Yohana 10
10
Isa yi saakunnasiiba ɲuma le le
1Isa vɛɛ: «Ǹ'i tuɲa fɔ ài yɛ, mɔɔ min tɛ donna saa wɛlɛ donda la, fɔ ka jɛlɛ ka don fan gbɛlɛ, wo tii yi son ni benkannikɛba le le. 2Kɛɛ mɔɔ min do yi donna wɛlɛ donda la, wo tii le saakunnasiiba bɛlɛbɛlɛ le. 3Dalakanaba yi da lakala ale le yɛ. Saalu y'a kan mɛnna. A aa saalu kilila, a bɛ ni a tɔɔ, ka bɔ ai le kɛnɛma. 4A vɛ aa saa bɛ labɔla, wo vɛ kɛla, a yi bila ai ɲa ka taa. Ado saalu yi bilala a kɔ, kamasɔlɔn ai k'a kan lɔn. 5Ai tɛ bilala mɔɔ gbɛlɛ kɔ, fɔ ka bɔli a ma, kamasɔlɔn ai ma wo tii kan lɔn.»
6Isa ka sana wo la ai yɛ, kɛɛ ai do m'a ɲaye.
7Wo lɔ, Isa vɛɛ ai yɛ kɔtunun: «Ǹ'i tuɲa fɔ ài yɛ, ǹe le saa wɛlɛ donda le. 8Mɔɔ minu nanin ǹ ɲa, son ni benkannikɛba le wo bɛ le, kɛɛ saalu ma ai tolomalɔ wolu ma. 9Ǹe le donda le. Ni mɔɔ mɔɔ vɛ donna ǹ fɛ, wo tii kisitɔle. A do kɛtɔ don ni bɔ kɛla ka dɔnnikɛya sɔlɔn. 10Son tɛ nala ko ko si lɔ mafɔ suɲali, faali, ani tiɲali. Ǹe koni nanin fɔsa mɔɔlu yi niimaya sɔlɔn lawasa lɔ.
11«Ǹe le saakunnasiiba ɲuma le. Saakunnasiiba ɲuma le y'a nii dila saalu ya ko lɔ. 12Mɔɔ min yi baalela wɔliko lɔ, wo tii tɛ saakunnasiiba bɛlɛ le, kumatɛ saalu tii. Ni a ka soofali dɔ natɔla ye, a yi saalu tola je ka bɔli. Soofali do yi saa dɔlu minale, k'a tɔlu lɔjɛzɛn. 13A yi bɔlile, kamasɔlɔn wɔliɲininba le a le, min mako pa tɛ saalu lakanako la. 14#Matiyu 11.27; Luka 10.22.Ǹe le saakunnasiiba ɲuma le. Ǹ ka ǹa saalu lɔn, ai do ka ǹ lɔn, 15iwo ǹ Fa ka ǹ lɔn teme, ani ǹ ka ǹ Fa fana lɔn ten ne. Ǹe do yi ǹ nii dila saalu ya ko lɔ. 16Saa gbɛlɛlu yi m̀ bolo, minu tɛ wɛlɛ min nɔ. Fɔ ǹ'i na wolu fana le. Ai do kɛtɔ ǹ kan mɛnna. Wo vɛ kɛla, ai bɛ kɛtɔ saa kulu kelen ne le, k'ai kɛ saakunnasiiba kelen bolo.
17«Ǹ Fa yi ǹ kanula, kamasɔlɔn ǹ'i ǹ nii dila fɔsa ǹ'a sɔlɔn kɔtunun. 18Mɔɔ suu suu tɛ se ǹ nii minala ǹ na, ǹe gbu le y'a dila. See yi ǹ yɛ k'a di, ani see yi ǹ yɛ k'a sɔlɔn kɔtunun. Ǹ Fa na ǹ jamalila min na, wo le ve.»
19Jahudiya kuntiilu lɔ ka tala kɔtunun kamasɔlɔn kuma wolu fɛ. 20Ai siyama vɛɛ: «Jina le vɛ fa bila a lɔ. Mindɛ lɔ ài y'ài tolomalɔla a la?»
21Kɛɛ a dɔgbɛlɛlu vɛɛ: «A yi kuma minu fɔla, jinatɔ tɛ kuma suu wo fɔla dɛ! Jina yi sene ka ɲagbɛ ɲa laka?»
Mɔɔlu k'i ban Isa lɔ teme
22Lɔhɔlɔmabonba kalifako Ala la, wo selibɔ min yi kɛla Jelusalɛmu san o san, wo ka bɛn nɛnɛbɔ waate ma. 23Isa do tɛɛ a mataamana lɔhɔlɔmabonba luu kɔnɔ, Masakɛ Sulimana ya bolon kɔlɔ. 24Jahudiya dɔlu vɛ ai ladɛnna Isa laminin nɔ je k'a fɔ a yɛ, ai vɛɛ: «I kɛtɔ sika bɔla mɔ lɔ waate mindɛ? Ni ile le Masa Tɔɔmasenin ne, i y'a fɔ mɔ yɛ k'a lagbɛ.»
25Isa k'ai javi, a vɛɛ: «M̀'ɛ ban wo fɔla ài yɛ, kɛɛ ài do ma la ǹ na. Ǹ'i ko minu kɛla ǹ Fa ya seetiiya lɔ, wolu le yi seleya dila ka bɛn m̀ ma. 26Kɛɛ ài limaniyanin tɛ, kamasɔlɔn ài fɛ tɛ ǹa saa kulu la. 27Ǹa saalu y'ai tolomalɔla ǹ kumakan na. Ǹ k'ai lɔn, ai do yi bilala ǹ kɔ. 28Ǹ'i niimaya banbali dila ai ma, ai do tɛnala halakila tuun, ado mɔɔ foi tɛnala sena ai jasola m̀ bolo. 29Ǹ Fa min n'ai dila m̀ ma, wo buɲanin vɛ bɛ le, ado mɔɔ suu suu tɛ se ai jasola ǹ Fa bolo. 30Ǹe ni ǹ Fa yi kelen ne le.»
31Wo fɔ Isa bolo, Jahudiyalu ka kawakulunnu ta kɔtunun ko ai y'a bon k'a faa. 32Isa do vɛɛ ai yɛ wo lɔ: «Ǹ na kɛko ɲuma siyama jiyala ài la minu bɔnin ǹ Fa fɛ. Ài y'a fɛ ka m̀ mabon a mindɛ ya ko lɔ?»
33Ai k'a javi, ai vɛɛ: «Mɔ t'i bonna kɛko ɲuma dɔ ya ko lɔ, mafɔ iya Alalafeyakan. Kamasɔlɔn i tɛ foi le fɔ adamaden, kɛɛ i i jɛlɛ kɛla mɔ Tii le le.»
34Isa vɛɛ: «Jalasa Ala m'a fɔ àiya seliya kitabu kɔnɔ, ko: ‹M̀'ɛ a fɔ ài ma ko tiilu›? 35Ala na a kumakan lasena mɔɔ minu ma, a n'a fɔla wolu ma ko tiilu, ado min sɛvɛnin kitabu kɔnɔ, wo ma tɛ se falinna. 36Ni wo le, ǹe do, ǹe min tanin ǹ Fa bolo ka ǹ kelaya dunuɲa? Mindɛ lɔ ài y'a fɔla ko m̀'ɛ Alalafeyakan fɔ, kamasɔlɔn n'a fɔla mingɛ ko Ala Denkɛ le ǹ ne? 37Ni m̀ ma kɛ ǹ Fa ya baalelu kɛla, ài kà la ǹ na. 38Kɛɛ ni a ka talan ǹ'i wolu le kɛla, ài yi la wolu la, hali ni ài ma la ǹe la, fɔsa ài y'a lɔn k'a gbɛ a ma ko ǹ kafonnin ǹ Fa kan, ale fana kafonnin ǹ kan.»
39Ai k'i wuli kɔtunun a minako lɔ, kɛɛ a k'i polokoso ka bɔ ai bolo.
40 #
Yohana 1.28. A do ka bɔ je ka taa Julidɛn kɔɔ kɔma kɔtunun ka se dingila dɔ lɔ, Yaya tɛɛ mɔɔlu makola tɛɛminja kɔlɔman ne. A do ka waate dana kɛ je. 41Mɔɔ siyama ka na a ma. Ai do tɛɛ a fɔla, ai vɛɛ: «Yaya ma kawananko foi kɛ. Kɛɛ a na ko ko si fɔla ka bɛn kɛ́ min ma, wo bɛ yi tuɲa le le.» 42Ado mɔɔ siyama ka limaniya Isa ma je.
Избрани в момента:
Yohana 10: MBT2023
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Manya Bible Translation, © SIM International, 2023