Yohanes 9
9
Yesus nafngamone tomwat matbolar sa
9:1-12
1Noak ma Yesus nlanre nof a ne, I nsalan tomwat matbolar sa. Tomwate ne ramtoranbabe i e nabol lo. 2Yesus Ni manglartar renrat I, “Tuangguru, ni botuan e ise ni sale nwayat ma ramtoranbabe i e nabol ye? I ni sale nre enany amany nir sale?”
3Ne Yesus nfalak, “I nabol farye to feti ni sale nre enany amany nir sale. Nempa i nabol farye nema tomwatar monuk bise ma rsalan Ratu Ni kuase ma nkarya na ni momorip. 4Noak ma lere lolone idak ka tkaryae Ratu ma nsiduk Yakw a ne Ni karyayar. Fali keta nronram e to tomwate fen lese ma bise nkarya. 5Noak ma lolone kmworip a na saryamprene, Yakw kweluk ngaodir ma kodir tomwatar monuk dalmir.”
6Lama Yesus nfalak monuk farane, I ndikat na ompak, ne nabali Ni dikat a ne nor ompak. Betno nal ma nyonge na matbole ne matany. 7Ne nfalak, “Mtwi muraup a na kloloku Siloam.” (Siloam ye isiny feti: ‘Ma nsiduk I a ne.’) Mpe tomwate ne nti ma naraup. Noak ma nbali e nakeban lo.
8Ne tomwatar na ni das seriny baldu ma tomwat walyetar ma luryain e rsalan ma i natak a ne, rafalak ber sir, “Tomwate ye ma biase namtoran ma natak nre?”
9Ne tomwatar ketnir a rfalak, “Au, i ye lo!” Nempa ketnir a nbal e rfalak, “Tate, souny nbalak motak tomwate ne.”
Ne tomwate ne koko i a nfalak, “Au, yakw ye lo.”
10Mpa tomwatar a ne renrat i, “Felan farpe ma bise mukeban ye?”
11Ne i nfalak, “Tomwate ma ngarany Yesus ne, I nose ompak neluk wekat betno nyonge na matngur. Ma nfalak ma ktwi kuraup na kloloku Siloam, mpe ktwi kuraup. Lama kuraup monuk e kukeban desar.”
12Mpa tomwatar a ne renrat, “Tomwate ne namin mpe?”
Ne nfalak, “Yakw to kufai.”
Tomwat Farisyar to rsenang fali Yesus nafngamone matbole ne na ler Sanari
9:13-41
13-14Noak ma Yesus nabali Ni dikat nor ompak ma nyonge na tomwate ne matnir, iane na tomwat Yahudyar nir ler Sanari. Mpe tomwatar a ne ror tomwate ma nakeban a ne ber tomwat Farisyar. 15Ne tomwat Farisyar a ne renrat i a nbal, “Felan farpe ma bise mukeban ye?” Ne nfalak, “Tomwatar sa nyonge wekat na matngur, betno ktwi kuraup, ne kukeban desar.”
16Mpe tomwat Farisyar ketnir rfalak, “Kam mafai feti Ratu to nsiduk tomwate ye, fali I nafngamone tomwatar na ler Sanari.”
Ketnir a nbal e rfalak, “Farlan tomwat sale I e I to bise ma nose kabain mpasalnar farane!” Iane nwayat ma sir rabangal.
17Ne renrat a rbali tomwate ne, “Ma ko e mdaun farpe? Ma tomwate ma nose ma mukeban a ne, ise i?”
Ne i nfalak, “Tomwate ne nabi i.”
18Nempa mangfaret Yahudyar a ne to ralele feti luryain e tomwate ne nabol ma lere ye nakeban lo. Mpa rtar enany amany ma renrat sir. 19Lama rait e, mangfaret Yahudyar a ne renrat sir, “Botuan feti kanak ye angkimir e? Ma botuan feti noak ma mimtoranbabe i e nabol lo e? Ma felan farpe ma nakeban ye?”
