Phŭn Blŭng 17
17
Klơi tr̂ĕ klĭ
1Pah Abram hmâo ayŭ 99 thŭn,#An Phŭn 12:4; 16:3. Yêhôwa pơƀôh br̂ơi Abram ƀôh ñu, nŭn ñu pơhiăp hr̂ŏm Abram: «Kâo Ơi Adai Yang Kơtang Hloh, br̂ơi ih bat hr̂ŏm kâo, dăp ngă hiam tôm-tĕč he mơ̆n, 2nŭn kâo ti kă klơi uăn bơgop kâo hr̂ŏm ih, kâo ti ngă br̂ơi nă čo ih lal đĭ jai lô tui lô tui.» 3Pah anŭn Abram bon kô̆p ƀŏ ñu pơ kơnah, jr̂ŏng nŭn Ơi Adai pơhiăp hr̂ŏm Abram: 4«Gah kâo, klơi uăn bơgop kâo kă hr̂ŏm ih hla ne: Ih ti jr̂ŏng ma môt sô̆n-sat pơkŏn-pơkŏn lô-lĭn.#17:4 Phŭn 12:1-3; 15:1-21; 18:10-15; 22:16-18 r̂ă r̂oi mơ̆ng klơi Ơi Adai pơhiăp uăn hr̂ŏm Abrahăm mơ̆n. 5Ƀŏ ih r̂ăng bĭ iâo “Abram”#17:5 Ƀŏ Abram tui tam Hêbrơ čiăng laĭ «Ma r̂ăng pơpô̆ bơyom.» dŏng tah, r̂ăng ti iâo ih “Abrahăm”#17:5 Ƀŏ Abrahăm tui tam Hêbrơ čiăng laĭ «Ma môt mơnuih lô-lĭn.» dŏng, yua kâo bơdŏ br̂ơi ih jr̂ŏng ma môt sô̆n-sat pơkŏn-pơkŏn lô-lĭn.#An Rôm 4:16-17. 6Kâo ti ngă br̂ơi ih hmâo nă čo lal đĭ lô, kâo ti ngă br̂ơi nă čo ih jr̂ŏng môt sô̆n-sat pơkŏn-pơkŏn, wŏt nă čo ih ti pơpôn r̂ai môt pơtao mơ̆n. 7Kâo ti kă klơi uăn bơgop kâo hr̂ŏm ih dăp djuoi ih dơdơi kơñ he mơ̆n, tui tam nôk gơñu, klơi uăn bơgop ne ti dŏ nao-nao hayoh, kâo yơh Yang ih dăp djuoi ih dơdơi kơñ he mơ̆n. 8Kâo ti pha br̂ơi ih bih lŏn-ia Kanan, lŏn-ia ih dŏ dăng ne, kâo ti br̂ơi ih dăp djuoi ih dơdơi kơñ, čiăng gơñu hmâo lŏn-ia ne nao-nao hayoh. Kâo yơh Yang môt gơñu.»
9Jr̂ŏng nŭn Ơi Adai pơhiăp hr̂ŏm Abrahăm: «Gah ih dŏng, br̂ơi ih djă čr̂oh wŏ klơi uăn bơgop kâo, ih dăp djuoi ih dơdơi kơñ he mơ̆n, tui tam nôk gơñu. 10Ne yơh klơi uăn bơgop gô-ih ti djă čr̂oh, klơi uăn bơgop kâo kă hr̂ŏm gô-ih dăp djuoi ih dơdơi kơñ he mơ̆n: Bih đahkơi-đahkơi tăm môt gô-ih, br̂ơi r̂ăng tr̂ĕ br̂ơi klĭ gơñu wŏ. 11R̂ăng ti tr̂ĕ br̂ơi klĭ dơdŭ ia djă gô-ih, čiăng gô-ih ƀôh jel mơ̆ng klơi uăn bơgop kâo kă hr̂ŏm gô-ih. 12Bih nă đahkơi-đahkơi tăm môt gô-ih tơgr̂ư̆ nôk, tơl a pơpôn r̂ai ñu, kloh păn r̂ơi boih, r̂ăng ti tr̂ĕ br̂ơi klĭ ñu, wŏt nă đahkơi a pơpôn mơ̆ng sang ih, lơ đahkơi ih blơi mơ̆ng môt sô̆n-sat pơkŏn bĭ djơ̆ djuoi ih pô ơ mơ̆n. 13Dăp đahkơi hlŭn a pơpôn mơ̆ng sang ih pô, dăp đahkơi hlŭn ih blơi mơ̆ng len ơ mơ̆n, br̂ơi r̂ăng tr̂ĕ br̂ơi klĭ gơñu soh-sel, čiăng klơi kâo uăn bơgop hr̂ŏm gô-ih dŏ tăm dr̂ơi-jĕn gô-ih nao-nao hayoh. 14Plai đahkơi bĭ br̂ơi r̂ăng tr̂ĕ klĭ dơdŭ ia djă ñu, pô nŭn a ti tr̂ĕ pôktĕ lôi ñu mơ̆ng nă plơi lan, yua ñu git ngă tui klơi uăn bơgop kâo.»
