མ་ཏི། 16
16
རྟགས་གེན་ཤོ་ཨ་ཉི་ཞུ་ཝ༌ལ།
1ཕ་རི་སི་པ་དང་ས་དུ་ཀི་པ་བ་ ཡི་ཤུ་ག་སྐུན་མདུན་ག་བཅག་ཐཱན་ རོ་ཀེ་རྒྱུགས་ལ་ལེ་དེན་གེ་ ཞིང་ཁམས་ག་ རྟགས་གེན་ཤོ་དག་ཉི་ ཞུ་ཝ༌ལ།
2ཉི་རོ་ཀི་ རོག་ཏེ་བ་ཀ་ ལན་གནང་ཉི་གསུངས་མ་ལ་ ངེ་རི་དག་པ་ཀབ་ཉི་ ངམ་ཙ་ལུ་ཨ་ཝ་ཐོང་ནེ་ལ་ ན་ཤི་ཡེག་ཅ་ ངམ་ཚ་ལེ་གི་ཝ་ལ་དག༌ཉི། 3དག་པ་ཀབ་ཉི་ ཝུན་བེད་པེ་ངམ་ཙ་ལུ་རི་ཉི་ བུག་པ་ཆོ་ནེ་ལ་ ན་ཤི་ཡེག་ཅ་ ངམ་སུ་ཁེ་ལེ་གི་ཝ་ལ་དག༌ཉི། ནོང་ཧང་ད་བུ་ ཨོ་ཕེ་གི་ལ་སྨོ་ ན་ཤི་ངབ་ཀ་རྟགས་གོད་ཐཱན་ ཡེག་པེ་རེ༌ལ། དག་པ་ཀབ་ཉི་ ན་ཤི་ཨོ་མ་ཇུང་ཁཱན་རྟགས་བ་ཀ་ དེན་ཐ་ཁྲེ་བེ་རེ་བུ་མ༌ལ། 4ངན་པ་དང་ དམ་ཚིག་མ་ཁཱན་ མི་རབས་གི་ཤ་ རྟགས་གོད་པེ་ལམ༌ཅ། དག་པ་ཀབ་ཉི་ རོག་ཏེ་བ་ཀ་དེན་གེ་ ཡོ་ན་ག་རྟགས་ཐུར་ཤ་མ་ཏོག་པ་ བཱརའ་རྟགས་ ཧང་རང་མ་གེན་མ་དག༌ཉི། ཡི་ཤུ་གི་ ཨོ་ཐེན་གསུངས་ཐཱན་ རོག་ཏེ་བ་ ཐུབ་ཐ་ཉི་ བྱོན་མ༌ལ༎
ཕ་རི་སི་པ་དང་ ས་དུ་ཀི་པ་ག་བི་ཏོ།
5སློ་མ་བ་མཚོ་གོག་ཉི་ ཉ་ལོ་ཀ་ནབ་ཀ་ཕེབས་པ༌ལ། དག་པ་ཀབ་ཉི་ རོག་ཏེ་བ་ཀི་ ཀེབ་ཏང་ཕ་ལེ་ག་ ཡིད་ཀ་མི་ཝ༌ལ། 6ཡི་ཤུ་གི་ རོག་ཏེ་བ་ཀ་ གསུངས་མ་ལ་ རིག་པ་སྒྲིམ་ཅོ། ཕ་རི་སི་པ་དང་ ས་དུ་ཀི་པ་བ་ཀ་བི་ཏོ་གེ་ རིག་པ་སྒྲིམ་ཉི་ཆོའི་དག༌ཉི།
7ཉི་རོག་ཏེ་བ་ནང་དོ་ཆཱས་ཨ་ཉི་ ཨ་ཤི་ཀེབ་ཏང་ མ་ཕ་ཝ་ཨ་དེན་གེ་ གསུངས་ལ་མེ་དག་ཉི་ ཡེག་པ༌ལ། 8རོག་ཏེ་བ་ཀི་ ཆཱས་ཨ་ཁཱན་ཁེ་པ་མཁྱེན་ཉི་ ཡི་ཤུ་གི་གསུངས་མ་ལ་ ན་ཧ་དད་པ་ གནམ་མེད་ས་མེད་ ཟེ་མུ་ཤ༌ལ། ན་ཧ་བ་ ཀེབ་ཏང་མ་ཝ་ཨ་དེན་གེ་ ཧང་ཨ་ཉི་ སྡུག་བསྔལ་ཨན་ཅ་ཡ། 9ན་ཤི་ཨོ་མ་བུ་ ཧ་གོ་ལུ་མ་ལ་སྨོ། ཇི་གི་ཀེབ་ཏང་ལྔ་གི་ སོ་ངོ་ 5000 ག་ ལྟོ་བི་ལེ་གང་ཀ་ ལཱན་ཇུ་ལུས་ཁཱན་བ་ཀི་ ཤོ་མ་ཧབ་ཏུར་ ཕུང་མ་ཤོ་ཝ་གི་ལ་སྨོ་ ཡིད་ཀ་མ་ལ་སྨོ། 10ཉི་ཀེབ་ཏང་ཟུམ་གི་ སོ་ངོ་ 4000 ག་བི་ལེ་གང་ཀ་ ལཱན་ཇུ་ལུས་ཁཱན་བ་ཀི་ ཤོ་མ་ཧབ་ཏུར་ ཕུང་མ་ཤོ་ཝ་གི་ལ་སྨོ་ ཡིད་ཀ་ཨ་ལུ་མ་ལ་སྨོ། 11ཨོ་ཉེ་རང་གི་ནེ་བུ་ ཇི་གི་ཀེབ་ཏང་ག་ཀོར་གེ་ ཆཱས་ཨ་ཝ་མང་གི་ཨ་ཉི་ ན་ཤི་ཧང་ཨ་ཉི་ ཧ་གོ་ལེ་རེ་བུ་མ་ལ་ཡ། ཇི་གི་ཡེག་ཅ་ ཕ་རི་སི་པ་དང་ ས་དུ་ཀི་པ་བ་ཀ་བི་ཏོ་གེ་ རིག་པ་སྒྲིམ་ཉི་ཆོའི་དག༌ཉི།
12ཇུ་ཀ་དག་པ་ཀབ་ཉི་ ཡི་ཤུ་གི་ ཀེབ་ཏང་ག་ཀོར་གེ་མང་གི་ཝ་ ཕ་རི་སི་པ་དང་ ས་དུ་ཀི་པ་བ་ཀི་ཡེ་ཁཱན་གེ་ རིག་པ་སྒྲིམ་ཅོ་དག་ཉི་ གསུངས་མ་གི་ཝ་ལ་ཨ་ཉི་ རོག་ཏེ་བ་ཀི་ ཧ་གོ་ཝ༌ལ༎
པ་ཏྲུས་གི་ ཡི་ཤུ་ཁིརིས་གི་ལ་དག་ཉི་ ཞུ་ཝ༌ལ།
13ཀའི་ས་རི་ཡ་ ཕི་ལིབ་པི་དག་ས་ག་ ཆ་འོག་ག་ཕེབས་ཏེན་གེ་ སོ་ངོ་བ་ཀི་ སོ་ངོ་ག་ཟ་ཤོ་ ཨི་བི་གི་ལ་ཡ་ཨ་ཉི་ ཡེག་ལ་ཡ་དག་ཉི་ ཡི་ཤུ་གི་ རོ་ཀ་སློ་མ་བ་ཀ་ ཇི་མ༌ལ།
14རོག་ཏེ་བ་ཀི་ ལན་མཇལ་ཉི་ ཚེ་བང་གི་ཨ་ནེ་ལ་ ཁྲུས་གསོར་པ་ ཡུ་ཧན་ན་དང་ ཉི་ཚེ་བང་གི་ཨ་ནེ་ལ་ ལུང་བསྟན་པ་ ཨེ་ལི་ཡ་དང་ ཉི་ཨོམ་ཆང་རང་ བཱརའ་སོ་ངོ་བ་ཀི་ཨ་ནེ་ལ་ ཡར་མི་ཡ་ ཨུ་ཉུ་མ་ནེ་ལ་ བཱརའ་ལུང་བསྟན་པ་བ་ཀ་པོང་ཀེ་ ཐུར་གི་ཝ་ལ་ཨ་ཉི་ ཡེག་ལ་དག་ཉི་ ཞུ་ཝ༌ལ།
15དག་པ་ཀབ་ཉི་ རོ་ཀི་ རོག་ཏེ་བ་ཀ་ ན་ཤི་ཨ་ནེ་ལ་ ཇང་ཨི་བི་གི་ལ་ཨ་ཉི་ མི་ན་ཡ་དག་ཉི་ ཇི་མ༌ལ།
16སི་མོན་པ་ཏྲུས་གི་ ལན་མཇལ་ཉི་ ནཱན་ཤོ་ གསོན་པོ་ཨ་ཉི་བཞུགས་ཁཱན་ དཀོན་མཆོག་ག་སྲས་ ཁིརིས་གི་ལ་དག༌ཉི།
17ཉི་ཡི་ཤུ་གི་ རོ་ཀ་གསུངས་མ་ལ་ ཡོ་ན་ག་ཟ་སི་མོན་ ནཱན་ཤོ་ བྱིན་རླབས་ཅན་གི༌ལ། ཨུ་ཐུ་ཆཱས་ཁེ་པ་ སོ་ངོ་གི་མང་གི་ཝ་ ཞིང་ཁམས་ག་བཞུགས་ཁཱན་ ཇ་ག་ཡབ་གི་ ན་ག་གེན་མ་གི༌ལ། 18ཉི་ཇི་གི་ ན་ག་ཡེག་པེ་ ནཱན་ཤོ་ པ་ཏྲུས་#16:18 པ་ཏྲུས་དག་པེ་དེན་ཐ་ཤོ་ ལུང་གི་ཝ༌ལ།གི༌ལ། ཉི་ཨོ་ཐ་ལུང་ཐུང་ཀ་ ཇི་གི་ ཇ་ག་ཆོས་ཚོགས་ཅོད༌པེ། ཉི་དམྱལ་བ་ག་དབང་གི་ ཨོ་ཉ་ཆོས་ཚོགས་ དབང་པེ་མར་བ། 19ཇི་གི་ན་ག་ ཞིང་ཁམས་ག་རྒྱལ་སྲིད་ག་ དེ་མེ་ཟུ་བ་བི༌ལེ། ནཱན་གི་ འཛམ་གླིང་ག་ ཧང་ཐིག་པ་ཐུར་ ཞིང་ཁམས་ག་བུ་ཐིག༌པེ། ཉི་ནཱན་གི་ འཛམ་གླིང་ག་ ཧང་ཕེག་པ་ཐུར་ ཞིང་ཁམས་ག་བུ་ཕེག་པེ་དག༌ཉི།
20རོག་ཁིརིས་གི་ལ་ཨ་ཉི་ ཨི་བི་ག་རང་ མ་ཡེག་ཅོ་ན་དག་ཉི་ རོ་ཀི་ རོ་ཀ་སློ་མ་བ་ཀ་ བཀའ་ན་སྒྲིང་སྒྲིང་ཨ་ཉི་གནང་མ༌ལ༎
ཡི་ཤུ་གི་ རོག་གཤགས་པེ་དག་ཉི་ གསུངས་མ༌ལ།
21ཨོ་ཉ་གེ་ག་ཏཱན་ ཡི་ཤུ་གི་ རོ་ཀ་སློ་མ་བ་ཀ་ རོག་ཡ་རུ་ཤ་ལེམ་ག་བྱོན་ཉི་ སོ་ངོ་ཆི་ལུ་བ་དང་ བླ་མ་ཆི་ལུ་བ་ ཉི་བཀའ་ཁྲིམས་ག་ སློབ་དཔོན་བ་ཀ་ ག་དང་གེ་ གནམ་མེད་ས་མེད་ དཀའ་ཝ་ཅཱད་པེ་ཁེ་ཝ་ཀོར་གེ་ དང་སང་ཀིན་ཨ་ཉི་ གསུངས་མ༌ལ། རོག་ཏེ་བ་ཀི་ ཇང་ཤེ༌ལེ། དག་པ་ཀབ་ཉི་ ནོང་སམ་ག་ནོང་ཀ་ ཇང་ལོག་ཉི་ཝུ་ལེ་ན་དག་ཉི་ གསུངས་མ༌ལ།
22པ་ཏྲུས་གི་ རོག་ལོག་ཐུར་ལོ་ཀ་ཏཱན་ ཞུན་ཐཱན་ བཱརག་ཉི་ ཞུ་ཝ་ལ་ མང་གི་གཙོ་བོ་ ཨུ་ཐུ་ད་བུ་ ཧ་ལ་རང་ ནཱན་ག་ཐུང་ཀ་ མ་ཇུང་ཆེན་དག༌ཉི།
23དག་པ་ཀབ་ཉི་ རོ་ཀི་པ་ཏྲུས་ལོ་ཀ་ཏཱན་གིར་ཐཱན་ སེ་ཏཱན་ ནཱན་ཇང་ཐུབ་ཐ་ཉི་ མ་དི་ལམ། ནཱན་གི་ ཇ་ག་ལམ་སུ་ལེ་ཅམ༌ལ། ཧང་ཡ་དག་ནེ་ལ་ ནཱན་གི་ མི་ཁཱན་ཁེ་པ་ དཀོན་མཆོག་གེ་མང་གི་ཝ་ སོ་ངོ་གེ་གི་ལ་དག༌ཉི།
24ཉི་ཡི་ཤུ་གི་ རོ་ཀ་སློ་མ་བ་ཀ་གསུངས་མ་ལ་ ཨི་བི་གི་ ཇ་ག་ཕྱག་ཞུ་ལེ་ག་ སེམས་ཨ་ཝ་ཐུར་ ཨོ་ཉ་སོ་ངོ་གི་ རོག་རོག་ཏེན་སྤང་ཐཱན་ རོ་ཀ་ཁྲིམས་ཤིང་བང་ཉི་ ཇ་ག་ཕྱག་ཞུ་ལེ་ཁེ༌ལེ། 25ཧང་ཡ་དག་ནེ་ལ་ ཨི་བི་གི་ རོག་ཏེན་ག་ཚེ་ག་ སྲོག་རྒྱབ་ཨ་ལེ་གོད་པ་ཐུར་ ཨོ་ཉ་སོ་ངོ་གི་ རོ་ཀ་ཚེ་གེ༌མེ། དག་པ་ཀབ་ཉི་ ཨི་བི་གི་ ཇ་ག་ཡོར་ཀེ་ རོ་ཀ་ཚེ་གེ་མ་ཐུར་ ཨོ་ཉ་སོ་ངོ་གི་ ཚེ་ཉོང༌པེ། 26སོ་ངོ་གི་ འཛམ་གླིང་ ཐམས་ཅན་རང་ ཉོང་ཐཱན་རང་གི་ནེ་བུ་ རོ་ཀ་ཚེ་གེམ་ནེ་ལ་ ཁེབ་སང་ཧང་ལ་ཡ། ན་ཧ་ཚེ་ཀབ་ཉི་ སོར་པེ་རེ་ཁཱན་ ཧང་ཅ་ཡ། 27ཧང་ཡ་དག་ནེ་ལ་ སོ་ངོ་ག་ཟ་ རོ་ཀ་ཞིང་ཁམས་ག་འཐེན་པ་བ་ཀབ་ཉི་ རོ་ཀ་ཡབ་ག་ གཟི་བརྗིད་ག་ནང་ཀ་ཨུན་ཐཱན་ སོ་ངོ་བ་ཀི་ ཨ་ཝ་ག་ལའི་དང་ཏུ་ཉི་ སེ་རབ་བི༌ལེ། 28ཇི་གི་ ན་ག་ཐྲང་ཉི་ཡེག་ཅ་ སོ་ངོ་ག་ཟ་ལོག་ཉི་ རོ་ཀ་རྒྱལ་སྲིད་ག་ མང་ཕ་སག་པུ་ ཨོ་ཐ་ག་ཐིང་ཉི་ཆོ་ཁཱན་ ཚེ་བང་གི་ ཤི་ཝ་ག་མ་སེ་ལ་དག༌ཉི༎
Избрани в момента:
མ་ཏི། 16: TNTB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Tshangla New Testament
© 2023, The Bible Society of India
all rights reserved