Luke 16
16
Muséli ngua maambe maledite
1Sése nàlɛle baate bɛndi ndé: «Ichine nichàbade na mutu wuwàkɛlenge mabuɛ mɛndi.» Baate bàyɛnde gu mboge ichine muɛne nibàlɛle ndɛ ti muséli wu wɛ vɛde mabuɛ mawɛ mu kɛle, asatoge mɔ kɛle vɛ. 2Ichine àtɛde mukéli a mabuɛ mɛndi, nàlɛle ndɛ ndé: «Maambe ma baate balɛle mɛ mu mbate a wɛ, mɔ maambe mambuli? Sade mɛ iséngi cha mabuɛ ma mɛ vɛde wɛ kɛle. Wɛ chibàbade mukéli a mɔ vɛ.» 3Mukéli a mabuɛ àtase, nàlɛle ndé: «Ivonde chɛme ka mɛ akipose gu mudianze. Mɛ kabuni mɛ kisade? Mɛ salidi na bungudi bua dianze gutsɔ manungi vɛ. Mɛ kuade na tsoni ti mɛ vɔnde bikumbe gulidi baate.» 4Ka mɛ yɛbi buni mɛ kisade. Avane ti ivonde chɛme cha pose mɛ gu mudianze, baate bayake mɛ gutsɔ manzɔ ma bɔ. 5Avane ndɛ tɛde mutu mutu wuwànuanenge ivonde chɛndi, nàlɛle wa tsomi ndé: «Wɛ ivonde chɛme kuɛ wɛ nuane?» 6Ndɛ nàkale ndɛ ndé: «Mɛ ivonde cha wɛ mukame mirɛge mia mɛdi mɛ nuane.» Mukéli mabuɛ nàkale ndɛ ndé: «Tsagele. Bɔnge ichange wɛ kome wo, mɛ ivonde cha wɛ, makumi mataane ma mirɛge mia mɛdi mɛ nuane.» 7Atɛde mutu mukime, nàlɛle ndɛ ndé: «Wɛ ivonde chɛme kuɛ wɛ nuane?» Awone nàkale ndɛ ndé: «Mɛ ivonde cha wɛ mukame mapondji ma baputu mɛ nuane.» Mukéli mabuɛ nàkale ndɛ ndé: «Tsagele. Bɔnge ichange wɛ kome wo mɛ ivonde cha wɛ, makumi pɔɔmbe ma mapondji ma baputu mɛ nuane.» 8Avanekaniva ivonde chɛndi àkakese muséli wa muyibi mu buyédi buni ndɛ bàde na bɔ. Baate ba bulɔnge bunebu na buyédi gutsɔ bichidili bia maambe mamabuɛ pfuɛchi a bɔ muɛne na bɔ muɛne. Buyédi muɛne busayɛbene na bua baate babamachinge Nzɛmbi vɛ.
Utɔnde gua Nzɛmbi na maambe ma bulɔnge
9Sése nàbàlɛle baate bɛndi ndé: «Na mabuɛ ma béne labage gutsɔ bulɔnge, sadani maambe mamabuɛ gulidi baate. Bɔ bakabade ka bambɛgi ba béne. Béne lesade tchambe muɛne, va mabuɛ muɛne mákáfuade, Nzɛmbi náyake béne gu mboge a ndɛ gu ndɛ yumu. 10Mutu wulidi na ledite mu maambe mapése, alidi na ledite mu maambe ma mbuli. Mutu wu wusalidi na ledite mu maambe mapése vɛ, namoni a maambe ma mbuli, asalidi na ledite vɛ. 11Béne ti lesalidi na ledite lakɛle mabuɛ ma béne labage mu bulɔnge bunebu vɛ, wu kivɛde béne mabuɛ mambuli ka naa? 12Béne ti lesalidi na ledite lakɛle mabuɛ ma bambɛgi vɛ, wu kivɛde béne mabuɛ mu ndé mɔ mabade ka ma béne ka naa? 13Mutu achitoge yimbese ba Kumu bɔli vɛ. Ndɛ bɛle mumochi, akatɔnde wone. Béne lechitoge yimbese Nzɛmbi, mane béne lekabayimbese na badɔle vɛ.»
