KENESE 44
44
Ko Galo te Ipu Siliva a Iosefa
1Ne fakatonu atu a Iosefa ki te tavini tela e pule i tena fale penei, “Fakafonu atu a taga a latou kona ki meakai, ki te mea e mafai ne latou o ave, kae fakafoki atu te tupe a te tino ki loto i tena taga. 2Tuku atu taku ipu siliva ki loto i te taga a te tamaliki foliki eiloa, fakatasi mo te tupe ne tuku atu ne ia mo togi ana saito.” Tena, ne fai eiloa ne te tavini e pela mo te fakatonuga ne fai atu ki a ia. 3I te taeao 'malu eiloa, ne tuku atu ei a tautaina kona ke olo, fakatasi mo olotou asini. 4Ne seki mao atu latou mo te fa'kai, kae fai atu a Iosefa ki te tavini tela e pule i tena fale penei, “Fakavave ke maua atu ne koe a te kau kona ne olo. Kafai e maua atu ne koe, fesili atu ki ei penei, ‘Ai a ko taui ei ne koutou te lei ki te masei? 5Ai a ne kaisoa ei ne koutou te ipu siliva a toku pule?#44.5: Tasi o fuliga taumua Kai a ne kaisoa ei ne koutou a te ipu siliva a toku pule?; Te faka Epelu e seai ne pati konei. Ko te ipu tena e inu a ia i ei, e fakaaoga foki ne ia i te fakamatalaga o mea funa. A te mea ne fai ne koutou se ofa tulafono tafasili i te se lei!’ ”
6I te maua atuga ne te tavini tena a taina kola o Iosefa, ne fai atu ei ne ia a muna kola ne fakatonu atu ne Iosefa. 7Kae ne tali mai latou penei, “Tou malu, se a te uiga o au pati kona? Matou e tauto me e seki fai eiloa ne matou se mea pena. 8E iloa eiloa ne koe me ne fakafoki mai eiloa ne matou mai te fenua o Kanana, a tupe kola ne maua ne matou i loto i omotou taga. I te feitu fea la ka sona kaisoa ei ne matou ne siliva io me ne aulo mai te fale o tou pule? 9Tou malu, kafai e maua te ipu tena i se tino i a matou, e tau la a ia o tamate, ka ko matou ke fai mo au pologa.”
10Muna a te tavini tena, “Ko lei; au la e manako fua ki te tino eiloa tela ne puke ne ia te ipu ke fai mo aku pologa, ka ko koutou katoa e saoloto eiloa.” 11Tena, ne tuku fakavave ifo a olotou sake ki lalo, fakatau tala eiloa tino i tena sake. 12Ne kamata te iloiloga a te tavini a Iosefa i te sake a te tino matua, fakasolo ifo eiloa ke oko ki te tino foliki, tena ne maua ei te ipu i te taga a Peniamina. 13Ne fakatau saesae a gatu o tautaina kona i te fanoanoa, toe fakauta olotou asini, te mea eiloa ko toe foki atu ki te fa'kai ki a Iosefa.
14I te okoatuga o Iuta mo ona taina kona ki te fale o Iosefa, a Iosefa koi nofo mai eiloa i ei. Ne ifo latou i ona mua, 15kae fai atu mo Iosefa penei, “Se a te mea ko oti ne fai ne koutou? Seiloa ne koutou me i te tino penei mo au, e mafai o iloa ne ia te otou mea ne fai i feitu fakataulaitu?”
16Muna a Iuta, “Tou malu, ne a foki a muna ka fai atu ne matou ki a koe? Se a foki te fakamasakoga ka fai atu ne matou? Se a foki te faiga ka fai ne matou ke sao matou? Ko oti ne fakaasi ne te Atua te motou agasala. A matou katoa konei ko fai mo au pologa, kae se ko ia fua tela ne maua i ei te ipu.”
17Muna Iosefa, “Ikai, e se mafai ne au o fai se mea pena! Ko te tino fua tela ne maua i ei taku ipu ka fai mo aku pologa. Ka ko koutou katoa e saoloto o foki atu mo te saogalemu ki te otou tamana.”
Ko Fakamolemole a Iuta mo Peniamina
18Ne fanatu a Iuta ki mua o Iosefa kae fai atu penei, “Fakamolemole tou malu, talia mai ke faipati fakalei taua. Sa ita mai ki a au; a koe e pela eiloa mo te tupu. 19Tou malu, masaua i a koe ne fesili mai ki a matou penei, ‘E isi se otou tamana, io me se otou taina ake?’ 20Ne tali atu matou penei, ‘E isi se motou tamana mo te motou taina foliki tela ne fanau ka ko te motou tamana ko matua eiloa. A te taina tonu o te tamaliki tena ko oti ne mate, ka ko ia fua tenei koi ola mai, mai tamaliki a tena matua. Tela la, a tena tamana e alofa malosi eiloa ki a ia.’ 21Tou malu, a koe ne fai mai ko ia ke aumai ki konei ke matea ne koe, 22kae ne tali atu matou me e se mafai eiloa te tamaliki o vau keatea mai tena tamana; me kafai e fai pena, ko tena tamana ka mate. 23Tena ne fai mai ei koe penei, ‘E se toe talia ne au ke o'mai koutou ki oku mua mafai e se aumai te otou taina foliki.’
24“I te motou ologa ki te motou tamana, ne fai ne matou ki a ia au pati ne fai mai ki a matou. 25Ne fai mai a ia ke toe o'mai matou o toe togi atu ne meakai. 26Kae tali atu matou penei, ‘E se mafai matou o olo; e se mafai matou o talia ki mua o te tagata tela mafai e se olo atu matou mo te motou taina foliki. Matou e olo mafai e olo tasi matou mo te motou taina foliki.’ 27Ne fai mai te motou tamana ki a matou penei, ‘E iloa ne koutou me e tokolua eiloa aku tama i taku avaga tela ko Lasela. 28E tokotasi ko galo. E se taumate kaati ne saesae eiloa ne manu fekai me tenei seki toe matea aka eiloa ne au talu mai te taimi ne galo atu ei a ia. 29Kafai e ave ne koutou a ia tenei kae tupu se mea ki a ia, kaati la e mate eiloa a au i te fanoanoa, i au foki la ko matua eiloa.’
30-31Ne faipati eiloa a Iuta, muna a ia, “Kae nei la, e tou malu, kafai e foki atu nei au ki toku tamana kae matea ne ia i te tamaliki e galo, kaati la e mate eiloa. A tena olaga nei ko te tamaliki faeloa tena, tela la, a te fanoanoa tenei ka avatu ne matou kaati e mate eiloa a ia i ei, te mea foki la ko matua. 32Sua feitu foki la, ko oti ne tuku ne au toku ola mo te tausiga o te tamaliki tenei. Au ne fai ki toku tamana me kafai e se fakafoki atu ne au a te tamaliki, a te ‘se ka i luga i au i aso katoa o toku olaga. 33Tou malu, e lei ke nofo au o fai mo au pologa o sui Peniamina; kae tuku atu a ia ke foki mo ona taina. 34E mafai pefea o foki atu au ki toku tamana mafai e galo Peniamina? E se mafai ne au o kilo oku mata ki te fanoanoa tela ka oko ki toku tamana.”
Избрани в момента:
KENESE 44: Tusi Tapu
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Tuvalu Revised Bible © Bible Society in the South Pacific