मत्ती 18
18
1ओहाङःसैको येसुकुस् वाह्ओमयः ओउःकःताङ् वाङ्ती “लौ परमेस्वर्कोः राजीहाङः सुखेलो अरुसै ताङ्ह्लेःनाः” त दाय्ह्ती व्हत्थातो 2येसुइ यात्चाक् हौलम्कायः वानःती ओउःमयःकोः पीस्हाङः गम्आकान्। 3गम्आक्तीको “लौ नीङ् ल्हुङ् द्यान्ह्ती इ मीओ हौलम्लो लेखा ङ्हा स्याव्सा खेःतेःनै ओहाङःसैको नीङ् परमेस्वर्कोः राजीहाङः मुसा दोःतेःनै। हौलम्लो लेखा आःताः स्याव्माःत ओहाङः मुसा दोःतेःइली। 4सुसु हौलम्लो लेखा ल्हुङ् मीतो स्याव्नाः ओउःलेः परमेस्वर्कोः राजीहाङः अरुसै ताङ्ह्लेःनाः बा। 5ओहाङःसै सुसुखेइ ङाकोः काम् जाङ्ह्साकायः इलो खेःओ हौलम्कायः रोम्ती त्याक्बत्नाःताङः ओउःइलेः ङाकायःमा रोम्नाःताङः। 6सुसुखेइ यात्चाक् ङाकोः कुरा ङ्हाम्सा बोङःओ हौलम्कायः ङाकःसै फेताक्चानी ओउःत हायःओसै ओउः मान्ताकायःलेः कय्क्हाङः ग्रायःबाङ् योकोःती छीत्आक्तीको ज्युम्ह्ओ तीःहाङः ल्होक्सा पेलेःनाः। 7इ ल्हाव्ह्दैबाङ्कोः मान्तालम् आन लीह्सीःओ गोरःसा खेःइतो दोह् हायःती दाय्ह्सा ङाकायः ङ्हाम्ओलम्कायः पेमालो मान्तालम्इ थ्योन्ह्ती रेव्ताक्सा बोङःनानी। ओउः पेमालो मान्तालम्इ एत रेव्तो हायःसा खेःसापाय् खेःइतो ओउःमयःइपाय् लोने आन न्युम्ह्नानी बा। 8ओहाङःसै नाङ्कोः क्रुत् दोम्इलेः पेमालो जाङ्ह्तेःचौया ओउः क्रुत् दोम् तात्ती वाय्पाःस नाङ् नीस्ज्याङ् क्रुत् दोम् नाःती नरककोः गलमा म्हीत्मालो म्हेःहाङः ल्होक्ओसै यात्ज्याङ् क्रुत् दोम् ह नाःती रौ जीङः दोःसा पेआनाः बा। 9फेरी नाङ्कोः मीक्इ च्यवःआक्तीको पेमालो ल्हुङ् वाङ्नाः त खेःया ओउः मीक्पाय् त्युत्ती वाय्पाःस। नीङ्पाय् नीस्ज्याङ् मीक् नाःती नरककोः गलमा म्हीत्मालो म्हेःहाङः ल्होक्ओसै यातैज्याङ् मीक् ह नाःती रौ जीङः दोःसा पेआनाः बा। 10-11लौ इलो खेःओ हौलम्कः ब्लाय्क्लाम् दोङ्सीलेः ओउःमयःकायः स्यास्ओ लाङ्कासै ल्होक्ओमयः गलमा ङाकोः परमेस्वर् आपाकुस् लाङ्काहाङः मुनै।
12इमा दोङ् कुरालेः माःर। यात्चाक् भेदा मेत्छ्याः ह्रामःओ मान्ता यात् सै भेदामेत्छ्याः मुनाः। नाःतो मुसापाय् मुलेःनाः यातैज्याङ्पाय् बन्हाङः वेन्ह्ती मीह्आ त खेःया ओउः ह्रामःओ मान्ताइ अरु भेदामेत्छ्याःकायः फेती ओउः मीह्ओकायः बोङःलाङ् आल्नाः माःर। 13ओहाङःसैको आल्ती बोङःती च्यवःआक्ती ओउः मेत्छ्याःपाय् ‘द्याह् च्यवःआलाङः’ त दाय्ह्ती आन म्रोलेःनाः। माः है ओउः अरु नाःतो मीह्मालो मेत्छ्याःकःसै ओउः ङ्हा मीह्ती वाय्खेःओ मेत्छ्याःकः म्रोलेःनाः बा। 14ओउः ह्रामःओ मान्ता यात्ज्याङ् भेदा मेत्छ्याःपाय् मीह्ताक्सा झाक्ल इलो लेखा ङाकोः परमेस्वर् आपामा यातैज्याङ् हौलम्पाय् वेन्ह्ती मीह्ती वाय्सा झाक्ल।