Yulu na tɔtɔ nibiviɔge
14Baate ba lebuli la barifichi bàyoge maambe ma Sése àyambelenge, nibàsɛbe ndɛ muti bɔ bàtɔngenge mabuɛ ma bulɔnge bunebu gualotele. 15Sése nàlɛle bɔ ndé: «Béne lasade maambe mamabuɛ gulidi baate mu muɛsese ti béne baate babayɛbene lelidi, Nzɛmbi ayébi mitéme mia béne. Muti maambe ma baate batase bo mɔ maambe ma mbuli, Nzɛmbi asatɔnde mɔ vɛ. 16Sa Mbatise napayade, baate àbade bàmàtsuame nayabe mangidi ma Muyise na maambe ma babigi ba mabige ma Nzɛmbi bàkome. Tsaange Buyumune bua Nzɛmbi va lekɛse la Sa Mbatise bàbande tɔse. Mutu mutu nasade lembande mu bage Buyumune bua Nzɛmbi. 17Yulu na tɔtɔ nibiviɔge. Tɔ lebige la mabige ma Nzɛmbi ti lemochi lechitoge niambene vɛ. 18Lebagele afunze mukɛdi a ndɛ, mu kuɛle mukaase mukime, ndɛ bukɛli abuise. Namoni a lebagele lakuɛle mukaase wu mulumi afundji, ndɛ na ndɛ vane bukɛli abuise.»
Kokome ichine na Lazare
19Vayulavane, Sése nàyole musame wunewu: «Niguàbade na ichine, chichàluatenge mangoyi ma buyimbe ma lefune lalenɔne. Tsuge yotchi, ndɛ tchàdenge biéle ndile bibibuɛ na sàdenge mayayi. 20Niguàbade na gɔ na itutu chichàbade na mapode mu niute yotchi. Itutu muɛne va mutungu a nzɔ ichine cha làsenge. Ndoge a chɔ Lasare. 21Itutu muɛne chàtɔndenge tchade matsétsénge ma biéle màmàragenge gu tɔtɔ va ichine chàtchadenge. Bamvuɛndi na bɔ nibàvɛtenge mapode mɛndi. 22Lasare àkuade, batome ba Nzɛmbi ba gu yulu nibàbéte ndɛ gu yulu va pédi a Barame. Ichine nachɔ chikuade, nibàkunde cho. 23Gu itchige cha mimbɔnde, ichine nichàmɔnenge mimbɔnde mia lotele. Cho chichimbele mise, nichàtalele Barame, Lasare atsagele va pédi a ndɛ. 24Avanekaniva ichine muɛne chàbuamege ndé: «A taate Barame, kɔkɔle a wɛ mɔne mɛ tinge. Tchindege Lasare ayitube mulémbe a ndɛ gutsɔ maambe, ayade ayitsɔlese mɛ letɛngi va yulu lelimi mu mane mɛ péyi. Muti gutsɔ mbuage gu mɛ lidi guni mɛ mimbɔnde mia lotele mɛ mɔne.» 25Barame nàkale ndɛ ndé: «A muane a mɛ. Bangele va wɛ bàde moyi, wɛ bàde na mabuɛ mvuamɔvɛ. Sabone Lasare mimbɔnde mia lotele àmɔnenge. Ndɛ lɔlɔ ka ngɔmbe atsakene nayɔ, wɛ kaniwukichi gutsɔ mimbɔnde. 26Mane va pɛngidi a bése a béne, mbɛnge mvuayɔvɛ ilidi. Bése balilidi ngule a guni, lechitoge sabege mu bakese béne ngule yi béne lelidi vɛ. Namoni a béne lechitoge yade gulidi bése vɛ.» 27Ichine nichàlɛle Barame ndé: «Taate Barame kɔkɔle a wɛ, tchindege Lazare ayɛnde gulidi itsuku cha taate a mɛ. 28Mɛ gone na baane ba tɛyi batane. Ndɛ yɛnde gu yilébele bɔ, bɔ na bɔ bakayade gu mɔne mimbɔnde guni.» 29Barame nàkale ndɛ ndé: «Baane ba taate wɛ bakɛle mangidi ma Muyise na maambe ma babigi ba mabige ma Nzɛmbi bàkome mu lébele bɔ.» 30Ichine nichàkale ndɛ ndé: «A taate Barame, bɔ bachichilele maambe muɛne vɛ. Tɔ ti mutu vatsɔ baate bàbàkuade, asoge mu yɛnde gulidi bɔ, bɔ bagɛle mulinge.» 31Barame nàlɛle ichine ndé: «Bɔ babise chilele mangidi ma Muyise na maambe ma babigi ba Nzɛmbi bàkome mu lébele bɔ, mutu wuwàkuade nasoge mu yɛnde gu lébele bɔ, bɔ bachilele maambe ma ndɛ kilɛle bɔ vɛ.»
Избрани в момента:
Luke 16: NZB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES