MI CILIMA 2
2
1Lanwani tanpoli leni ki tinga leni yaala n ye lienni kuli den tagi ki gbeni. 2U Tienu n den baa soani yaa tuonli kuli, o den soani ki gbeni li. Li daleleeli daali mo o den fuodi.#Ebl 4.4,10 3U Tienu den seligi li daleleeli ki gagidi li kelima o den cedi o tuonli, wan den tagi ki tieni yaala kuli, ki fuodi laa daali.#Ñam 20.11
Edena koaŋamu
4Line n tie tanpoli leni ki tinga yaa cilima, ban den tagi yaa yogunu, Li Miali Diedo U Tienu n den tagi ki tinga leni tanpoli yaa yogunu. 5Fatuuguba kuli daa den ye ki tinga nni, muadiba kuli mo daa den pudi. Li den tie kelima Li Miali Diedo daa den teni ke ki taaga mini ki tinga nni, niloba kuli mo daa den ye ki baa ko ki tinga.
6Ama ku mangu yen fii ki luoni ki tinga nni ki soangi mi tinfanma kuli. 7Li Miali Diedo den taa ki tinga yaa tama ki tagi o nilo. O den fuo o miani nni li miali yaa fuoma ke o ja den tua yaa miali n fo.#1Kol 15.45 8Lanwani Li Miali Diedo U Tienu den buli u koaŋamu Edena kani ki tiegi puoli po. O den taa wan den tagi yaa nilo ki kuani o lienni.
9Li Miali Diedo U Tienu den teni ke i tiidi buoli kuli pudi ki tinga nni, yi ŋani bu nunbu po ki go ŋani mi jiema po. Li miali yaa tibu den se u koaŋamu siiga nni leni mi ŋanma leni mi biadima yaa bandima yaa tibu kuli.#Doa 2.7; 22.2,14 10Yaa kpenu n puubi den ñani Edena nni ki baa soangidi u koaŋamu. Likani, u den boagidi ki tua kpentaana naa. 11U kpenkpialu yi Pisona, li tie yaa kpenu n lindi Hafila diema kuli, wula n ye naankani. 12Laa diema yaa wula ŋani cain. Yaa tibu yaa sinma n yi *bidelioma leni yaa tanmoanli n yi onigisi kuli ye laa diema nni.
13U kpenlielu yaa yeli yi Gihoni, wuni n tie yaa kpenu n lindi Kusa yaa diema kuli. 14U kpentaalu yaa yeli yi Hidekela, wuni n tagi Asili yaa puoli po. U kpennaalu mo yaa yeli yi Yufilata. 15Li Miali Diedo U Tienu den taa o nilo ki kuani o Edena yaa koaŋamu nni ke wan yaa ko ki go guu u. 16Li Miali Diedo U Tienu den bili o nilo po yaa ñoabonli n tie na: «A baa fidi ki je u koaŋamu yaa tiidi bonluonkaala kuli. 17Ama ŋan da ŋmani mi ŋanma leni mi biadima yaa bandima tibu yaa bonluonkaala kelima a yaa ŋmani bu yaa daali, a baa kpe.»
18Li Miali Diedo den yedi: «Laa ŋani ke o nilo n yaa ye o bebe. N baa tagi opo o todika yua n naani leni o.» 19Li Miali Diedo U Tienu den taa ti tandi ki tagi ti moayandi kuli leni tanpoli yaa bonyugiditi kuli. O den teni ke bi cua o nilo kani ke wan le wan baa cili ba yaa yela. Ke bonfuodila kuli n yaa kubi o nilo n baa cili o yaa yeli. 20O nilo den puni ti denyandi kuli a yela leni tanpoli bonyugiditi kuli leni ti moayandi, ama waa den laa o yuli po, yaa todika n naani leni o. 21Lanwani Li Miali Diedo U Tienu den teni ke mi goacianma cuo o ja ke o guani. O den ñani o kalu kpaba siiga nni kpabiyenli ki teni ke ti gbanandi go guani ti kaanu ki ŋanbi. 22Li Miali Diedo U Tienu den taa li kalikpabili, wan den ñani yaali o ja kani ki tagi o pua ki gedini o o ja kani. 23O ja den yedi:
«Moala, diidi yua n tie n kpabili yaa kpabili,
Leni n gbanandi yaa gbanandi.
Bi baa cili o yeli o pua,
Kelima bi den ñani o o ja yaa niinne.»
24Li tie lani yaa po ke o ja baa ña o baa leni o naa kani ki taani leni o pua ban tua gbananyendi.#Mat 19.5; Mak 10.7-8; 1Kol 6.16; Efe 5.31
25O ja leni o pua kuli den ye mubima ke fe ki pia ba lipo.
O ja leni o pua miidi U Tienu kuali
Избрани в момента:
MI CILIMA 2: GUX03
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Gulmancema Bible © Bible Society of Burkina Faso, 2003.