Genesis 7
7
1Bhodïrï Gïr Nukadakami itïtïdai Noé,
—Mosïkaxi aapi Noé ïgai dai gin ïïgidi gin kaï. Go gaa maigobai maiti gin ïïgidi tomarhi ïmadutai. Kaxkïdï ipïrhidi aanï pïxi baakiagi barko ïraana ïmadï gï oñiga dai gï maamara dai gï kaakaxdïïdï— itïtïdai. 2—Daidi baidatika aapi barko ïraana kubarakami kïkïïrhiadï go buxtaki ix makïdï gï kuayi ïmadï po kaki okiadï ïpï. Dai go gaa ix makïdï maitï gï kuayi go gia mos arhi googoka baidatika aapi ïmo kïrhiadï ïmadï ïmo okiadï. 3Dai bïïxi ix maaxkami oidaga ujurugi oidigi dama gï aagai pïx baidatika kubarakami kïkïïrhiadï ïmadï po kaki okiadï ïpï xi mai ugitiagi ujurugi go oidigiïrï— itïtïdai.
4Bhodïrï Gïr Nukadakami itïtïdai,
—Xibi abhiadïrï kubarakami tasaikïdï otosamu aanï duki. Dai gokobhai tasai duduki agai tasïrï dai tukarï. Dai bïï naato xia duadamu aanï makïdï idui aanï oidigi dama ajiopadami— itïtïdai.
5Dai bhodïrï idui go Noé bïïxi go aaduindagai ix makïdï gatïjai Gïr Nukadakami.
6Go Noé ka biakatadai naadan ciento umigi aidïxi ka dupi agaitadai oidigi. 7Dai go Noé baa barko ïrana mai kia dupikai oidigi dai baidaja oñigadï ïmadï maamaradï ïmadï kaakaxdïïdï. Ïgai bïï baapa ïpï xi mai bhaikoagi. 8-9Dai go buxtaki ix makïdï ïgai dai gï kuayi bïï baapa ïpï modukai ïmadï go ix makïdï maitï kuayi dai ujurugi ïmadï oidigana ajiopadami buxtaki dai kïkïixi dai asta aarhi kïkïixi bïï baapa ïpï barkoana. Diuxi gatïjai mïsai googokatai bapakïna ïgai dai podukai baapa ïïmo kïkïïrhiadï ïmadï ïïmo okiadï.
10Bhodïrï ka bapakïkai ïgai Bhodïrï abhiadïrï kubarakan tasaikïdï ka sudaïrï dupimi oidigi. 11Ka biakatadai go Noé naadan ciento umigi aidïxi sudaïrï dupi agaitadai oidigi. Dai amaxi sai todian dukai taatapai oidigi laalachi dai kabami bhïbhïtokimi sudagi dïbïrai utamajadïrï dai tïbagi kupiokan tïi ïpï laalachi xi tïkadïrï todian dukai gïïgïpi aaxi sudagi ïpï. 12Bhodïrï gokobhai tasai duudu oidigi modukai tasïrï dai tukarï ïpï. 13Dai baa go Noé barko ïraana ïgai baa tasïrï aidïxi ka dupi agaitadai oidigi dïï mai kia dupikai ka baatadai ïgai. Dai baidaja ïgai oñigadï dai maamaradï ïmadï kaakaxdïïdï. Baikadukana maamaradï Noé. Ïmoko Sem tïgidu dai ïmai Kam dai ïmai Jafet. 14-15Dai gïn ïmadï baapa ïpï bïïxi aïkatai ixtuma oidaga kiiyïrï buxtaki maaxi ïmadï oidigana ajiopadami buxtaki maaxi dai kïkïixi ïmadï aarhi kïkïixi dai ujurugi ïpï. Bïïxi go ix makïdï oidaga oidigi dama mïï barkoana dada chïchïki dai googokatai baapa ïmadï Noé. 16Diuxi ka aagiditadai go Noé ix bapasana ïgai ïïmo okiadï dai ïïmo kïkïïrhiadï ix makïdï baapasa agaitadai ïgai barko ïrana dai ka pobï dui. Dai ka bapakïkai ïgai Gïr Nukadakami kuu kuuparadï go barko.
Избрани в момента:
Genesis 7: NTP
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Copyright: Ethnos360 Sanford, Florida