Matiye 7
7
I ɓok dan wa sôwâ məsin mi
(Luk 6.37-38,41-42)
1«I ɓok dan wa sôwâ məsin mi, kədan Ifray ɓok dan wa ri mi. 2Zə Ifray də ɓok dan wa ri ce' ndə məni hi wə ɓok dan wa sôwâ məsini. Ɓay kwa kənji' kwa məni hi wə kənji' kwa ne kə sôwâ məsin kə ndi, Ifray də kənji' mi ne kə ndi ta'a#Mak 4.24. 3Zə mi ha wə kar bubuɗ gu məni wə i vay ba wû ɓay ha cu gak we gu mə i ru mə su? 4Ha gak in ne kə vay ba wû: A ar nan tle bubuɗ gu məni wə i ru, kəri məni ha kə gu wə i ru ma su? 5Ha swə mə vur vur, a par gu məni wə i ru cop, ɓay ndəna', ha gak weri ɓay kədan ha tle bubuɗ gu məni wə i vay ba wû.»
6«I ne kwa mə Ifray ne kə də mi. Hi la' gi ndəna' si, handay də faŋ mi ti. I njay ri mə coɓ kəcik mə ɗe kə "perlə" wə kor ziŋ mi. Hi la' gi ndəna' si, handay də ta wa rum kə seme.»
I o, i keɓ, ɓay i tu' vun vari
(Luk 11.9-13)
7«I o, ɓay hi də fe. I keɓ, ɓay hi də za'a. I tu' vun vari, ɓay sôwâ də ar vun vari zə ri. 8Zə sa su daŋ' məni wə o, mum fe. Swə məni wə keɓ, bə rum za'a. Ɓay swə məni wə tu' vun vari, sôwâ ar vun vari zə bə rumu. 9Swə ɗaw du ri gak ne gway' ne kə vay um kəri məni mum o kwati ɓa rum su? 10Ko mum gak ne wu' ne kə vay um kəri məni mum o keve ɓa rum su? 11Hi sôwâ mə bro', hi we vari kədan hi ne kwa mə ɓay ne kə daw mi. Ba mi mə wafray də ne kwa mə ɓay ne kə sôwâ məni wə um o pâ kwa məni hi wə gi nə si!
12I gi kwa daŋ' zə sôwâ məsin, ce' ndə məni hi wə wa' i handay gi zə ri. Dan dlay Moyizə kə ɗerwa sum ka' dan ne vari ndəna'a#Luk 6.31.»
Vun vari mə kî
(Luk 13.24)
13«I ze vun vari mə kî! Zə vun vari mə bwi kə vari mə dan cik wə də ri məni sôwâ də vi' wə han, ɓay sôwâ juk wə ta hana. 14Ama vun vari mə kî kə vari mə kəcik wə də ri məni sôwâ də ke kə nyî mə də hâ wə han, ɓay sôwâ cep wə ta hana.»
Gu kə vra' umu
(Luk 6.43-44)
15«I ji tu ri hay' sum ka' dan mə hay dana. Handay wə mbə hay' ri kə gi tu nday ce' ndə cime, ama wə vunduk nday handay dəghaw' mə kaw kwa. 16Hi də nday we kə sin ndaya. Swə cu ɓe vra' viŋə wa ŋây' mi, ko cu ɓe vra' tərum wa ŋây' usiya məta'a. 17Gu mə ɓay wə vra' vra' mə ɓay, ama gu mə bro' wə vra' vra' mə bro'o. 18Gu mə ɓay cu gak vra' vra' mə bro' mi, ɓay gu mə bro' cu gak vra' vra' mə ɓay məta'a. 19Gu daŋ' məni cu vra' vra' mə ɓay mi, sôwâ də tum njay də ku#Mat 3.10; Luk 3.9. 20Ndəna' ta', hi də we sum ka' dan mə hay dan kə sin ndaya#Mat 12.33.»
Na cu we ni ɗaw mi
(Luk 13.25-27)
21«Sôwâ daŋ' məni man ɗe: Bârî, Bârî, cu də ze wə ri məni Ifray wə də suk jwə wa sôwâ um nə mi, say sôwâ məni wə gi kwa məni Ba man mə wafray wə wa'a. 22Kəri məni bəka rum də mbə, sôwâ juk də man ini: Bârî, Bârî, namba ka' dan məni car mbə hay' Ifray kə semɗe ru, namba 'way gam kə semɗe ru, namba gi yew kə semɗe ru! 23Kəri rum, na də nday ini: Na cu we ni ɗaw mi. I 'ya hay' rin seŋ, hi sôwâ məni wə gi sin mə bro'o#Nye 6.9!»
So hoɓo
(Luk 6.47-49)
24«Ndəna' ta', sa su daŋ' məni wə mun dan məni na wə in, ɓay wə gi dan rum, mum də ra' nji kə swə mə kə wa məni ɗam so um wa pra. 25Bəŋô se, mbi mbə haɓ ta rəka, simbeɗ sa' wa so rum kə gbəgboŋ, ama so rum cu bru mi, zə zu so rum tor wa pra. 26Ama sa su daŋ' məni wə mun dan məni na wə in, ɓay cu wə gi dan rum mi, mum də ra' nji kə swə mə dan wa məni ɗam so um wa nyetle. 27Bəŋô se, mbi mbə haɓ ta rəka, simbeɗ sa' wa so rum kə gbəgboŋ, ɓay so rum bru ta nya, ɗənok cete.»
Gbəgboŋ Zezu
(Mak 1.22; Luk 4.32)
28Kəri məni Zezu ndo' vun kwata' um, vari kwata' um jin' wa ne kə raw sôwâ, 29zə mum cu ta' kwa ce' ndə sum pay zu dan dlay wə ta' nə mi, ama mum wə ta' kwa nday ne kə gbəgboŋo.
Избрани в момента:
Matiye 7: KMN
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Le Nouveau Testament et Psaumes en Peve © Alliance Biblique du Tchad, 2014.