Yowanane 12
12
Mariya udi wela Yezu manananshi ku makasa
(Mat 26.6-13; Mar 14.3-9)
1Matuku asambombu kumpala kua tshibilu tshia Dipita dia Maweja-Nangila, Yezu kuya ku Betanya#12.1 Tangila Mar 11.1 ne diumvuija. kuvua Lazare, uvuabu babishe ku lufu awu, musombe. 2Muaba awu, Marte uvua mumulambile biakudia. Lazare uvua umue wa ku bantu bavua ku mesa ne Yezu. 3Mariya kuangata tshia bibidi tshia litre wa manananshi a mushinga mukole, avuabu kabayi basambakaja ne tshintu tshikuabu to. Kuelaye Yezu ku makasa. Pashishe kuakupulaye ne nsuki yende.#12.3 Fuanyikija ne Luk 7.37-38. Nzubu mujima kuwula ne mupuya wa manananshi. 4Umue wa ku balongi ba Yezu, diende Yudase Iskariyote — ke uvua ne bua kumuelela tshitungu, — kuambaye ne:
5— Kabavua mua kupana manananshi aa ku mushinga wa nkanu mitoke ya mushinga mukole nkama isatu, bua kuyipesha bapele bua tshinyi?#12.5 nkanu mitoke ya mushinga mukole: tangila Mar 6.37 ne diumvuija.
6Yudase kavua wamba nanku bualu uvua usumpakena bapele to. Kadi uvua muivi. Uvua mulami wa tshibutshilu, wiba bivuabu batekamu. 7Kadi Yezu kuamba ne:
— Mulekelayi! Enze tshidibu ne bua kuenza dituku dia kunjikabu. 8Nenuikale ne bapele matuku onsu pamue nenu,#12.8 Fuanyikija ne Diel 15.11. kadi meme kanuakuikala nanyi matuku onsu.
Badi belela Lazare tshitungu
9Bena Yuda bavule kumvua lumu ne: Yezu udi ku Betanya. Kuyabu muaba awu, kabayi baya amu bualu bua Yezu nkayende to, kadi kabidi bua kumona Lazare uvua Yezu mubishe ku lufu. 10Ke bamfumu ba batuangaji kumyuangana bua kushipesha Lazare kabidi. 11Bualu bena Yuda ba bungi bavua bumuke kudibu bualu buende, bitabe Yezu.
Yezu udi ubuela mu Yerushalayime
(Mat 21.1-11; Mar 11.1-11; Luk 19.28-40)
12Butshia, bantu bavule bavua bavuile tshibilu tshia Dipita dia Maweja-Nangila, kumvuabu ne: Yezu mmufike ku Yerushalayime. 13Kuangatabu malala a mabue, kuyabu kumuakidila, bela mbila ne:
— Tutumbishayi Mvidi Mukulu! Mvidi Mukulu ele muntu udi ulua mu dina dia Maweja-Nangila lupemba! Mvidi Mukulu ele mukalenga wa Izrayele lupemba!#12.13 Fuanyikija ne Mis 118.25-26.
14Yezu kusangana muana wa nyama wa mpunde, kubandapu! Mudibu bafunde mu Mukanda wa tshijila ne:
15“Bena Siyone, kanutshinyi!
Tangilayi, ke mukalenga wenu udi ufika!
Mmusombe pa muana wa nyama wa mpunde.#12.15 Zek 9.9.”
16Balongi bende kabavua banji kujingulula bionsu abi to. Kadi Yezu mumane kupeta butumbi buende, ke kushishabu kuvuluka ne: mu Mukanda wa tshijila mbamane kufunda malu aa bualu buende. Nanku malu aa nunemeke umvua mukanda muambe bualu buende.
17Bantu bonsu bavua ne Yezu pavuaye mubishe Lazare ku lufu, mumupatule mu lukita bavua balonda bivuabu bamone. 18Ke pavua bantu ba bungi balue kuakidila Yezu. Bualu bavua bamane kumvua muvuaye muenze bualu ebu bua dikema. 19Ke Baparushe kuambilangana ne:
— Nudi numona ne: kanuakupeta tshipeta tshimpe to. Bantu bonsu bakadi bamulonda!
Bamue bena Ngreke badi bakeba Yezu
20Bamue bena Ngreke#12.20 bena Ngreke: bantu aba bavua baya kuenza tshibilu tshia Dipita dia Maweja-Nangila. Nansha kabayi bena Yuda, bakavua bitabe malu a bena Yuda. bavua munkatshi mua bantu bavua baye kutendelela ku Yerushalayime mu tshibilu. 21Kuyabu kudi Filipe (uvua wa mu Betsayida mu Ngalileya), bamuambila ne:
— Mukalenga, tudi basue kumona Yezu.
22Filipe kuya kuambila Andre, pashishe bonsu babidi kuya kuambila Yezu. 23Yezu kubandamuna ne:
— Diba ndimane kukumbana mpindiewu didi bantu ne bua kutumbisha Muana wa muntu. 24Ndi nnujadikila bulelela ne: lutete kaluyi lumata mu buloba, lufila, ludi lushala nkayalu. Kadi lolu lutue, ludi lumenesha ntete ya bungi. 25Muntu udi unanga muoyi wende neaujimije. Kadi muntu udi kayi unanga amu muoyi wende, neaulame too ne ku muoyi wa tshiendelele.#12.25 Fuanyikija ne Mat 10.39; 16.25; Mar 8.35; Luk 9.24. 26Pikala muntu musue kungenzela mudimu, udi ne bua kundonda. Nanku muena mudimu wanyi neikale kabidi muaba undi. Tatu wanyi udi utumbisha muntu udi ungenzela mudimu.
