Johan 4
4
Samariạ Maejiu
1Jisu do Johan khon hõ bạ̃ṛtiye celayetʼko are bạptisetʼko ona do Phạrusikoko ańjomakatʼ tahẽkana. 2Jisu do apnarte bae bạptisetʼko tahẽkana menkhan uniren celakogeko bạptisetʼko tahẽkana. 3Ado Jisu onae baḍaeketʼ khan Jihudạ Prodes bạgikate arhõ Gạlilteye calaoena. 4Ar Gạlilteye calakʼkan tahẽkan jokhecʼ uni do Samariạ disạm talate sen paromokʼ hoyentaea. 5#Gen 33.19; Josu 24.32 Uni do Samariạkoakʼ Sukhạrko metakʼ mitʼṭecʼ nagrahateye hecʼena. Noa nagraha do Jakob acʼren hopon Joseph okaṭakʼ jaegae emade tahẽkan ona sorrege tahẽkana. 6Ona jaegare Jakobakʼ mitʼṭecʼ kũń tahẽkana. Jisu do dãṛã dãṛãteye laṅgayen khan ona kũń aṛereye duṛupʼena.
Unre ber do tikin amdaj tahẽkana. 7-8Ado Jisuren celako atote jomakʼ kirińko calao akan tahẽkanre mitʼṭen Samariạ maejiu do dakʼ loe hecʼena. Jisu do uniye metadea, “E mại, den ńũi lạgitʼ dakʼ imạńme.”
9 #
Esr 4.1-5; Neh 4.1,2 Uni Samariạ maejiue menkeda, “Iń doń Samariạ maejiukana. Ar Jihudi hoykate cekate am do dakʼem koeyeń kana?” Maejiu do noa iạteye menkeda ente Jihudi ar Samariạko do bako duṛupʼ teṅgonkan tahẽkana.
10Jisu do uni maejiue roṛ ruạṛadea, “Isorakʼ danem baḍaele khan ar okoe am ṭhen dakʼe kokoe kana enḍekhan amge honaṅ uni ṭhen dakʼem koekea ar uni do jiwetʼ dakʼe emkema.”
11Maejiue menkeda, “Menkhan amakʼ ma loloteakʼ hõ coṅ bạnukʼtam ar kũń ma khạndrige. Enḍekhan oka khon ona jiwetʼ dakʼ dom ńamkeda? 12Aleren baba Jakob khon do bam maraṅa. Noa kũń do unigeye emakatʼlea. Uni ar acʼren hoponko noa kũń reakʼ dakʼko ńũiyetʼ tahẽkana ar uniren mihũ meromko hõko ńũiyetʼ tahẽkana.”
13Unre Jisui menkeda, “Jãhãege noa dakʼe ńũi uni do arhõ tetaṅea. 14Menkhan iń oka dakʼiń emokʼ, ar okoe onae ńũi uni do tisge oho tetaṅlea. Ona dakʼ do uniyakʼ ontorre jaejug jion lạgitʼ bhumbukokʼkan dakʼ jharna leka hoyokʼa.”
15Onate uni maejiu do Jisui metadea, “Enḍekhan ona dakʼ baṛe imạńme jemon alo tetaṅiń ar nonḍe dakʼ lo hijukʼ hõ alo hoyokʼ tiń.”
16Jisu do uniye metadea, “Do calakʼme, ar amren jãwãe hoho ạguiyem.”
17Maejiue menkeda, “Jãwãe do bạnuitińạ.”
Jisu do uniye metadea, “Ṭhikgem menakada jãwãe do bạnuitama, 18ente niạ lahare amren do mõṛẽ goṭen jãwãeko tahẽkantama, ar ńit okoe menae uni hõ amren jãwãe doe baṅkana. Am do sạri kathagem menakada.”
19Unre maejiu do Jisui metadea, “Ńit iń baḍae daṛeakʼ kana am do mitʼṭen nạbi kanam. 20Aleren hapṛamko do noa burureko sewaletʼ tahẽkana, menkhan apepe meneda, Jerusalemrege sewa do lek kana.”
21Jisu do uniye metadea, “Ańjomme ar ińakʼ kathare pạtiạukʼme, ente nonkan okte hijukʼ kana unre Isor Baba do noa burure hõ baṅ ar Jerusalemre hõ bape sewawaea. 22Ente ape do okaṭakʼ bape baḍaekan onape sewawakʼ kana, menkhan ale okaṭakʼle baḍaeakatʼ onagele sewawakʼ kana, ente kại khon bańcaokʼ do Jihudiko khonge hecʼakana. 23Menkhan okte daraekana, ar ńit hõ kangea, one unre sạri sewako do Jiu ar sạriyakʼte Babako sewawaea. Ar Baba hõ nonkan sekʼwakogeye ńam baṛayetʼkoa. 24Isor doe Jiu kana; ar okoe uniko sewawaekan, onko do Jiu ar sạriyakʼte sewawae lek takoa.”
25Unre uni maejiue menkeda, “Baḍaegeạń, Mạsi, okoe do Krisṭko metaekan uni doe daraekana. Are hecʼlenre sanamakʼe baḍae ocobona.”
26Jisu do uniye metadea, “Iń kangeạń uni do, one okoe am tulucʼe galmaraokan.”
27Ar inạkʼtege Jisuren celako doko hecʼena, ar mitʼṭen maejiu tulucʼ Jisu galmaraoko ńelkede khan onko doko hahaṛayena. Menkhan enhõ okoege bako metadea, “Am do cetʼem khojkana se cedakʼ uni tulucʼ dom galmaraoeda?”
