JENESIS 19
19
1Go agelo dua wanogoe ero umai paki Sodom ragi melu; go Lot e do natano namata‐pua ni Sodom: go Lot e punusi ra, po duleana naga ega sua ra; go e kolo suai natano; Go e noa, 2Pa leo, nawota aginau maga, koroga tawasi paki ekopu ni nasum̃a ki tea suasua animu, po m̃enaki, po sarue natuamu, go koroga wo duleana malip̃ogi sa, po surata pano. Go ero noa, Ee; ma aroga wo m̃enaki napua. 3Go e pasadie p̃arua ki da; go ero dawasi punusi a, po paki ekopu ni nasum̃a aneana. Go e madeada mari nakaniana sikai, po dao ni bred waina leven e dika asa, go ero ganikani. 4Ma ragi waina eu ko da one natano mau, naanoai maga ni natokoana, naanoai maga ni Sodom, eu dalivirigoro nasum̃a, natureai maga go tea matua maga, naatam̃oli mamau puti ni sara tokora. 5Go eu pioso paki Lot, po noa ki nia, eu naga, Naatam̃oli dua waina ero umai paki ekopu punusi ko p̃ogi waia wai? P̃a viragi ra paki katama punusi gami, naga auga atae ra. 6Go Lot e dave pae namata punusi ra, po kokoro namata natakuna. 7Go e noa, A pavara ni mu, taigu maga, kuga ta mari naleo sa dapalana mau. 8Kuga leo, a peani natugu nagoroi dua waina ero ko da atae naanoai mau; aga viragi ra paki katama punusi mu, a pavara ni mu asa, go kuga mari paki da dapala waina e p̃ia namatamu: ma kuga ta mari te navatuna paki naatam̃oli dua wanogoe mau; nalakena ero po umai sili melu ni nasum̃a aginau. 9Go eu noa, P̃a suka. Go eu noa, Kanao waia e umai naga ega m̃enaki‐atatoko, go e naga ega vei tea vasap̃otae: ragi waia auga wo mari sa ki kiki ki da, ma auga wo mari sa ki p̃arua ki‐go. Go eu diesoki p̃arua ki naatam̃oli wanogoe, Lot nogo, po umai paki m̃aladigi naga euga marip̃orae nakokoro. 10Ma naatam̃oli dua wanogoe ero sai ki nam̃elearuda, po puati Lot paki ekopu punusi ra, po kokoro namata. 11Go ero atugi naatam̃oli maga waina eu dokogoro namata ni nasum̃a ki nakesaana, tea kiki go tea warua maga: dapala eu marisa pap̃ai namata. 12Go naatam̃oli dua wanogoe ero noa ki Lot, ero naga, Ku peani tea p̃ota seara nea kite? M̃om̃a, go natum̃a naanoai maga, go natum̃a nagoroi maga, go tea maga waina ku peani ra natokoana; p̃a viragi ra dave m̃elu dua ki tokora waia: 13Nalakena kinami aroga wo mari sa ki tokora waia, nalakena nakuapiosoana kakada e po p̃arua narae ni Yehovah: go Yehovah e po dip̃aki lua gami umai, naga aroga mari sa ki nia. 14Go Lot e dave pano, po pasa ki m̃ona maga, waina eu dawiri natuna nagoroi maga, po noa, Kuga tuleana, kuga m̃elu dua ki tokora waia pano; nalakena Yehovah ega wo mari sa ki natokoana. Ma m̃ona maga eu midoa ki nia naga e alagoro pasa kalakala. 15Go ragi namakotokotoana, agelo ero pasa suatoro ki Lot, ero noa, P̃a tuleana, p̃a viragi lua am̃agoroi, go natum̃a nagoroi dua waina ero pei tea vap̃aiana; naga p̃a ta mate nasigisigileoana ni natokoana mau. 16Ma e mari daliali; go naatam̃oli dua wanogoe ero puati nam̃elearuna, go nam̃elearu ni anagoroi, go nam̃elearu ni natuna nagoroi dua; Yehovah e dodomi a: go ero piragi lua e, po doropusi a etaku ni natokoana. 