Luka 19
19
Yesu ne Sakeo
1Yesu dwuli Yeriko, na né ɔpɛ nu berɛ kɔ. 2Na yieee, né biaa bie bɔ ye dumaa li Sakeo ɔ ɔwɔ berɛ, bɔ ɔte ɛtoɔdidelɛniɛ panyi bɔ ye sa nu le bie ɔ. 3Né ɔpena kyɛ onwu Yesu ná onwu ye sona horɛ, nakoso ɔnate ɛlɔen ne ati wannwu ye, ofikyɛ ɔte sona tikaa. 4Yiti otuli amirika lili moa ɔɔfole akyea bie aso kyɛbɔ okonwu ye ɔ, ofikyɛ berɛ yeɛ né ɔkwaafa ɔ. 5Na Yesu dwuli berɛ nen, ɔtole ye ti anwuro, onwuni ye, na osele ye kyɛ, “Sakeo, dwu bra ndɛndɛ! Ofikyɛ w’awuro yeɛ ɔsɛ kyɛ mesikye ɛnɛ ɔ.” 6Yiti odwuli ase ndɛndɛ, na olele Yesu wɔ anigye nu. 7Na ɛlɔen ne nwuni ye sɔ nen, bɛ mukoraa bɛyɛle nwuhunwuhu kyɛ, “Biaa bɔnefoɛ he yeɛ wahɔ waasikye ye awuro ɔ.” 8Yeɛ Sakeo dwɔso gyinane, na osele Awurade kyɛ, “Ao, Awurade, mefa m’anwonyadeɛ bue mekyɛ ehiafoɛ; na sɛ mafa aminɛlilɛ so male ebie nikyee a, ngɔbɔ ye nwo pɛen nna ngotua ye kerɛ.” 9Na Yesu sele ye kyɛ, “Ɛnɛ kyẽa ye, ngoalelɛ awa awuro he anu, ofikyɛ ye koso ɔte Abraham bosoniɛ. 10#Mat 18.11 Na Sona Awa ne wale kyɛ ɔbaapena ná ode bɛ bɔ bamini ɔ.”
Mina buru ne nwo anyandera
(Mateo 25.14-30)
11Na mmerɛ bɔ begu so betie sɔ dwirɛ nemɔ nen, ɔtoale so buli bɛ anyandera, ofikyɛ né wapingye Yerusalem, yeɛ afei ɛlɔen ne susuli kyɛ Nyameɛ ahennie ne ɔbaaye ye nwo ali berɛ ne ala. 12Yiti osele bɛ, “Dehyeɛ bie tuli atee hɔle dedeede maen bie aso kyɛ ɔkwaamaa bɛfa ye besi hene, ná afei osa ba. 13Na ɔfrɛle ye ngoaa nemɔ anu buru, na ɔmane bɛ mina#19.13: MINA: Ne mina ko te paaniɛ kɔyɛ bosome nza akatuaa. buru, na osele bɛ kyɛ, ‘Ɛ́mɔfa he bɛ́yɔ adwuma kɔpem kyɛ ngɔwa ɔ.’ 14Nakoso ye maen ne anu ama de, né bɛpɔ ye, yiti betuli ɛbɔfoɛ mɔ maa bɛpole ye so bɛɛhane kyɛ, ‘Yɛmbena kyɛ sɔ biaa he odi yɛ so hene.’
15“Na ɔwale kyɛ bɛfale ye besili hene, ná osa wale nen, ɔhyɛle kyɛ bɛfrɛ ngoaa bɔ ɔfale sikaa ne mane bɛ ne bɛbrɛ ye, ná onwu bɔ ebiala afa ayɔ adwuma wanya ɔ. 16Bɔ oli moa ne wale, na osele kyɛ, ‘Me mene, wɔ mina ne, mvasoɛ mina buru awa ye nwo.’ 17Yeɛ osele ye kyɛ, ‘Mmo, akoaa paa! Ɔnate kyɛ ali kãa bie nwo nahorɛ ne ati, nea nguro buru so.’ 18Na bɔ ɔtɔ so nyɔ ne wale oosele kyɛ, ‘Me mene, wɔ mina ne, mvasoɛ mina nnu awa ye nwo.’ 19Na osele ye koso kyɛ, ‘Wɔ koso, nea nguro nnu so.’
20“Yeɛ ko bieku koso wale ɔɔhane kyɛ, ‘Me mene, wɔ mina ne ɛhe. Mvale eduku ngyekyele ye nwo. 21Né mesuro wɔ, ofikyɛ ɛte sona bɔ wɔ dwirɛ yɛ se ɔ; ɛfa bɔ amva ando berɛ ɔ, yeɛ ebu bɔ elluale ɔ.’ 22Na osele ye kyɛ, ‘Wɔ akoaa atianuserɛniɛ! Wɔ bɔbɔ wɔ noa dwirɛ yeɛ ngogyina so ngobua wɔ foɛ ɔ! Ɛse kyɛ nde sona bɔ me dwirɛ yɛ se ɔ, bɔ mefa bɔ mamva mando berɛ ɔ, yeɛ mebu bɔ nnuale ɔ. 23Na nzu ati yeɛ amva me sikaa ne ando sikakorabea ɔ, kyɛ meba a, me sa kɔhã me nikyee ne ye nwo nzihoɛ ɔ?’
24“Na osele bɛ bɔ begyigyi berɛ ne kyɛ, ‘Ɛmɔle mina ne befi ye sa nu, ná ɛ́mɔfa bɛ́ma ko bɔ ole mina buru ne.’ 25(Na besele ye kyɛ, ‘Yɛ mene, naa ole mina buru dada!’) 26#Mat 13.12; Mak 4.25; Luk 8.18 ‘Na mekã mekyire ɛmɔ kyɛ, ebiala bɔ ole bie ne, bɛkɔfa somaa bɛkɔboka ye so; nakoso bɔ olle bie ne, bɔ ole ye ne po, bekole bekofi ye sa nu. 27Na me pɔfoɛ mɔ bɔ né bɛmbene so kyɛ medi bɛ so hene ne de, ɛ́mɔfa bɛ bɛbra wa beehu bɛ me nyunu wa!’ ”
Yesu kɔ Yerusalem ngonim nu
(Mateo 21.1-11; Marko 11.1-11; Yohane 12.12-19)
28Na Yesu hane ɛhe yiele nen, ɔsẽ lili moa kyɛ ɔkɔ Yerusalem. 29Na opingyele Betefage ne Betania, bɔ ɔwɔ bokaa bɔ bɛfrɛ ye Olive Bokaa ne anwo nen, ɔsomane ye asuafoɛ nemɔ nyɔ 30sele bɛ kyɛ, “Ɛmɔhɔ akuraa bɔ ɔwɔ ɛmɔ nyunu dɔ ne anu. Sɛ ɛmɔwura akuraa ne anu a, ɛmɔkonwu afunum akrɔngrɔma bɔ bamenda ye, bɔ sona biala ɔttenane ye so le ɔ. Ɛ́mɔsangye ye bɛ́fa ye bɛbra wa. 31Na sɛ ebie bisa ɛmɔ kyɛ, ‘Nzu ati yeɛ ɛmɔsangye ye ɔ?’ a, ɛmɔhã kyɛ, ‘Awurade hia ye.’ ”
32Yiti bɛ bɔ ɔsomane bɛ ne, besili nu hɔle, na benwuni nikyee biala pɛpɛɛpɛ kyɛbɔ ɔhã hyirele bɛ ne ala. 33Na begu so bɔ bɛsangye afunum akrɔngrɔma ne nen, ye mene mɔ bisale bɛ kyɛ, “Nzu ati yeɛ ɛmɔsangye afunum akrɔngrɔma ne ɔ?” 34Na bebuale kyɛ, “Awurade hia ye!” 35Na bɛfale ye bɛbrɛle Yesu; bɛfale bɛ ndaadeɛ aguasoɛ beguale afunum akrɔngrɔma ne aso, na bɛfale Yesu bɛtenane so. 36Ɔte so ná ɔ́kɔ nen, bɛfale bɛ ndena bɛsesɛle atee ne anu.
