JOHAN 6
6
Kami Sangpangato Buh A Pacah
(Mat 14:13-21; Mrk 6:30-44; Luk 9:10-17)
1Ato pacoengah Jesuh loa Galili tuili hapbang yaeh ah a caeh (Tiberias tuili tiah doeh a kawk o). 2Dawnraihaih ih sakhaih hoiah ngan kana kaminawk a hoihsak ih to a hnuk o boah pongah mipui paroeai mah anih hnukah to a baang o. 3Jesuh loa maenui ah a dawh moa toah to a hnukbangnawk hoiah anghnut o. 4Judah kaminawk ih Takantak Poi tue loa a hnaih boah. 5Jesuh loa a taenghaek to a khet na-ah mipui paroeai mah angmah bangah kangzo to a hnuk moa Filip khaeah, “Ahi kaminawk boiboih hae pacah han ka khawt buh hae naamaw qanh o han?” tiah a duengh. 6(Hitiah a thuih hae Filip tanoekcakhaih ih ni; loktang ah thuih nahaeloa timaw ka sak han tito angmah panoek tangcae boah).
7Filip mah, “Mi boih mah zetta ah cak poeng han mataeng doeh takaw ka khawt ah qan han loa maku phoisa 200 to cang ai koeh tih,” tiah a naa. #6:7 Maku phoisa: Maku phoisa maeto hae kami longto ih nito tok saktho hoiah alii. (Mat 20:2 khen ah).
8A hnukbang ah ka om toengh longto, Simon Piter ih amnauk Andru mah, 9“Kami longto, barli takaw kae pangato hoi tangaa hnetto ka tawn naukta to hiah hae a oh. To-e hi zetto kapop mipuinawk hanah ato takaw hoi tangaa to khawt mak ai roeroe,” tiah a naa.
10Jesuh mah, “Mipuinawk to anghnusak oah,” tiah a naa pae. (Toah to phroh kahing to a oh mang). Topongah mipui to anghnut o moa sungqum boih ah nongpa ngaiah sangpangato thuemtham a oh. 11Jesuh loa takaw to a lak, Sithaw khaeah kawn lok a thuih moa toah kanghnu mipuinawk khaeah to a pazet. Tangaa to doeh tobatih toengah a pazet moa anihcae boih mah a cak o thaih roekto ah a cak o. 12Zok amhah o boih na-ah a hnukbangnawk khaeah, “Caknoinawk to pakuem o boih ah; tidoeh anghmatsak o hmah,” tiah a naa. 13Topongah anihcae mah pakuem o cu moa mipui mah barli takaw kae pangato a cak o pacoeng ih caknoi kamhlai to daengkraem hlaihnetto a koi.
14Ato dawnraihaih Jesuh mah a sak ih a hnuk o na-ah, “Ahi kami hae longnui ah kangzo han kaom Tahma#6:14 Tahma: 1:21 khen ah. tangtang ni,” tiah a thuih o. 15Mipui to angzo o ueloa sangpahrang ah suek nganga hanah na naeh o tih, tito Jesuh mah a panoek; topongah angmah buengah maenui ah to caeh.
Jesuh Tui Nuiah Takat
(Mat 14:22-33; Mrk 6:45-52)
16Duembang khoving na-ah Jesuh hnukbangnawk to tuili bangah to tathuk o moa, 17palong thungah akun o, moa tuili hapbang yaeh, Kapernaum vang bangah to amlaem o let. Qum tue a phak boah moa Jesuh loa anihcae khaeah angzo ai zawzaw vop. 18Ato nathuemah takhi kana parai a songh moa tuiphu paroeai angthawk. 19Palong to meng thum meng palito roekrak a thoek o na-ah Jesuh to tui nuiah ka taka moa palong bangah kangzo to a hnuk o na-ah paroeai a zit o. 20Jesuh mah, “Zi o hmah, kai ni,” tiah a naa pae. 21Topacoengah kawnhaih hoiah palong thungah to akun o sak moa a caeh han a koeh o haih ih hmuen ah to akraa aiah a phak o.
Mipui Mah Jesuh Pakrong O
22Akhawnbang ah tuili hapbang yaeh ah kaom mipuinawk loa toah to palong maeto khueh a oh tito panoek o. Ato palong thungah Jesuh to om ai moa a hnukbangnawk khueh a caeh o tito panoek o. 23Tiberias vang hoitoah kangzo palong kalahnawk to Angraeng mah kawn lok a thuih pacoengah mipui mah takaw a cak o haih ih ahmuenh taeng tuitaeng ah ang phak. 24Toah to Jesuh hoi a hnukbangnawk om o ai tito mipui mah a hnuk o na-ah to ih palongnawk to angthueng moa Jesuh pakrong koeh ah Kapernaum vang ah to a caeh o.
