o Esau. I te taimi ka tuku atu ei ne ia te fakamanuiaga, 24ne toe fesili atu a Isaako penei, “A koe na ko Esau eiloa?”
Ne tali atu a Iakopo, “Te Aliki, au ko Esau eiloa.”
25Muna a Isaako, “Aumai ne mu kano manu. Ka oti au ne kai ko tuku atu ei taku fakamanuiaga.” Ne avatu ne Iakopo ne mu manu, ne avatu foki ne ia ne uaina mo ona inu. 26Muna a tena tamana ki a ia, “Taku tama, soloki mai o sogi mai ki a au.” 27#Epe 11.20I te soloki maiga o Iakopo o sogi ki a Isaako, ne 'sogi ei ne Isaako te manogi o ona gatu, tela ne tuku atu ei ne ia tena fakamanuiaga. Muna a ia penei, “A te manogi gali o taku tama e pela mo te manogi o te kogā laukele tela ko oti ne fakamanuia ne te Aliki. 28Ke avatu ne te Atua ne vaiua e uke mai te lagi, kae fai foki ou fatoaga ke ola! Ke fakamaumea ne ia koe i saito mo uaina! 29#Kene 12.3A malo ke fai mo au tavini, ka ko tino katoa ke ifo atu ki a koe, ke fai koe mo pule i ou kaiga katoa, ka ko te gafa o tou matua ke ifo atu katoa ki a koe. Ke fakamalaiagina a latou kola e fakamalaia atu, kae ke fakamanuiagina a latou kola e fakamanuia atu ki a koe.”
Ko Fakamolemole a Esau ke Tuku atu tena Fakamanuiaga
30I te otiga o te fakamanuiaga ne Isaako a Iakopo, ko Iakopo eiloa ko fano, ka ko Esau ko fatoa oko mai i tena fanoga o sala manu. 31Ne tunu foki ne ia ne meakai gali, ave ei ne ia ki tena tamana. Ne fai atu a ia ki tena tamana penei, “Toku tamana, na tu mai ki luga o kai aka ki te manu tenei ne fano au o sala mai, ko te mea ke na fakamanuia mai au ne koe.”
32Muna a Isaako, “Ko oi koe?” Kae tali atu a Esau, “Ko tau tama tagata matua ko Esau.”
33Ne polepole te foitino o Isaako, kae fesili atu ki a Esau penei, “Ko oi la te tino ne vau mo kano manu ko oti ne tunu fakalei, kae ne kai au ki ei ka koi tuai o ulu mai koe ki loto? Ne tuku ne au ki te tino tena taku toe fakamanuiaga, tela la e o ia eiloa ki te se gata mai.”
34I te lagonaga ne Esau te mea tena, ne tagi pakalaga kae fai atu ki a Isaako penei, “Toku tamana, tuku mai aka foki la tau fakamanuiaga ki a au!”
35Ne tali atu a Isaako, “Ko tou taina ne vau o fakaloiloi au. Ko oti ne fano mo te fakamanuiaga tela ne tau o maua ne koe.”
36 #
Kene 25.29-34
Muna a Esau, “Tenei te lua o taimi ne fakatogafiti ei ne ia au. Setioa eiloa me ko tena igoa ko Iakopo.#27.36: Iakopo: A te uiga o te igoa tenei faka Epelu “faitogafiti.” Ne puke ne ia toku tofi i toku tulaga ko te toekimua, kae nei ko kaisoa aka foki ne ia toku fakamanuiaga. E a, ko seai eiloa se fakamanuiaga koi toe mo oku?”
37Ne tali atu a Isaako, “Ko oti ne tuku atu ne au a ia ke pule i a koe e pena foki mo ana kaiga katoa ke tavini atu ki a ia. Kae ne tuku ne au ki a ia a saito mo uaina. Taku tama, ko seai nei se mea e mafai ne au o fai mo koe.”
38 #
Epe 12.17
Ne fakamolemole atu eiloa a Esau ki a Isaako, muna a ia, “Toku tamana, e a, e tasi eiloa tau fakamanuiaga? Fakamanuia mai foki au!” Tena ne tagi ei a ia.
39 #
Epe 11.20
Ne fai atu ei a Isaako ki a ia penei,
“Ka seai ne vaiua mai te lagi mo koe.
Ka se ola lei ou fatoaga.
40 #
Kene 36.8; 2Tupu 8.20 A koe e ola i te pelu.
Ka ko koe e fai mo tavini a tou taina.
Kafai e 'teke koe ki a ia, #27.40: 'teke io me ka ola se nofo 'toka.
Ko sao ei koe mai i tena pulega.
41Ne fai fili a Esau ki a Iakopo me ne maua ne ia te fakamanuia a Isaako. Ne fai a mafaufauga o Esau penei, “Ko pili nei kae galo atu toku tamana, ko tamate ei ne au a Iakopo.”
42I te logoga o Lepeka i te togafiti a Esau, ne uga tena fekau ki a Iakopo kae fai atu ki a ia penei, “Kiloke, a tou taina ko Esau ko lamalama o tamate koe. 43Taku tama, fai nei ne koe te mea ka fai atu ne au. Fano nei ki toku tuagane ko Lapana i Halana, 44o 'nofo mo ia ke oko ki te taimi e gata ei te kaitaua o Esau, 45kae puli foki i a ia a te mea ne fai ne koe ki a ia. Ka oti ko uga atu ei ne au se tino ke puke mai koe. Ai a ka sona galo fua ei aku tama e tokolua i te aso e tasi?”
A Iakopo ko uga ke Fano ki a Lapana
46Muna a Lepeka ki a Isaako, “Au ko fiu kae fita i avaga a Esau konei, ne fafine fakaatea. Kafai foki la e avaga a Iakopo ki tamafine Heti konei, kaati la e tau mo au o na mate.”
Избрани в момента:
KENESE 27: Tusi Tapu
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Tuvalu Revised Bible © Bible Society in the South Pacific