LUK 23
23
I Jisas mo tu koro na nako i Paelet
(Mat 27.1-2,11-14; Mak 15.1-5; Sione 18.28-38)
1A tangaloi aira vunu ramo maraka ramo lavi Jisas mo tu koro na nako i Paelet*. 2Hikani ramo tau na noga leo lakwai Paelet, ramo viti kwara, “Keu tagai na tangaloi hikani u tuku turuki hatihatiki na nomai tangaloi, u tuku viti lakwara kwara rana hatu voli a takis lakwa na hugwe lakua i Sisa*. Mo viti huria sibona kwara aia i Vurae*, a Hugwe Lakua.” #Luk 20.25
3I Paelet mo uduhuri kinia mo viti kwara, “?I nigo a Hugwe Lakua nona gwaloana noi Isrel*?”
Hikani i Jisas mo daraki lakwae mo viti kwara, “Aia hokinia hi komo viti.” #1 Tim 6.13
4Vunu i Paelet mo viti lakwa na tangaloi* lingilingi lalakua mana vao kwara, “Nahe hagwe na vakasileana te vohoki lo tangaloi hika.”
5Vae aira ramo madimadi lo leoki ramo viti kwara, “Lolona mo toko huhui, u sinasina na ngwera Sutia doluaki kwara rana toko vai vuro. U tinakaki tomua lolo vanua Galili*, vae hika mo maravuti takwahike.”
6Lolona i Paelet mo rongo na leo hokinia hi mo uduhuri kwara, “?Kworohokinia? ?A tangaloi hikani aia a ngwera Galili?” 7Lolona i Paelet mo rongo na roroki kwara i Jisas u vanamai tina vanua hinea i Herot #23.7: I Herot. I Herot hi aia i Herot Antivas. Kona taga lo Deksenare lo buku hika takuni. aia u hugwe koroa, mote maraka mo hora i Jisas vaki maia, huri i Herot u hugu Serusalem lo taro hi. #Luk 3.1
I Jisas mo tu koro na nako i Herot
8Lolona i Herot* mo tagai Jisas u lagwa haburu huri u rongo na rorona vae u lengaia kwara ne tagaia te tuai, vae hetea. U tuku domi kwara ne tagai Jisas te lo vaisea hinea mo toko vai. #Luk 9.9 9Hokinia i Herot mo uhi Jisas kina leo uhiuhi u rusa, vae i Jisas he viti na leo te vohoki. 10A tangaloi* lingilingi lalakua mana tangaloi* kikikila na Uliuli* Kokona rau hugu takwa-hi, ramo kwaha karakara ramo viti na kinau rahe karea te vovohi Jisas. 11I Herot mana nona tangaloi na vuro ramo vaivai tagai Jisas, ramo tagataga veveki rera kinia. Vunu ramo duletaki na lugwa karea luna, ramo horae mule taliku vaki mai Paelet*. 12Lo rani kwahaia hi i Herot mai Paelet raru mo bulubulu taliku, huri tomua raru tavatavaluivuro kirarua.
I Paelet mo viti kwara vae i Jisas ne mate
(Mat 27.15-26; Mak 15.6-15; Sione 18.39—19.16)
13Hikani i Paelet* mo kware tabulutaki na tangaloi* lingilingi lalakua, mana kaitomuaki na tangaloi, vake mana tangaloi maira. 14Mo kwaha maira mo viti kwara, “I kamu tulu lavi na tangaloi hikani vaki maiau, tulu viti kwara u tuku turuki hatihatiki na tangaloi. Hikani nomo kahi haro na doridorina lo nakomiu, vae nahe hagwe na hatiki te luna vohoki hinea tulu mo toko vitira huria. 15I Herot* vake he hagwe na kinau te luna kwara mo vai saloia, vae huri hi mo horae mulemai taliku vaki maikita. Vae u matangwasara kwara a tangaloi hika he vai na kinau te hinea kwara u hati vohoki vae ne mate huri. 16I nau nari viti lakwara rana takwilia, vunu na tirakinia ne va lakao.” #23.16: Lo Buku Kokona tuaki hinea a tangaloi rau ulira tuai, rau hoke na leo hika kina leo hinea mo viti kwara, “17 Tigwaravu lo taro na Kanikani na Tivekiana u taritarisa kwara i Paelet ne tiraki a tangaloi katukwale tina ingwa na gwarugwaru lakwara.”
18Vae a vao doluaki ramo vidouki ramo vikwahaki ramo viti kwara, “!Ko kwohi mateia! Ko tiraki i Baravas lakwakami.” 19A tangaloi hi i Baravas rau taua tilolo ingwa na gwarugwaru huri u vai na tangaloi ramo viroro vovohi na tangaloi nona kavman lo gwatuivanua lakua hi, vake aia u ua mate a tangaloi.
