Mathew 4
4
1Naŋ o Vui me vanogag i Jesus sage ilo vanua vanameag si i Satan ni gale iloa aia. 2Wa ni me matir wora o maran wa o qoŋ saŋavul vat, paso nan me maliŋsala. 3Wa i meregale qara van ma suria, ti vet wa, Si iniko Natun God, ka vet ape vat ŋaŋ iloke si a ris bread nia. 4Pa ni me valui goroa ti vet wa, Me rave veta wa, O tanun tete esu mun o bread vires, nava mun o val vavae ŋaŋ we rowo lue nan navalan God. 5Naŋ i Satan ti vanogagia ilo laqlaqe vanua we roŋo, ti vatira neia vawo ŋorŋor ima we roŋo, 6ti vet munia wa, Si iniko Natun God, ka rowo siwo; ape me rave veta wa,
Ni te vareg ira angel ŋaŋ anana apeniko,
Wa neira te sapalo kalo ko mun napanera,
Nan ko wa tika taso wun naraŋoma ape vat.
7Naŋ i Jesus me vet munia wa, Me rave mulaŋ wa, Ko tete meregale i Lord God iniko. 8Naŋ i Satan me vanogag mulaŋ neia vawo qase tauwe we tole aneane, wa ti gaganag munia o marana ŋaŋ a marama, wa o leŋas tapena. 9Ti vet wa, Na te le nol at iloke ŋaŋ muniko, si ko qe rowo taqa wa we vatieqau goro nau. 10Naŋ i Jesus ti vet wa, Toa reag, Satan, ape me rave veta wa, Ko te vatieqau goro i Lord God iniko, wa ko te rowrowovag munia tuwale. 11Wa i Satan me rowo vitagia; wa ilo, ira angel ŋaŋ me mule ma we tataga suria.
12Naŋ i Jesus me roŋotag si me ukeg vano i John ilo ima rotrot, ni me sirig i Galilea; 13wa ti toavtag o Nasaret, ti mule ti togatoga a Kapernaum a pan qilo, ape tiŋgoro vanua Sabulon wa Naphtali. 14Si ilone te tira amon Isaia o prophet me vava apena, we vet wa,
15O vanua Sabulon wa o vanua Naphtali,
O matesala a lama, tavala Jordan,
Galilea nora sul ŋaŋ we sea,
16O sul me togatoga ti alo silsiliga,
Me ilo o valawar liwoa,
Wa mun ragai me togatoga ti alo masao matea wa alo malumalu tapena,
O valawar me rowo raka muneira.
17Naŋ alo qoŋ ilone i Jesus qara qeteg raka we toretore, wa we vava wa, Tur nomleas, ape o marana tavunana me rasu ma.
18Wa ni me tatatale a pan qilo ta Galilea, wa me ilo o tatasiu pulrua, i Simon, navaruesasana i Peter, wa tasina i Andrew, we tultul o gape ilo qilo; ape rara o vaŋvaŋona. 19Naŋ ti vet mun rara wa, Ura tataga inau, wa na te ge kamurua o vaŋvaŋon tanun. 20Wa rara me toavtag gaplot norara o gape ŋaŋ, wa me tataga ineia. 21Wa ni me van at nan o vatine, wa me ilo o tatasiu we sea pulrua, i James natun Sebede, wa tasina i John, alo aka amen Sebede tamanrara, we wurvag noratol o gape ŋaŋ, wa ti loglog rara. 22Wa rara me toavtag gaplot o aka wa tamanrara, qara tataga neia.
23Wa i Jesus me mulemule tal alo Galilea nol, we vatogo alo nor o ima siwo tuwale ŋaŋ, wa we toretore ape lea we wia tape marana, wa we ge esu o sale gopae ŋaŋ, wa o sale mageregere ŋaŋ amaira sul. 24Wa narorona me gao lue nol o vanua a Suria. Wa neira me vanogag ma suria ira gopae ŋaŋ, o gopae ŋaŋ we seasea wa o vivtig ŋaŋ me qalora, wa irasei o vui we tatas me gege neira, wa irasei o tamate lelera me ge neira ti, wa ira mawea ŋaŋ, wa ni me vaesura. 25Wa o sul we qoqo me tataga neia nan o Galilea wa Dekapolis wa Jerusalem wa Judea wa ta tavala Jordan.
Избрани в момента:
Mathew 4: MOTA
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
New Testament was published by the British and Foreign Bible Society in 1931.