Lik 15
15
A naxax ale no mbaal mo’u ne
(ɗeeti Mace 18:12-14)
1We ndabdinooxoogna juuti fo lakas we wiin we a ƭeetoogna nen baabakaad a ngara me Yeesu ndax da nan-gilooxin.#5:29-30 2Farisiya we fo saasadax maak we kaa ñuxmatilooxoogu, a layaa yee:
«O koor oxeeke kaa dalnaa baabakaad we, soo a ñaamaa fa den.»
3Kaa koy, Yeesu a naxooxa a den a naxax aleeke yee:
4«O kiin na nuun a jegangaa paal teemeed, soo a mo’iɗ teen leng, ndax xaƴkee paal qarɓeen ɓetuu nahik ke fo paal ɓetuu nahik lakas ke na koƥ alaa, soo a waaƭik ne mo’na, boo yaa ta ga’kan? 5A ga’angaan, xan a gadooxin, too xan a ɗaay lool. 6A gatangaa no mbind ne, xan a xoy qaariit um fo gentand um, a lay a den ee: ‹Mbelakinooxyo fa mi, yaam ga’aam mbaal ne mo’’ina.› 7Neene itam, mexe layan a nuun ee: Xan a jeg o ɗaay olaa moƴna o magin na asamaan yaam o paabakaad o leng kut oxaa fesna pakaad um a cinj ee o ɗaay ole no wiin qarɓeen ɓetuu nahuk fo wiin ɓetuu nahuk waa soxla’eerna o mbes pakaad den a cinj.»
O xanjar o mo’u le
8«O tew oxuu jegna xa qanjar xarɓaxay xaaliis fa nqoolu, soo a mo’iɗ teen o leng, ndax heƥandkee o lampa, a leelaa mbind ne, a waaƭaa o ndang boo yaa ta ga’uuna? 9Yaa ta ga’kan, xan a xoy qaariit um fo gentand um, a lay a den ee: ‹Mbelakinooxyo fa mi, yaam ga’aam o xanjar ole mo’’ina.› 10Neene itam, mexe layaa a nuun ee: Xan o ɗaay o maak a jeg mbaambir no malaaka ke Roog yaam o paabakaad o leng kut oxaa fesna pakaad um a cinj.»
O ƥiy onqe ruuxna a koƥ
11Yeesu a layahina a den ee:
«O koor a jeg’a xa ƥiy xa ƭaq. 12O ndeɓ onqe a gara, a lay a faap um ee: ‹Faap, cooxaam a las es no ke waruuma o lam na halal fee wo.› Maaga, faap fee a xaajana a den ke da mbaruuna o lam. 13A cinj ñaal leng-leng, o ndeɓ onqe a sofa ke ta jegna fop fa xaaliis, soo a ret fo ten no saax goƭu. Maaga, a ñoowooga no kaa feluuna, a yaq ke ta lam’ina fop. 14Yaa ta ñaamna ke ta jeg’ina fop boo yoqɗatee tus, biim maak a rokiida no saax le, too a dalfooxa o ñak ke ta soxla’na. 15Bes, a reta a waaƭik calel maa no leng no waa ngenna no saax laa. Oxaaga a ɓisaan na xa qol um, ndax ta gayanan a tuul. 16A bug’a o ñaam lool no ke a tuul ake a ñaamaa, ndaa saɗiran o duq, yaam o leng cooɗ’iran tig. 17Maaga, a refa no xalaataa, soo a laytooxaa yee: ‹Jaajal fodu num faap es a jegu, da njeg ñaamel mayu kaa da mbaageerna o paang sax, soo mi koy um ref meeke, xonaa fo nqeex! 18Xam inoox, nomtoox maa faap es, layin ee: Faap, tooñaam a Roog, tooñong. 19Xoyatel o ƥeef sax a jombaxam. Ndiiki, fat o ɗeetaam nen o leng no jaajal we wo.› 20Cinj kaaga, a refa na ƭat, a nomtooxaa maa faap um.
Ke ta maad’ina o goƭaa fop oo, faap um a ƴookaan, ta yuɗin lool. A ƴufa a xetookin, a farakooxin, soo a foonin. 21O ƥeenqe a layaan ee: ‹Faap, tooñaam a Roog, tooñong, too xoyatel o ƥeef sax a jombaxam.› 22Kaa koy, faap fee a laya faɗ we ten ee: ‹Ñofyo ƥisiid sabadoor ne moƴna o mos, too ndokanin o ten. Ndokaneenoo o heɗ fo xa ñaaƭ itam. 23Ƥisiidyo o xeel ole moƴna o magin meen too mbarin. Fat i ñaam, mbelakinoox. 24Yaam o ƥees onqe xon’ina a ñoowatina. Kaa mo’’u too a feeña.› Naaga, a ndalfooxa o ndef no mbelakinooxaa.
25Yaaga fop koy, o maag oxe na xa qol axaa a reeƭu. Yaa ta gataa boo a matiid mbind naa, a nana mbak ne fo a kim ake. 26A xoya o leng no ngoor kaa, a laamtan ke xew’ina. 27O qoyaa a layaan ee: ‹O ndeɓ of gatu, soo faap of a waranin o xeel ole moƴna o magin meen, yaam kaa mo’’u ndaa a feeña na jam ndiiki.› 28Ndak fo ndak, o maag oxe a fuuxa, too bug’ee o rok kam mbind naa. Faap um a sutooxiida, too a layin ta rok, 29ndaa a doona a faap um ee: ‹Xa kiid xa mayu xey, axaa um jalanang. Mosiim o ñak o fi ke layaxamoona, too mosiraamo o coox sax o mbambe nqaa bumbaaytuuma fo qaariit es. 30Ye o ƥeef onqaana a gatna, ten fee ñaamna halal of fop fo a caga ke, waranaano o xeel ole moƴna o magin.› 31Faap fee a doonaan ee: ‹O ƥees, woxey fa mi bes fuu refna, too ke jeguuma fop, wo jegun. 32Kaa koy, kaa o war’u o sawar too felakinoox, yaam o ndeɓ of oxey, kaa xon’u, too a ñoowatina, kaa mo’’u, too a feeña.› »
Избрани в момента:
Lik 15: SRR23
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Copyright © 2015-2023 by Eglise luthérienne du Sénégal