Motíosi 8
8
Yésusu e é éŋúgíe ukúnúkunu ummue
(Mél 1.40-44; Lók 5.12-14)
1Aŋa Yésusu a mbaá lɛ a siisene ogɔndɔ, bitúu bitúu bá batɔ bɛ́ báa lɛ gó mo biene. 2Gɔ́ɔ ukúnúkunu ummue a mo báyɛkɛnamɔ́, a báá ncó gule enúu go cí naá busío bɛ́hɛ́, go oyɛda a amɔ́: «Daadáa, aáŋa o lɛ́galɛga, o lɛ́ ba go cogona.» 3Yésusu a á gaanóná ombɔ́gɔ, go mo báláfɛna a amɔ́ gɛ́hɛ́ aá: «Ndɛ́galɛga, bɛ́ɛ́mba sogónáalú.» Hɔ́ɔ na hɔ́ɔ, mɔtɔ go dómba go éŋuge ogɔnɔ́ yɛ́hɛ́ yá kúnú. 4Gɔ́ɔ Yésusu a mo oyanamɔ́ a amɔ́: «O bébeŋe, o do oyáná mɔtɔ boóma, goana ɛ́dá bédúfie naá udúmbí bɛbáágá naá Asaŋa, go íŋene gɛbáágá gɛ́ɛgɛ Mɔ́sɛsɛ a mbaá sómbá, nɔ́ɔnɔ bó gaá dúfíe mɔtɔ uŋkimée goŋaá go é éŋúgé#8.4 O bana Léfi 14.2-32..»
Ogɔ́nɔ́ɔ ummue ba olɔŋɔ yá bisimbi ntɛdɛ a á ágá odɛ́má yɛ́hɛ́ naá Asaŋa
(Lók 7.1-10; Sáŋ 4.46-54)
5Yésusu a mba lɛ́ i íŋenene naá tɛ́sɔnɔ ya Kapɛlɛnahɔ́mɛ, gɔ́ɔ ogɔ́nɔ́ɔ ba olɔŋɔ yá bisimbi ntɛdɛ a mo báyɛkɛnamɔ́ go ɛ́da go mo béyéeyenye 6a amɔ́: «Daadáa, uyogóní bamɛ a lɛ́ naá nnyaŋá mbɛ́dɛ́ɛ, ogɔnɔ́ yó báá go mo mɛ́nca, ɔ ɔ́bɛgɔnɔ makɔ́nɔ́.» 7Yésusu go mo oyana a amɔ́: «Kɛɛ́ ɛ́dá ŋgɛ́da mo éŋugie!» 8Ogɔ́nɔ́ɔ ba bisimbi ntɛdɛ go gɔnɔ gɔ́lɔ dogálɔ a amɔ́: «Daadáa, cɛ háánánáa goŋaá go íŋene naá yɔmɔ́ nnyaŋá: gálɛ́da goana nogálɔ númmue, uyogóní bamɛ a geé éŋúgé. 9Yɔmɔ́ɔ moatɛ́ moatɛ ŋgɔ́bɛnɔnɔ na ogɔ́nɔ́ɔ bamɛ, ndɛ́ na bisimbi bɛ́ɛbɛ bɛ́ ŋgɔ́bɔnɛnɔmɔ́. Ŋgoyana gímmue caá: “Ɛ́dá!” gɛ́ ɛ́da, ŋgoyana gíncodío caá: “Úlé!” gɛ́ úle. Ŋgoyana uyogóní bamɛ caá: “Ŋaáa gɛnáa!” a ŋa.» 10Aŋa Yésusu a mbɔɔ́ ɔ́bɔ́ dogálɔ dá ogɔ́nɔ́ɔ ba bisimbi dɔ́ɔdɔ, gɛ́hɛ́ go békúke makɔ́nɔ́. Kɔ́ɔ o oyanamɔ́ báaba bá mbaá lɛ bá mo bienene a amɔ́: «Ŋgaá nyó oyáná mammana caá; ká lɛ́ cɛ gídé mɔtɔ a ágana odɛ́má yɛ́hɛ́ naá Asaŋa náana naá Ɛ́sɛlahɛ́ɛlɛ. 11Kanɛ́ ŋgaá nyó oyáná tɔ́nɔ caá: gɛca gɛ́ ŋgu úlénée, gɛ́ ɛ́da fadɛgana gɛayá gá mbálɛ́ná buisí, na gá púíné buisí, bá nco lukumene go gɛdáágá olɔŋɔ na Ábalaháma, Ɛ́saga na Yɔ́kɔbɔ naá Bufuŋe bá mmoɛná. 12Kanɛ́ báaba bá mbaá lɛ bá go ɔ́bɛnɔnɔ na bigíndé bá mmoɛná bá ŋga bɛ́ɛ́mbá nɔɔ́ɔlú go hanyɔ́ naá mbíno: hɔ́ɔlɔ́ bó ŋga bɛ́ɛ́mbá mbií na gobanda gá bigélédé.» 13Kɔ́ɔ Yésusu o oyanamɔ́ ogɔ́nɔ́ɔ ba bisimbi ntɛdɛ a amɔ́: «Gundé naá mamɔ́ nnyaŋá, ŋgáa bó báŋa go busío báhɔ naá gioliminyo gáhɔ.» Naá gigúlí moánɛ, uyogóní ba ogɔ́nɔ́ɔ ba bisimbi ntɛdɛ go dómba go éŋuge.
Yésusu e é éŋúgíe nnyeedíi ba okɔ́dɔ ba Píele
(Mél 1.29-31; Lók 4.38-39)
14Yésusu i íŋenene naá nnyaŋá ya Píele, go gíde nnyeedíi ba okɔ́dɔ bɛhɛ́ mbɛ́dɛ́ɛ, nnyɔ́dɔ yɛhɛ́ ɛ mba lɛ́ bólɛ́gáalú. 15Kɔ́ɔ Yésusu a mo báláfɛnamɔ́ go ombɔ́gɔ, nnyɔ́dɔ yɛhɛ́ ɛ báá dómbá go fuuge; okɔ́dɔ go fadɛgɛna, a bɛ́ɛ́ ɛ́dá gɛ́hɛ́ go ala.
Biéŋugie mbɔ́dɔ aá mbɔ́dɔ
(Mél 1.32-34; Lók 4.40-41)
16Aŋa hɛɔbɔ́bɔ́ɔ hɛ́ mboó obá, batɔ bá báá lɛ gó ɛ́da go úlenine Yésusu na gɛcɛcá gá batɔ bá bɛgáda bá biliíli. Yésusu go gúne bɛgáda bá biliíli bɛ́ɛbɔ goana na nogálɔ, a béé éŋúgíe bɔgɔnɔ́gɔnɔ biimée. 17A mba ŋaáa nɔ́ɔnɔ goŋaá nogálɔ nɔ́ɔnɔ mbúsí ya Asaŋa Iseyíi ɛ mbaá gálɛ́dá nó bóhóogio. Nogálɔ moánɛ nó lɔ́mɔ́: «A mba gɔ́lɔ́ bɛnɛ́mɔ bɛ́cɔ́, a báá có dóóná ɛgɔnɔ́ yɛcɔ́#8.17 O bana Iseyíi 53.4..»
Bɔ́ɔbɔ mɔtɔ a lɔ́mɔ́ bá go ŋa go go biene Yésusu
(Lók 9.57-60)
18Aŋa Yésusu a mbɛɛ́ ɛ́ná bitúu bitúu bá batɔ bɛ́ báá go mo géŋgelidie, gɛ́hɛ́ go fáa bogaaga bá goŋaá bá báca, bɛ́ ɛ́da naá cɔ́lɔ ya boayá búunú. 19Iloodio há bicele hímmue go báyɛkɛna Yésusu go mo oyana hɛ́ amɔ́: «Iloodio, nná go bienene hoóma hiimée háaha o nɛ́ ɛ́damɔ́.» 20Yésusu go mo gundie a amɔ́: «Pága sɛ́ bɛanana mabɛ́lá, munoní má mmoɛná mó bɛanana aŋaanɔ; kanɛ́ Moɔnɔ́ ba mɔtɔ, mɔ́ɔ, a dɛ báá na hoóma há go dála odóɛ hɔ́ɔ a dúugide.» 21Mɔtɔ uncodío naá olɔŋɔ yá beebieni go mo oyana a amɔ́: «Daadáa, manɛ́ tɛ́ɛna ŋgɛ́da mie baaba.» 22Kanɛ́ Yésusu a amɔ́ gɛ́hɛ́ a amɔ́: «Mbienéemú, dɛ́ɛ́na begúe bá mienene bɛlɔ́ŋɔ́ bábɔ́.»
