Matiu 14
14
De Go Iri Vae Vale Go Jon Na Bapitema
(Maka 6.14-29; Luka 9.7-9)
1Torana ṉalu igogo ne, Erode Ati Antipas i batu lavata ego kena Qalili, i gata topu na pepeu de igogo zazu ia Jesu, 2gonae i sine ne qira basoero zazu ia igo, “Qa nanao valeke dena i Jon na bapitema i too ule napu me bago. Go i ko ne mazala i zazu ne go zazu vari vapoloso ro dena.” 3Tanego Erode to i sine ne qira basoero ia tarina pala Jon, qolo ze seni mana taru ze bara ne. Erode i zazu ne pata dena, tanego i sauna Erodiasi, i qole bana ia Pilipi, kaena Erode. 4Tanego Jon na bapitema i sine bana ne Erode igo, ‘Iki totoloṉo kaega aro qo busia go Erodiasi.’ 5Erode i soko vae vale na Jon, do i sareki ne qira basoero na Jiu, tanego basoero ne iri vaogoto Jon i kaki propeta.
6Do ṉalu musaqara Erode i zazu ne pata gege, sauna nanao taru na musaqara podo ia, sale qole ia Erodiasi i lama veqa e tarakenaqa qira basoero iri teṉo go. Pasi nae Erode i lete kula sivala to, 7gonae igo dena, “Qa odo odo ninidena una teke nigo kaki pata qo pene go.”
8Iago ilulua pata i soko go sinana i sine bana nego, sale qole ia ne igo, “Qa soko ono teke nava kuzuku na Jon na bapitema loborona kaki kameka ebata ninidena so!”
9Pata i pene go sale qole dena, i va maqate batu lavata Erode, do tanego sauna odo odo i zazu ne ze go tarakenaqa qira basoero iri teṉo go, iago i sine ne qira basoero zazu ia, “Teke ne pata i soko go sale qole ne, 10zae bara ne mana za kodake kokolina Jon na bapitema.” 11Gonae iri taru me ze ebata kuzuku ne, mana iri lama teke ne sale qole ne, mana iza teke ne sinana go. 12Ria disipoloro ia Jon iri lama pala tokamana mana za vovua ne, taramuzina iri za pepeu ne Jesu pata i doka go Jon na bapitema.
Jesu Iva Ṉaṉa Qira Lima Mao Basoero
(Maka 6.30-44; Luka 9.10-17; Jon 6.1-14)
13Ṉalu Jesu i gata soba tarama na pata i doka go Jon na bapitema, i age kaki koluka mana i za ko vamiki e de iki koe kaega basoena. Do ṉalu basoero ne iri gata soba de i zae go Jesu, iri kasine komala ro ria iri goe sasaniqa mana iri kale muzi ne ia go. 14Ṉalu Jesu i za dokae rikisi ne i mia qira topu sasakata basoero, puṉuna i lete nanao qira mana i vatavoisi qira vano iri mokoso go.
15I raravi zato ia ria disipoloro ia iri lama sine ne Jesu, “I raravi to dena, mana de qata lama koego dena i kaega ka pata gege na! To turi vagado qira qe basoero ne komala ro ria, go tara ria za volia kapata tarina ge go.”
16Do Jesu i vataule ne qira igo, “Basoero dena ki tora kaega tuna turi vagado qira go, ramu to muna teke ne qira pata gege.”
17Disipoloro ne iri go, “Remu, kalima bureri mana karua iṉana so i ko ne qemu go.”
18“Pala me dena,” igo Jesu. 19Gonae i sine ne qira basoero ne tarina kolokue seuseu ne, i pala kalima bureri mana karua iṉana i kakadekaqe rani ne mana i seko velaka zaqe God. I pasia bureri ne mana i teke ne qira disipoloro ia, mana disipoloro ia iri ara kena ne qirae go basoero ne. 20Osiqira basoero iri ṉaṉa mana iri kuma lupo. Disipoloro ia iri soqe pata gege i kosivala go mana iri vapurake torana manoga karua ebata. 21Topu qira valekero iri ṉaṉa go torana lima mao ria, salero mana qolero gogone iriki qana qira kaega.
Jesu I Zaza E Popoko Na Masi Ne
(Maka 6.45-52; Jon 6.15-21)
22Jesu gonae i sine ne qira disipoloro ia tarina goe koluka ne mana kava kenaqa za kene tepa na masi pipika ne, tanuna ne tina turi vagado ne qira basoero ne. 23Taramuzina i vagado lupo qira basoero ne, i popoka za kaki kubolo tanuna mana i za pene, go i doka so kuse go, 24torana nae koluku iri goe go disipoloro ne i lete za bana to varilobori na masi pipika ne, mana i pala qira tubitubi lavata ro tanego iri sota seva ne.
25Kaki dia so varilobori na kapisa mana kaonomo koloko sarusaruku Jesu i lama e de iri koego, i zazae masi ne. 26Do ṉalu disipoloro ia iri miasoba ia, i zazae go masi ne, iri lete sareki, iri koru valavata, “Manuru,” iri go, mana iri lete le ne to sareki.
27Jesu i katikili seko me, “Valosia nanao qamu, era so dena, muniki sareki!”
28Gonae Pita i seko me, “Batu! Ṉalu go i aro ogoto, sine nava mego ma zaza atue deqo koego aro.”
29Jesu i vataule ne, “Lama to aro!” Gonae Pita i kasi ne koluka ne mana i zazae masi ne go mara za soba Jesu igo. 30Do ṉalu Pita i mia go moqere na sokoro ne, i lete sareki mana i tupi zunu za masi ne, iago i koru zaqe Jesu, “Batu, vakavele ava!”
31Katikili so Jesu i kazara mana i pala zaqe karisina Pita mana i sine ne, “Vaogoto aro iara lete suka so! Avigo tane i ruama nanao mu na?”
32Ṉalu iru keba ule za loboro koluka ne, masi ne i bule, tana go sokoro ne i le to. 33Gonae disipoloro iri koego koluka ne iri vazaka Jesu. Iri go dena, “Pata ogoto bana, aro to qo Tuna go God!”
Jesu I Va Tavoisi Qira Vano Mokoso Na Genesaret
(Maka 6.53-56)
34Iri kavae masi pipika ne mana iri za dokae kaki dia iri vitono ze Qenasaret. 35Basoero na komala nae iri mia rove Jesu, gonae iri vazao sekoe osina komala i garogaro go, go tarina lulu qira me basoero mokoso de ikoego Jesu. 36Basoero ne iri pene Jesu go mara vamao ne qira vano mokoso mara ria siba tumu na roku ia, go tina va tavoisi qira, mara osiqira ria iri siba go, iri tavoisi lupo to.
Избрани в момента:
Matiu 14: VRSNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
The New Testament in Varisi, Solomon Islands © Bible Society of the South Pacific, 1994, 2004.