17Go e pakilina, ragi waina ero piragi lua sua ra paki etaku, naga e noa, P̃a sava pano raki namauriana anigo; p̃a ta leo kitaku mau, go p̃a ta doko te tokora sikai ni Malo Matemate mau; p̃a sava paki tava pano, naga p̃a ta mate mau. 18Go Lot e noa ki da, e naga, Ee nawota aginau, ega ta dapala nogoe mau: 19P̃a leo, tea suasua anigo e po pap̃ai nasaup̃iaana namatam̃a, go ku po mari nadodomiana anigo e p̃arua, waina ku po pisei ki nau asa, ku po mauti namauriana aginau; go kinau a marisa sava paki tava, nasaana e pe va parati ki nau, go a pe mate: P̃a leo, 20natokoana waia e pei m̃aladigi naga aga sava paki asa, go nae e pei tea kiki: p̃a suasua naga aga sava paki asa pano (nae e da pei tea kiki kite), go naatagu ega wo mauri. 21Go e noa ki nia, e naga, P̃a leo, a po moro dogo parati ki tea waina ku po noa e, naga aga ta dap̃olosiwo ki natokoana waina ku po noa e. 22P̃a m̃araverave, p̃a sava paki asa pano; nalakena a marisa mari te navatuna pa pa p̃a wo umai paki asa. Nalakena tea wanogoe nagisa ni natokoana wanogoe e pei tea sosoana ki Soar. 23Elo e sake elagi ni navanua ragi waina Lot e umai paki Soar. 24Go Yehovah e mari brimstone go nakapu vavaga e p̃owo Sodom go Comorrah e m̃elu Yehovah pae nakoroatelagi umai; 25Go e dap̃olosiwo ki natokoana maga wanogoe, go Malo Matemate mamau, go tea mamau puti waina eu doko natokoana maga, go tea waina e ulua natano. 26Ma nagoroi aneana e leo kitaku natakuna, go e po pei vatu ni natasimena waina e lawodu. 27Go Abraham e duleana malip̃ogi sa, po paki tokora waina e lawodu asa narae ni Yehovah: 28Go e leo paki Sodom go Comorrah, go paki navanua mamau ni Malo Matemate, po leo punusi, go p̃a leo, naasua ni navanua e sake dakiusi naasua ni upu ni nakapu.
29Go ragi waina Sup̃e e mari sa ki natokoana maga ni Malo Matemate, Sup̃e e midoa ki Abraham, po dip̃aki lua Lot e m̃elu dua ki natap̃olosiwokiana, ragi waina e dap̃olosiwo ki natokoana maga waina Lot e doko ara doko.
30Go Lot e sake m̃elu dua ki Soar pano, po doko tava, nara ma natuna nagoroi dua eu mamau; nalakena e mataku doko Soar: go e doko valea sikai, nara ma natuna nagoroi dua. 31Go tea takalapa e noa ki tea takariki, e naga, Tamagida e pei tea matua, go naanoai sikai e da doko navanua mau waina ega wo umai punusi gida, dapala namariana ni maramana mamau: 32P̃a umai, toroga mari tamagida ega munu waine, go toroga wo one sikoti a, naga toroga magi tamagida dape naatam̃oli. 33Go ero mari tamada e munu waine nap̃ogiana wanogoe: go tea takalapa e pano, po one sikoti tamana; go e da atae ragi waina e o natano asa, kite ragi waina e duleana asa mau. 34Go matamai ki nia, tea takalapa e noa ki tea takariki, e naga, P̃a leo, kinau a one sikoti mama p̃ogi ni nanova. Toroga mari a ega moro munu waine p̃ogi waia; go nigo p̃a vano, po one sikoti a, naga toroga magi tamagida dape naatam̃oli. 35Go ero mari tamada e moro munu waine nap̃ogiana wanogoe: go tea takariki e duleana, po one sikoti a; go e da atae ragi waina e one natano asa, kite ragi waina e duleana asa mau. 36Dapala nogoe Lot natuna nagoroi dua ero magi tamada diena. 37Go tea takalapa e dape natuna naanoai sikai, po soso nagisana ki Moab: nae e pei tama ni naworawora ni Moab pa pa paki naaleatia waia. 38Go tea takariki, nae ma e dape natuna naanoai sikai, po soso nagisana ki Ben‐ammi: nae e pei tama ni Ammon natuna maga pa pa paki naaleatia waia.
Избрани в момента:
JENESIS 19: NTB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Bible Society of the South Pacific