Yohana 12
12
Mɔyamu ka Isa sen mamun tulu sumadiyanin ne teme
Matiyu 26.6-13; Malɛkɛ 14.3-9
1Timinkunna Selilon tɛɛ vɛ to tele wɔɔlɔ, wo lɔ, Isa ka taa se Betani ka don Lazali ya bon na, a na min lawulila ka bɔ saya lɔ. 2Ai ka faanali ba lɔbɛn Isa yɛ. Maata le tɛɛ dɔnnifen siila ai kɛɛna, ado Lazali gbu tɛɛ dɔnnikɛya lɔ Isa fɛ je. 3#Luka 7.37, 38.Ai ka to dɔnnila, Mɔyamu ka na tulu sumadiyanin daagbɛlɛn ne, ai y'a fɔla min ma ko naladu, a tɛɛ litili tala jate bɔle. A do ka wo mun damina Isa sen ma, k'a matɛ a kunsi le. Wo suma ka jɛzɛn fan bɛ lɔ bon na. 4Kɛɛ Isa kɔbiladen min tɔɔ tɛɛ ko Judasi Isakaliyɔti, min tɛɛ a janva boloma, wo vɛɛ: 5«Mindɛ lɔ tulu min ma fele wɔligbɛ gbana kɛmɛ sawa (300) la, ka wɔli wo kɛ bolokolonnu madɛmɛlifen ne?» 6Kɛɛ a do ma wo fɔ bolokolonnu hena ma, mafɔ son ne tɛɛ a le, ani a deinin tɛɛ a bolo donna aiya wɔlibilabɔlɔ lɔ min tɛɛ a bolo.
7Kɛɛ Isa do vɛɛ a yɛ: «Moso min to je. A na tulu min ladalola ka bɛn ǹ sudoon lon ne ma. 8Bolokolonnu totɔ ài tɛma waate bɛ, kɛɛ ǹe do tɛnala tola ài tɛma kudein.»
Ɲamɔɔlu ka janva lasii Lazali ma teme
9Jahudiyalu k'a mɛn mingɛ ko Isa vɛ taa Betani, ai siyama vɛ taala je. Ale kelen ya ko tɛɛ tɛ, mafɔ Lazali ya ko fana, a na min lawulila ka bɔ saya lɔ. 10Wo lɔ, salakalase kuntiibalu ka Lazali faako jatesii fana, 11kamasɔlɔn Jahudiya siyama tɛɛ bɔla ai kɔ ka limaniya Isa ma ka bɛn Lazali ya ko ma.
Isa ka don Jelusalɛmu mɔɔbaya boloma teme
Matiyu 21.1-11; Malɛkɛ 11.1-11; Luka 19.28-40
12Wo kɛnɛbɔlon, jama ba minu nanin tɛɛ selibɔya lɔ, wolu k'a mɛn ko Isa yi nala Jelusalɛmu. 13Wo lɔ, ai vɛ taala tamalo bululu le a labɛnya lɔ, k'ai kan labɔ, ai vɛɛ:
«Hozana!
Duwawu yi wo le yɛ min yi nala mɔ Tii tɔɔ lɔ!
Duwawu yi Isilan masakɛ yɛ!»
14Isa ka sofalini bolan dɔ ye ka jɛlɛ wo kɔkan, k'a kɛ iwo a sɛvɛnin kitabu kɔnɔ teme, ko:
15«Ziyɔn sodennu, ài kà siyan!
Ài y'a ye, àiya masakɛ yi nala ài ma,
a do siinin sofalini bolan kɔkan.»
16Isa kɔbiladennu tɛɛ ma ko wolu ɲaye kunfɔlɔ le, kɛɛ a ka magbiliyali sɔlɔn waate min nɔ, ai hangili ka bila a lɔ ko, ko minu sɛvɛnin kitabu kɔnɔ ka bɛn a ma, wo bɛ le kɛnin a yɛ.
17Jama min ka Isa ye Lazali kilila ka bɔ kabulu lɔ, wolu ka to seleya dila ka bɛn wo ma. 18Wo le k'a kɛ, jama ka na a labɛnya lɔ, kamasɔlɔn ai ka mɛn ko ale le na kawananko wo kɛla. 19Wo lɔ, Falisilu k'a fɔ i ɲɔɔ yɛ, ai vɛɛ: «Ài y'a ye, ài tɛ se foi ɲiala butu, kamasɔlɔn dunuɲa bɛ vɛ bila a kɔ!»
Isa ka aa sayako fɔ teme
20Wo k'a talan, Gɛlɛkika dɔlu tɛɛ batokɛbalu tɛma minu taanin tɛɛ Jelusalɛmu selibɔya lɔ. 21Wolu k'i madon Filipe la, ale min bɔnin tɛɛ Betisaida so kɔnɔ Galile koovi lɔ. Ai do vɛɛ a yɛ: «Kuntii, m'a fɛ ka Isa ye.» 22Filipe ka taa wo fɔ Andele yɛ, ado ai mɔɔ fila ka taa wo fɔ Isa yɛ. 23Wo lɔ, Isa k'ai javi, a vɛɛ: «Mɔɔnivin Tanin ya magbiliyali waate vɛ se. 24Ǹ'i tuɲa fɔ ài yɛ, ni malo kama kelen ma sɛnɛ duu lɔ ka tunun, ale kelen ne totɔ. Kɛɛ ni a ka tunun duu lɔ, a yi fɛlɛnne ka sawati bɛlɛbɛlɛ kɛ. 25#Matiyu 10.39; 16.25; Malɛkɛ 8.35; Luka 9.24; 17.33.Wo le y'a ma, ni mɔɔ min ka aa niimaya ladiyaɲɛ, wo tii bɔnɔtɔle a la. Kɛɛ do, ni mɔɔ min ka aa dunuɲalɔtɛɛ lagbeyaɲɛ, wo tii ya niimaya la yi kanale kudein. 26Ni mɔɔ min y'a fɛ ka baale kɛ ǹ yɛ, fɔ wo tii yi bila ǹ kɔ, ado m̀'ɛ kɛla tɛɛminja, ǹa bɔiden fana kɛtɔ je le. Ni mɔɔ min ka baale kɛ ǹ yɛ, ǹ Fa kɛtɔ wo tii buɲala.»
27«Ǹ joso tɔlɔyine. Wo lɔ, ǹ'i mindɛ fɔ? Jalasa ǹ'a fɔle, ǹ ko: ‹Ǹ Fa, i yi m̀ matanga tɔlɔya waate min ma›? Wo tɛ bɛn, kamasɔlɔn ǹ nakun ne wo le. 28Ǹ Fa, i tɔɔ ma yi gbiliya!»
Wo fɔ Isa bolo, kumakan dɔ ka bɔ sanma k'a fɔ, a vɛɛ: «M̀'ɛ a magbiliya. Ǹe do kɛtɔ a magbiliyala kɔtunun.»
29Jama min tɛɛ lɔnin je, wolu ka wo mɛn mingɛ, a dɔlu vɛɛ: «Sankulukan ne.» A dɔgbɛlɛlu vɛɛ: «Mɛlɛka dɔ le na kumala a fɛ.»
30Kɛɛ Isa k'ai javi, a vɛɛ: «Kumakan min ma bɔ ǹa ko lɔ, mafɔ àiya ko. 31Tandainɔ yi ne, dunuɲa kititɛɛ waate vɛ se, ado dunuɲa kuntii gbɛntɔle butu. 32Ǹe koni la vɛ jɛlɛla ka bɔ duukolo kɔkan, ǹ kɛtɔ adamaden bɛ masamana k'ai lana m̀ ma.» 33Isa na min fɔla a faako ɲa jiyako le lɔ.
34Wo lɔ, jama vɛɛ a yɛ: «Mɔ n'a mɛnna ko a sɛvɛnin seliya kitabu kɔnɔ ko Masa Tɔɔmasenin totɔ niimaya le lɔ kudein. Wo ma yi ne, mindɛ y'a kɛla vɛ i y'a fɔla ko Mɔɔnivin Tanin la ka kan ka jɛlɛ ka bɔ duukolo kɔkan? I kan yi Mɔɔnivin Tanin min ma, jene yi wo tii le?»
35A do ka jama javi, a vɛɛ: «Kɛnɛya kɛtɔ waateni kɛla ài tɛma bene. Damanda kɛnɛya y'ài tɛma, ài yi to taamana alako divi kana bala ài lɔ. Mɔɔ min yi taamana divi lɔ, wo tii ma a taaya lɔn. 36Damanda kɛnɛya y'ài tɛma, ài yi limaniya kɛnɛya ma, fɔsa ài yi kɛ kɛnɛyalɔmɔɔlu le.» Isa wɔlinin ko wolu fɔla, a ka bɔ je ka t'i doon ai ma.
Mɔɔlu ya limaniyabaliya
37Hali Isa tɛɛ vɛ kawananko siyama minu bɛ kɛ ai ɲakɔlɔ, ai do ma limaniya a ma, 38fɔsa Nabi Ezayi ya kelayakuma ma yi fa teme, ko:
«Mɔ Tii, jene vɛ la mɔ kumakan na?
Mɔ Tii ya foniseleya la vɛ nkɛnɛmaya jene yɛ?»
39Wo le n'a kɛla, ai ma se limaniyala, kamasɔlɔn Nabi Ezayi k'a fɔ kɔtunun, a vɛɛ:
40«Ala vɛ ai ɲa gbɛ
ani k'ai josokun ja,
alako ai ɲa kana yeni kɛ,
ani ai josokun kana koɲaye,
kamasɔlɔn ai t'a fɛ k'ai jɛlɛ lasei Ala ma, fɔsa a tɛɛ ai lakisi.»
41Nabi Ezayi na wo fɔla, baa a tɛɛ vɛ Isa ya magbiliyali ye ka kuma ka bɛn a ma.
42Wo bɛ n'a kɛ, hali Jahudiya kuntii siyama limaniyanin tɛɛ Isa ma, kɛɛ ai ma ai lɔ wo la bala lɔ, kamasɔlɔn ai tɛɛ siyanna Falisilu le ɲa, fɔsa ai kana ai gbɛn Aladalibon na. 43Kamasɔlɔn adamadennu ya magbiliyali le diyanin tɛɛ ai yɛ ka timin Ala ta la.
Isa ni a Kelaba
44Isa do k'a kan labɔ, a vɛɛ: «Ni mɔɔ min ka limaniya m̀ ma, wo tii ma limaniya ǹe kelen ma, mafɔ ǹ kelaba fana. 45Ni do mɔɔ min ka ǹ ye, wo tii vɛ ǹ kelaba fana ye. 46Ǹ nanin dunuɲa iwo kɛnɛya, fɔsa m̀ malimaniyamɔɔlu kana to divi lɔ butu. 47Ni mɔɔ min ka ǹ kumakan mɛn, a do m'a labato, ǹ tɛnala wo tii kitila. Kamasɔlɔn m̀ ma na dunuɲa kitiko lɔ, fɔ k'a lakisi. 48Ni mɔɔ min k'i ban ǹ nɔ, a do m'a bolo sii ǹ kumakan kɔlɔ, ko yi je min kɛtɔ a kitila, wo le ǹ kumakan ne, ǹ na min fɔla. Wo gbugbu le kɛtɔ a kitila dunuɲa laban lon. 49Kamasɔlɔn m̀ ma kuma ǹe gbu ya seetiiya lɔ, kɛɛ ǹ Fa min na ǹ kelayala, wo gbu le na ǹ jamalila kuma minu fɔko lɔ. 50Ado ǹ k'a lɔn niimaya banbali yi sɔlɔnna aa jamali le sabu la. Wo lɔ, ǹ'i ko minu lasena iwo ǹ Fa n'a fɔla ǹ yɛ teme.»
Избрани в момента:
Yohana 12: MBT2023
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Manya Bible Translation, © SIM International, 2023