37Na opingyele berɛ, nekaa bɔ atee ne torotoro kɔ Olive Bokaa ne anwo nen, asuafoɛ ɛlɔen ne amukoraa bɛhyɛle ye bo belili ahurusi, na bɛbɔle ese bɛyele Nyameɛ ayɛ wɔ anwanwadeɛ mbiri mbiri amukoraa bɔ banwu ye ne anwo, 38#Edw 118.20 kyɛ, “Saleɛ ole Ɛhene bɔ ɔnate Awurade dumaa nu ɔba ye! Asomdwee wɔ nyameɛso, na animnyam wɔ anwuro anwuro!”
39Na Farasiifoɛ bɔ né bɛwɔ ɛlɔen ne anu ne, bɛ nu biemɔ sele ye kyɛ, “Kyerɛkyerɛniɛ, dwudwo w’asuafoɛ nemɔ!” 40Na obuale bɛ kyɛ, “Mekã mekyire ɛmɔ kyɛ, sɛ bemua bɛ noa a, nyɔboɛ mɔ po bɛkɔteatea nu.”
Yesu sũ ma Yerusalem
41Na opingyele kuro ne, ná ɔtole ye nye neane ye nen, osũ mane ye kyɛ, 42“Wɔ, sɛ ɛnɛ ye po yeɛ wɔ bɔbɔ ala ɛse bɔ ɔfa asomdwee ba a, ahaa ɔte paa! Nakoso kekesaala ye de, bafa bafea wɔ. 43Ofikyɛ mmerɛ bie baawa wɔ so, bɔ wɔ pɔfoɛ mɔ bɛkɔyɔ nyinasoɛ bɛkɔfo so bɛkɔwa wɔ nu, bɔ bɛkɔpɛ bɛkɔbra wɔ nwo bekoyia, ná batua wɔ bahã wɔ bamia; 44bekodwiri wɔ bekogua ase, ɛne wɔ mma bɔ bɛwɔ wɔ nu ne, na bɛngɔyakyi nyɔboɛ bɔ ogyi nyɔboɛ so ɔ wɔ wɔ nu; ɔnate kyɛ annwu mmerɛ bɔ ɔlole wɔ ɔɔneane wɔ ne.”
Yesu foa dwadifoɛ fi asɔneyɛɛ sua ne anu
(Mateo 21.12-17; Marko 11.15-19; Yohane 2.13-22)
45Yesu wurale asɔneyɛɛ sua ne anu, na ɔhyɛle ye bo foane bɛ bɔ bɛyɛ nningyein atɔen ne fili berɛ; 46#Yes 56.7; Yer 7.11 na osele bɛ kyɛ, “Bahyerɛ kyɛ, ‘M’awuro te mbaeɛbɔlɛ awuro’; nakoso ɛmɔ de, ɛmɔafa bakakyi awuefoɛ afealeɛ.”
47 #
Luk 21.37
Na daa biala ɔyɛle ngyerɛkyerɛ wɔ asɔneyɛɛ sua ne anu. Né asɔfo mbanyi, ahyerɛlɛfoɛ ne maen mbanyi bɛpena kyɛ ahaa beku ye ɔ, 48nakoso bannya ye nwo ate, ofikyɛ né mmenia ne amukoraa bayɛ asoɛ betie edwirɛ bɔ ɔkã ne.
Избрани в момента:
Luka 19: EBP
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Esahie Bible © Bible Society of Ghana, 2018.