मर्कस् 15
15
1ओहाङःसैको न्याम् थोङ्खयःओहाङः ओउः ताङ्ह्ओ पुरोहीत्लम्पाय् धर्मा स्यान्ओमयःमा यहुदीकोः ताङ्ह्ओ मान्तालम्मा सबै हुम्ती मुओलम्कुस् होम्काय्ती नोःकाय्आकाय्। नोःकाय्आक्तीको येसुकायः पानःती आलःती अन्चलादीस् पीलातस् त तोओकःताङ् दाक्आथै। 2ओउःकःताङ् दाक्ती वानःआक्तीको “लौ नाङ्पाय् यहुदीलम्कोः राजालेःतेः खेःतेःनाःया” त दाय्ह्ती पीलातस्इ व्हत्थातो “नाङ्इ तोओलो लेखा ओउःतलेः खेःनाङः” त दाय्ह्ती येसु त्याङ्आ। 3ओहाङःसैको ओउः ताङ्ह्ओ पुरोहीत्लम्इ येसुकायः आन गाल्तुम्ती नोःआकाय् 4ओउःत झ्यान्ते पीलातस्इ ओउःमयःकोः कुरा सायःती “लौ ओउःमयःइ नाङ्कायः आन गाल्तुम्ती नोःतेःनाः दोह् हायःतीतेः लयःकायः त्याङ्धाङ्तेःसल” त दाय्ह्ती येसुकायः तोथातो 5येसुपाय् दोह्मा त्याङ्ल ओउःत झ्यान्ते पीलातस् ग्याङ्ह्ओ खेःतो।
6ओहाङःसैको ओउः च्योल्ओ दीन्कोः छ्यात्हाङः साल् साल्कायः यात्चाक् झ्याल्खानहाङः थुनओ मान्ताकायः अन्चलादीस्इ फेन्सा खेःतो त जवआकानी। सुकायः “लौ इकायःलेः फेन्पाः” त दाय्ह्ती यहुदीलम्इ तेती तोआकानी ओउः मान्ताकायः पीलातस्इ फेताक्ओ खेःतो। 7ओहाङःसैको ओउः साल्हाङः यात्चाक् बरबा त तोओ झ्याल्खानहाङः थुनओ खेःतो। ओउः बरबा त तोओइ सर्कार्लम्कुस् मीन्ह्काय्तोक्हाङः मान्ताकायः सात्आकान् ओउःत झ्यान्ते सर्कार्कोः मान्तालम्इ बरबामा ओउःकोः साथीलम्कायःमा चुम्ती झ्याल्खानहाङः काआथास। 8ओहाङःसैको येसुकोः कुरा सायःतोक्हाङः यहुदीकोः मान्तालम् हुम्ती पीलातस्कःताङ् वाङ्ती “लौ च्योल्ओ दीन्कोः जवओ जाङ्ह्ती द्याह् यात्चाक् थुनओ मान्ताकायः फेन्उ दै” त दाय्ह्ती तेआकाय् 9“लौ उया ङाइ सुकायः फेन्सा झाक्तेःनै। इ यहुदीलम्कोः राजाकायः फेन्चाङःया” त दाय्ह्ती पीलातस्इ व्हत्थासतो 10ओउः ताङ्ह्ओ पुरोहीत्लम् ल्हुङ् लती झ्यान्ते येसुकायः सात्ताक्सा बोङःआकानी त चीःती येसुकायः “फेन्चाङःया” त दाय्ह्ती व्हत्आकान्। 11पीलातस्खे येसुकायः फेन्सा ग्याओ खेःतो ओउः ताङ्ह्ओ पुरोहीत्लम्इ हुम्ओ मान्तालम्कायः थ्योन्ह्ती होम्काय्ती झ्यान्ते “लौ येसुखे खेःल बरबाखेकायः फेन्उ” त दाय्ह्ती ओउःमयःइ त्याङ्आकाय्। 12ओउः हुम्ओलम् एत त्याङ्ओ सायःती “लौ उया इ यहुदीलम्कोः राजा त नीङ्इ तोओकायःपाय् ङाइ द्याह् दोह् हायःचाङः” त दाय्ह्ती पीलातस्इ व्हत्थासतो 13“ओउःकायः क्ल्याय्ओ सीङःहाङः सात्पाःथै” त दाय्ह्ती ओउः हुम्ओ मान्तालम् गोःती त्याङ्आकाय्। 