Yohana 16
16
1«M̀'ɛ ko min bɛ fɔ ài yɛ, fɔsa ài kunnɔ kana tɛɛ ka limaniya siya bila. 2Ai kɛtɔ ài gbɛnna k'ài labɔ Aladalibonnu la. Ado lon dɔ sentɔ, ài faabalu kɛtɔ ai milila ko ai yi Ala ya baale le la wo le. 3Ai kɛtɔ ko wo suu kɛla ài la kamasɔlɔn ai ma ǹ Fa lɔn, kumatɛ ǹe ma. 4Kɛɛ ǹ na ko min bɛ fɔla ài yɛ, fɔsa waate wo vɛ sena, ài hangili yi bila a lɔ ko ǹ ka wo le fɔ ài yɛ.
Nii Sɛnɛyanin ya baale
«Ǹ tɛɛ ma ko minu fɔ ài yɛ a damina lɔ, kamasɔlɔn ǹ tɛɛ ài fɛ. 5Kɛɛ tandainɔ, ǹ taatɔle ǹ kelaba fɛlɔ, ado ài suu suu tɛ m̀ maɲiningala ko: ‹I taatɔ min?› 6Kɛɛ komi ǹ na ko minu fɔla ài yɛ, wo le n'ài niilafinna. 7Wo bɛ n'a kɛ, ǹ'i tuɲa fɔ ài yɛ, ǹ taako le fisayanin ài ma, kamasɔlɔn ni m̀ ma taa, Dɛmɛliba tɛnala nala ài ma. Kɛɛ m̀'ɛ taala, ǹ kɛtɔ Dɛmɛliba lanala ài ma. 8A do vɛ nala, a kɛtɔ dunuɲamɔɔlu ya filibandeya jiyala ai la ka bɛn julumbuko ma, ani telenmandeyako, ani kititɛɛko. 9Ai filinin ka bɛn julumbuko ma, kamasɔlɔn ai ma limaniya m̀ ma. 10Ai filinin ka bɛn telenmandeyako ma, kamasɔlɔn ǹ taatɔle ǹ Fa fɛlɔ, ài do tɛnala ǹ yena butu. 11Ai do filinin ka bɛn kititɛɛko ma, kamasɔlɔn dunuɲa kuntii ya kiti vɛ ban tɛɛla.
12«Ko siyama le yi ǹ fɛ bene k'a fɔ ài yɛ, kɛɛ ài tɛ se wolu manɔla yi ne. 13Kɛɛ Nii Sɛnɛyanin vɛ nala, min yi tuɲa lankɛnɛmayala, ale le kɛtɔ tuɲa bɛ jiyala ài la. A do tɛnala kumala a jɛlɛkanu ya seetiiya lɔ, kɛɛ a vɛ ko ko si mɛnna, a kɛtɔ wo le fɔla, ani ka ko natɔlu lase ài ma. 14A do kɛtɔ m̀ magbiliyala, kamasɔlɔn a na kuma minu bɛ mɛnna ǹ da, a kɛtɔ wolu le lasena ài ma. 15Min bɛ yi ǹ Fa ta le, wo bɛ yi ǹ ta le le. Wo le n'a kɛla, n'a fɔla, ǹ ko, Nii Sɛnɛyanin vɛ min sɔlɔnna ǹ fɛ, a kɛtɔ wo le lasena ài ma.»
Isa kɔbiladennu ya niilafin kɛtɔ jɛlɛmana ka kɛ sawa le
16«Waateni vɛ timinna, ài tɛnala ǹ yena butu. Kɛɛ waateni vɛ timinna wo kɔ, ài kɛtɔ ǹ yena kɔtunun.»
17Wo fɔ Isa bolo, a kɔbiladen dɔlu k'i ɲɔɔ maɲininga, ai vɛɛ: «A na min fɔla mɔ yɛ, wo kɔlɔ yi mindɛ le? A vɛɛ ko waateni vɛ timinna, mɔ tɛnala a yena butu, ani ko waateni vɛ timinna wo kɔ, mɔ kɛtɔ a yena kɔtunun. A vɛɛ kɔtunun ko wo kɛtɔ kɛla kamasɔlɔn a taatɔle a Fa fɛlɔ. 18Waateni wo kɔlɔ yi mindɛ le? A do kan yi min ma, mɔ ma wo ɲaye!»
