Luk 13
13
Ma itopul dogur ke udo elio soulu
1Deka osep leklou ka tidong are tibasik ke Yesus ke alo ka Pailot vai osep ola ina ma tidue burwa ke osep Galili ina leklou alo ka tidue elio opmu ina. Deka osep ola ina tibuli osep tonari inarak marau kap ongwa ka tidue elio opmu ina ine inarak marau. 2E Yesus koli wai ke isak langane. “Aitno lumu lange? Osep Galili ina tonari urok elio epmes ina mole osep Galili ina leklou urok elio epmes ina deka tinamani elio langane koke aurou? 3Ngawai ke umu langane. Aurou va. E langka umabauluk aitno lumu ke lumu elio epmes ina kovok umu blang ma umeimina. 4Koke aitno lumu mter ke osep songotno lumeklu ka timete alo ka ninu ka dong egim alang ka dong ke omur Siloam gene duru ke isak. Aitno lumu lange? Urok elio epmes ina mole osep Jerusalem ina leklou urok elio epmes ina koke aurou? 5Ngawai ke umu langane. Aurou va. E langka umabauluk aitno lumu ke lumu elio epmes ina kovok umu blang ma umeimina.”
Yesus wai pelengon ano ke akai fik
6Deka Yesus wai pelengon ano ke isak langane. “Gute gesa usak akai fik ke ila yage galou wain ina e iye la waiki due fik otna ine e iye pado otna kovok. 7E iye wai ke gute ka plau yage tonari langane. ‘Ke tobor eklu kodong ngame ma ngadue fik otna ke akai ane e ngapado otna ine kovok. Oku ane omgusip akai ane. Ina lange iye vri adai e usu otna kovok e due taklak ina arit?’ 8E gute ka plau yage koli wai ke iye langane. ‘Puda omsongone dong tobor kene vala blang. Ma ngayas taklak lelei ke batne e ngadue bulmakau tena sep ke taklak. 9E langka akai usu otna ke tobor kene ka me are itau e langka usu otna kovok amwai e ma ngagusipe.’”
Yesus lua apmang kene ke oklou sabat
10Ke oklou sabat gesa Yesus dong ke duningen ina ninu e parere osep. 11E apmang gesa dong are ka angelo soulu due paia ke tobor songotno lumeklu kodong. Apmang erine ke odong ine mol e iye karanga vri osuk kovok. 12Alo ka Yesus vati apmang tonari iye gi ke iye ma iye me deka wai langane. “Aiya lem paiangan yagos. Omdong itau.” 13Deka iye kai iye ke limla e lokono apmang odong ine polou itau e iye vri osuk e kakai Ida Tapolngon angaine tito ine. 14E gute ka plau duningen ina ninu aitno nevlik amnga kesua Yesus due apmang polou itau ke oklou sabat. Deka iye wai ke osep ka tidong are langane. “Umakaranga umoboko ke oklou lumakene. E umomo ma gute due lumu paiangan yagos ke oklou tonari. E umodue elio langane ke oklou sabat sakam.” 15E Yesus koli wai ke iye langane. “Umu osep yakngan ina e aitno lumu orwo. Ke oklou sabat umu kene kene umala ke ongwa urok ninu e umekles urok galou e umapaur lumu bulmakau koke lumu donki la ma tinim aki. 16E apmang ane iye Abraham ila napakngan gesa ka Satan pou iye ke tobor songotno lumeklu kodong. Aitno lumu lange? Ngakaranga ngakles apmang ane ina paiangan ke oklou sabat koke aurou?” 17Yesus wai langane deka osep keniye ka tipara pulu pelengon kap iye isak mnak isak e osep pula aitno lisak neser ke elio itau lokono ka iye due.
