Lik 20
20
Sañ-sañ fee Yeesu
(ɗeeti Mace 21:23-27; Mark 11:27-33)
1Na bes fa leng, a jopir Yeesu a jangnaa wiin waa kam Mbind Roog naa, soo a waare’aa Yegil mbaax ne, saasadax maak waa fo jaajangin maak waa no kebil kaa Moyiis fo maak waa a ngara maa Yeesu, 2a laamtin ee:
«Layangi a in: Sañ-sañ fum o fi’taa kene? An ci’ong sañ-sañ fene?»
3Yeesu a doona a den ee:
«Xam laamit a nuun tig itam: 4Batiise fee Saŋ o mat, na asamaan a inooru, ndi no wiin we?»
5Maaga a ñimatirooga yee:
«Boo i ndoonuuna yee: ‹Na asamaan›, yaaga xan a lay ee: ‹Xar taxu boog nu ngimee no ten?› 6Too i ndoonangaan ee: ‹No wiin we a inooru›, xan wiin we fop a mbarit a in a kac, yaam a woora a den ee Saŋ o tuleer a reeƭu.»
7Maaga, a ndoona yee andee me ta inoorna.
8Yeesu a laya a den ee:
«Mi yoo, laykiim a nuun sañ-sañ fee um fi’taa kene.»
A naxax ale no xooxoox soxodu we
(ɗeeti Mace 21:33-46; Mark 12:1-12)
9Yeesu a refa no naxooxaa xeet faa yee:
«O yaal mbind a jimba a ƭing taxar biiñ, a doxnin xooxoox ndax da nqaajran fo ten, yaam kaa bug’u o ñaaƴik no saax jan, too a nar’u o miñ.#Es 5:1 10Yaa a saxad alaa a fadna, a lula o tag um maa no xooxoox waa, ndax ta ɓisiidin a las um no ke saxadeena. Kaa koy, xooxoox waa a ndama o tag oxaaga a nqawin, soo a ndaxin ƥay ƥor. 11A lulahina o tag o lakas, soo da nqawin itam, a mbi’in cednooxu, soo a ndaxin ƥay ƥor. 12A dakooxa o lul o tadkandeer, da ngaañin, a sutin tafil. 13O yaal a ƭing alaa a laya yee: ‹Xar um fi’kaa? Kaam lulkaa o ƥees onqe fexuuma, yaam ñakkiran o niw muk.› 14Kaa koy, yaa xooxoox waa a nga’uuna, a laya yee: ‹O lam oxe xe garaa. Fat i mbarin, ndax i njang ke ta war’ina o lam fop.› 15A ndamaan, a ƭooqin boo ta sutoox a ƭing alaa, soo a mbarin.
Ii ndiiki koy, nam o yaal a ƭing ale a fi’kaa xooxoox waaga? 16Xan a gar, a saŋik xooxoox waaga, soo a doxin a ƭing ale wiin lakas.»
Yaa wiin waa a nanna a naxax aleene, a laya yee:
«Muk!»
17Maaga, Yeesu a faambra fa den, a lay a den ee:
«Xar a Pind akene a tektu koy:
‹Ɓil le maamax we a ndeɓ’ina
refatu ɓil faraaj le.›#Kt 118:22
18Ten taxu oxuu yenna took ɓil leene xan a ɓoloox, too took no xuu ta yenna xan a feñexoox.»
Roog fa Kesaar fee
(ɗeeti Mace 22:15-22; Mark 12:13-17)
19Jaajangin waa no kebil ke Moyiis fo saasadax maak waa a and’a a paax ee den taxu Yeesu a laytaa a naxax alaaga. Ten taxu kaa mbaaƭoogu maa da ndoonitna a Yeesu o ɓay na waxtu faaga sax sax ta layoogna, ndaa kaa saɗar’u xeet faa. 20Kaa ngayoogu a Yeesu. A lula wiin waa mbi’ooxoogna nen jofu, ndax da mbogin. A cungooga ta juum no ɗelem, ndax da mbaagin o ƥoxot haahate waa fo gofornoor faa. 21Wiin waaga a laamtaan ee:
«O Caajangin oxe, i anda yee kaa o layaa too jangnaa no cofel. Jegiro samtirand leng, yaam kaa o jangnaa a ƭat Roog no ndigil. 22Ndax i mbara o ndabid a Kesaar fee a bateer ndi nam?»
23Yeesu a anda o ƴiƴ olaa den, too a doona a den ee:
24«Lalaamoo o xanjar o leng. Nitaal nene fo a pind akene, an jegu a den?»