Yezu udi wambila bantu bua lufu luende
27— Mpindiewu muoyi udi undubakana. Nengambe tshinyi? Nengambe ne: Tatu unsungidile ku bidi ne bua kuenzeka diba edi anyi? Kadi tshindi mufikile panu tshidi nangananga bua kupitshila mu diba edi dia makenga. 28Tatu, tumbisha dina diebe!
Kumvuabu diyi difumina mu diulu ne:
— Ndi mumane kuditumbisha, nenditambishe tshiakabidi. 29Bantu bavule bavua muaba awu bumvua diyi adi, kuambabu ne:
— Ndikubakuba dia mvula!
Bakuabu bavua bamba ne:
— Mutumibue wa Mvidi Mukulu uvua uyukila nende!
30Kadi Yezu kubambila ne:
— Diyi edi kadiena diamba nanku bualu buanyi to, kadi bualu buenu. 31Mpindiewu ke diba dialumbuluishabu bantu. Mpindiewu nebipate mfumu wa panuapa. 32Kadi meme, pangelabu kulu, nenkoke bantu bonsu kundi.#12.32 pangelabu kulu: miaku eyi idi yumvuija malu mishindu ibidi, mudi Yowanane muenze misangu mivule (tangila 3.3,8 ne diumvuija). Apa idi yumvuija mudibu bela Yezu kulu ku mutshi mutshiamakane, apa mudiye ubuela mu butumbi buende (tangila kan. 33; 3.14-15; 8.28.)
33(Yezu uvua muambe nanku, bualu uvua musue kuleja bantu lufu luvuaye ne bua kufua.) 34Bantu bavule kumuandamuna ne:
— Tudi balonge mu Mikanda ya mikenji yetu ne: Meshiya neashale ne muoyi tshiendelele.#12.34 Tangila Mis 110.4; Yesh 9.6; Dan 7.14. Nanku muudi mua kuamba ne: Muana wa muntu nebamuele kulu mbishi? Awu Muana wa muntu nnganyi?
35Yezu kubandamuna ne:
— Butoke butshidi munkatshi muenu, kadi mbua katupa kipi. Endayi panutshidi ne butoke, bua miidima kuyinujikididi. Bualu muntu udi wenda mu miidima kena mumanye kudiye uya. 36Itabayi butoke panutshidi nabu, bua nuikale bana ba butoke.
Bena Yuda kabena bitaba Yezu
Yezu mumane kuamba nanku: kumukaye, kuyaye kubasokoma. 37Nansha muvuaye muenze bishima bia bungi bobu batangila, kabavua bamuitaba to. 38Ke muvua miaku ya muambi Yeshaya ikumbana ne:
“Maweja-Nangila, udi muitabe bituvua bambe nnganyi?
Uvua Maweja-Nangila muleje bivuaye musue kuenza nnganyi.#12.38 Yesh 53.1, muvua bena Ngreke bafunde kale.”
39Kabavua mua kuitaba to, bualu Yeshaya uvua muambe kabidi ne:
40“Mvidi Mukulu uvua mubafofamije mesu,
mututubije lungenyi luabu,
bua mesu abu kaamonyi,
lungenyi luabu kalujinguludi bualu,
bua kabapinganyi kundi,
bua meme kubasungidila.#12.40 Yesh 6.9-10, muvua bena Ngreke bafunde kale.”
41Yeshaya mmuambe nanku bualu uvua mumone butumbi bua Yezu, muambe kabidi bualu buende.
42Kadi nansha munkatshi mua bamfumu ba bena Yuda, ba bungi kuitaba Yezu. Kadi kabavua badileja patoke. Bualu bavua batshina Baparushe bavua mua kubipata mu nzubu wa kutendelela.#12.42 Tangila 9.22. 43Bavua basue nangananga bua bantu babanyishe, pa mutu pa kukeba bua Mvidi Mukulu abanyishe.
Muaku udi ulumbuluisha bantu
44Yezu kuela diyi dikole ne:
— Muntu udi ungitaba, kena ungitaba nkayanyi, kadi udi witaba kabidi uvua muntume. 45Muntu udi ummona, udi umona kabidi uvua muntume. 46Meme ndi mufike pa buloba bu butoke, bua muntu yonsu udi ungitaba kashadi mu miidima. 47Padi muntu umvua miaku yanyi, kayi uyikumbaja, meme tshiena mua kumupisha ku tshilumbu to. Bualu meme ndi mufike bua kusungidila bantu. Tshiena muvue kubapisha to. 48Muntu udi umbenga, kayi wanyisha miaku yanyi, udi ne mumuluishi: muaku undi mulongeshe neumupishe dituku dia nshikidilu. 49Bualu tshiena muakule ku bumfumu buanyi nkayanyi to, kadi Tatu uvua muntume ke uvua mumfundile tshimvua ne bua kuamba, nansha kulongesha. 50Ndi mumanye ne: tshidi Mvidi Mukulu ufundila muntu tshidi tshipetesha muoyi wa kashidi. Nanku tshindi ngamba, ndi ntshiamba muvua Tatu wanyi mungambile.
Избрани в момента:
Yowanane 12: TSH96
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Bible avec Livres Deutérocanoniques en Tshiluba © Société Biblique de la R. D. Congo, 1996