Jesuh Hinghaih Takaw
25Jesuh to tuili hapbang yaeh ah a hnuk o na-ah mipuinawk mah, “Patukkung, natuekah maw hiah hae na phak loa?” tiah a duengh pae o.
26Jesuh mah, “Loktang kang thuih o: Kai nang pakrong o hae ka sak ih dawnraihaih na panoek o thaih pongah na ai moa takaw to na koeh roekto na cak o pongah ni. 27Kamro hankoi buh han-iah to toksah o hmah; dungzan hinghaih hanah kangcak buh hanih ah to tok o lat ah. Ato buh loa Kami Capa mah na paek o tih, kawmawtiah Pa Sithaw mah anih nuiah amathaih ih to a sak zawh boah,” a naa pae.
28Topongah anihcae mah, “Sithaw mah sah o na soe tiah ang koeh o haih ih sak hanah timaw ka sak o han?” tiah a duengh o.
29Jesuh mah, “Sithaw mah sah o na soe tiah ang koeh o haih ih loa a patoeh ih kami to taang hae ni,” tiah a pathim pae.
30Anihcae mah, “Ka hnuk moa ka taang o thaih hanah kawbatih dawnraihaih ih to maw na sak han? Na sak hanih to loa timaw? 31Cabu Kacai mah, ‘Cak hanah van hoitoah takaw to a paek pae o,’ tiah a thuih ih batih toengah kaicae saezanawk loa praetanghaeng ah manna takaw to a cak o,” tiah a naa o. #Exo 16:4,15; Sam 78:24
32Jesuh mah, “Loktang ta-ah kang thuih o: Mosi mah a paek ih to van takaw tangtang ai ni. Van takaw tangtang to ka paek loa Pa ni. 33Kawmawtiah Sithaw mah paek ih takaw loa van hoitoah angzoh tathuk moa long hae hinghaih ka paekkung to ni,” tiah a naa pae.
34Anihcae mah, “Angraeng, ato takaw to na paek toemoe ah,” tiah a hnik o.
35Jesuh mah anihcae khaeah, “Kai loa hinghaih ih takaw ni. Kai khaeah kangzo kami loa natuek doeh zok amhlam mak ai; kai ka taang kami loa natuek doeh tui anghae mak ai. 36To-e kang thuih o batiah kai hae nang hnuk o boah e nang taang o ai. 37Pa mah ang paek ih kami boih loa kai khaeah angzo o ueloa ami doeh kai khaeah kangzo boih loa ka haek mak ai. 38Kawmawtiah kaimah koehhaih ih to sak hanah van hoitoah kanghum ai, kai matoehkung koehhaih ih to sak hanah ni loa kangzoh. 39Moa kai matoehkung ih koehhaih ih loa ahi ni: Kai ang paek ihnawk boiboih to maeto doeh anghmasak aiah, ani hnukkhuem koek ni ah anihcae boih to kang thawksak let boih hanih to ni. 40Kawmawtiah Pa mah a koehhaih ih loa Capa to a hnuk moa ka taang kami boiboih mah dungzan hinghaih a tawnh o hanah to ni. Hnukkhuem koek ni ah anihcae to pathawk moa ka hinghsak han,” tiah a thuih.
41“Kai loa van hoi-ih kangzo takaw ni,” tiah a thuih pongah mipuinawk mah laisaep o thuih. 42Topongah anihcae mah, “Hi kami hae Joseph capa Jesuh na ai maw? Amno hoi ampa doeh ka panoek o boih. Kawbangmaw ‘Van hoitoah kangzoh,’ tiah a tih halat hae?” tiah a thuih o.
43Jesuh mah, “Laisaep o tuek hmah laih ah! 44Matoehkung Pa mah kai khaeah na zaehoi ai nahaeloa ami doeh kai khaeah angzo thaih mak ai; moa hnukkhuem koek ni ah anih to pathawk moa ka hinghsak han. 45Tahmanawk mah, ‘Mi boih to Sithaw mah thuitaek ah om o tih,’ tiah a tarik o. Ami doeh Pa ih lok to ka thaih moa anih khae hoitoah kamtuk kami loa kai khaeah to angzoh.#Isa 54:13 46Hitiah ka thuih na-ah hae ami doeh Pa to a hnuk o boah tihaih ih na ai ni; Sithaw khae hoitoah kangzo kami khueh ni loa Pa to ka hnuh kami ah a oh. 47Loktang ta-ah kang thuih o: Ka taang kami loa dungzan hinghaih to a tawnh. 48Kai loa hinghaih takaw ni. 49Nangcae saezanawk loa praetanghaeng ah manna to a cak o e, a duek o toengtoeng. 50To-e ami doeh van hoitoah kangzo takaw to ka caa kami loa dueh mak ai. 51Kai loa van hoitoah kangzo hinghaih takaw ni. Ami doeh ahi takaw ka caa loa dungzan ah hing poe tih. Kang paek hanih takaw loa hi long mah hinghaih a hnuk thaih hanah kang paek ih ka takngan ni,” tiah a naa.