20Ne sir rfalak, “Kam mafai feti angkamar ber i, ma noak ma mamtoranbabe i e nabol e lo. 21Nempa kam to mafai feti felan farpe ma i nakeban ye. Ma to mafai nbal feti ise ma nafngamone matnir ye. Mpa myenrat motak i, nema koko i a nasaur ber a kmi fali silai i lo.” 22Sir rfalak farane fali ramtaut mangfaret Yahudyar a ne. Ma fali sir rfat ma lese lo feti ise motak ma nyoding feti Yesus ye Ray Silai, keta rose rteri desar i ma kete nti das sampayang. 23Iane nwayat ma enany amany rfalak, “Myenrat motak i fali silai i lo.”
24Ne rluan ma rtar a rbali tomwate ma nabol a ne ma rfalak, “No mungoak ber Ratu feti safe ma mfwalak ye botuan, fali kam mafai feti tomwate ne tomwat sale I.”
25Ne tomwate ne nfalak, “Yakw to kufai feti tomwate ne, tomwat sale I nre tate. Nempa kufai lan feti luryain e yakw kubol nempa lere ye kukeban lo.”
26Ne sir rfalak a nbal, “I nose farpe ko ma mukeban ye?”
27Ne tomwate ne nfalak, “Dine kfwalak ber a kmi lo, nempa to mdyengar. Ma safema ma lolone myenrat a mbyal? Ali kmi mpyeang ma myeluk manglarat ber I a nbal e?”
28Lama rdengar farane sir rafbwere i ma rfalak, “Ko mweluk manglarat ber I, nempa kam e tate! Kam meluk manglarat ber Musa. 29Kam mafai feti luryain e Ratu natanuk nor Musa. Nempa Tomwate ne kam to mafai feti nof mpe nma.”
30Ne tomwate ne nfalak, “Do! I nose ma kukeban ma, safema lolone myenrat a nbal feti nof mpe nma. 31Kmi mfyalak feti tomwate ne tomwat sale I, nempa kit tafai feti Ratu to ndengar tomwat salar nir tatakar. Ma I ndengar lan tomwatar ma rsampayang ber I ma rose rlarat Ni mpempeang a ne. 32Nof luryain terik lere ye to lain sa ma tdengar feti tomwatar sa bise ma nafngamone tomwate ma nabol nof ma betno ramtoranbabe i. 33Farlan Ratu to nsiduk tomwate ne, botuan feti tomwate ne to bise ma nose nal sasaf.”
34Ne sir rfalak, “Hei! Noak ma anoi namtoranbabe ko e nim salar yadin lo, ma ko mose ma muftutu kam e?” Lama rfalak monuk farane e ratian i a rbie das sampayang a ne.
35Noak ma Yesus ndengar feti mangfaret Yahudyar ratian tomwate ne, I nti nanriak tomwate ne. Lama ntungan i e, nfalak, “Ko mulele Tomwate Anaky e?”
36Ne tomwate ne nfalak ber Yesus, “Maken, no mfwalak feti Tomwate Anaky a ne ise I nema kulele I.”
37Ne Yesus nfalak, “Ko mswalan I lo, ma I ma natanuk nor ko ye I a ne lo.”
38Ne i nfalak, “Maken, Yakw kulele feti Ko ye Tomwate Anaky!” Mpe i nsatngur a na Yesus sounlury.
39Ne Yesus nfalak, “Yakw kmwa saryamprene ma ktwetak tomwatar nir ngriar. Yakw kose farane nema ise ma nabol bise ma nakeban, ma ise ma nfalak feti nakeban keta nabol.”
40Ne tomwat Farisyar ketnir ma ramin iane rdengar farane mpa rfalak ber I, “Ko mfwalak farane iane feti kam mabol a nbal e?”
41Ne Yesus nfalak ber sir, “Farlan mfyalak feti mibol, iane feleles farlan to mir sal, fali to mifai feti impe ma botuan. Nempa mfyalak feti bise ma mikeban, mpa iane feleles farlan ma mifai feti impe ma botuan. Safo ni botuan e lolone mimin sale dalam ma ka mibare mir salar a ne.”
Избрани в момента:
Yohanes 9: YMD
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Yayasan Pemberdayaan Masyarakat Desa © Wycliffe Bible Translators, Inc. All rights reserved.