Phŭn Blŭng 13
13
Abram dua ñu Lot pơklah gŏp gơñu
1Nŭn Abram dua kơi bơnai ñu biă mơ̆ng Êjĭp, đĭ nao pơ ƀon Nêkĕp, dăp bih nŏ yĕt-yĕt ñu hmâo, wŏt Lot nao hr̂ŏm ñu mơ̆n. 2(Abram ñu mơnuih bơdr̂ŏng jat, ñu hmâo phung čĭm dăp pr̂ăk maih lô.) 3Jr̂ŏng nŭn ñu biă mơ̆ng ƀon Nêkĕp, bat mơ̆ng ha ƀon nao pơ ha ƀon, khă tơl tr̂uh pơ plơi Ƀêt-el. Ñu nao pơ ƀon hađăp, ƀon ñu bơdŏng sang seng tŏng mơ̆ng blŭng, plah-wah plơi Ƀêt-el mơ̆ng plơi Ai,#An Phŭn 12:8-9. 4jr̂ŏng nŭn Abram iâo đĭ ƀŏ Yêhôwa pơ ƀon nŭn, ƀon nŭn yơh ñu ngă pr̂a ngă yang pah ahlâo. 5Lot, pô nao hr̂ŏm Abram, ñu hmâo dr̂ăm lô hla ti Abram mơ̆n, ñu hmâo phung triw phung be, phung mo, dăp sang seng tŏng lô he mơ̆n. 6Plai ƀon nŭn bĭ čr̂ăp ôh gơñu dua r̂ăng dŏ hr̂ŏm, yua gơñu hmâo dr̂ăm-gơnăm lô jat, tơl gơñu bĭ thâo dŏ hr̂ŏm gŏp gơñu. 7Ha tô̆ dŏng, môt čiă phung čĭm Abram, dăp môt čiă phung čĭm Lot, pĭ pơdjơ̆ gŏp gơñu. (Pah anŭn môt sô̆n-sat Kanan dăp môt sô̆n-sat Pêrĭsit dŏ tăm ƀon nŭn mơ̆n.)
8Nŭn Abram pơhiăp hr̂ŏm Lot: «Anăm br̂ơi hmâo klơi pơdjơ̆-pơsao dua ta ôh, dăp môt čiă čĭm kâo hr̂ŏm môt čiă čĭm ih, yua dua ta yŏng dơi. 9Bih lŏn-ia ne dŏ gah năp ih boih. Nĭng nŭn yơh, br̂ơi ih klah đuĕ mơ̆ng kâo wŏ, jơ̆ ih r̂ih tô̆ gah djao, nŭn kâo ti nao gah nuă, jơ̆ laĭ ih r̂ih tô̆ gah nuă, nŭn kâo ti nao gah djao dŏng.» 10Jr̂ŏng nŭn Lot ep yô, ƀôh bih čol dua gah hnoh ia Yuđăn, tr̂uh pơ plơi Sô-a, hmâo ia lô ƀon, hla ti suŏn Yêhôwa,#An Phŭn 2:8-10. hla ti čal Êjĭp. (Pah anŭn Yêhôwa ka bơr̂ăm lôi plơi Sôđô̆m dăp plơi Kômôra ôh.) 11Nĭng nŭn yơh, Lot r̂ih bih čol hnoh ia Yuđăn tô̆ ñu pô, nŭn ñu bat nao ping gah ngŏ. Yua nĭng nŭn yơh, môt gơñu dua r̂ăng mơ̆ng pơklah gŏp gơñu. 12Abram dŏ tăm lŏn-ia Kanan, plai Lot dŏng, ñu dŏ tăm čol hnoh ia Yuđăn, čol nŭn hmâo plơi pơkŏn-pơkŏn, ñu bơdŏng sang seng tŏng jĕ plơi Sôđô̆m. 13(Gah nă plơi lan Sôđô̆m, gơñu mơnuih ngă set, gơñu ngă glaĭ mơ̆ng Yêhôwa kơtang jat.)
14Dơdơi mơ̆ng Lot klah đuĕ, nŭn Yêhôwa pơhiăp hr̂ŏm Abram: «Br̂ơi ih ep yô mơ̆ng ƀon ih dŏ ne wŏ, ep nao pơ ping gah djao, ping gah nuă, ping gah ngŏ, ping gah yô̆! 15Yua bih-tih lŏn-ia ih ƀôh ne, kâo ti br̂ơi ih, dăp tr̂uh pơ djuoi ih hayoh. 16Kâo ti ngă br̂ơi djuoi ih hmâo lô-lĭn hla ti kơnah ƀô̆k, jơ̆ lơi anăm yap kơnah ƀô̆k, nŭn ñu anăm yap djuoi ih mơ̆n. 17Gŭ đĭ wŏ, br̂ơi ih bat yô jŏp tăm lŏn-ia ne, yua kâo ti br̂ơi ih boih.» 18Jr̂ŏng nŭn Abram r̂uh sang seng tŏng, nao dŏ jĕ phŭn kơyâo dŭt-dŭt#13:18 Phŭn kơyâo dŭt-dŭt ne Hêbrơ laĭ «Phŭn kơyâo Êlôn.» An Phŭn 12:6. ơi Mamrê mơ̆ng plơi Hêbrô̆n, jr̂ŏng nŭn ñu ngă pr̂a ngă yang Yêhôwa pơ anŭn mơ̆n.
Избрани в момента:
Phŭn Blŭng 13: JKB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2024, Wycliffe Bible Translators, Inc.