14“इकायःपाय् बुरु दोह् हायःती सात्चाङः र। ओउःइ दोह् रेव्ओ हायःउतो ती” त दाय्ह्ती पीलातस्इ फेरी व्हत्थासतो एत सायःआक्ती ओउः हुम्ओलम्इ न्हाङ्तोलेः जोक्तो गोःती “ओउःकायः क्ल्याय्ओ सीङःहाङः सात्पाःथै” त दाय्ह्ती त्याङ्आकाय्। 15ओउःत झ्यान्ते ओउःमयःकोः कुरा सायःसा ग्याती पीलातस्इ बरबाखेकायः फेन्आथै येसुखेकायः लाइ स्राप्ती घान्आक्ती सीपाहीलम्कःताङ् सात्साकायः ल्हाआथै।
16सीपाहीलम्कःताङ् ल्हाआक्तीको ओउःमयःइ येसुकायः दर्बाल्कोः चौकीहाङः लात्ती वानःआकानी। 17ओहाङः वानःआक्तीको सबै पल्तन्लम्कायः गोत्ती वानःती ओउः सीपाहीलम्इ येसुकायः राजालो लेखा दुओ क्रमःनाय् लावती चुःकोः क्याह्ओ मुकुत् फोङ्ती ल्हुप्आकानी। 18एत हायःआक्ती ङीःराय् जाङ्ह्सा थेङा ओउःमयः स्यवती “लौ भालातेः वाङ्ओतेःआः नाङ् यहुदीलम्कोः राजाय” त दाय्ह्ती तोआकानी। 19फेरी ओउःकायः तालाङ्हाङः क्रात्इ थोःतीमा द्युर् द्युरःतीमा आह्रे ख्याल् जाङ्ह्ती बाःती स्यवआकानी। 20ओहाङःसैको येसुकायः इतलेः ङीःआक्तीको ओउः दुओ नाय् ल्ह्युन्ती ओउःकोः लयःकोः नाय्लम्इ फेरी लावती ओउःकायः बाहीरताङ् लात्ती ग्ल्युनःती क्ल्याय्ओ सीङःहाङः सात्लाङ् आलःआकानी।
21ओहाङःसैको आलःती ल्याम्हाङः लात्ती वाह्तोक्हाङः सीपाहीलम्इ यात्चाक् क्युरीनी देस्सै वाङ्ओ मान्ता सीमोन् त तोओ च्यवःआकानी। ओउः सीमोन् त तोओपाय् आलेक्जान्द्रीया रुफस् त तोओ नीस्पुःचाःकोः आपा खेःतो। सीमोन्कायः च्यवःआक्तीको ओउः सीपाहीलम्इ ओउःकायः येसुकोः सात्सा खेःओ सीङः लात्ताक्आकानी। 22ओहाङःसैको आल्ती येसुकायः गोल्गोथा त तोओ दुलुङःताङ् लात्ती वानःआथै। गोल्गोथा त तोओकोः माने “पुह्रुमःराङ्” लेःआः। 23ओहाङः दाक्ती वानःआक्तीको येसुकायः तीतेपतीकुस् ल्याव्ह्ओ धाक्सायःकोः तीः ल्हाथातो ओउःपाय् तुङ्सा ग्याल। 24-25ओहाङःसैको बीहानलेः हल्फाव्ने बेलाहाङः येसुकायः साःहाङः पोत्ती गम्ओ क्ल्याय्ओ सीङःहाङः पानःती ओउःकोः दोम्क्रुत्हाङः खील्इ थाक्ती योकोःती गम्आथै। ओउःकोः नाय् लयःमयःकायः वेःसाकायः ओउः सीपाहीलम्इ बाङ् खेलती योआकानी। 26फेरी येसुकायः गाल्तुम्ती नोःओ कुरा इतलेः लेखती ओउःकोः थाराय्सै गम्ओ खेःतो “इपाय् यहुदीलम्कोः राजालेः” त लेखआकानी। 