A ndoonaan ee:
«Kesaar fee!»
25Maaga, a laya a den ee:
«Ƥoxotyo boog a Kesaar fee ke Kesaar fee a jegna, soo ƥoxot a Roog ke Roog a jegna.»
26Njeg’ee dara kaa da maaftuuna no ke ta layna mbaambir faan laa. Ke Yeesu a doon’ina a den a bet’a a den, too a naanga yereŋ, a tiim.
Kaa farna na qontax ale no xon we
(ɗeeti Mace 22:23-33; Mark 12:18-27)
27Leng-leng no Sadusiya waa na layaa yee a qontax jegee, a matiida a Yeesu, soo a laamtin ee:#Pi 23:8
28«O Caajangin oxe de, Moyiis kaa bindan a in ee: O koor oxuu dolinna o tew, soo a guut a xon too xaƴee fo ten xa ƥiy, o ndeɓ um a wara o lam o ñaaw oxe, a sakan o maag um ƥasil.#Cang 25:5 29Yaaga fop koy, a jeg’a o maag fo xa teɓ ɓetaa fo leng um. O maag oxe a dolin’a, a xon, too xaƴee fo o teem xa ƥiy, 30-31o ƭikandeer oxe fo o tadkandeer oxe a lama o tew o ñaaw oxe, a nqon, too nqaƴee fo ten xa ƥiy. Naaga a xewit’u itam, boo ɓetuu ɗik waa fop a nqon, too nqaƴee fo ten xa ƥiy. 32A cinj den fop koy, o tew oxaa a xona itam. 33I laamtang koy ee: Na bes faa na qontax alaa, an no goor weene na jegkaa o tew oxe, yaam ɓetuu ɗik we fop a ndolin’aan?»
34Maaga, Yeesu a doona a den ee:
«Wiin we na jamaane fene kaa ngilgaa rew we, soo rew we a ndolooxaa, 35ndaa we njombeerna o njeg a las na jamaane fee na garaa fo na qontax alaa no xon waa ngiligkatee, too rew we ndolooxkatee. 36Mbaagkatee o nqon sax, yaam xan a nandat fo malaaka ke, soo a ndefat xa teɓandoong Roog, yaam ne da ndeefna na qontax ale. 37Kaa farna na qontax ale no xon we koy, Moyiis a andnoor’aan no ngol naa kaƥoogna, ye ta xoyaa o Yaal oxe ‹Roog fee Abraham, Roog fee Isaak fa Roog fee Yakoob.›#Sut 3:6 38Kaa koy, Roog refee Roog fee no xon we, ndaa Roog fee no ñoow we, yaam no ten fop kaa ñoowaa.»
39Leng-leng no jaajangin waa no kebil ke Moyiis a ndoonaan ee:
«O Caajangin oxe, paax soom layo.»
40No kaa xotitna na waxtu faaga o leng saɗ’atiran o laamit tig.
Yeesu Kiristaa o Ndaan Dawid fo o Ƥeenqe Roog
(ɗeeti Mace 22:41-46; Mark 12:35-37)
41Yeesu a laya a den ee:
«Nam a mbaagu o layit ee Kiristaa fee o Muumucil oxe regteena, o ndaan Dawid oo? 42Dawid fa xoox um sax layun no safe le na Kim a tedu ke, ye ta layna yee:
‹O Yaal oxe a laya o Yaal oxe mi yee:
Moofi na ñamaak es,#Kt 110:1
43boo yaa fi’uuma fañ we wo me o dakaa.›
44Dawid fa xoox um sax kaa xoyan o Yaal oxe. Nam a waagu o refit o ndaan um koy?»
Yeesu a xasana Farisiya we fo jaajangin we no kebil kaa
(ɗeeti 11:37-54; Mace 23:1-36; Mark 12:38-40)
45Yaa fop a maadna o nan-gilooxaa, Yeesu a laya daalbe waa ten ee:
46«Mbootooxyo boog jaajangin we no kebil ke, mbexna o ndokooxaa ndoki maak, too a mbex o simnel no qel ke. Kaa mbaaƭaa maa da mboditna mbaambir kam pind a qeƭ ke fo moofir ke moƴna o niwnoox no qew ke. 47Kaa njaɓaa ke ñaaw we a njegna fop, a yoonandtin a qeƭ a ciig, ndax da ƭeetel nen jofu. Weene wiin na moƴkaa o ƭomiɗ hate.»
Избрани в момента:
Lik 20: SRR23
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Copyright © 2015-2023 by Eglise luthérienne du Sénégal