Luke 24
24
Nzɛmbi asole Sése gu leku
1Mu letsuge la tsomi la tsɔne na kɛtianguɛli, bakaase nibàyɛnde gu péchi na mɛdi na miyɔmbe mia tsule yiyibuɛ mi bɔ bàvange letsuge lebavome. 2Bɔ bàsote gu péchi, nibàbakese lemani le badibege péchi bamabondese. 3Bakaase muɛne baningele gutsɔ péchi mvumbi bakese vɛ, nibàgémbe. 4Avanekaniva bɔ bàkémege babagele bɔli baluate mangoyi mamayingegenge bàsotege va bɔ bàbade. 5Bɔɔme bukuate bakaase muɛne, bɔ nibàkundege mabunze mabɔ gu tɔtɔ. Tɔ babagele muɛne nibàlɛle bɔ bo: «Béne muki lasage mutu wulidi moyi va pfuɛchi a baate bàbàkuade?» 6Sése wu béne lasage asasɛli vaneva ka vɛ. Nzɛmbi amasole ndɛ gu leku, ndɛ moyi akade. Va béne abɔ làbade ki gu Ngalilé, bangelani maambe ma ndɛ lɛlenge béne ndé: 7«Mɛ Wuwàbɔnge ndjime a baate nibákabe mɛ kase na baate bababi, nibákɔmene mɛ mu mbate a kurusu, mɛ nikuáde, tsuge yɔli yiviɔge, mu lamutate mɛ kásoge.» 8Avanekaniva bakaase muɛne bàbangele mabige ma Sése àlɛlenge bɔ. 9Bɔ bàmate gu péchi, bɔ nibàyɛnde gu yole musame a maambe muɛne motchi gulidi baate bɛndi ba lekumi na mumochi na gulidi baate bakime. 10Bakaase muɛne nibanebe: «Mari wa muchi Magedale, Sane, na Mari ngua Sake.» Bakaase bakime bàbade bone a bɔ nibàyolenge musame gulidi baduki ba Sése ba lekumi na mumochi na baate bakime. 11Tɔ baate muɛne botchi nibàkuate page bo maambe ma bakaase muɛne balɛle, masalidi maambe mambuli vɛ. 12Piɛre àtɛmene, nàyɛnde matine gu péchi. Ndɛ dɛngene, nàmɔne ndile ka matsaande ma bàpɔte Sése. Vayulavane ndɛ gémbe mu maambe ma ndɛ mɔne, nàgabege gu mboge a ndɛ.
Baduki ba Sése bɔli bakuani na Sése mu ndjile a bole bubatɛde Emayuse
13Mu letsuge muɛne, baate ba Sése bɔli nibàyɛndenge gu bole bu batɛde Emayuse bu buàbade mua matɛmbi na musɛnge a Sérusalɛme. 14Bɔ nibàyambelenge pfuɛchi abɔ muɛne na bɔ muɛne mu maambe motchi màmaviɔge. 15Va bɔ bàyambelenge, Sése àsote va bɔ bàbade, nàbuge ndjile na bɔ. 16Bɔ bàmɔnenge ndɛ, tɔ bàsadigele bɔ a wunewu ni Sése vɛ. 17Sése nàfule bɔ ndé: «Maambe ma béne layɛnde na yambele mɔ mɛni?» Bɔ bàtɛmene, nibàbade ndile ka nimene. 18Mutu mumochi wubatɛde Cléopase nàkale ndɛ ndé: «Wɛ pénze ka ni mutu wusayugi maambe mamaviogi tsuge yineyi gutsɔ musɛnge a Sérusalɛme vɛ?» 19Sése nàkale bɔ ndé: «Maambe ma béne layambele mɔ mɛni?» Bɔ nibàkale ndɛ bo: «Bése maambe màmàviogi mu mbate a Sése wa muchi Nasarɛte layambele. Ndɛ mubigi a maambe ma Nzɛmbi ngua bungudi abédi, mu bichidili biɛndi bia maambe na mu biyɛmbili biɛndi va busu bua Nzɛmbi na va mise ma baate.» 20Bivonde bia bavédi ba malage na bivonde bi biatome bése a béne, ni bibikébili ndɛ kase mu kɔmene ndɛ mu mbate a kurusu bo ndɛ akuade. 21Bése lebédingi ndile ka nachite ti ndɛ niwukipose bichi Ichirayɛle gu buvége. Tɔ tsuge ka tate nachi maambe muɛne màviogi. 22Mumbuli, bakaase babalidi va pfuɛchi a bése, bayɛnde gu péchi na kɛtianguɛli, nibayidi gu lɛle bése maambe ma legimbi mu mɔ. 23Bɔ bayɛnde basabékichi mvumbi vɛ. Bɔ nibayidi gu lɛle bése ti: «Batome ba Nzɛmbi ba gu yulu bayidi gu bakese bése nibaléli bése ti Sése wu béne lasage, moyi akade.» 24Baate va pfuɛchi bése bayɛnde gu péchi, nibabékichi maambe motchi ndile ngane a buni bakaase baléli. Tɔ bɔ bàsàbɛkichi niute a Sése vɛ. 25Avanekaniva Sése àlɛle bɔ ndé: «Béne muki lesatchikese na chilele maambe ma babigi ba mabige ma Nzɛmbi bàkome vɛ? 26Ka bédi buédi vɛ ti mutu wu Nzɛmbi àsɔle napabage Buyumune, akapamɔne mimbɔnde?» 27Avanekaniva Sése àsopele bɔ maambe màbàkome mu niute a ndɛ baande gutsɔ bichange bia Muyise nacha gutsɔ bichange bia babigi ba mabige ma Nzɛmbi bàkome. 28Va bɔ bàbade ka bɛle nàtɔde gu bole bu bɔ bàyɛndenge, Sése nàtɔnde lote ndaande. 29Tɔ baate bɛndi ba babɔli nibàbɔnde ndɛ bo: «Tsagele, letɛdi lemarɛkene buchi ka vinde bua vinde.» 30Va bɔ tsagele mu tchade, Sése àbɔnge lepɛ, agabese malumbi gulidi Nzɛmbi, abokele lepɛ, nàkabele baate bɛndi. 31Bɔ bàtchikese maambe, nibàdigele Sése. Vayulavane, Sése nàniambene. 32Baate ba babɔli nibàyambele pfuɛchi abɔ muɛne nabɔ muɛne bo: «Mumbuli, va ndɛ bédi ayambele na sopele bése nawɛ maambe ma bakome gutsɔ ichange cha mabige ma Nzɛmbi mu ndjile, mitéme bédi ndile ka mbuage mia lole vɛ?»
33Vakɛtiavane bɔ bàtɛmene, nibàgabege gu Sérusalɛme. Bɔ babakese baate ba lekumi na mumochi na baate bakime bàkokene, nibàlɛle bɔ bo: 34«Mumbuli Sése moyi alidi, bone a Chime bamonini.» 35Baate muɛne nibàlɛle bɔ maambe motchi ma bɔ bàmɔne na yoge va bɔ bàyɛndenge mu ndjile na buni bɔ bàdigele Sése va ndɛ bokele lepɛ.
Sése asote va pfuɛchi a baate bɛndi ba lekumi na mumochi
36Va baate muɛne bàbade ki yàmbele bàyambele, Sése àsote va pfuɛchi abɔ, nàlɛle bɔ ndé: «Pɔle yibade na béne.» 37Bɔɔme nibuàkuate bɔ muti bɔ bàtaase bo a wunewu ka mukuyi. 38Tɔ Sése nàlɛle bɔ ndé: «Béne bɔɔme muki lamɔne na tongele maambe?» 39Kɛngesani bividi bia batsɛde bàbàkomini mɛ mu makake na mu matɛmbi. Bɛmbani. Mukuyi asalidi na misoni na mavichi vɛ. 40Ndɛ mane na bɔ yambele, nàmuɛse bɔ makake na matɛmbi mɛndi. 41Mu bɔ babade na ngɔmbe, na mu bɔ bàbade bagémbe, bɔ bàbade ki basachilele vɛ, avanekaniva Sése àfule bɔ ndé: «Béne na biéle biatchade?» 42Bɔ nibàvɛde ndɛ lebuke la tchui wa mubabe. 43Sése àbɔnge tchui, nàtchade va mise mabɔ. 44Avanekaniva ndɛ lɛle bɔ ndé: «Va mɛ bédingi na béne, mɛ ngɛ mɛ lélingi béne mé buédi ti maambe màbàkome mu niute a mɛ gutsɔ bichange bia Muyise na gutsɔ bichange bia babigi ba mabige ma Nzɛmbi na bia mimbe, makapasopege.» 45Avane Sése àsopele bɔ maambe màbàkome gutsɔ ichange cha mabige ma Nzɛmbi, nàlɛle bɔ ndé: 46«Bàkome bo, Mutu wu Nzɛmbi àsɔle buédi akapamɔne mimbɔnde, akuade, tsuge yɔli yiviɔge, mu la mutate ndɛ kásoge va pfuɛchi a baate bàbàkuade. 47Baate bákáyɛnde gu tɔse tsaange yiyibuɛ gulidi baate ba makake motchi mu tate gua ndoge a ndɛ baande Sérusalɛme. Baate batube mabi mabɔ, Nzɛmbi akachindele bɔ maambe mamabi ma bɔ bachidingi. 48Béne ni bimoni bia maambe muɛne motchi. 49Mɛ tchindege béne mutu wu Taate a mɛ àsade béne pɛngini. Tɔ patsagelani va Sérusalɛme nachi béne lekábage bungudi bua Nzɛmbi buni buamate gu yulu.»
Nzɛmbi akomese Sése gu yulu
50Avanekaniva Sése àbɛge bɔ ngule a musɛnge a Bétani. Ndɛ chimbele miɔge, nàvɛde bɔ misaange. 51Va ndɛ vɛdenge bɔ misaange, akagege na bɔ, Nzɛmbi nàkomese ndɛ gu yulu. 52Tɔ baate bɛndi bàsome mabɔnge va busu bua buɛndi, nibàyimbese ndɛ. Vayulavane, bɔ nibàgabege na ngɔmbe yalotele gu Sérusalɛme. 53Tsuge yotchi, bɔ nibàkakesenge Nzɛmbi gutsɔ nzɔ yibàbɔndenge Nzɛmbi.
Избрани в момента:
Luke 24: NZB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES