मर्कस् 9
9
1“दोङ्सी दाय्ह्भनाङ् यात्नीस् इहाङः सायःती मुओ मान्तालम्इ लयः सीमाच्युक्हाङःलेः परमेस्वर्कोः राजीमा ओउःकोः ग्वम्मा च्यवःसा दोःनै” त दाय्ह्ती येसुइ तोआथास। 2ओहाङःसैको यात् सात पुत्आक्तीको पत्रुस्मा याकुब् युहना नीस्पुःचाःमा ओउः सुम्चाक्कायः येसुइ लात्ती आलःती चीङःचाङःत मुओ यास्ओ स्यालुङ्कोः च्योःताङ् लनःआथास। 3ओहाङः लन्ह्आक्तीको ओउः सुम्चाक्इ योयोबालेहाङः येसुकोः रुप् ल्हेस्ती थाङ्ती ओउःकोः नाय्लम् आन भाम् फीर्लीक्त छोओ खेःतो। भाम्जम् भाम्ओ खेःमालो ओउःच्युक् भाम्ओ सुइमा नाय् धावःसा खाय्नीली। 4येसु एत थाङ्ती स्याव्तोक्हाङः अरु नीस्चाक् मोसा एलीया त तोओनीस्लेः येसुकुस् नोःकाय्लाङ् थाओ खेःचतो। 5-6ओउःनीस् येसुकुस् नोःकाय्ती मुओ च्यवःती येसुकुस् वाह्ओ सुम्चाक् आन रैती “अ गुरुय ङी इहाङः वाङ्ती मुओ गुच्युक् पेजेःतो। लौ ङीइ सुम्ज्योः झ्युह्रुक् कीम् जाङ्ह्नेःनेःनानाङ्स यात्ज्योः कीम् नाङ्कायः यात्ज्योः मोसाकायः यात्ज्योः एलीयाकायः” त दाय्ह्ती पत्रुस्इ ग्याङ्ह्ती झ्यान्ते दोह् हायःसा चीःमाःत तोआथै। 7ओहाङःसैको रेनःझेनःत मुस् वाङ्ती ओउःमयःकायः घमःआथास। ओउःमयः घमःतोक्हाङःपाय् मुस्सै यात्ज्योः हाव्नयः वाङ्ती “लौ इपाय् ङाकोः आन राप्ओ ल्हुङ्गोरे चोः लेःआः बत्ताङः। ओउःइ तोओ कुरालेः पेतो सायःनु दा” त दाय्ह्ती दाय्ह्ओआः। 8एत दाय्ह्ओ सायःआक्तीको ओउः सुम्चाक् येसुकुस् वाह्ओमयःइ लयःकःहाङः त्यास्ती योतोक्हाङः सुकायःमा च्यवःनीली येसु ह ओउःमयःकुस् मुआ। 9ओहाङःसैको येसुमा ओउः सुम्चाक् स्यालुङ्सै ग्ल्युङ्ह्आकाय्। ग्ल्युङ्ह्ती वाह्तोक्हाङः “लौ ओउः मान्ताकोः चोःत तोओ सीआक्तीको उह्ती च्योक्माच्युक्हाङः नीङ्इ मेस् च्यवःओमा सायःओमा सुकायःमा ल्हाक्ती छ्यान्ह्तेःचानी दा” त दाय्ह्ती येसुइ तोआकान्। 10ओउःत तोओ सायःआक्तीको ओउः सुम्चाक्इ अरुकायः छ्यान्ह्माःत लयःमयःकुस् ह “लौ इ ‘सीआक्तीको च्योक्नाङः’ त येसुइ दाय्ह्ओ दोह् दोह् कुरालेः” त दाय्ह्ती ग्याङ्ह्ती नोःकाय्आकाय्। 11ओहाङःसैको “लौ उया ओउः धर्मा स्यान्ओमयःइ दोह् हायःती ‘ओउः वाङ्सा खेःओ ख्रीस्कोः ङ्हासै एलीया वाङ्आनाः’ त दाय्ह्ती स्यान्नानी” त दाय्ह्ती ओउः सुम्चाक्इ येसुकायः व्हत्नीतो 12“एलीयापाय् दोङ्सीलेः ङ्हा वाङ्ती सबै कुरा पेतो जाङ्ह्ताक्नौ बा। ओउः मान्ताकोः चोः त तोओमा आन लीह्तो गोरःसा खेःतो ‘ओउःकोः कुरा अरु म्हर्इली’ त उय्ह्लेहाङः लेखओआः। 13दोङ्सी दाय्ह्भनाङ् एलीया त तोओपाय् द्याह् वाङ्ओ लेःआः बा। वाङ्सापाय् वाङ्ओआः ओउःकायः अरुइ लयः झाक्ओ पेमालो काम् हायःआथै। इ कुरा उय्ह्लेहाङःसै लेखओआः बा” त दाय्ह्ती येसुइ स्यान्आथास।
