เห่ขุทวาลู่ 12
12
จอแปแหร่ ตูจูเพร เอ๊เถ่จว๊า คูอับราม
1จอแปแหร่ ตูจูเพร เฮ๊ คูอับราม เน๊อ, “แด่แก เนเทอเนเก่, เนกลุยเนแล เน๊อ เนเพ อาตี๊หี่แตแพเต๊เห่ เร๊อ เถ่จว๊า มอ เด๊อ เทอเก่ เด๊อ แว เก่ เด๊อะโล เป่ เน ปา เนอเต๊เก่ นี๊.#เพรโด่แนพู๊ เต๊เห่ ๗:๒-๓, ฮีบรู ๑๑:๘
2แว เก่ นอ ทวาแถ่ เน เน๊อ เมวเจ่อดู๋ เต๊อเจ่อ ปา,
เร๊อ แว เก่ เมบุ๊ยเมเตอเรอ เน ปา,
แว เก่ นอ โลเทอโลเก่ เนมุย ปา
เร๊อ เน เก่ ทวา เป่ เตบุ๊ยเตเตอเรอ เต๊อเจ่อ เด๊อ อูเง ปา.
3แว เก่ เด๊อะบุ๊ยเด๊อะเตอเรอ แกแย เด๊อ อา เด๊อะบุ๊ยเด๊อะเตอเรอ เน เนอเต๊เห่ ปา.
แว เก่ อิชอฮา แกแย เด๊อ อา อิชอฮา เน เนอเต๊เห่ ปา.
โทเร๊อ แกแย ล๋อ ปลี โอ่ เด๊อ เห่ขุ เออเต๊เห่เนอ,
แว เก่ เด๊อะบุ๊ยเด๊อะเตอเรอ แฮเง เหย่ซี เน๊อ เน ปา.”#กาลาเทีย ๓:๘
4เร๊อ คูอับราม เถ่จว๊า หม่าแหน่ ฮู๋ จอแปแหร่ ตูจูเพร เฮ๊โอ่ ลู เนอ, เร๊อ อาพู๊ดุ คูโลท ครวาจว๊า เกอลู. เบ๊อะ คูอับราม โอ่ เด๊อ วีฮาราน เร๊อ อา เถ่จว๊า เบ๊อะเนอ, อาหน่า โอ่ เฮ๊อ โซซว๊าเตอเชอ เน๊อ แงหน่า เฮ๊อ. 5คูอับราม เอ๊หนิ เร๊อ อาเม เหมาะซาราย, อาพู๊ดุ คูโลท, โทเร๊อ อา พย๊า เกอเร๊อ ล๋อ อาเตดุแหย่แถ่เซ เน๊อ อาเตมีเตดอ เน๊อ หลู่ เด๊อ อา พย๊าหนิ เบ๊อะ วีฮารานกู เนอเต๊เห่, เร๊อ เหย่ซี เถ่จว๊า แลแค เด๊อ คานาอันเก่, เร๊อ อา จว๊าโต่ แลแค เบ๊อะเนอ.
6เพอับราม เน๊อ อาแกแย เต๊เห่ โนจว๊าตาลว๊าแก คานาอันเก่ เร๊อ อา จว๊าโต่ แลแค เด๊อ วีเชเคมเก่, ส่อเหมาะดุ โอ่ เด๊อ โมเรห์เก่ เนอต๊อเหมาะ อาโอ่. เบ๊อะเนอ, คานาอันเมวเจ่อพู๊ เต๊เห่ โอ่แลแค เบ๊อะ เก่กู เนอ. 7เบ๊อะเนอเค, จอแปแหร่ ตูจูเพร โอ่โลแถ่ เป่ คูอับราม เร๊อ อา เฮ๊ ลู เน๊อ, “เก่ เออเต๊เก่ หม่า แว เก่ เด๊อะ เน๊อ เนพู๊เนเลอ ปา,” โทเร๊อ คูอับราม ต่าแถ่ หนิเป่ จอแปแหร่ ตูจูเพร เด๊อ อา โอ่โลแถ่ เป่ ลู เนอเตเพร อาเง เตหลู่แตเหร่ เต๊เหร่ เน๊อหล่อ.#เพรโด่แนพู๊ เต๊เห่ ๗:๕, กาลาเทีย ๓:๑๖
8โทเร๊อ อา จว๊ากาแล ติ เด๊อ วีเบธเอล เบ๊เถ่ โฉ่เกล เนอตากยา, เร๊อ อา จว๊าช๊อโอ่ แลแค อาเหล่สื่อเหล่แบ่ เบ๊อะ วีเบธเอล เน๊อ วีอัย อาเปล่กู เนอ. วีเบธเอล เร๊อ อา โอ่ เด๊อ อาเบ๊โน, วีอัย เร๊อ อา โอ่ เด๊อ เบ๊เถ่ ตากยา. เร๊อ อาต่าแถ่ เป่ จอแปแหร่ ตูจูเพร อาเง เตหลู่แตเหร่ เน๊อหล่อ เบ๊อะเนอ เต๊เหร่ เร๊อ อา จ๊อเบ แถ่เร๊อ จอแปแหร่ ตูจูเพร เบ๊อะเนอ. 9เด๊อ อาโหน่เนอ อา แกล่จว๊าโอ่ โต๊โผะ โท โต๊โผะ, เร๊อ อา จว๊าโอ่ โต่ เด๊อ คานาอันเก่ ซิแล ตากยา.
คูอับราม จว๊าโอ่ เด๊อ อียิปต์เก่
10เบ๊อะเนออาเค หน่ากล่า เร๊อ เก่วีเก่กอ โอ่แถ่ ชอแหน่เจ๊อ เด๊อ คานาอันเก่กู อาขว่าอาคยา, คูอับราม แกล่ตา จว๊าโอ่โก๊เล๊ เด๊อ อียิปต์เก่ เตอเปลอฮู๊. 11เบ๊อะ เหย่ซี เกเร ผื่อ โนเฮ๊อ เด๊อ อียิปต์ เก่กือกู เฮ๊อ เบ๊อะเนอ, อา เฮ๊ เกอเร๊อ อาเม เหมาะซาราย เน๊อ, “เน หม่า เพรเหมาะ เด๊อ อา โหมะตว๋า แหน่เจ๊อ เตเพร. 12ช๊า อียิปต์พู๊ เต๊เห่ แม๊เถ่ เน อาเค ปาเนอ, เหย่ซี เก่ เฮ๊ แลแค เน๊อ, ‘เนอหม่า อาเม เฮ๊อ.’ เร๊อ เหย่ซี เก่ เมเซอแก แว ปา, เร๊อ อา เก่ แด่โอ่เซอเพร แก เน ปา. 13แด่ทูซิปล่อ เร๊อ เฮ๊ เกอเร๊อ เนเหน่ เน๊อ เน หม่า แวโป่เพรเหมาะ เนอ นี๊, เน เก่ เฮ๊ ฮู๊เนอ ตื๊อหม่า เหย่ซี เมโมเมแร๊ฉื่อ แว ปา, เด๊อ เนขว่าเนคยา เร๊อ เหย่ซี เก่ แด่โอ่เซอเพร เกอ แว ปา.”#เห่ขุทวาลู่ ๒๐:๒, ๒๖:๗
14โทเร๊อ เบ๊อะ เหย่ซี จว๊าโน เฮ๊อ เด๊อ อียิปต์เก่กู เบ๊อะเนอ, อียิปต์พู๊ เต๊เห่ แม๊เถ่เฮ๊อ เหมาะซาราย เน๊อ อา โหมะตว๋า แหน่เจ๊อ. 15เร๊อ อียิปต์เก่คุ๊ย อาเพรแรเตพู๊ เต๊เห่ แม๊เถอะ เหมาะซาราย เร๊อ อา แฮ ถู่เซ๊ หนิเป่ อาหรี่อาแก เน๊อ คุ๊ย, เร๊อ คุ๊ย ซิหยื่อ ลู เน๊อ อาเม เร๊อ อา นอจว๊า เอ๊แฮ ลู เด๊อ อาโฮกู. 16เด๊อ เหมาะซารายอาขว่าอาคยา, คุ๊ย เอ๊โมฉื่อ แร๋ แหน่เจ๊อ คูอับราม, โทโต่ อา เด๊อะ เอ๊ แหน่เจ๊อ ลู ซิหมิ เน๊อ เป่, ปู่เป๊เหน่, แมอ๊อแหล่เพ, แมอ๊อแหล่โหมะ, หลู่เพรคู, หลู่เพรเหมาะ เน๊อ ตีซิโบดุ เต๊เห่.
17เร๊อ คุ๊ย พย๊า เหมาะซาราย อาขว่าอาคยา, จอแปแหร่ ตูจูเพร นอตา เก่หร่าเก่ดวา เด๊อ อาต๊อหร่อเซ๊ แหน่เจ๊อ เต๊เห่ เด๊อ คุ๊ย เน๊อ อาเทอพู๊เก่พู๊ เต๊เห่ อาลู. 18ฮู๊เนออาขว่าอาคยา, คุ๊ย เอ๊แฮ คูอับราม เร๊อ อา เฮ๊ ลู เน๊อ, “เน จว๊า เมโต่ เจ๊อ แว ฮู๊เออ หม่า เมเต? อา หม่า แวเม, เน เฮ๊ แว ฮู๊เนอ โต่ เมเต? 19เน จว๊าเฮ๊ โต่ แวเน๊อ ‘เหย่ หม่า แวโป่เพรเหมาะ แพ๊,’ เร๊อ เน จว๊าปลวาพย๊า โต่ แว เน๊อ ลู เมเต? เออเล๊ เนเม, เอ๊กา แก มอ เร๊อ เถ่จว๊าแก แลแค.” 20เออโตโพ๊ เร๊อ คุ๊ย เฮ๊ตา อาโคเจ่ เต๊เห่ เร๊อ เหย่ซี เอ๊หนิ คูอับราม เน๊อ อาเม โทเร๊อ อา นอ โต่หนิ ลอ ล๋อ อาเตดุแหย่แถ่เซ อาตาหมื่อตาเต เต๊เห่ เร๊อ อา นอเถ่จว๊าแก เหย่ซี.
Избрани в момента:
เห่ขุทวาลู่ 12: EKTNTGEN
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте