Лукастар 21
21
Вдовакєре дуй хурде копейкі
1Ісус дикгєлас, сар барвале чівкєренас пескєре дари андре храмоскєрі скарбнічка. 2Одя Ов дикгля єкга чора вдова, саві чідя дуй хурде копейкі.
3Акор Ісус пгендя:
— Чачібе пгенав туменґє, со кади чорі вдова чідя єкг бутередер саворендар. 4Бо кадала саворе денас андал пескєро барваліпе, а ой айсі чорі, і чідя саворо, со ла есас про джівіпе.
Ісус вакєрел пало ода, со ейла
5Кана завакєрде варесаве мануша пало храмос, со ов гіно обракіме шукар бароренца те барваліпнага, саве аненас ле Девлескє, Ов пгендя:
6— Авена дівеса, со одалестар, со тумен канакє дикгєн, на ачела бар про бар, — саворо ейла розмардо.
7Оне пгучле Лестар:
— Танітов, кана ода обачелапес? І саво знаменіє сікавела про ода, кана ода маїнел те ачен?
8Ов ленґє пгендя:
— Меркінен, гой ніко тумен те на дилинярел. Бо бутджяне, ко авена андро Мійро нав і пгенена: «Ода Ме» і «Овра іма обачіля». На джян пал ленде! 9Кана тумен шунена пало войни те пал ода, со мануша ачен аврі єкг протів авересте, на даран. Бо саворо када маїнелпес те обачен анґлал, та аґор ачелапес на єкгваресте.
10Ов дуредер вакєрелас кє ленде:
— Джяла нийпос про нийпос і краліпе про краліпе. 11Акор разінелапес е пгув, і андро бут тгана ейла барі бокг те баро насвалібен, а про нєбос ейна страшне і баре знаменія.
12Та анґлал ода, сар маїнел са када те ачен, тговена пре туменде пескєре васта і кєздинена тумен те траден, предена тумен андре сінаґоґі і андре тюрмі, і ліджяна тумен ко краля те ко владара. Саворо када туменца кєрена важ Мійро нав. 13Акор ейла тумен возможность те свідчінен. 14Но на думінен анґлал пало ода, со туменґє те отпгенен. 15Бо Ме дава туменґє айсі ґовді те о лава, со ані єкг тумаре врагендар на бійрінела те отпгенен чі те тердьон аврі анґлал туменде. 16Акор предена тумен тумаре дада, пграла, тумаро чаладос і тумаре барата, а варекас тумендар мурдарена. 17Важ Мійро нав саворе тумен мержінена. 18Та ані єкг бал пал тумаро шейро на проперела! 19Тийрінен, і авка ратинена пескєрі вовді.
20Кана тумен дикгєна Єрусалім, захундо буте суґлядєнца, акор джянен, гой авля овра, кана ов маїнел тейн розрушіме. 21Акор одала, саве гіне андре Іудєя, мі денашен про брегі; ко андро фоврос, мі денашен андал лесте, одала, ко пре маля, те на джян пре лесте, 22бо андре одала дівеса о Дейл воздела ле манушенґє, і акор обачелапес саворо, со гіно пісіме. 23Біда пгаре ромнєнґє і одаленґє, ко дел чувчі те пієн, андро одала дівеса, бо баро пгарібе ейла пре пгув, і руш зчордьолапес пре када нийпос! 24Єкг мануша меркєрена ле шаблятар, а авер манушен спгандена і отліджяна про авер пгув. Єрусалім тапошінена піндренца шільяка мануша, адик на преджяла ленґєрі овра.
Ісус вакєрел пало ода, гой Ов минґ вісальола
25І ейла знаменіє про кгам, про чон те про черхеня, нийпі пгувакєре шунена ровібе морьоскєро ле волнендар і ейна андро смуткос, і на джянена, со те кєрен. 26Акор мануша слабісальона ле даратар, анґлал ода, со авел про цейло светос. Акор те нєбоскєрі зор разісальола. 27Акор дикгєна ле Час Манушенґєрес, саво авел про хмара ле зорага те андре барі слава. 28Кана када саворо кєздинелапес те обачен, ушен і вазден о шейре, важ ода, бо іма пашес тумаро ратипе.
29Паліш Ов розвакєрдя ленґє айсо вакєрібе:
— Дикгєн про інжірос і про саворе дубі. 30Кана пре ленде сікавенпес прайтя, тумен дикгєн ода і джянен, гой пашес о нілай. 31Авка те тумен, кана дикгєна, со када саворо обачелапес, джянен, со іма пашес о Краліпе ле Девлескєро. 32Чачібе пгенав туменґє, минґ на шажнінела када родос, сар када саворо ачела. 33О нєбос те пгув преджяна, а Мійре лава на преджяна.
На совен
34Меркінен пре туменде, гой тумаре їле те на замаренпес чак ле мулатипнага, піїбнага і джівіпнаскєре заботамі, гой ода дівес те на авел пре туменде акор, кана тумен лес на ужарен, 35сар сітка. Ов авела про саворе мануша, саве джівен пре цейлі пгув. 36Міндик авен бодре і модліненпес, гой тумен мієл зор те преджян са, со маїнелпес те ачен, і те тердьон анґлал о Ча ле Манушенґєро.
37Сако дівес Ісус сікавелас андро храмос, а ратяга джялас про Олівково партос і преліджялас одя е раті. 38А сіктосарастар саворо нийпос іскіделаспес андро храмос, гой те шунен Лес.
Избрани в момента:
Лукастар 21: ЗРБ
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2021 Pioneer Bible Translators