14ओउःत स्यान्ती तोती येसुमा ओउःकोः सुम् साथीमा ग्ल्युङ्ह्ती ओउः अरु येसुकुस् वाह्ओमयःकःताङ् दाह्आकाय्। दाह्ती वाङ्तोक्हाङः येसुइ ओउःकोः लयःकुस् वाह्ओमयः धर्मा स्यान्ओमयःकुस् काय्काय्ओ च्यवःआकान् फेरी नाःतो मान्तालम्इमा हुम्ती योती मुआकाय्। 15ओउः हुम्ती मुओलम्इ येसुकायः च्यवःओ कुस्ब्रक्त ग्याङ्ह्ती ओउःकःताङ् तन्ती स्यवलाङ् वाङ्आकाय्। 16येसुकःताङ् वाङ्ती “लौ नीङ्तेः ओउःमयःकुस् दोह् दोह् त नोःकाय्ती काय्काय्ती मुतेःनै” त दाय्ह्ती ओउःकुस् वाह्ओमयःकायः येसुइ व्हत्उतो 17यात्चाक् हुम्ओ मान्ता त्याङ्ती “अ गुरुय ङाकोः चोःपाय् काःहाल्लाङ् वानःआलाङः। ओउःकायः यात्ज्योः लान्इ ङायःझुङ्नाःथै। 18ङायःतोक्हाङः ङाकोः चोःकायः नोःसा ताक्माःत आन साङ्ह्ताक्ती कुयःताक्ती साःताङ् तोस्नाःथै ओउःकोः सय्क् ङ्हीक्ती म्होतोङ्सै भोप् थाती वाङ्नाः। ओउःत झ्यान्ते नाङ्कुस् वाह्ओमयःकःहाङः काःहाल्लाङ् वाङ्ङोतो ओउःमयःइ इ लान्कायः ल्हेस्सा खाय्बाय्नीली” त दाय्ह्ती ओउः मान्ता तोआथै। 19“लौ नीङ् ङ्हाम्मालो ग्यामालो मान्तालम्पाय् नाङ्कुस् ङा गुच्युक् ज्याङःतोलेः स्यान्ती मुसा खेःङोतो। नीङ्कोः ङ्हाम्मालो ल्हुङ् योती गुच्युक्हाङः लीह्ती गोरःसा खेःनाङः र। लौ ओउः जीक्ओ हौकायः वानःनु दा” त दाय्ह्ती येसुइ तोआथास। 20ओहाङःसैको येसुकःताङ् वानःआक्तीको ओउः लान्इ येसु च्यवःओ कुस्ब्रक्तलेः ओउः हौकायः ब्रःताक्ती प्लाह्ताक्ती साःहाङः तोस्आथै ओउःकोः म्होतोङ्सै भोप् ग्ल्युङ्ह्ती हीलःती प्लवःती साङ्ह्ओ खेःतो। 21एत येसुइ च्यवःती “लौ इलो खेःओ स्याव्ती गुच्युक् ज्याङःनाः ती” त दाय्ह्ती आपाकायः व्हत्उतो “ओउःपाय् मीओ हौलम् खेःतोक्हाङःसै वाङ्ओआः। 22बेला बेलाहाङः ओउः लान्इ म्हेःहाङःमा तोस्नाःथै बेला बेलाहाङः ज्युम्ह्तो तीःहाङः तोस्नाःथै ङाकोः चोःकायः सात्ती वाय्सा बोङःती ओउःतलेः हायःनाःथै। नाङ्इ खाय्तेःनौ त खेःया नीची नीस् आपाचाःकायः योनःती योती इकायः स्याक्ताक्ताङःच दा” त दाय्ह्ती ओउः चोःकोः आपा तेआ। 23“दोह् हायःतीतेः ‘नाङ्इ खाय्तेःनौ त खेःया’ ततेः तोतेःआची। सुसुइ ङाकायः ङ्हाम्नाःताङः ओउःकायः दोह् खेःयामा दोःनाः बा” त दाय्ह्ती येसु त्याङ्आ 24ओउःत त्याङ्ओ कुस्ब्रक्त “अ प्रभुय ङाइ बल बल ङ्हाम्नेःनाङ् ङाकायः न्हाङ्तोलेः ङ्हाम्ताक्ची दै” त दाय्ह्ती ओउः आपा गोःती तेआ। 25ओहाङःसैको अरु नाःतो मान्तालम् द्याङ्तो तन्ती प्लीङ्ह्ती प्लीङ्ह्ती वाङ्ओ च्यवःती “अ नाङ् नोःसा सायःसा ताक्मालो लान्तेः इकायः फेती जुगाङ्मातेः ङायःतेःचौ ओउःत ङाइ गानाक्ती तोनेःनाङ्” त दाय्ह्ती ओउः लान्कायः जान्ती तोआकान्। 26एत तोआक्तीको आन हीह्ती चोःकायः दोम् क्रुत् कुयःती ओउः लान्इ फेथातो फेआक्तीको ओउः चोः सीओलो लेखा प्रात्ती मुआ। ओउःत झ्यान्ते नाःतो मान्तालम्इ च्यवःती “लौ इजा सीओआः रैस” त दाय्ह्ती नोःइतो 27येसुइ ओउःकोः क्रुत् चुम्ती च्योक्ताक्आकान्। च्योक्आक्तीको ओउः गोय्चोः लयःलेः चीङ्आ। 28ओहाङःसैको ओउः गोय्चोः चीङ्ती आल्आक्तीको येसुमा ओउःकुस् वाह्ओमयःमा कीम्हाङः पोक्ती वाङ्आकाय्। कीम्हाङः पोक्आक्तीको अरु मान्ता मुमालो बेलाहाङः येसुकुस् वाह्ओमयःइ येसुकःताङ् वाङ्ती “ङीइपाय् गत हायःती ओउः लान्कायः ल्हेस्सा खाय्ङुसुलु” त दाय्ह्ती व्हत्आकानी। 29“इलो खेःओ लान्पाय् ल्हेस्साकायः परमेस्वर्कायः आन तेती तोसा खेःतो। एत तेती तोआक्तीको ह ल्हेस्सा खाय्नौ” त दाय्ह्ती येसु त्याङ्आ।
30ओउःत येसु त्याङ्आ ओहाङःसैको आल्ती गालील त तोओ अन्चल्हाङः च्योल्ती वाह्आकाय्। ओहाङः च्योल्ती वाह्तोक्हाङः “येसु इहाङः वाह्नाः” त अरुइ चीःसा ओउःपाय् म्हर्सल दोह् हायःती दाय्ह्सा ओउःइ लयःकुस् वाह्ओमयःकायः ह स्यान्सा झाक्ओ खेःतो। 31“लौ ओउः मान्ताकोः चोः त तोओपाय् स्याङ्ह्ससैपाय् पेमालो मान्ताकःताङ् ल्हालाङ् दाक्लेःनानी। दाक्आक्तीको ओउःकायः सात्नाःथै सात्आक्तीको सुम् दीन्हाङः त्याती च्योक्नाः” त दाय्ह्ती येसुइ स्यान्थासतो 32ओउःकुस् वाह्ओमयःइ ओउःकोः स्यान्राय्कोः माने पेतो तय्ह्आक्नीली फेरी “इ कुराकोः माने दोह्लो। ङीकायः दोह् स्याव्चाः” त रैती म्हर्ती येसुकायः ओउः स्यान्राय्कोः माने “दोह्लो” त व्हत्सा ग्याइली।
33ओहाङःसैको ओउःत हायःती ओउःमयः आल्दा आल्दा कफर्नाहुम् त तोओ सहर्ताङ् दाह्ती कीम्हाङः पोक्आकाय्। कीम्हाङः पोक्ती मुतोक्हाङः “लौ ल्याम्हाङः वाह्तोक्हाङः नीङ्पाय् दोह् दोह्कायःतेः काय्काय्ती नोःकाय्ओ खेःतेःइतो” त दाय्ह्ती येसुइ ओउः बारजन छ्युङ्ह्ओमयःकायः व्हत्थासतो 34ओउःमयः “ङीलम्कःहाङः सुखेलो ताङ्ह्नाःतय्ही” त काय्काय्ओ त झ्यान्ते रास्ती त्याङ्सा ग्याइली। 35ओउःमयः त्याङ्सा ग्यामाःत झ्यान्ते येसु च्युङःती ओउः बारजन गोत्ती वानःती “लौ सुखेलो ‘ङापाय् अरुसै ताङ्ह्लेःनाङः’ त म्हर्चै ओउःलेः सबैकोः नोकरी स्याव्ती अरुसै मीतो स्याव्जेःपै” त येसु दाय्ह्ती 36यात्चाक् हौलम्कायः ओउः बारजनकोः पीस्हाङः गोत्ती वानःआकान्। गोत्ती वानःआक्तीको ओउः हौलम्कायः लयःकोः खोस्हाङः गम्ती 37“लौ सुसुइ ङाकोः काम् जाङ्ह्साकायः इलो खेःओ मीओ हौलम्कायः रोम्ती त्याक्बत्नाःताङः ओउःइलेः ङाकायःमा रोम्नाःताङः। फेरी सुसुइ ङाकायः रोम्नाःताङः ङाकायः ह खेःल ङाकायः ल्होक्ओ परमेस्वर् आपाकायःमा रोम्नानी” त दाय्ह्ती येसुइ स्यान्ती तोआथास।
