Matsiyù 8
8
Yesù byèèma kpiri sɔn cɛrɛmabeu min niì
(Marikì 1.40-45; Lukì 5.12-16)
1Àyìwà, Yesù jàà bou jèèn tsɛ waatsi riì bwèy, jàma brìsi yè e gban à kpɛyn. 2Tɔ̀un, byèèmà kpiri sɔn yeè bo na, tɔ̀ yeè e kunun gban à bììn, è dzin à ra ci: «Tsìfaà, wo y'a tsiì, wo dzia mun cɛrɛmabe, min bà mòdzìn fɛnɛ.» 3Tɔ̀un, Yesù yè sià foro è dzyɛn à ra, è dzin ci: «Min tsiiŋ, mun ci e cɛrɛmabe, e bà mòdzìn fɛnɛ.» Tɔ̀ nɔ̀nkɔɔrɔn ko e sa, kpir'la yè cɛrɛmabe, è bo e re byèèmà ɲin'nà ɲàn. 4#Sak 14.1-32.Yesù yè dzin à ra ci: «Maà à dè mòò pɛn na dɛ ! B'à yɛrɛ kpadè saakagoojaabobaà rìì là. Tà shɔ̀ùn, Musà rè sàrìyaa ci saaka kaatsi rìi yè bo, è kpàdè ci wo cɛrɛmabeu, e bè tɔ̀ ka. Tɔ nà bà wo cɛrɛmabeumaà shɛɛrɛbe è re.»
Yesù kaadzin jɛrɛ̀blàtsi sɔn ne faagoofadzin cɛrɛmabeu min niì
(Lukì 7.1-10)
5Àyìwà, Yesù dɔ̀nkɔɔn Kapɛrinaxumùn wɔ̀ rɔ̀n, kaadzin jɛrɛ̀blàtsi sɔn yeè e kpɛrɛ̀ à ra, à y'à màfyɛ̀n. 6À ci: «Tsìfaà, mun ne faagoofadzian ɲɛɔ̀n gbàà doùn. À mùrùkuɔ̀, à to byɛɔ̀n fɔ è bè geren.» 7Yesù yè dzin à ra ci: «Mun nà bè, m'a cɛrɛmabe.» 8Kaadzin jɛrɛ̀blàtsià ci: «Tsìfaà, wo yè bà ni dɔn mun tsur'le tsii, mun na wɔɔ tɔ̀ mà waa. Arì wo ye gooma dzin soo basɔùn nì dè, tɔ mun ne faagoofadzian cɛrɛmabeuma. 9Àwà mun mòdzin, kùntsii ì ni mun kùùn, mun sa yeè bà ni kaadzin ì kùùn. Min sɔn ka, tɔ bèe, mun to ye sɔn kiri, tɔ nàa. Min dzin n ne jòòn rà, nèe fa, tɔ tɔ̀ rii faa.»
10Àwà, Yesù twɛy gooma reè myɛ̀un min niì, è ji à dzii tsɛ. Tɔ̀un, nìì reè gbaɔn à kpɛyn, è dzin twɛy rà ci: «Sààben na, mun nì ci e ra, arì Isirayɛlidzin neè ɲàn, mun na mòò jà ŋe, nèe ɲɛyna brìsi rèe kaatsi ni nìi ɲàn waa. 11#Luk 13.29.Mun nì ci e ra, mòò giri nà dan kir'la rà, ko bwèydoo rè, yè nà e tsuù yè ɲwɛɛ̀n ɲɔn Ibraximà, ko Ishakà, ko Yàkubà ka Jìrànxɔɔ̀ màsàbee gàne rɔ̀n. 12#Mat 22.13; 25.30; Luk 13.28.Ŋà, Jìrànxɔɔ̀ màsàbee gàneè na wù è bà nìì reè raa, twɛy nà maa da rɔ̀n, yè bà ni tsitsiɛ̀ rà. Gɛyn boo, ko ɲiun taa rìì nà bà ni mɔn.» 13Tɔ̀un, Yesù yè dzin kaadzin jɛrɛ̀blàtsià rà ci: «Bè tsii. È fa a re, a ci wo ɲɛun à ra nìi tsuru.» Tɔ̀ waatsia yɛ̀r'la ɲàn, kpir'la rè faagoofadzian yè cɛrɛmabe.
Yesù Piyɛrì blantaàn ko mòò giri cɛrɛmabeu min niì
(Marikì 1.29-34; Lukì 4.38-41)
14Tà shɔ̀ùn, Yesù yè dɔ̀n be Piyɛr'lè tsii. À wɔu mɔn, è Piyɛrì blantaàn jà à na cɛrɛma waa, màta brìsi y'à ɲɛɔ̀n. 15Tɔ̀un, è dzyɛn taàn sià rà. Tɔ̀ fau min niì, màtaà yè dò. Taàn yè fù, è ɲwɛyn goo jaa bo à re. 16Tɔ̀ ɲɛ̀rɛɛ̀ rɔ̀n, yè nà kweykɔɔn giri ka à re. Yesù rè goomaa baraka rɔ̀n, è kwey rèè kaa bo twɛy kweykɔɔn reè kpɛyn, è ɲìnìnkɔɔn sapɛ cɛrɛmabe. 17#Ekk 53.4.Tɔ fau, sànko Ŋaablà re kɛɛra Esayì na nìi dè dɔɔ̀n bɔrɔɔ, tɔ̀ yeè bo e shi tsɛ, nìi yɛ ci:
«È kungɔ wɔu mùn gbaa goo rèè dzuun, è mùn ne ɲìn'nèè seen sen.»
Nìi ni Yesù kpɛyn jìɛ̀ ɲàn
(Lukì 9.57-62)
18Àwà, Yesù nàu à jà jàma brìsi wò laguruunà, è dzin e re kàràndzin neè rà, ci y'a wa yu blàa kɛ̀yn nɔn. 19Tɔ̀un, Sàrìryà Kaamoo sɔn yeè e kpɛrɛ̀ Yesù rà, è dzin à ra ci: «Kàrànfaà, wo ye be min o min, mun nà n gban wo kpɛyn.» 20Yesù yè dzin à ra ci: «Kɔ̀ɔ̀ rìì ni tsɛ̀ kùn kpar'nèè rè, è dɔ̀ɔn min niì. Jìran nɔ̀n kɛ̀yn neè, tàn yè bà ni twɛy rè, yè e ɲɛɛn min niì. Ŋà Adamà dziàn, gàne na ni tɔ̀ tsoo ra, à nà e kungɔ wɔ min niì waa.» 21Yesù rè kàràndzin neè soo kpɛrɛ yè dzin à ra kɔn ci: «Tsìfaà, à to min bè n faà fùn wɔ ŋe.» 22Yesù ci à ra ci: «A gban mun kpɛyn, a to fùn nèè yè e re fùn nèè wɔ.»
Yesù fyɛn blaa tsìiŋ yuà tsɛ min niì
(Marikì 4.35-41; Lukì 8.22-25)
23Tà shɔ̀ùn, Yesù yè dɔ̀n konkor'na doùn, à re kàràndzin neè sa yeè dɔ̀n ko à ka. 24Tɔ̀un, à yè è to yuà tsɛ, fyɛn bla sɔn yeè bàràma fu. Tɔ̀ fyɛɛn blàbe ɲaanfaa suun, yuà yè fù jia konkor'na doùn. Tɔ̀ y'a tàrà, Yesù ni ciɛ̀ rà. 25Kàràndzin neè yè e kpɛrɛ̀ à ra tɔ̀un, y'à kpunan ci: «Tsìfaà, mùn tsi, yuà nàkɔɔn yɛ mùn ɲɔn.» 26Yesù yè kpunan, è dzin è ra ci: «Fee y'à to ye yè bà shia nèe tsuru ? Ye ɲɛunmaà dzyɛ̀n Ŋaablà ra dɛ !» À fùu tɔ̀un, è cerè fyɛɛn ko yuà sa tsɛ, twɛy sa yeè e maɲɛn tɛ, màànkaan sapɛ yeè dò. 27È ji mòdzian dzii tsɛ. È ci: «Nèe mòdzin kaatsi kɛ̀n ? Arì fyɛɛn ko yuà sa y'a re dèumaà myɛ̀ɛn, y'à shi jiì.»
Yesù kpiri kweykɔɔn fii cɛrɛmabeu min niì Gadara mar'la ɲàn
(Marikì 5.1-20; Lukì 8.26-39)
28Àyìwà, Yesù ko e re kàràndzin neè yè bè wɔ yu blàa kɛ̀yn, Gadaraka reè rè jàmaàn ɲàn. È bèu wɔ mɔn, kpiri kweykɔɔn fii yè bo kabur'lèè rà, yè tsià Yesù mà. Twɛy na ɲanbeò, fɔ mòò na e tsiɛ, è dɔ̀n tɔ̀ shia rè dɛ. 29Tɔ̀un, yè sɛ̀ɛ̀y ci: «Ŋaablà Dzin Kpir'la, fee ni wo ko ɲe fi ? Wo naɔ̀ mìin, wo yè nà gooɲaan fa ɲe ra, sani à waatsi yeè wɔ rìì gbɛ ?» 30Tɔ̀ y'a tàrà, bɛ̀y kuru brìsi sɔn dan na gbàn è ra, twɛy yè bà ni ɲwɛɛ̀n nà. 31Kwey rèè yè Yesù màfyɛ̀ɛn ci: «E ba nà mùn kaa, a yɛrɛ to e mùn bàji be bɛ̀y kur'là ɲàn.» 32Yesù ci è ra ci: «Y'a wa !» Tɔ dèu min niì, yè bo, yè bè dɔ̀n bɛ̀y kur'là ɲàn. Tɔ̀un, bɛ̀y kur'là sapɛ yeè soso jaà bo jèèn tsɛ, yè nà e kpinìn yu rɔ̀n, yè san mɔn. 33Bɛ̀y kplàtsuu reè yè vwɛ̀yn, yè bè wɔ̀ɔ̀ doùn. Goo o goo fau kweykɔɔn fiɛ̀ rè goò ɲàn, yè tɔ̀ jaa dè mòdzian nà. 34Tɔ fau, wɔ̀ɔ̀ mòdzian sapɛ yeè bo, yè Yesù kùùntsi. Y'à màfyɛ̀n, ci è bè, è bo ye re màr'lɔ̀ùn.
Избрани в момента:
Matsiyù 8: BDZU
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2024 Église Évangélique Mennonite du Burkina Faso (EEMBF) et SIL International