Yesus wai pelengon ano ke akai mastet e ke yis
(Matyu 13.31-33 e Mak 4.30-32)
18Deka Yesus wai ke isak langane. “Omur ka Ida Tapolngon plaue langka wansua? Ma ngawai pelengon ano lange ine? 19Iye langka mastet londo ka gute sere ke ila yage. Londo novluk e polou omba langka akai deka monuk time e tiuri urok onuk ke tetna.” 20E Yesus wai blang langane. “Ma ngawai pelengon ano lange ke omur ka Ida Tapolngon plaue? 21Iye langka yis ka apmang bulie ke dram plaua la lama plaua keniye tonari song polou omba.”
Itesep ke ekreng bitna ka daudeng
(Matyu 7.13-14 e Matyu 7.21-23)
22E Yesus lila la ke armok omba e armok daudeng e due ila langan la ke Jerusalem. E alo ka iye lila la iye parere osep. 23E gute gesa pmi iye langane. “Puda ma Ida Tapolngon lua osep awal boto vala ke urok elio epmes ina?” Deka Yesus koli wai ke isak langane. 24“Umu arit umu ma umesep ke ekreng bitna ka daudeng. Ngawai ke umu langane. Osep pula ma tiwaiki tisep ke ekreng bitna tonari e ma tikaranga kovok. 25Alo ka ninu ina gute tito e diva ninu ina ekreng bitna ma umevri ke dogur e lupmu nopolpol ke ekreng bitna e umawai langane. ‘Puda omklok ekreng bitna ke imi.’ E ma iye koli wai ke umu langane. ‘Ngaile umu kovok e ngaile lumu omur batne kovok.’ 26Deka ma umawai ke iye langane. ‘Imangen ngangon e imeinim aki kap wom. E amparere osep ke limem armok ina ekreng.’ 27E gute tonari ma koli wai langane. ‘Ngawai ke umu langane. Ngaile lumu omur batne kovok. Umu ka umodue elio soulu umala ke ngong.’”
28“E ma umekngis omba e umasak opmu erine pulu kesua aitno lumu engil lokono alo ka umavati Abraham e Aisak e Jekop e osep napaprangan ina keniye tidong ke omur ka Ida Tapolngon plaue. E Ida Tapolngon ma sapir umu e umodong ke dogur vala. 29Osep ma time ke omur ka oklou tito ine e omur ka oklou duru ine e omur not e omur saut e ma tidong tingen ke omur ka Ida Tapolngon plaue. 30Umoklingen. Osep leklou ka oku ane time batne mase ma timgo e osep leklou ka oku ane timgo mase ma time batne.”
Yesus aitno kro lokono ke osep Jerusalem ina
(Matyu 23.37-39)
31Alo ari osep Farisi ina leklou time ke Yesus e tiwai ke iye langane. “Herot waiki osep tidue burwa ke wom e aitno limi langka wan ka itau omsongon omur ane e amla ke omur silang.” 32Deka Yesus koli wai ke isak langane. “Gute Herot langka pokis deka umala e umawai ke iye ngawai langane. ‘Eknikane e kotu ma ngasapir angelo soulu e ngadue osep ka tipaia tipolou itau. Deka ke oklou eklu ina ma ngababrum lou bokongon.’ 33E dau ngala eknikane e kotu e gasak blang. Kesua gute napaprangan ina dong e mete ke omur silang kovok. Aurou. Iye ma mete ke Jerusalem vala. 34Aisudo. Osep Jerusalem ina umodue burwa ke osep napaprangan ina e umouri opmu ke osep ka Ida Tapolngon pagei isak ke umu ma timete ine. Aling pula ngawaiki ngagom umu ke ngong langka kwako gom titno ke pena bisna. E umawaiki umodue langane kovok. 35Umoklingen. Isuk boto ma lumu armok dong adai e yagos. E ma umavati ngong blang kovok la lama umawai langane. ‘Gute ka me ke Ida Puda angaine aitno itau itau.’”
Избрани в момента:
Luk 13: ANT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
copyright 2003 New Tribes Mission, Sanford, FL 32771