15ओहाङःसैको नाङ्कुस् मुओ मान्ताइ नाङ्कायः पेमालो काम् जाङ्ह्तेःनाः त खेःया ओउःकःताङ् एकान् आल्ती इ कुरा तोकाय्तेःनाःज ओउःइ नाङ्इ तोओ ग्याती सायःनौ त खेःया ओउः मान्तापाय् नाङ्कुस् फेरीलेः म्र्याःती मुलेःनाः। 16खेःल ओउःइ सायःतेःल त खेःया यात्नीस् अरु ङ्हाम्ओलम् वानःती ओउःमयःकःहाङः ओउः कुरा तोकाय्तेःनै ओउःत हायःती नाङ्इ तोओकायः यात्नीस् साची मुनै। 17ओहाङःसैको ओउः मान्ताइ ओउः साचीलम्कायः सायःउलु त खेःया नाङ्कोः कुरा सबै ङ्हाम्ओलम्कायः छ्यान्ह्लाङ् आल्अ। ओउःइ सबैकायः सायःउलु त खेःया ओउःपाय् ङ्हाम्मालो रेव्ओ मान्तालो लेखा स्याव्पाः। 18दोङ्सी दाय्ह्भनाङ् दोह् दोह् ल्हाव्ह्दैबाङ्हाङः नीङ्इ पानःतेःनानी ओउःलेः लाङ्काहाङः पानःओ लेःआः। दोह् दोह् ल्हाव्ह्दैबाङ्हाङः नीङ्इ फेन्तेःनानी ओउःलेः लाङ्काहाङः फेन्ओ लेःआः। 19फेरी इमा दोङ् कुरालेः नीङ् ल्हाव्ह्दैबाङ्हाङः मुओलम्कोःपाय् नीस्चाक् यात्ज्योः तेसा कुरा म्र्याःतीलेः तोतेःनै त खेःया ओउःपाय् ङाकोः लाङ्काहाङः मुओ परमेस्वर् आपाइ जाङ्ह्तेःनै बा। 20गाःहाङः गाःहाङः यात्नीस् ङाकायः ङ्हाम्ओ मान्ता हुम्ती वाङ्ती ङाकोः मय्ङ् पेह्ती मुनै ओहाङः ङामा ओउःमयःकुस् मुलेःनाङः” त दाय्ह्ती येसुइ स्यान्ती तोआथास।
21ओहाङःसैको येसुइ एत तोआक्तीको पत्रुस् ओउःकःताङ् वाङ्ती “लौ ङाकोः पुःचोङ् ङाकायः पेमालो हायःझुङ्नाःताङः त खेःया गुच्युक् पल्तकायः ङा ओउःकः ल्हुङ् मल्ह्माःत मुसा खेःतो सात् पल्तकायःया” त दाय्ह्ती येसुकायः व्हत्थातो 22“दोङ्सी दाय्ह्भनाङ् सात् पल्तकायः खेःल सात् सत्री पल्तकायः परतेःनाः। 23लौ यातैज्योः देस्कोः राजाइ लयःकोः नोकरीलम्इ त्याक्ओ रीन्लम् उथावसा बोङःआकान्। ओउःत हायःसाकायः सबै नोकरी राजाकःताङ् वानःआकानी। 24ओउः ङ्हा वानःओ मान्तालम्कःहाङः यात्चाक् लाख् रुपीया रीन् त्याक्ओ मान्ता खेःतो 25ओउःइ पाय्क्सा जुगाङ् खाय्माःत झ्यान्ते ‘लौ इ मान्ताकायःमा इकोः बुधी चोःलम् कीम् राङ्लम्मा सबै पैसाकायः वीनःपौ वीनःआक्तीको ओउःकोः मोल्कोः पैसा ङाकोः रीन् दप्साकायः बयःपाःताङः’ त दाय्ह्ती ओउः राजाइ हुकुम् बयःआकान्। 26ओउः राजाकोः हुकुम् सायःती ओउः नोकरीपाय् राजाकोः दोम्ताङ् बाःती स्यवती ‘अ प्रभुय बल गम्धाङ्ची दै ओहाङःसैको ङाइ जुगाङ् दप्ती पाय्क्चेःनाङ्’ त दाय्ह्ती ओउः नोकरी तेती तोआथै। 27एत तेती तोओ सायःआक्तीको ओउः नोकरीकायः योनःती योती ‘लौ ओउःकायः फान्नु ओउःइ पाय्क्सा परल’ त दाय्ह्ती ओउः राजाइ अरु हुकुम् बयःआकान्। ओउःत हुकुम् वयःआक्तीको ओउः नोकरीकायः फान्ती ल्होक्आकानी। 28ल्होक्आक्तीको ओउः नोकरी आल्ती यात्चाक् ओउःकुस् काम् जाङ्ह्ओ नोकरी क्रुस्आकान्। ओउः नोकरीपाय् ओउः ङ्हाकोः नोकरीकःसै पचीस् रुपीया रीन् त्याक्ओ खेःतो ओउःत झ्यान्ते ओउः ङ्हाकोः नोकरीइ अरुकायः कय्क्हाङः युप्ती चुम्ती ‘लौ ङाकोः पचीस् रुपीया पाय्क्ची’ त दाय्ह्ती तोआकान्। 29ओउःत तोआक्तीको ओउः अरु नोकरी साःताङ् बाःती ‘ङाकायः गम्धाङ्ची दै ओहाङःसैको ङाइ जुगाङ् पाय्क्ती बयःनेःनाङ् बा’ त दाय्ह्ती तेतो 30ओउः ङ्हाकोः नोकरी ग्यामाःत झ्यान्ते साथीकायः आधीकारीकःताङ् आलःती झ्याल्खानहाङः ओउःकोः रीन् पाय्क्धाङ्माच्युक्कायः थुनताक्आकान्। 31ओउःकोः साथीकायः थुनताक्ओ त अरु नोकरीलम्इ चीःती ओउः थुनओ मान्ताकायः योनःती झ्यान्ते राजाकःताङ् इ कुरा ल्हाक्ती छ्यान्ह्लाङ् आल्आकाय्। 32ओउःमयःइ ल्हाक्ती छ्यान्ह्ओ कुरा सायःआक्तीको राजाइ ओउः ङ्हाकोः नोकरीकायः गोत्ती वानःती ‘नाङ्पाय् आन रेव्ओ नोकरी लेःतेःआः। नाङ्इ ङाकः तेआ त खेःया नाङ्कोः आन नाःतो पैसाकोः रीन् वाय्नेःआलाङ्। 33-34ङाइ नाङ्कायः योनःती योओ त खेःया ओउःलो लेखा नाङ्इमा लयःकुस् काम् जाङ्ह्ओ मान्ताकायः योनःती योती ओउःकोः मीओ रीन् वाय्सा खेःओ खेःतेःतो’ त दाय्ह्ती ओउः राजा ल्हुङ् मल्ह्ती ओउः रीन्कोः पैसा जुगाङ् पाय्क्माच्युक्हाङः ओउः पेमालो नोकरीकायः न्युम्ह्ताक्साकायः ल्होक्आथै। परमेस्वर्कोः राजी ओउःलो लेखा लेःआः। 35नीङ्कःहाङः सुसुपाय् लयःकोः हौकोः रेव्ओ काम्कायः ल्हुङ् मल्ह्तो स्याव्चै ओउःकःलेः ङाकोः परमेस्वर् आपा ल्हुङ् मल्ह्तो स्याव्आनाः” त दाय्ह्ती येसुइ तोआथास।
Избрани в момента:
मत्ती 18: CDM93
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 1993 Wycliffe Bible Translators Inc., All Rights Reserved.