20I Paelet u lengaia kwara ne tiraki Jisas, hikani mo kwaha mana vao vano hi taliku. 21Vae hetea ramo kwaha karakara ramo viti kwara, “!Durua tilo kaibetu! !Durua tilo kaibetu!”
22I Paelet mo viti lakwara vakaitoluki kwara, “?Huri aha? ?U vai na havakinau mo hati? I nau nahe hagwe na kinau te hinea kwara u vaia, vae u taritarisa kwara ne mate huri. Karea, hika vae na viti lakwara rana takwilia vunu na tirakinia ne va lakao.”
23Vae ramo kwaha karakara vakevake ramo seseaka ramo toko viti kwara i Paelet ne viti lakwa na nona tangaloi rana durua tilo kaibetu. Ramo kwaha karakara hokinia hi vae rovonaki ramo gui i Paelet. 24Hikani i Paelet mo tau i Jisas tilo kabaga kwara rana kwohi mateia hokinia hi rau lengaia. 25Mo tiraki na tangaloi hi rau lengaia mo ngwalua, a tangaloi aia hi ramo taua tilolo ingwa na gwarugwaru huri u vai na tangaloi ramo maraka, ramo viroro mana tangaloi nona kavman, vake aia u ua mate a tangaloi. Vae i Paelet u tau i Jisas tilo kaba na nona tangaloi na vuro kwara rana vai a kinau maia hokinia hi a tomutomuai-tangaloi nona gwaloana noi Isrel* rau lengaia.
Ramo duru i Jisas tilo kaibetu
(Mat 27.32-44; Mak 15.21-32; Sione 19.17-27)
26Hikani ramo lavi Jisas ramo vano. Lolona ramo lakao lo hala ramo hagwe na tangaloi katukwale a hinana i Saemon, a ngwera Saerini, u vanamai tina vanua auta kwara ne va vano vaki lo gwatuivanua lakua. Hikani ramo susuni ngwavingwavikinia kwara ne kwali na kaibetu i Jisas ne huria takuni.
27A vao lakua lengalenga ramo huri Jisas lo hala hi. A ravavine vake ramo hurira ramo vitangiki ramo ula huria. 28Vae i Jisas mo halebohi vaki maira mo viti lakwara kwara, “I kamu a ravavine Serusalem. Tulu hatu tangi huriau, vae tulu tangi hurikamu, huri raranatumiu vake. 29A taroki eia u tuku vanamai vae savi na tangaloi rana viti kwara, ‘A tangaroa karea lakwa na ravavine hinea rahe hagohago natu tea, aira hinea rahe toko bava te natu, aira hinea a natu rahe kanikani te tiura.’ #Luk 21.23 30Vae lolo taro aia hini a tangaloi rana viti kwara, ‘!A vuti lalakua hika kwara rana sovibibikami vaha! !A vutivuti kwaririgi hika kwara rana tavunikikami vaha!’ #Hos 10.8; Rev 6.16 31Hika lai nga a vikai u gwaro radu nga vae rau tuku vai hokinia hi, vae diko a vikai ne goru rana vai ne huihuira vake.”
32Hikani rau lavi na tangaloi kairua vake raru galogalo tangwata, kwara vae raru ne mate haragoki mai Jisas. 33Lolona ramo maravuti lo tanotano hi u kwareki “A Tanotano na Hui na Gwatu na Tangaloi,” ramo duru i Jisas tilo kaibetu takwa-hi. A tangaloi kairua hi ramo dururarua vake tilo kaibetu kairua, kairuaki lo matuai Jisas kairuaki lo ngwairina. #Aes 53.12 34Hikani i Jisas mo viti kwara, “Mama, ko domidomi koro lakwara, huri rahe kikilai na kinau te hi ramo toko vai.” #23.34: Lo Buku Kokona tuaki hinea a tangaloi rau ulira tuai a leo aira vano hi lo ves 34 rau tikei luga.
Hikani ramo kwaheki na lugwa i Jisas lo livukaga kina tatatiki taes. #a Aes 53.12; Mat 5.44; Bol 7.60; b Sam 22.18 35A tangaloi ramo tu dalidalia ramo tagataga huria, vake a kaitomuaki nona gwaloana noi Isrel* ramo toko mana tiehia, ramo viti kwara, “!Ai! Aia u tuku vakahiki a tangaloi ratuaki vae hika diko aia i Vurae* hinea i God u mataia ne vakahikinia sibona vaha.”
36Hikani a tangaloi na vuro vake ramo tuku mana tiehia. Ramo vanamai kwara rana bete a waen kakarati lakwae kwara ne inu. #Sam 22.7-8 #Sam 69.21 37Ramo viti kwara, “Diko i nigo a Hugwe Lakua nona gwaloana noi Isrel ko vakahikinigo.”
38A uliuli hika rau taua hivoulu tina gwatu i Jisas u matangwasaraki kwara, “Hika a Hugwe Lakua nona gwaloana noi Isrel.”
39A tangaloi hi kairua raru mo galo lo tangwata raru mo dule lo kaibetu takwa-hi, kairuaki mo kwahakwaha hati ki Jisas mo viti kwara, “?Kworoho? ?Nu domi kwara i nigo hika i Vurae? !U karea kwara kona vakahikinigo, i kamirua vake!”
40Vae aia hi kairuaki mo suria mo viti kwara, “?Kworohokinia? ?Kohe mataku te ki God? I kita vunu hika rau durukita tilo kaibetu lo hala katukwale. 41Vae i kitarua u taritarisa kwara rana durukitarua tilo kaibetu huri na kinau hati taru mo toko vaira, vae rau vai kwehi lakwakitarua u bakoto. Aia a tangaloi hika he vai na kinau te kwara u hati.” 42Hikani mo viti lakwai Jisas kwara, “Jisas, kona mulemai ki Hugwe Lakua kona vanamai lo nomu huirana, vae ko domihagweau.” #Mat 16.28
43I Jisas mo kwaha maia mo viti kwara, “Kareaki na viti lakwako, hika karagwa, vae i nigo maiau lo vanua Parataes.”
I Jisas mo mate
(Mat 27.45-56; Mak 15.33-41; Sione 19.28-30)
44Lo mataniaho kaheata he aho tea, u dodoka koro na vanua doluaki hoki na bongi vae tarisaki lo mataniaho dori lakua.#Amos 8.9 45Hikani a lugwa* na bolo kabakaba hinea mo toko dule koro na Tanotano Kokona Karakara hinea lolo Ingwa Kokona noi God mo madadare kairua.#Eks 26.31-33; 36.35 46I Jisas mo ngara karakara mo viti kwara, “Mama, nu tiraki na tanungwegu tilo kabamu.” Mo viti na leo hikani mo rovo vunu a mabuna mo sala. #Sam 31.6; Bol 7.59
47Lolona a kaitomuaki na tangaloi na vuro nona ngwera Rom mo tagai na kinau vano hi, mo kaluhaki God mo viti kwara, “!Kareaki aia a tangaloi bakoto!”
48A tangaloi doluaki aira hi rau vanamai kwara rana tagai na kinau vano hi, ramo mule taliku vaki tataga rau rongo hati haburu, ramo toko vosai na gwagwaga huri. #Luk 18.13 49Aira hinea rau kikilai tabetabeki Jisas, maira hini a ravavine rau huria tina vanua Galili*, rau tu u vakavakahaoka ramo taga savi na kinau vano hi. #a Sam 38.11; 88.8; b Luk 8.2; 23.55
Rau tau na tarabehi i Jisas tilolo gwaru-malanga
(Mat 27.57-61; Mak 15.42-47; Sione 19.38-42)
50Hikani a ngwera katukwale a hinana i Sosev, u vanamai. Aia a ngwera Arimatia, a gwatuivanua katukwale nona gwaloana noi Isrel*. Aia katukwale tina Tangaloi* Tovotovo Lalakua nona gwaloana noi Isrel vae aia a tangaloi karea u bakoto. 51He masinge te mana noga tovotovo mana kinau vano hi ramo vai, vae u hugu tara kwara i God ne hugwe koro na bulana tangaloi. #Luk 2.25,38 52Aia mo vano vaki mai Paelet* mo uduhuri kwara ne tirakinia ne lavi na tarabehi i Jisas. 53Vunu mo vano mo lavi na tarabehi i Jisas tina kaibetu, mo lugwatia kina lugwa lotu u karea, vunu mo taua lolo gwaru-malanga* hinea a tangaloi rau kelia tina vatu. A gwaru-malanga hi rahe tau te tangaloi lolona radu nga. #Luk 19.30 54A rani hi a Rani na Vai Raraiana huri na Rani* na Mabuana, vae a Rani na Mabuana hi u garagarani kwara ne tinakaki.
55A ravavine hinea rau huri i Jisas tina vanua Galili*, ramo huri i Sosev ramo tagai na gwaru-malanga hi, vunu vake ramo taga tabetabekinia kwara a tangaloi rau tau kworohoki na tarabehi i Jisas tilolona. #Luk 8.2; 23.49 56Vunu ramo mule taliku vaki tataga, ramo lai a rau na vikai hinea rau boniboni mana pomat, ramo vai rarai kwara rana tau lo tarabehi i Jisas.
Lo Rani na Mabuana rau mabu, hokinia hi a Tangwata* mo viti. #Eks 12.16; 20.10; Dut 5.14
Избрани в момента:
LUK 23: HWT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Havakinau New Testament © Bible Society of the South Pacific, 2016.