27ओहाङःसैको येसुकोः ङोय्सैमा यात्चाक् ओउःकोः वेःसैमा यात्चाक् नीस् दाकु मान्तालम्कायः अरु क्ल्याय्ओ सीङःहाङः योकोःती गम्आकानी 28एतलेः ओउः आखरःहाङः लेखओ कुरापाय् “ओउःकायः रेव्ओलम्कुस् सात्आकानी” त दाय्ह्ओ ताप्तोलेः स्याव्आ। 29ओहाङःसैको येसु सीङःहाङः योकोःती मुतोक्हाङः च्योल्ती वाह्ओ मान्तालम्इ ओउःकायः खुनःती नोःआथै “अ नाङ्पाय् ‘मन्दीर् ह्र्योङःआक्तीको सुम् दीन्हाङः नया जाङ्ह्नाङः’ ततेः दाय्ह्ओतेःआः। 30ओउःत खेःया ओउः सीङःसै ग्ल्युङ्ह्ती लयःकायः दल्ताक्स” त दाय्ह्ती हेला क्लाःती गोःआथै 31ओउः ताङ्ह्ओ पुरोहीत्लम्इमा ओउःकायः ङीःआथै “लौ ओउःइ अरुकायः दल्ताक्आन् त दाय्ह्ओ लेःआः लयःकायः दल्ताक्सा खाय्सल। 32लौ इ इस्राएल्कायः दल्ताक्सा ख्रीस् त तोओ राजापाय् सीङःसै लयः ग्ल्युङ्ह्ती वाङ्पाः। ओउःत हायःओ च्यवःआक्तीको ङीइ ओउःकोः कुरा ङ्हाम्चाङःसु” त दाय्ह्ती धर्मा स्यान्ओमयःकुस् ङीःती नोःकाय्आकाय्। ओउः नीस्चाक् क्ल्याय्ओ सीङःहाङः योकोःती गम्ओ दाकुनीस्इमा येसुकायः हेला क्लाःआकाचु।
33ओहाङःसैको बार बजे न्याम् दोपारे स्याव्सा बेलाहाङः ओउः देस्हाङःपाय् च्याक्तो स्याव्आ। न्याम् दोपारेहाङःसै तीन् बजे योहोरी च्युक्हाङःकायः च्याक्ओ खेःतो। 34फेरी योहोरी बेलाहाङःपाय् येसु यहुदी भासा नोःती “एलोय् एलोय् लामा सबक्थानी” त दाय्ह्ती सोतोलेः दाय्ह्आ। ओउः कुराकोः माने इलेःआः “अ ङाकोः परमेस्वर्य अ ङाकोः परमेस्वर्य दोह् हायःतीतेः ङाकायःतेः फेतेःआची” त दाय्ह्ओ लेःआः। 35येसु एतलेः गोःतोक्हाङः यात्नीस् द्याङ्ती मुओलम्इ “एलोय् एलोय्” त दाय्ह्ओ सायःती “लौ ओउःइ एलीया त तोओकायः गोत्नौ रैस” त दाय्ह्ती नोःकाय्आकाय्। 36एत नोःती यात्चाक्इ क्रीम्ओ धाक्सायःकोः तीःहाङः नाय् जोःआक्तीको सीङःकोः च्योःहाङः पोतोलःती येसुकायः प्योती स्योनःती तुङ्ताक्सा बयःआथै “लौ ल्युङ्ह्ती मुइ एलीयाइ येसुकायः फान्ती क्लाःलाङ् वाङ्नाःया वाङ्लया त योनी दा” त दाय्ह्ती तोआकान्। 37ओहाङःसैको येसु फेरीलेः सोतो गोःआक्तीको ओउःकोः सास् ज्याल्आ। 38ओउःकोः सास् ज्याल्माकादे सहर्हाङः ओउः मन्दीर् कीम् दुङ्हाङः हेङ्केती खोओ नाय् त्यावःअसै कामःताङ्लेः क्रत्ती नीस् फाक् स्याव्माकादे। 39ओहाङःसैको यात्चाक् येसुकः द्याङ्तो मुओ सीपाहीकोः हवल्दार्इ येसु सीओ च्यवःती “इ मान्तापाय् दोङ्सीलेः परमेस्वर्कोः चोःलेः खेःतो” त दाय्ह्ती दाय्ह्आ। 40फेरी बल लोक्तोसै मोमःचोःलम्इ योती मुओ खेःइतो। ओउःमयःकःहाङः मरीयम् माग्दाला योसे कान्छ याकुब् नीस् पुःचाःकोः आमा मरीयम् त तोओमा खेःचतो सलोमेमा मुओ खेःतो। 41ओउः सुम्चाक् मोमःचोःलम्इ अनम्ह्लो येसुकुस् गालील देस्हाङः वाह्ती ओउःकायः सोर्ती स्यास्आथै। इ मोमःचोःलम्कुस् नाःतो अरु येसुकुस् यरुसालेम्ताङ् वाङ्ओ मोमःचोःलम्मा ओउःकायः सात्ओ योती मुआकाय्।
42-43ओहाङःसैको येसुकायः सात्नम् दीन्पाय् यहुदीलम्कोः धोओ दीन्कोः योह्लो खेःतो। धोओ दीन्हाङःपाय् मान्ता पाम्ह्सा स्याव्ल ओउःत झ्यान्ते ओउः दीन्कोः योह्लो न्याम् ब्लक्ओ बेलाहाङः यात्चाक् अरीमाथीया गाव्कोः युसेफ् त तोओपाय् येसुकोः म्हाङ् पाम्ह्साकायः पीलातस्कःताङ् तेलाङ् आल्आ। ओउः अरीमाथीयासै वाङ्ओ युसेफ् त तोओ यहुदीकोः ताङ्ह्ओ मान्ता खेःतो ओउःपाय् परमेस्वर्कोः राजी वाङ्सा दीन्कायः ल्युङ्ह्ती मुओ मान्ता लेःआः। ओहाङःसैको युसेफ् रैमामाःत अन्चलादीस् पीलातस्कःताङ् आल्ती “येसुकोः म्हाङ् ल्हाचाक्ची दा” त दाय्ह्ती तेआ। 44ओउःत तेतोक्हाङः “लौ येसुपाय् इच्युक् रेन्ह्ती सीचाःया” त ग्याङ्ह्तो म्हर्ती ओउः सीपाहीकोः हवल्दार् व्हत्साकायः गोत्आथै “लौ ओउः येसु त तोओ द्याह्लेः सीओया सीधाङ्मालोया” त व्हत्थातो 45“माः सीओआः” त दाय्ह्ती ओउः हवल्दार् त्याङ्आ। एत त्याङ्ओ सायःआक्तीको “लौ उया येसुकोः म्हाङ् त्याक्उ” त दाय्ह्ती येसुकोः म्हाङ् युसेफ्कायः ल्हाताक्आथै। 46ओहाङःसैको येसुकोः म्हाङ् दोःआक्तीको युसेफ्इ पेओ पाम्ह्सा नाय् लेःती ओउःकोः म्हाङ् सीङःसै क्लाःती नाय्इ खुप्आकान्। खुप्आक्तीको येसुकोः म्हाङ्कायः युसेफ्इ लात्ती आलःती चेनःबाङ्हाङः व्हह्र्ती द्यावःओ ल्युमःपुक् घाङ्हाङः काती गम्आकान्। काती गम्आक्तीको ल्होप्ओ बाङ् तुलुती ओउः घाङ् बोमःआकान्। 47एत हायःतोक्हाङः मरीयम् माग्दालामा योसेकोः आमा मरीयम् त तोओइमा येसुकोः म्हाङ् गाःहाङः गम्ओ त च्यवःती मुओ खेःचतो।
Избрани в момента:
मर्कस् 15: CDM93
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 1993 Wycliffe Bible Translators Inc., All Rights Reserved.