Лукастар 20
20
Пгучібе пало Ісусоскєрі влада
1Ачіляпес андро єкг дівес, кана Ісус сікавелас андро храмос ле нийпос і вакєрелас ленґє Радишаґоскєро Гійрос, кє Лесте подавле єкг баредер рашая, танітова Законоскєре, а те пгуредера. 2І пгучле Лестар:
— Пген аменґє, сава владага Ту када саворо кєрес? І ко диня Тукє кади влада?
3Акор Ов ленґє пгендя:
— Те Ме пгучава тумендар, а тумен пгенен Манґє — 4катар Іоанн хундя пескєрі влада те болавен, пало нєбос вай ле манушендар?
5Оне кєздинде те вакєрен машкар песте: «Те амен пгенага: "Пало нєбос", акор Ов пгучела: "Акор соске тумен на патянділян Лескє?" 6Те пгенага: "Ле манушендар", акор саворо нийпос марела амен ле баренца, бо оне патян, со Іоанн есас пророкос».
7Акор оне отпгенде:
— На джянас, катар.
8Акор те Ісус ленґє пгендя:
— І Ме на пгенава туменґє, сава владага Ме када кєрав.
Вакєрібе пало бувтякєре андре дракгуні
9Ов кєздиндя те розвакєрен ле нийпоскє када вакєрібе:
— Єкг мануш садзіндя дракгєнґєро садос. Ов диня лес важо лове ле бувтякєренґє, а коркоро ґейля пре цузо пгув про бутенґєрі овра. 10Кана авля овра, ов бічадя ле совґас ко дракгара, гой оне мі ден лескє ода, со поперелпес лескє ле увліпнастар. Та бувтяра ізмарде ле совґас і бічаде лес чувче вастенца. 11Акор ов бічадя минґ єкгєс совґас, та оне те лес ізмарде і кєрде лега пре ладж, а паліш бічаде лес чувче вастенца. 12Акор ов бічадя трітонес, та оне те лес фес ізмарде і чіде лес аврі андало садос.
13Акор о хулай дракгєнґєро пгендя: «Со манґє те кєрен? Бічавава мійре камаде чаворес, талам, лестар оне ладжянапес». 14Та кана бувтяра дикгле ле час, кєздинде те вакєрен єкг аврескє: «Саворо када хулаїпе маїнел те ачен лескє. Авас, мурдарага лес, гой ада саворо те ачел аменґє». 15Акор оне чіде лес аврі андало садос і мурдарде. Со канакє кєрела ленца дракгєнґєро хулай? 16Ов авела і мурдарела одален бувтякєрен, а садос отдела авренґє.
А одала, кай шунде када, пгенде:
— Те на ейл айсо!
17Та Ісус дикгля пре ленде і пгендя:
— Сар те ахальон када пісіме: «Бар, саво отчіде мурніка, ачіля єкг главнедер андро углос»? 18Сако єкг, ко перела про ода бар, розмарелапес, а пре касте ов перела, одалес затасавела.
19Танітова Законоскєре те єкг баредер рашая ахаліле, со ода вакєрібе Ісус розвакєрдя пал ленде, і важ ода камле єкгваресте те пганден тейле Лес, та даранас ле нийпостар.
Пгучібе пало ода, чі кампел те потінен налогі
20Важ ода оне кєздинде те дикгєн пало Ісус і бічаде кє Лесте ле манушен, саве сікавнаспес, со оне гіне чачібнаскєре, гой те худен ле Ісус про лав і те ден Лес аврі ле владакє андро васта рімоскєре владаріскє. 21Оне пгучле Лестар:
— Танітов, амен джянас, со Ту міште вакєрес і міште сікавес, і на дикгєс про муя, а чачес сікавес Девлескєро дром. 22Чі сабано аменґє те ден налогос імператоріскє вай наа?
23Ісус дикгля ленґєро буджяндіпе і важ ода пгендя ленґє:
24— Сікавен Манґє дінарій. Каскєро муй і каскєро нав пре лесте?
Акор оне отпгенде:
— Імператоріскєро.
25А Ов ленґє пгендя:
— Важ ода ле імператоріскє ден імператоріскєро, а Девлескєро — ле Девлескє.
26Оне на бійріненас Лес те хунде про лав анґлал о нийпос, чудаліненаспес, сар Ов отпгендя, і заціхісаліле.
Пало ода, сар ушена опре ле мерібнастар о мувле
27Акор подавле ко Ісус варесаве саддукєї (оне вакєренас, со нане уштавібе мувленґєро) і пгучле Лестар:
28— Танітов, Моїсєй пісіндя аменґє, те кє варекасте мерела о пграл, ко саво есас ромні, но на есас ла о чаве, акор ов маїнел те лен ла ромнякє і важ пескєро пграл те ден лакє ле чавен. 29Есас ефта пграла. Першо пграл іля пескє ромня і мувля бі о чаве. 30Паліш те дуйто. 31Те тріто іля ла пескє важо ромня; авка саворе ефтаджяне. Оне саворе мувле і на мукле пал песте ле чавен. 32Паліш мувля те е ромні. 33Важ ода, пало уштавібе ле мувленґєро, каскєрі ой ейла ромні? Бо ой есас ефтаджяненґє важе ромні.
34Ісус ленґє отпгендя:
— Кале векоскєре мануша лен пескє ромнєн і джян роместе. 35А одала, саве ейна достойне те джівен андро авер векос і ейла уштадо опре андал о мерібе, на лена пескє ромнєн і роместе на джяна. 36І на бійрінена іма те мерен, бо оне ейна подобне про анґєла. Оне гіне Девлескєре чаве, бо лен участіє андро уштавібе мувленґєро. 37А ода, со мувле ушена андал о мерібе, Моїсєй сікадя пажо тернячкєнґєро кущос, саво лаболас, кана вічіндя ле Раєс, со ов гіно о Дейл Авраамоскєро, о Дейл Ісаакоскєро і о Дейл Яковскєро. 38Ов о Дейл на ле мувленґєро, а ле джівденґєро, бо пріґ Лесте саворе джівде.
39Акор варесаве танітова Законоскєре пгенде:
— Танітов, Ту міште отпгендял!
40І ніко іма на тромалас те пгучен Лестар ні пал состе.
Ко гіно о Ісус?
41Паліш Ісус пгучля лендар:
— Соске вакєрен авка, со Хрістос гіно о Ча ле Давідоскєро? 42Та Давід коркоро вакєрел андро кніжка Псалмі:
«Пгендя о Рай мійре Раєскє:
Беш пре чачі сийра паж Манде,
43адик на тговава Тийре враген Тукє толо піндре».
44Давід вічінел Лес ле Раєга. Та акор, сар шай Ов авел лескєро Чаворо?
Ісус вакєрел пало буджянде мануша
45Саворо нийпос шунелас ле Ісус, а Ов пгендя Пескєре сікаденґє:
46— Меркіненпес ле танітовен Законоскєрен. Оне камен те пгірен андро діндярдо шукар уравіпе і камен, кана ленґє палікєрен про фовроскєре піяца. Оне бешен про єкг федер тгана андро сінаґоґа і про вічіме дийлос. 47Оне зален пескє ле вдовенґєре кгєра і про якга ле манушенґє буталікпес модлінен. Айсе прелена єкг баредер судос.
Избрани в момента:
Лукастар 20: ЗРБ
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2021 Pioneer Bible Translators