Luk̆a 19
19
Yeso do Zaxai
1Yeso Yerixoşa kamaxtu do mek̆ilamt̆u. 2Hek Zaxai-ya do ar mitxa kort̆u. Taxsildarepeşi dudi rt̆u do zengini rt̆u. 3Yeso oz̆iramu unt̆u, mara mk̆ule na rt̆u do dido k̆oçepe na ok̆obğut̆esşeni var az̆irert̆u. 4Yeso oz̆iramuşeni k̆ap̆ineri idu do mt̆k̆ori luğişi ncas kextu; hemuşeni ki, Yeso hekole mek̆ilasert̆u.
5Yeso hek mendaxtuşi jin yoʒ̆k̆edu do “Zaxai, manişa tude kogexti, handğa skani oxoris dodginu mik̆orems”-ya. 6Zaxai k̆ap̆ineri tude kogextu do Yeso oxori muşişa xelineri koducoxu.
7Hantepe na z̆iru iri-xolok “İdu do k̆rimoni ar mitxanis musafiri davu”-ya do elibarbales.
8Zaxai edgitu do Mances haşo uʒ̆u: “E Mance çkimi, aha, na miğun malepeşi gverdi fuk̆arapes goburtam; do mitişen uk̆anone ar mutu kemaç̆opinuna otxo k̆at̆i muşi mepçare!”
9Yesok hemus: “Ham ndğas ham oxori muçitu, hemuşeni ki, hayati Avraamişskiri ren. 10P̆a, K̆oçişskiri, na gondunu ogoru do moşletinuşeni moxtu”-ya uʒ̆u.
Ğormotik na Mekçespe İxmarit
11Hekonepek ham nenape iucamt̆esşk̆ule Yesok op̆aramitus ham memgapurate naonu. Yeruşalimis konanç̆udort̆un do hentepes Ğormotişi Mapoba ordoşa eçkindasen-ya daʒ̆onert̆es. 12Hamuşeni Yesok haşo tku: “Tişineri ar k̆oçi, mendra ar svaşa mendaxtu. Hekoni mapa ivasert̆u do goiktasert̆u. 13Vit ç̆k̆ori muşis koducoxu do hentepes tito mina komeçu do haşo uʒ̆u: ‘Ma gobiktaşakis ham parapete dulya vit.’
14Mara noğurepe muşik ham k̆oçis var oromt̆es: ‘Ham k̆oçi mapa na goomodgitanen var minonan’-ya do goşaoneri k̆oçepe ek̆oç̆işines.
15K̆oçi mapa divu do goiktuşk̆ule, para na meçu ç̆k̆orepes dumçinu, nak̆o moges, oz̆iramu unt̆u. 16İptineri komoxtu, ‘Mance çkuni, ar mina skanik vit mina çkva komogu’-ya uʒ̆u.
17Mance muşik hemus, ‘Megaxelu, k̆ai ç̆k̆ori!’-ya uʒ̆u. ‘Ç̆uç̆ut̆a dulyas emnieti na ivişeni vit noğaşi jin xeʒala giğurt̆as.’
18Majuranik moxtu do, ‘Mance çkuni, ar mina skanite ma xut mina çkva komobogi’-ya.
19Mance muşik hemus, ‘Siti xut noğaşi jin xeʒala giğurt̆as’-ya.
20Masumani komoxtu, ‘Mance çkuni, aha mina skani! Hea ar mandilis komep̆k̆ori do pşinaxi. 21Hemuşeni ki, skanden maşkurinen. Si gurik̆ap̆et̆i k̆oçi re; na var dogidvapun keç̆opum do na var gixaçkapun dogumum’-ya.
22Mance muşik hemus, ‘Ç̆e p̆at̆i ç̆k̆ori, si nenape skanite xukmi megiçare. Ma na var domidvapun na ep̆ç̆opum do na var mixaçkapun na bgumum gurik̆ap̆et̆i k̆oçi na bore kogiçkit̆u do 23p̆a muşeni para çkimi faizis var meçi? Mati gobiktaşk̆ule hea faizi muşite kebzdimt̆i.’
24Uk̆ule gomti muşis na renanpes, ‘Xes na uğun mina koguʒ̆uğit, vit mina na uğun k̆oçis komeçit’-ya.