38ओउःत तोतोक्हाङः “अ गुरुय यात्चाक्इ नाङ्कोः मय्ङ् पेह्ती लान्लम्कायः ल्हेस्ती वाय्ओ च्यवःङुसुतो। ओउः मान्तापाय् ङीकुस् वाह्मालो त झ्यान्ते ओउःकायः ‘इत हायःलाम्’ त दाय्ह्ती त्याःती तोआलाङःसु” त दाय्ह्ती युहनाइ ल्हाक्ती तोथातो 39-40“ओउःकायः त्याःलाम्। सुसुइ ङाकोः मय्ङ् पेह्ती ग्याङ्ह्राय् जाङ्ह्नानी ओउःलो खेःओ मान्तापाय् रेन्ह्तोलेः ङाकायः रेव्तो नोःसा खाय्नीली। सुसुलो ङीकोः बीरोत् खेःइली ओउःलेः ङीकुस् भीङ्तेःनै” त दाय्ह्ती येसु त्याङ्आ। 41“दोङ्सी दाय्ह्भनाङ् सुसुखेइ ‘लौ नीङ्पाय् ख्रीस् त तोओकोः मान्ता लेःआः ओउःत झ्यान्ते बयःनेःनाङ्’ त दाय्ह्ती नीङ्कायः तीः तुङ्सा बयःतेःनै ओउः मान्ताकायःलेः परमेस्वर्इ पेतो बयःमानौ।
42सुसुखेइ यात्चाक् ङाकोः कुरा ङ्हाम्ती सायःओ हौलम्कायः ङाकायः फेताक्चानी ओउः मान्ताकायःलेः कय्क्हाङः ग्रायःबाङ् योकोःती छीत्आक्तीको ज्युम्ह्ओ तीःहाङः ल्होक्सा पेनाः। 43-44नाङ्कोः क्रुत्इलेः पेमालो जाङ्ह्तेःचौ त खेःया ओउः क्रुत्पाय् तात्ती वाय्पाःस। नीङ्पाय् नीस्ज्याङ् क्रुत् नाःती नरककोः गलमा म्हीत्मालो म्हेःहाङः ल्होक्ओसै यात्ज्याङ् क्रुत् ह नाःती रौ जीङः दोःसा पेआनाः बा। 45-46नाङ्कोः दोम्इमा पेमालो जाङ्ह्तेःचौ त खेःया ओउः दोम्पाय् तात्ती वाय्पाःस। नीङ्पाय् नीस्ज्याङ् दोम् नाःती नरककोः गलमा म्हीत्मालो म्हेःहाङः ल्होक्ओसै यात्ज्याङ् दोम् ह नाःती रौ जीङः दोःसा पेनाः बा। 47फेरी नाङ्कोः मीक्इ च्यवःआक्तीको पेमालो जाङ्ह्तेःचौ त खेःया ओउः मीक्पाय् त्युत्ती वाय्पाःस। नीङ्पाय् नीस्ज्याङ् मीक् नाःती नरककोः गलमा म्हीत्मालो म्हेःहाङः ल्होक्ओसै यात्ज्याङ् मीक् ह नाःती परमेस्वर्कोः राजीहाङः मुसा दोःओ पेनाः। 48नरकहाङः म्हेःपाय् गलमा म्हीत्मालोआः मुलेःनाः ओहाङःकोः मायः जेःओ पेःपाय् गलमा सील। 49सबै मान्तापाय् म्हेःइलेः जय्लनःसा खेःतो। 50छेःपाय् क्यानः ल्हाम्ताक्साकायः पेलेःनाः माःर। पेसापाय् पेलेःनाः ल्हाम्मालो छेःइलेः दोह्मा ल्हाम्ताक्सा खाय्ल। क्यानःहाङः काओ छेःपाय् लयःलेः युती क्यानःकुस् पेतो ल्याव्ह्नाः ओउःलो लेखालेः नीङ्लम् लयःमयःकुस् पेतो काय्काय्माःत ल्याव्ह्काय्न” त दाय्ह्ती येसु तोआथास।
Избрани в момента:
मर्कस् 9: CDM93
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 1993 Wycliffe Bible Translators Inc., All Rights Reserved.