Yésusu a á kíkíe puŋe
(Mél 4.31-41; Lók 8.23-25)
23Gɔ́ɔ Yésusu a bólɛgamɔ́ naá gilué olɔŋɔ na behúúní bɛ́hɛ́. 24Hɔ́ɔ na hɔ́ɔ, gɛantá gá puŋe go ɛ́da go fufe, miimpo má máŋɛ́ go ɛ́da go búugebugie gilué odɛ́má goŋaá má gɛ́ yímie. Gɛcamɛna moánɛ, Yésusu a mba lɛ́ godɔnɔ́ɔ. 25Behúúní bɛ́hɛ́ go báyɛkɛna, bá báá mo foyóná bá amɔ́ gɛ́hɛ́ aá: «Daadáa, có sódíomú! Gɛ́cɔ́ go ɛ́da goŋaá dɛ fúe.» 26Yésusu go bó gundie a amɔ́: «Nɛɛ́nɛ no lɔ́mɔ́ na bofoá náana, bɛɛnyɔ́ɔ batɔ bá gioliminyo fágɔfágɔ o?» Kɔ́ɔ a fadɛgɛnamɔ́ tɛ́nɛ́ɛ, go áncɛdɛna puŋe na máŋɛ́, muimée mɔ́ɔmɔ mó báá lɛ gó mámana pɔ́ɔ́. 27Batɔ biimée go ɛ́da go békúke, bá gálagala bá amɔ́: «Kasɛ́á mbɔ́dɔ ya mɔtɔ yɛ́yɛ́ɛ náana o, ya goŋaá akɛ́ ufufu, akɛ́ máŋɛ́ mó mo ɔ́bɛnɔnɔ#8.27 Go eninye na ŋgɔ́ŋɛ́ naá Ɛsagɔ 65.8; 89.10, na 107.23-32. o?»
Yésusu na mbɛ́ sá batɔ ɛ́handɛ́ sá bɛgáda bá biliíli
(Mél 5.1-20; Lók 8.26-39)
28Aŋa Yésusu a mbaá yoogá boayá búunú, naá gɛdɔŋɔ gá Bagadaláa#8.28 Gadaláa bó do mbáa lɛ tɛ́sɔnɔ ya Beyúdene, boóma bá bakɛ́lomɛ́da 10 gɛayá gá mbádá, ombɔ́gɔ onɔ́mɛ yá gɛsɔmbɔsɔ́mbɔ́ɔ gá Gɛnɛsalɛ́dɛ ɛ́na Gelilée., mbɛ́ sá batɔ ɛ́handɛ́ sá bɛgáda bá biliíli sɛ́ húmene naá bɛbɛ́lá, go úle giluméní nɛhɛ́, mɔtɔ a dɛ mbáa lɛ ba go dómba naá pɛ́ moánɛ. 29Mbɛ́ sɛ́ɛsɔ go ɛ́da go ánca sɛ́ amɔ́: «O có fúmbene ɛkádɛ, Moɔnɔ́ ba Asaŋa o? O lɔ́mɔ́ úléelú háalá go go nco có fáa noséésényée gɛcamɛna kanɛ go bola lí?» 30Hɔ́ɔ hɔ́ɔlɔ́, naá gɛyábá, buufe bá ŋgɔnɔ́bɛ́ bó mba lɛ́ bó nyáanya naá ogɔndɔ. 31Bɛgáda bá biliíli bɛ́ɛbɔ go ɛ́da go béyéeyenye Yésusu bɛ́ amɔ́: «Go amɔ́ o có gúne, có dómáamɔ́ naá buufe bá ŋgɔnɔ́bɛ́.» 32Yésusu go bɛ́ oyana a amɔ́: «Ɛ́dá nɔnɔ kɔ́ɔ.» Bɛ́ báa lɛ gó húmene, go íŋenene naá ŋgɔnɔ́bɛ́. Buufe buimée bá ŋgɔnɔ́bɛ́ go ɛ́da kíkide naá ogɔndɔ go nco bésugune naá máŋɛ́ cuuu, go fúe púmú naá miimpo. 33Bebeŋíbéŋí ŋgɔnɔ́bɛ́ bá báá díínée, go cekie boóma buimée naá tɛ́sɔnɔ, na gɛsɛnɛ gá batɔ bá báandɛ́ bá bɛgáda bá biliíli. 34Kɔ́ɔ batɔ biimée bá tɛ́sɔnɔ yɛ́ɛyɔ bá húmenemú go go nco lumene na Yésusu. Aŋa bá mbaá mo ɛ́ná, gáábɔ́ go mo béyéeyenye goŋaá a húme naá gigísi gábɔ́ gá cí.
Избрани в момента:
Motíosi 8: YAS
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте