MATHIUS, NOPUKU AFASAO SORE, 11
NOPUKU AFASAO SORE, 11
1ANE nei nimai iai, nibune afasao o Iesu ia niana tagata aia nifakairo ta twelv, aia nifeke none iai keifakairo ma keikova ia umrai sore tshare.
2¶ Iai Joanes nifakarogona ia tafare mukei avere o Kristo, aia nikowna erua o niana tagata aia nifakairo.
3Neitucage iateia, Akoi aia erefia komai mo acime katari ia tasi foci?
4Iesu nifasao neitucage iacrawa, Roro akorua ma fakairo Joanes foci ane iotshi akorua fakarogona ma kowcitia;
5Acre afoimata pouri nakamo foimata merama, ta sape roro erefia, ta leprose penpena erefia, ta tarega tuturi fakarogona erefia, tagata mate kamasike, ia acre konofo ana nokova afasao erefia.
6Ma erefia aia kanatshicina aroto feimacowa avau.
7¶ Hepe acrawa niroro Iesu neikamata keifasao ia amotu tagata afasao ia Joanes, Taha acowa niroro watafa ia tugogau keicitia? Tagasao nigarue ia tumtagi?
8Kaia taha acowa niroro watafa keicitia? Tatane nitaka ia tumega meruru? Kowcitia acre kataka ia tumega meruru konofo efare o fateriki.
9Kaia taha acowa niroro watafa keicitia? Ta profeta? Keini, avau kautucua iacowa aia, ma aia sore kagi ta profeta.
10Ma tenei aia, neisereace o aia, Kowcitia, Avau kawna tshaku fitshicou emoa tshou foimata, aia kapenpena tshow aretu emoa akoi.
11Tamari avau koutucua iacowa, Ia acre nifarere o afine jimra tasi sore kagi Joanes ta Baptiso; kaia aia ta sisi ia tavaka o taragi aia sore kagi aia.
12Ma wamuri anopogera o Joanes ta Baptiso ia nopoge nei ma ta vaka o taragi kofere, ma acre tomatua amo aia ia tomatua tshare.
13Ma iotshi aprofeta ma afasao tapu nifakairo ane komai ia anopogera o Joanes,
14Pe acowa kafarogona tenei ko ta Elaija, acre neitucua aia kamai.
15Aia tshana nontarega keifakarogona, erefia aia fakarogona.
16¶ Kaia ia taha avau katucua fakatagasia o tagata konofo milownei? Acre hepe atamerecriki nokonofo ia merai, ma nokotapa tshare anele.
17Nokoutucua, Acime nifagosia iacowa, ma acowa sekomako iateia, acime nitagi iacowa, ma acowa semakuru mana.
18Ma Joanes nimai sekeina mana ma senumeia mana, ma cre neitucua, Aia niamo tasi agelo isa.
19Ta Nontariki o tagata nimai nokokai ma nokoinumea ma acre koutucua, Kowcitia tatane nokokia fakasore takai, ma nokoinumea fakasore aweina, ta nele o acre niamo mune tsha teriki, ma o tagata isa. Kaia Arapakau kowcitia maganerefia ia niana erecriki.
20¶ Nopogera aia neikamata kaiseciria umrai sore iai ia acre aia neimna nalupai vere sore tshana, ia ane nei, acre sefeimacowa ma senatshicina maganisa tshare;
21Kawe iatakoi Koresin! Kawe iatakoi Bethseta! ma pe avere sore neimna ia akorua milow, neimna ia Tairus ma Saiton acrawa nifeimacowa ma neinatshicina tsharawa maganisa ituai; ma nitagi iateia ia umega mukei ma nokamopaku.
22Kaia avau koutucua iacowa, Fakamata fakasisi o Tairus ma Saiton ia nopoge wamuri, fakamata tshowa sorekagi.
23Akoi ma Kaperneum kosore iluga ia taragi, kateifo akoi iraro ia tiafi sore; ma pe avere sore neimna i akoi, nikeima ia Sotom, aia nokonofo ia nopoge nei.
24Kaia avau koutucua iacowa, Pe fakamata o fanua Sotom fakasisi ia nopoge wamuri, fakamata tshou fakasore.
25¶ Ia nopogera Iesu nifasao neitucage, Avau kabisa iatakoi Tata, Teriki sore o taragi ifanua wararonei, ia ane nei akoi nakafuna anera ia tagata arapakau ma nifakairo, ma akoi nifakairo anera ia atamerecriki.
26Erefia tira Tata, ma akoi neicitiafakarafia keicitia hepra.
27Ane iotshi neitufwa avau ia tshaku Tata, ma jimra tatane tasi nakeiro ta Nontariki kaia Tamana ana; foci jimra tasi tatane nakeiro Tamana kaia ta Nontariki ana, ma aia foci ta Nontariki kafakairo aia.
28¶ Komai iatavau acowa iotshi vere sore keitomea ma amoga, ma avau katufwa acowa kogapu.
29Amo acowa tshaku tererakou amoga, etoutari avau; ma avau kuroto mugaro ma totonu, ma acowa kamo kogapu ia nokano tshowa.
30Ma tshaku tererakou amoga komeru, ma tshaku amoga komama.
Избрани в момента:
MATHIUS, NOPUKU AFASAO SORE, 11: ANT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте