Luka 23
23
Bɛfa Yesu begyina Pilato nyunu
(Mateo 27.1, 2, 11-14; Marko 15.1-5; Yohane 18.28-38)
1Afei mmenia worawora ne amukoraa bedwɔsole, na bɛfale ye bɛhɔle Pilato nyunu. 2Na bɛhyɛle ye bo bɛbɔle ye kwaadu kyɛ, “Akoaa he, yɛhyele ye kyɛ ɔbɔ yɛ maen ne anwo tokuro, na ɔbera mmenia kyɛ nnɛmaa betua toɔ bɛma Kaesare; afei koso, ɔnwa ye ala ole Ɛhene Kristo ne.” 3Yeɛ Pilato bisale ye kyɛ, “Wɔ ole Yudafoɛ Hene ne anaa?” Na obuale ye kyɛ, “Ye ala yeɛ ahã ne.” 4Na Pilato sele asɔfo mbanyi nemɔ ne ɛlɔen ne kyɛ, “Biaa he, me de, mennwu foɛ biala bɔ odi ɔ.” 5Nakoso bɛhane ye serɛserɛ so kyɛ, “Ɔma mmenia yɛ maen ne anwo lɔen; ɔyɛ sɔ ngyerɛkyerɛ ne wɔ Yudea maen nu amukoraa, na ɔhyɛle ye bo Galilea, yeɛ afei wafa waadwu ɛwa po.”
Bɛfa Yesu bɛkɔ Herode nyunu
6Na Pilato tele dumaa Galilea nen, obisale kyɛ, “Biaa he te Galileaniɛ anaa?” 7Na ɔtele kyɛ ofi Herode manzini nu nen, ɔmaa bɛfale ye bɛɛmane Herode, bɔ né sɔ mmerɛ ne, ye koso ɔwɔ Yerusalem ɔ. 8Na ɔyɛle Herode fɛ paa kyɛ wanwu Yesu ɔ, ɔnate kyɛ né wate ye nga, na ɔyɛle kyɛ ɔpena kyɛ onwu ye ɔ, né wahyɛ. Na né ye nye la so kyɛ ɔkɔyɔ nzɛngyerɛnneɛ bie maa okonwu ye. 9Yiti Herode bisale ye dwirɛ pee, nakoso wamma ye mmuayɛɛ biala. 10Né asɔfo mbanyi ne ahyerɛlɛfoɛ nemɔ begyigyi berɛ bɔ bɛbɔ ye kwaadu yeayea paa. 11Na Herode ne ye asraafoɛ bɛpepɛle ye nzoaa, bɛgorole ye nwo; na afei ɔfale ataadeɛ nyemenenyemene bie wurale ye, na ɔmaa besa bɛfale ye bɛɛmane Pilato. 12Na sɔ kyẽa ne ala, Herode ne Pilato bɛfale abiɛngoɛ; ofikyɛ daa ne de, né bɛyaka.
Bebua Yesu ewue foɛ
(Mateo 27.15-26; Marko 15.6-15; Yohane 18.39—19.16)
13Afei Pilato frɛle asɔfo mbanyi nemɔ, maen mbanyi ne ɛlɔen ne maa beyiale, 14na ɔfa tole bɛ nyunu kyɛ, “Ɛmɔfale biaa he bɛbrɛle me, kyɛ ye yeɛ ɔma mmenia bɛyɔ basabasa wɔ maen ne anu ɔ. Na ɛ́mɔtie, mabisabisa ye dwirɛ wɔ ɛmɔ nyunu wa, nakoso kwaadu bɔ ɛmɔafa babɔ biaa he ne, mennwu kyɛ odi nu biala nwo fɔ ɔ. 15Na sɔ ala yeɛ Herode koso wannwu kyɛ odi fɔ ɔ; yiti ɔmaa besa bɛfale ye bɛbrɛle yɛ. Na ɛ́mɔtie, ɔyyɔle nikye fee bɔ ɔfata kyɛ beku ye ɔ. 16Yiti ngofi ye mbire, ná mayakyi ye.” 17[Na aluolue ne anu, né odi kyɛ ɔyakyi kukununiɛ ko ɔma bɛ.]#23.17: Tete Ahyerɛlɛ ne bie fa ngyekyɛmuɛ 17 boka so.
18Na bɛ mukoraa bɛbɔle nu bɛteane nu kyɛ, “Ye akoaa he fi berɛ, ná yakyi Baraba ma yɛ!” 19(Ɔte ebie bɔ né wayɛ lɔen watia awaen ne wɔ kuro ne anu ɔ; afei koso né wali awue; yiti né bafa ye bato kuku nu.)
20Né Pilato pena kyɛ ɔyakyi Yesu, yiti obisale bɛ bieku; 21nakoso bɛteateane nu kyɛ, “Bɔ ye mmeamudua nu! Bɔ ye mmeamudua nu!” 22Obisale bɛ ye pɛen nza so kyɛ, “Nzu ɔ? Nzikyɛ bɔne yeɛ wayɔ ɔ? Me de, mennwu nikyee biala bɔ wayɔ bɔ ɔfata kyɛ beku ye ɔ; yiti ngofi ye mbire, ná mayakyi ye.” 23Na bɛhɔle so bɛteateane nu besele kyɛ, odi kyɛ bɛbɔ ye mmeamudua nu; na dede bɔ bɛyɔle ne, ɔbole ye deɛ ne aso. 24Yiti Pilato buale ndɛen, kyɛ bɔ bɛpena ne, wayakyi nu wama bɛ. 25Na ɔyakyili biaa bɔ ɔnate ɛlɔenyɛlɛ ne awuelilɛ ti bafa ye bato kuku nu ne mane bɛ, kyɛbɔ bɛsrɛle ye ne ala; nakoso Yesu de, ɔyele ye mane bɛ kyɛbɔ bɛpena ne.
Bɛbɔ Yesu mmeamudua nu
(Mateo 27.32-44; Marko 15.21-32; Yohane 19.17-27)
26Na bɛ́fa ye bɛ́kɔ nen, bɛhyele Simɔn bie bɔ ofi Kirene, bɔ né ofi namue nu ɔba ɔ, na bɛfale mmeamudua ne bɛtole ye so, kyɛ ɔsoa li Yesu si.
27Na maen ne anu mmenia pee lili ye si, yeɛ mmrasua bɔ bɛbɔ awuye ná besu ye ɔ koso. 28Nakoso Yesu berele ye nye neane bɛ sele kyɛ, “Yerusalem mmaa mmrasua, nnɛma ɛmɔsu me, na mmom ɛ́mɔsu ɛmɔ bɔbɔ ɛmɔ nwo ɔne ɛmɔ mma mɔ!. 29Na ɛ́mɔtie, mmerɛ bie ɔ́ba, bɔ bɛkɔhã kyɛ, ‘Mmotaen mɔ, yeɛ koɛ mɔ bɔ banwo ba koraa, ɔne nyɔfone mɔ bɔ bɛnnone bɛ le ne, banya saleɛ!’ 30#Hos 10.8; Nye 6.16 Yeɛ bɛkɔhyɛ ye bo bɛkɔhã bekohyire mmokaa kyɛ, ‘Ɛ́mɔdwiri bégua yɛ so!’ ɔne pambaa mɔ kyɛ, ‘Ɛ́mɔfa yɛ bɛ́fea!’ 31Na sɛ bɛfa ɛhemɔ bɛyɛ bakaa monɛ a, né bakaa wuruwaa de bɛkɔyɛ ye sɛ?”
32Na bɛfale bɔnefoɛ nyɔ koso bɛbokale ye so bɛhɔle, kyɛ bɛkwaahũ bɛ. 33Na bedwuli nekaa bie bɔ bɛfrɛ berɛ “Tire Kokuroka so,” na berɛ yeɛ bɛbɔle ye ne bɔnefoɛ nemɔ mmeamudua nu ɔ: ko wɔ ye famaa so, yeɛ ko koso wɔ ye bɛen so. 34#Edw 22.18 Na Yesu hane kyɛ, “Baba, fa kyɛ bɛ, ofikyɛ bɛnze bɔ bɛyɔ ɔ!” Na beguale serewa bɛhyɛle ye ndaadeɛ ne bɛfale.
35Né mmenia nemɔ begyigyi berɛ bɛnea. Na mbanyi nemɔ gorole ye nwo kyɛ, “Olele ebiemɔ, sɛ ye ole Kristo ne bɔ Nyameɛ aneanea nu aye ye ne a, maa ole ye nwo e!” 36#Edw 69.21 Asraafoɛ nemɔ koso gorole ye nwo, na bɛwale ye nwo berɛ bɛɛmane ye nzaa kekarekekare bie, 37na besele kyɛ, “Sɛ ɛte Yudafoɛ hene a, de wɔ nwo e!” 38Na bɛhyerɛle edwirɛ bie bɛbɔle ye ti so anwuro kyɛ: Yudafoɛ Hene ne ɛhe.#23.38: Ahyerɛlɛ ne bie kã kyɛ: Bɛhyerɛle ye wɔ Hela, Roman ne Hebri dwudwolɛ nu.
39Bɔnefoɛ bɔ bɛbɔle bɛ mmeamudua nu ne, bɛ nu ko bɔle ye alapaa kyɛ, “Aso nna wɔ ole Kristo ne anaa? Pepɛ de wɔ nwo ná de yɛ koso e!” 40Nakoso ko ne buale ye hwili ye nyunu kyɛ, “Enzuro Nyameɛ hɔ ɔ, kyɛ foɛ komapɛ ne ala yeɛ bafa babua wɔ ɔ? 41Yɛ deɛ ne de, ɔfata yɛ; ofikyɛ bɔ yayɔ ne, ye nwo akatuaa yeɛ yanya ye ne; nakoso biaa he de, ɔyyɔle bɔne nikyee biala bɔ ɔtte mayee ɔ.” 42Na osele kyɛ, “Yesu, sɛ ɛba w’ahennie nu a, kaye me.” 43Na obuale ye kyɛ, “Nahorɛ nu, mekã mekyire wɔ kyɛ, ɛnɛ kyẽa ye, ɛkɔboka me so wɔ Paradise.”
Yesu wue
(Mateo 27.45-56; Marko 15.33-41; Yohane 19.28-30)
44Kɔyɛ eyiagyina ne, awosii katale aseɛ so amukoraa maa oodwuli nnɔnmmiɛnza. 45#Ɛks 26.31-33 Awosii katale eyia so, na ɛtena bɔ ɔpɛ asɔneyɛɛ sua ne anu ne, nu suale nyɔ. 46#Edw 3.5 Afei Yesu teane nu serɛserɛ kyɛ, “Baba, wɔ sa nu yeɛ mefa me sunzum mewura ɔ!” Na ɔhane ɛhe ne, ɔhale nu.
47Na asraafoɛ ɛyaa so panyi ne nwuni bɔ wasi nen, ɔyele Nyameɛ ayɛ, na ɔhane kyɛ, “Amba, biaa he te teneneeniɛ!”
48Na mmenia amukoraa bɔ bɛwale berɛ kyɛ bɛbaanea bie ne, benwuni bɔ wasi nen, bɛfale bɛ sa befifini b’ahone befili berɛ bɛhɔle. 49#Luk 8.23 Na ye mmango amukoraa ne mmrasua bɔ belili ye si befili Galilea ne, begyinagyinane nziɛ nziɛ yeɛ bɛneane bɔ ɔhɔle so ne ɔ.
Besie Yesu
(Mateo 27.57-61; Marko 15.42-47; Yohane 19.38-42)
50Na tie, biaa bie bɔ bɛfrɛ ye Yosef bɔ ofi Yudafoɛ kuro Arimatea so, bɔ ɔte badwafoɛ nemɔ anu ko, bɔ ɔte sona paa ná ɔtengyɛ ɔ, 51bɔ ye de wambene bɛ porɛ ne bɛ yɔleɛ ne aso ɔ, né ye de ɔ́nwondɛ Nyameɛ ahennie ne. 52Sɔ biaa ne hɔle Pilato berɛ ɔɔsrɛle ye kyɛ ɔfa Yesu fuin ne ma ye. 53Yeɛ ɔyele fuin ne wale ase, ɔfale nwera kyekyele ye nwo, na ɔfale ye ɔɔtole asieleɛ bɔ bapɛ ye nyɔbotaen nu ɔ nu. Né bɛffale ebiala bɛttole nu le. 54Né ɔte anwoboaboa kyẽa, bɔ afofikyẽa ne wapingye ɔ.
55Na mmrasua bɔ bɛ ne Yesu fili Galilea bɛwale ne, bɛhɔ bɛɛneane asieleɛ ne, ɔne kyɛbɔ bɛfale ye fuin ne bɛtole nu ɔ. 56#Ɛks 20.10; Deut 5.14 Afei besa bɛhɔle beesiesiele ayirefona ne sakyeɛfona. Na afofikyẽa ne, belele bɛ nwome kyɛbɔ mmeraa ne te ne.
Избрани в момента:
Luka 23: EBP
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Esahie Bible © Bible Society of Ghana, 2018.