Luk̆a 15
15
Na Gondunu Mçxurişi Memgapura
1Mteli taxsildarepe do k̆rimonepe Yeso oucuşeni mulurt̆es. 2Farisurepek do Maç̆aralepek: “Ham k̆oçik k̆rimonepe ik̆abulams, hentepe k̆ala gyari ipxors”-ya do barbalamt̆es.
3Yesok hentepes ham memgapura dup̆aramitu: 4“Tkvani doloxe ar mitxanis oşi mçxuri kuonurt̆uk̆on do ar mçxuri gundunuk̆on, otxeneçidovit̆oçxoro mçxuri golas naşkvas do na gundunu mçxuri z̆iraşakis va gorasert̆ui? 5Hea koz̆iraşk̆uleti xeleberi, mxucis kogixunams. 6E do oxori muşişa goiktaşk̆ule k̆atape do manz̆agerepe muşis ducoxams do hentepes, ‘Na gomindunu mçxuri kobz̆iri, çkimi k̆ala tkvati ixelit!’-ya uʒ̆umers. 7Tkva giʒ̆umert, hamdğeni, ʒas, Ğormotişa na goiktu ar k̆rimonişeni na ivasen xeleba, Ğormotişa goktinu na var uk̆orems otxeneçidovit̆oçxoro ʒ̆ori k̆oçişeni na ren xelebas ucgin.”
Na Gondunu Paraşi Memgapura
8“Varna, vit baçxurişi para na uğun ar oxorcas ar tane gundunuk̆on, para z̆iraşakis, k̆andeli nudvinams, oxori dokosums do k̆ai-xeşa var gorumsi? 9Uk̆ule para koz̆iraşi k̆atape do manz̆agerepe muşis ducoxams do ‘Na gomindunu para kobz̆iri, çkimi k̆ala ixelit!’-ya uʒ̆umers. 10Tkva giʒ̆umert, hasteri, ar k̆rimoni Ğormotişa goiktaşi, Ğormotişi melaikepes axelenan.”
Na Gondunu Skirişi Memgapura
11Yesok, “Ar k̆oçis jur skiri kuonut̆u”-ya. 12“Ç̆ut̆a skirik baba muşis, ‘Baba, mali skanişen na manç̆en komomçi’-ya. Babakti malepe muşi jur skiri muşis ok̆urtu.
13Hamuşen ar-jur ndğaşk̆ule ç̆ut̆a skiri na uğurt̆u iri-xolo kok̆ik̆orobu do mendra ar svaşa igzalu. Hek sefas doloxe doskidu do na uğut̆upe doçodinu. 14İri-xolo daçoduşk̆ule he svas didi k̆it̆luği divu, heati fuk̆ara kodoskidu. 15E do hekoni ar mitxanis keluxedu. K̆oçik hea, ğecepe oçumuşeni ocvecişa mendoşku. 16Biç̆ik, ğecepek na ipxonan mutxanepete korba muşi oz̆ğapu unt̆u, mara mitik hemus mutu var meçamt̆u.
17Nosişa moxtuşi haşo tku: ‘Baba çkimişi dido madulyepes opşa oç̆k̆omalepe kuğunan, mati hak mşkorinate bğurur! 18Ebisela do baba çkimişa mendapta, ‘Baba, ʒaşa do skanda k̆rima domaxenu. 19Ma arçkva skani skiri mot mşinom, hayas var bğir. Ma madulyepe skanisteri mşini’ dobuʒ̆va’-ya. 20Haşote eiselu do baba muşişa goiktu. Mara mendra rt̆uşa baba muşik hea kaz̆iru do guris naç̆u, k̆ap̆ineri alis kodolak̆idu do konaxvelu. 21Skiri muşik hemus, ‘Baba, ʒaşa do skanda k̆rima domaxenu. Ma arçkva skani skiri mot mşinom, hayas var bğir’-ya uʒ̆u.
22Babak ç̆k̆orepe muşis haşo uʒ̆u: ‘Manişa, mtelişen k̆ai libade moiğit do kodolokunit! K̆itis maʒ̆k̆indi kogyudvit, k̆uçxepes çapula komodvit. 23Mgvaneri xocik̆a komoionit do nuk̆vatit, p̆ç̆k̆omat do sefa p̆at! 24Hemuşeni ki, ma ham skiri domiğurudort̆un, disağu; gomindunudort̆un, kiz̆iru’-ya. E do haşote oxoktapus kogyoç̆k̆es.
25E do hemuşi didi skiri onas rt̆u. Oxoris nanç̆uşk̆ule gelaçamuşi do xoronişi xoma ognu. 26Ar meteles ucoxu do ‘Mu iven?’-ya do k̆itxu. 27Metelek hemus, ‘Cuma skani goiktu do komoxtu, baba skanikti hemus şurite do k̆aite na z̆iruşeni mgvaneri xocik̆a nuk̆vatu’-ya uʒ̆u.
28Hemus guri komuxtu, doloxe amaxtimu var unt̆u; baba muşi gale kogamaxtu do hemus oxveʒ̆u. 29Mara hemuk baba muşis haşo uʒ̆u: ‘Oʒ̆k̆edi, nak̆o ʒ̆anaşen doni gixezmet̆am, p̆ot̆e skani nenaşen var gamapti; do si p̆ot̆e k̆atape çkimi k̆ala sefa oxenuşeni ar boçik̆atina varti momçi; 30Mara mali skani ʒ̆urak̆ape k̆ala na ç̆k̆omu ham skiri skani moxtu do var, ar mgvaneri xocik̆a nuk̆vati.’
31Baba muşik hemus, ‘E skiri çkimi, si k̆at̆a oras çkimi k̆ala re, e do mutu miğun skani ren. 32Mara, ham cuma dogiğurudort̆un do na masağesşeni; gomindunesdort̆un do na bz̆iritşeni bixelat do oxobaktat’-ya uʒ̆u.”
Избрани в момента:
Luk̆a 15: LZZ
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Laz Luke © Bible Society in Turkey (Kitabı Mukaddes Şirketi) 2020