19Isa tɛɛ k'a lɔn ai tɛɛ a fɛ k'a maɲininga ko wolu ma. Wo lɔ, a vɛɛ ai yɛ: «Ǹ n'a fɔla, ǹ ko, waateni vɛ timinna, ài tɛnala ǹ yena butu, kɛɛ waateni vɛ timinna wo kɔ, ài kɛtɔ ǹ yena kɔtunun. Ài i ɲɔɔ maɲiningala wo kɔlɔ le ma? 20Ǹ'i tuɲa fɔ ài yɛ, ài kasitɔ k'ai maɲuma, k'a talan dunuɲa kɔnɔlɔ yi diyala. Ài niilafintɔ, kɛɛ àiya niilafin kɛtɔ jɛlɛmana ka kɛ kɔnɔlɔdiya le. 21Ni moso ka kɛ tin nɔ, a ma yi ɲuma yi la bubale, kamasɔlɔn aa tɔlɔya waate vɛ se. Kɛɛ a ɲuma vɛ jiila, aa kɔnɔlɔdiya kɛtɔ a laɲinala tɔlɔya ba wo bɛ lɔ, kamasɔlɔn mɔɔnivin dɔ vɛ na dunuɲa. 22Àilu fana yi ten ne: Ài niila vɛ fin butu, kɛɛ ǹ kɛtɔ ài yena kɔtunun. Wo vɛ kɛla, ài kɔnɔlɔ yi diyale, ado mɔɔ foi tɛnala sena kɔnɔlɔdiya wo bɔla ài bolo.
23«Wo lon vɛ sena, ài tɛnala ǹ dalila ko ko si la butu. Ǹ'i tuɲa fɔ ài yɛ, ni ài ka ǹ Fa dali ko ko si la ǹ tɔɔ lɔ, a kɛtɔ wo dila ài ma. 24Hali bi, ài ma ko ko si dali ba ǹ tɔɔ lɔ. Ài y'a dali, ài do y'a sɔlɔnne, fɔsa àiya kɔnɔlɔdiya da yi fa.»
Isa vɛ see sɔlɔn dunuɲa ma
25«Ǹ na ko minu fɔla ài yɛ sanalu lɔ. Kɛɛ waate dɔ sentɔ, ǹ tɛnala kumala ài yɛ sana lɔ butu. Ǹ kɛtɔ ǹ Fa ya ko fɔla ài yɛ kuma lagbɛnin ne lɔ. 26Wo lon vɛ sena, ài kɛtɔ a dalila ǹ tɔɔ lɔ. Ǹe do t'a fɔla ko ǹe le kɛtɔ ǹ Fa dalila ài yɛ, 27baa ǹ Fa gbu y'ài kanula, kamasɔlɔn ài vɛ ǹ kanu, ani ài limaniyanin k'a fɔ m̀ bɔnin ale le fɛlɔ. 28M̀ bɔnin ǹ Fa le fɛlɔ ka na dunuɲa, ado m̀ bɔtɔle dunuɲa yi ne ka seikɔ ǹ Fa fɛlɔ.»
29A kɔbiladennu vɛɛ a yɛ wo lɔ: «Aahan, i yi kuma lagbɛnin ne fɔla butu, sana tɛ! 30Mɔ v'a ɲaye butu ko i ka ko bɛ lɔn, i do mako tɛ mɔɔ ya ɲiningali la. Wo le n'a kɛla, mɔ vɛ limaniya k'a fɔ ko i nanin ka bɔ Ala le fɛlɔ.»
31Isa do k'ai javi, a vɛɛ: «Ài vɛ limaniya butu? 32Waate dɔ sentɔ, a do vɛ se butu, ài bɛ jɛzɛntɔ k'ài kɔsei àiya luulu ma, ka ǹe kelen to. Kɛɛ ǹe kelen tɛ, kamasɔlɔn ǹ Fa yi ǹ fɛ. 33Ǹ na ko minu fɔla ài yɛ, fɔsa ài yi josolajii sɔlɔn ǹa kafonɲɔɔya lɔ. Ài kɛtɔ gbalo siyama masɔlɔnna dunuɲa, kɛɛ ài josola yi gbeleya. M̀'ɛ see sɔlɔn dunuɲa ma.»
Избрани в момента:
Yohana 16: MBT2023
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Manya Bible Translation, © SIM International, 2023