52Totiah a thuih pongah anihcae salak thungah angaekhaih ih to tacawt moa, “Kawbangmaw hi kami mah a takngan to cak hanah aicae to na paek thaih tih?” tiah thuih o.
53Jesuh mah anihcae khaeah, “Loktang ta-ah kang thuih o: Kami Capa takngan na caa o ai moa a thii to na nae o ai nahaeloa nangmahcae ih a thungah hinghaih na tawn o thaih mak ai. 54Kai ih ka takngan ka caa moa ka thii ka nae boih loa dungzan hinghaih to a tawnh o moa hnukkhuem koek ni ah pathawk moa ka hinghsak han. 55Kawmawtiah kai ih ka takngan loa buh tangtang moa ka thii loa naek hankoi tangtang ni. 56Kai ih ka takngan to ka caa moa ka thii ka nae boih loa kai thungah a hingh o moa kai doeh anihcae thungah ka hingh toeng. 57Kahing Pa mah ang patoeh moa anih ranghoiah kai doeh ka hingh. Tobatih toengah ami doeh kai ka caa loa kai ranghoiah hing toeng tih. 58Topacoengah ahi hae van hoitoah kangzo takaw ni; nangcae saezanawk mah a cak o ih takaw batih na ai ni. Anihcae loa a cak o e a duek o toengtoeng, to-e ahi takaw ka caa kami boih loa dungzan ah hing o tih,” tiah a naa.
59Ahi lok hae Kapernaum vang sinakok thungah a patuk na-ah to Jesuh mah a thuih.
Dungtasawk Hinghaih Lok
60A hnukbang paroeai mah ato lok to a thaih o na-ah, “A patukhaih ih hae a rai lawnlai. Mimah maw tahngai thaih tih?” tiah a thuih o.
61Mimah thui pae o aiah ato kawng ah to laisaep o tito a panoek moa anihcae khaeah, “Ahi patukhaih ih mah hae nangcae to palung a boengsak o maw? 62Totibaloa patahhaih iah Kami Capa hae zanghnii thuem ih a ohhaih ahmuenh ah kamlaem let to na hnuk o nahaeloa kawbangmaw na om o tih? 63Hinghaih ih ka paekkung loa Sithaw ih Pakhra ni; kami sakthaihaih ih loa azompui ni. Nangcae khaeah kang thuih o ih loknawk hae loa hinghaih ka paek Sithaw ih Pakhra to angzoh haih. 64To-e kami thoemto mah na taang o ai,” tiah a naa. (Jesuh loa atangsuek nahoiah mah amito maw ka taang han ai moa amito maw angmah nuiah paipi alae tih, tito a panoek king). 65Moa anih mah, “Hitiah a oh pongah Pa mah anihcae hanah loklam sah pae ai nahaeloa ami doeh kai khaeah angzo o thaih mak ai, tiah kang thuih o ih to ni,” tiah a naa.
66Topongah Jesuh hnukbang kami paroeai mah amlaem o let moa ahnuk ah to baang o ai boah. 67Topongah a hnukbang hlaihnetto khaeah, “Nangcae doeh kai hae caehtak han na koeh o toeng maw?” tiah a duengh.
68Simon Piter mah, “Angraeng, ami khaeah to maw ka caeh o tih loa? Nang ni loa dungzan hinghaih ka paek lok to na tawnh.#Mat 16:16; Mrk 8:29; Luk 9:20 69Moa vaihi loa nang hae Sithaw khae hoitoah kangzo Kami Kacai ni, tito kang taang moa kang panoek o boah,” tiah a naa.
70Jesuh mah, “Nangcae hlaihnetto hae kaimah kang tuek o na ai maw? To-e longto loa taqawk ah na oh o ving,” tiah a naa. 71Anih loa Simon Iskariot capa Judas ih akawng to ni a thuih. Kawmawtiah Judas loa hnukbang hlaihnetto thungih longto toeng e anih nuiah paipi alae.
Избрани в момента:
JOHAN 6: AKNT2023
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Asang Khongso New Testament in Eastern Khumi © Bible Society of Myanmar, 2023.