28Unre maejiu do acʼakʼ kanḍae bạgi oṭowatʼte atoteye senena ar hoṛkoe metatʼkoa, 29“Dela hijukʼte mitʼṭen hoṛ ńelepe. Uni do ińiń ceka akatʼ jotowakʼe lại ạdińa. Baṅ do nuigeye Mạsikan?” 30Onate hoṛko do ato khon oḍokkate Jisu ṭhen hijukʼko ehopʼena.
31Ar inạ takre celako do nehõradeteko metadea, “E Guru, thoṛa jom maṛaṅlem.”
32Jisu do onkoe metatʼkoa, “Iń ṭhen nonkan jomakʼ menakʼa one ona reakʼ ape do bape baḍaekan.”
33Onate celako doko menjoṅana, “Enḍekhan cetʼ jãhãe jomakʼko ạgu akawadea?”
34Unre Jisui metatʼkoa, “Okoeye kol akadiń uniyakʼ sanaleka calakʼ ar uniyakʼ kạmi purạutaege hoyokʼ kana ińakʼ jomakʼ do. 35Ape do cetʼ bape meneda, ‘ar pon cando khange phosol samṭao din do seṭerokʼa mente?’ Menkhan ińiń metapekana, mitʼ dhao khetko secʼ beṅgetʼakʼpe, phosol samṭao okte do hoyakana. 36Okoe phosole samṭaoetʼkan uni do ńitge kuṛạiye ńameda ar jaejug jion lạgitʼ phosole doho jarwayeda. Onate itạ erokʼicʼ ar phosol samṭaoicʼ, unkin banarge mitʼ sãotekin rạskạkʼ kana. 37Noate sạbudokʼ kana, ‘mitʼ hoṛ doe era ar eṭagicʼ doe ira.’ 38Iń do nonkan phosol samṭaoiń kolketʼpea one ona lạgitʼ ape do bape khaṭao akan. Ente eṭakʼko doko khaṭao akana ar ape do ona khaṭaoakʼ reakʼ phosolpe samṭaoeda.”
39Ado okoe maejiue gohayetʼ tahẽkan, acʼe ceka akatʼ ona jotowakʼ do uniye lạiyakada mente, onate uniyakʼ katha ańjomkate ona atoren ạḍi utạr Samariạ hoṛ do Jisureko pạtiạuena. 40Onko do Jisu ṭhen hecʼkate ako sãote tahen lạgitʼko nehõradea. Onate Jisu do onḍe bar dine tahẽyena. 41Unre uniyakʼ katha ańjomkate arhõ ạḍi utạr hoṛko pạtiạuena. 42Onko do uni maejiuko metadea, “Ńitokʼ do eken amakʼ katha iạtele pạtiạukʼ kana ona do baṅ, menkhan uniyakʼ katha ańjomkatele bujhạu daṛeakʼ kana, sạrige uni do manwakoren babańcaoicʼ kanae.”
Napṛakʼ hoṛren hopone bogeyede
43-44 #
Mat 13.57; Mrk 6.4; Luk 4.24 Ado one Jisui menletʼ tahẽkan baṅma, nij disạmre nạbiko do manot bako ńama; onate ona katha purạukʼ lạgitʼ uni do Samariạre bar din tahẽkate onḍe khon Gạlilteye calaoena. 45#Jhn 2.23 Ar Gạlilreye seṭeren khan Gạlilrenko do uniko ataṅ daramkedea. Ente porob jokhecʼ okoeko hoṛ Jerusalemteko senlen onko do Jisui kạmiletʼakʼ jotowakʼko ńelleda.
46 #
Jhn 2.1-11
Jisu do arhõ Gạlil reakʼ ona Kana atoteye calaoena. Nonḍege uni do dakʼe darkha rasa ocoletʼ tahẽkana. Ar Gạlil reakʼ Kapharnạhum nagrahare mitʼṭen raj kạmiyạ hoṛren hopontetʼ doe ruạ kạhil akan tahẽkana. 47Uni rajren kạmiyạ hoṛ do Jisu Jihudiạ khon Gạlilteye hecʼakana menteye baḍaeketʼ khan uni do Jisu ṭhen senkateye nehõrena jemon Kapharnạhumte senkate gidrạye bogeye. Unre uniren gidrạ do gujukʼ dạkhile tahẽkana.
48Jisu do uni raj kạmiyạ hoṛe metadea, “Jãhãn cinhạ se hahaṛa kạmi bape ńellekhan ape do okalekate hõ ohope pạtiạulena.”
49Unre uni raj kạmiyạ hoṛ doe menkeda, “Ma dayakate ińren gidrạ ạuriye gujukʼrege hijukʼme.”
50Jisu do uniye metadea, “Do calakʼme, hoponme doe bogeyena.” Ar uni kạmiyạ hoṛ do Jisuakʼ kathare pạtiạuenteye calaoena.
51Ado uni raj kạmiyạ hoṛ do tinre oṛakʼe ruạṛ senokʼkan tahẽkana unre horrege uniren gutiko do hecʼkateko metadea, “Amren hoponme doe bogeyena,”
52Uni doe kuliketʼkoa, “Oka okteye bogeyena?”
Adoko lạiyadea, “Hola tikin mitʼ baja okte ruạ do chuṭạuentaea.”
53Ar inạtege gidrạren apattetʼe doe bujhạukeda, ṭhik ona okterege Jisu doe metade tahẽkana, “Amren gidrạ doe bogeyena.” Unre acʼ ar acʼakʼ gharońjren sanamko do Jisureko pạtiạuena.
54Ar Jihudạ khon Gạlilre hecʼen tayom Jisu do dosar dhao noa hahaṛa kạmiye kạmikeda.
Избрани в момента:
Johan 4: SBT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Santali Bible © Bangladesh Bible Society, 2021.