25Hemus, ‘Mance çkuni, hemus zate vit mina kuğun!’-ya uʒ̆ves.
26Hemukti, ‘Tkva giʒ̆umert, mitxas kuğunna hemus monz̆ineri niçinasen; mara na var uğuns, xes na uğunpeti eiç̆opinasen’-ya. 27‘Çkimi mapoba na var unt̆es duşmanepe çkimiti haşo komoonit do ʒ̆oxle çkimi hentepe doilit’-ya.”
Yeso Yeruşalimişa Mapasteri Amulun
28Yesok, ha nenape dotkuşk̆ule mamguralepe muşis goʒ̆ancğonu do Yeruşalimiş k̆ele igzalu. 29Zeytinişi Golas na ren Vitfaği do Vitania na coxons oput̆epes nanç̆uşi jur mamgurale muşi goʒ̆incğonu. 30Hentepes haşo uʒ̆u: “Melendoni oput̆eşa idit. Oput̆es mextatşi çkar miti na var gyuxunapun mek̆oreri ar guruni z̆iraten. Hemus tok̆i nuʒ̆k̆it do ma komomionit. 31Ar mitik, ‘Guruni mot moʒ̆k̆umt?’-ya do dok̆k̆itxanna, ‘Mance çkunis hea daç̆erebun’-şo uʒ̆vit.”
32Jur mamgurale mendaxtes do iri-xolo Yesok na up̆aramitessteri heşo koz̆ires. 33Guruni moʒ̆k̆umt̆esşi hemuşi mancepek, “Guruni mot moʒ̆k̆umt?”-ya do k̆itxes.
34Hentepekti, “Mance çkunis hea daç̆erebun”-ya uʒ̆ves. 35Guruni komuones. Dolokunupe mutepeşi gurunis koyorçes do Yesoti kogyoxunes. 36Yeso nulurt̆uşi xalk̆ik, dolokunupe mutepeşi gzas dorçamt̆es. 37Yeso, Zeytinişi Golaşen tudeşa na gyulun gzas nanç̆uşk̆ule, dido mamguralepe muşik na z̆ires mucizepeş gurine xelineri do zori xomate Ğormoti haşo omʒkvamt̆es:
38“Manceşi coxote na moxtu Mapa ʒ̆k̆onda ren!
Ʒas misoba, iri-xoloşen mağalis didoba ivas!”
39Hek na ren teni Farisurepek Yesos, “Mance çkuni, mamguralepe skanis duperxi!”-ya uʒ̆ves.
40Yesok hentepes, “Tkva giʒ̆umert, hentepe dostibesk̆on kvalepek nena moiğanen”-ya uʒ̆u.
Yesok Yeruşalimişeni İbgars
41Yeso Yeruşalimis nanç̆uşi noğa koz̆iru. Bgarineri haşo tku: 42“Egizila, handğa misobaşa na nulun gza siti kogiçkit̆uk̆on. Mara haʒ̆i, haya tolepe skanişen dimpulinu. 43Heşo ndğalepe moxtasen, duşmanepe skanik k̆at̆a k̆ele gogiğobanen, gogalanen do meşagjlip̆anen. 44Siti, doloxe na gionun berepeti gyoç̆k̆idanen. Kvaş jin kva var dogiskidasen. Hemuşeni ki, Ğormoti mogitvaluşk̆ule var oxogaʒ̆onu.”
Yeso Oxvameşa Amulun
45Yeso Oxvameşi avlaşa kamaxtu do gamamçamurape gale get̆k̆oçus kogyoç̆k̆u. 46Hentepes, “ ‘Oxori çkimi oxvamuşi oxori ivasen’-ya ç̆arut̆u, mara tkva abrek̆epeşi ğorma dovit”-ya uʒ̆u.
47Yesok, k̆at̆a ndğas Oxvames doguramt̆u. P̆ap̆aşumçanepe, Maç̆aralepe do xalk̆işi tişinerepes hemuşi ğura unt̆es. 48Mara muç̆o vanoren, hea var uçkit̆es. Hemuşeni ki, xalk̆ik Yesos şuri do gurite uucamt̆u.
Избрани в момента:
Luk̆a 19: LZZ
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Laz Luke © Bible Society in Turkey (Kitabı Mukaddes Şirketi) 2020