KENESE 48
48
Ko Fakamanuia ne Iakopo a Efalaima mo Manase
1I se taimi fakamuli, ne oko atu te fakailoaga ki a Iosefa i tena tamana ko masaki. Tena ne puke aka ei ne Iosefa ana tamaliki tagata e tokolua, ko Manase mo Efalaima, olo atu ei o asi ki a Iakopo. 2I te logoga a Iakopo i tena tama ko Iosefa ko vau o asi a ia, tela ne fakamalosi aka eiloa a ia o sagasaga ki luga, i tena moega. 3#Kene 28.13,14Muna Iakopo ki a Iosefa, “A te Atua Malosi ne fakaasi mai ki a au i Lusa, i te fenua o Kanana, kae fakamanuia ne ia a au. 4Muna a ia ki a au penei, ‘Ka fakatokouke ne au tau fanau, ko te mea ko tou gafa ke tupu mai i ei a malo e uke; ka tuku atu ne au te fenua tenei ki tino o tou gafa ke fai mo tofi o latou ki te se gata mai.”’
5Ne faipati eiloa a Iakopo, muna ia, “Iosefa, a au tama tagata e tokolua kola ne fanau i Aikupito kae seki oko mai a au, e a aku; a Efalaima mo Manase e pau eiloa mo aku tama, e pela eiloa mo Leupena mo Simeona. 6Kafai e toe isi aka foki ne au tamaliki, ka se taku pela me ne aku tama. A te mea e maua ne latou e auala mai i a Efalaima mo Manase. 7#Kene 35.16-19Ko fai ne au a te mea tenei, ona eiloa ko tou matua ko Lasela. Ne mate atu a ia mo toku fanoanoa lasi, i te fenua o Kanana, tela e pili ki Efalata, i te taimi ne foki mai ei au mai Mesopotamia. Ne tanu ne au a ia i kona, i tafa o te auala ki Efalata.” A Efalata i aso nei ko Peteleema.
8I te mateaga ne Iakopo a tama a Iosefa, ne fesili atu a ia penei, “Ko oi tamaliki konei?”
9Ne tali atu a Iosefa, “Ko aku tamaliki kona, ne aumai ne te Atua i te fenua o Aikupito.”
Muna Iakopo, “Aumai ki oku mua, ke fakamanuia atu ne au.” 10A mata o Iakopo ko se lei malosi ona eiloa ko te matua, tela ko se lei ei tena kilokilo. Ne tuku atu ne Iosefa ana tama kia a Iakopo tela ne sai atu ki a laua kae sogi atu ki a laua. 11Muna Iakopo ki a Iosefa, “Au ne seki toe mafaufau eiloa me e toe lavea ne au a koe, kae nei ona ko faiga a te Atua, tenei ko lavea ei ne au, se ko koe fua, ka ko au tama foki.” 12Tena ne puke mai ei ne Iosefa ana tama mai vae o Iakopo o fakaifo atu ki a Iakopo.
13Ne tuku atu ne Iosefa a Efalaima ki te feitu fakamaui o Iakopo, ka ko Manase ki te feitu fakaatamai. 14Ka ko Iakopo ne fepeiaki ona lima, tela la, ko tena lima fakaatamai e tuku ki te ulu o Efalaima tela ko te tama foliki, ka ko tena lima fakamaui e tuku ki luga i te ulu o Manase, te tama matua. 15Tena, ne fakamanuia ne ia a Iosefa#48.15: Iosefa: I te tonuga eiloa a Iakopo ne fakamanuia ne ia a Iosefa e auala i ana tama ko Efalaima mo Manase.
“Ke fakamanuia a tamaliki tagata kona ne te Atua tela e tavini ki ei toku tamana ko Isaako mo toku tupuna ko Apelaamo.
Ko te Atua tela ne takitaki mai ne ia a au ke oko mai eiloa ki te aso nei ke fakamanuia atu ki a laua!
16Ke fakamanuia atu ki a laua a te agelu tela ne fakasao ne ia a au mai fakalavelave katoa!
A toku igoa mo te igoa o toku tamana ko Isaako,
Mo te igoa o toku tupuna ko Apelaamo ke manatua faeloa e auala i tamaliki tagata konei!
Ke tokouke a la fanau, ke lasi te la gafa!”
17Ne tai se fiafia a Iosefa i te mateaga ne ia a tena tamana e tuku tena lima fakaatamai ki te ulu o Efalaima; tela ne puke aka a ia ki te lima fakaatamai o tena tamana o tuku ki te ulu o Manase. 18Muna Iosefa ki tena tamana, “Toku tamana, e 'se te tukuga o ou lima. Tenei loa te tama matua; tuku mai tou lima fakaatamai ki tena ulu.”
19Ne ita tena tamana, muna ia, “Taku tama, e iloa ne au taku mea e fai. A te gafa o Manase se gafa ka takutakua foki. Ka ko tena taina foliki ka sili atu i a ia, ka ko tena gafa ka fai mo malo takutakua.”
20 #
Epe 11.21
Tela, ne fakamanuia ne ia laua i te aso tena, muna a ia, “Ka fakaaoga ne tino Isalaelu o lua igoa i taimi e faipati ei latou ki fakamanuiaga. Ka fai olotou pati penei, ‘Ke fai koutou ne te Atua e pela mo Efalaima mo Manase.’ ” I te faiga tena, ne fakatomua ei ne Iakopo te igoa o Efalaima i te igoa o Manase.
21Tena ne fai atu ei a Iakopo ki a Iosefa penei, “Ko lavea mai ne koe i a au ko pili o mate, ka ko te Atua ka fakatasi atu eiloa ki a koe, kae ka fakafoki ne ia a koe ki te fenua o ou tupuga. 22A Sekema e tuku atu ne au ki a koe, kae se ki ou taina. Te koga tena se koga laukele ola tela ne fao ne au mai tino Amoli ki taku pelu mo taku kausana.”
Избрани в момента:
KENESE 48: Tusi Tapu
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Tuvalu Revised Bible © Bible Society in the South Pacific