15Jr̂ŏng nŭn Ơi Adai pơhiăp hr̂ŏm Abrahăm dŏng: «Gah Sarai bơnai ih, ih anăm iâo ƀŏ ñu “Sarai” dŏng tah, yua kâo iâo kr̂a ƀŏ ñu “Sara”#17:15 Ƀŏ Sara ƀŏ Sarai dua tô̆ nŭn tui tam Hêbrơ čiăng laĭ «Nă bia pơtao.» yơh. 16Kâo ti pha br̂ơi ñu klơi nŭk-nua, ha tô̆ dŏng kâo ti br̂ơi ih hmâo nă đahkơi r̂ai mơ̆ng ñu mơ̆n. Kâo ti br̂ơi ñu klơi nŭk-nua, čiăng nă čo ñu jr̂ŏng môt sô̆n-sat pơkŏn-pơkŏn, wŏt nă čo ñu ti pơpôn r̂ai pơtao čal pơkŏn-pơkŏn mơ̆n.» 17Pah anŭn Abrahăm kô̆p kŏ tơl pơ kơnah, dăp klao, jr̂ŏng nŭn ñu khư̆t tăm bŭt: «Hiư̆m, đahkơi hmâo ayŭ 100 thŭn boih, dŏ thâo hmâo nă mơ̆n ah? Hiư̆m, Sara, ñu hmâo ayŭ 90 thŭn boih, ñu dŏ thâo pơpôn nă mơ̆n ah?» 18Jr̂ŏng nŭn Abrahăm pơhiăp hr̂ŏm Ơi Adai: «Tô̆ ih mơ̆ng br̂ơi Ismael dŏ ti năp ih, nŭn găl yơh!» 19Nŭn Ơi Adai pơhiăp glaĭ: «Bĭ ôh! Sara bơnai ih yơh ti pơpôn nă đahkơi br̂ơi ih, nŭn ih ti iâo ƀŏ ñu “Isă.”#17:19 Ƀŏ Isă tui tam Hêbrơ čiăng laĭ «Klao.» An Phŭn 17:17; 18:12-15; 21:6. Kâo ti kă klơi uăn bơgop kâo hr̂ŏm ñu, klơi uăn bơgop nŭn ti dŏ nao-nao hayoh hr̂ŏm djuoi ñu dơdơi kơñ. 20Gah nă ih Ismael dŏng, kâo hmĭ#17:20 Ƀŏ Ismael tui tam Hêbrơ čiăng laĭ «Ơi Adai hmĭ.» tui ih mơ̆n. Nêne kâo ti pha br̂ơi ñu klơi nŭk-nua, kâo ti ngă br̂ơi ñu hmâo nă čo lal đĭ lô, čiăng nă čo ñu jai lô tui lô tui. Nă đahkơi ñu pluh dua r̂ăng ti ngă khua soh, wŏt kâo ti ngă br̂ơi Ismael jr̂ŏng sô̆n-sat pr̂ŏng he mơ̆n. 21Plai klơi uăn bơgop dŏng, kâo ti kă hr̂ŏm Isă, nă Sara ti pơpôn br̂ơi ih, thŭn dơi kơñ tơl yan ne.» 22Tơl Ơi Adai pơhiăp hr̂ŏm Abrahăm jr̂ŏng boih, nŭn Ơi Adai đuĕ mơ̆ng Abrahăm đĭ glaĭ pơ adai dih.
23Jr̂ŏng nŭn Abrahăm tô̆ Ismael nă ñu, dăp bih đahkơi hlŭn a pơpôn tăm sang ñu, wŏt đahkơi hlŭn ñu blơi mơ̆ng len, bih môt đahkơi dŏ mơ̆ng sang ñu, nŭn ñu tr̂ĕ br̂ơi klĭ dơdŭ ia djă mơ̆ng r̂ơi nŭn mơ̆n, hla ti Ơi Adai pơhiăp hr̂ŏm ñu. 24Pah r̂ăng tr̂ĕ br̂ơi klĭ Abrahăm, ñu hmâo ayŭ 99 thŭn boih.#An Rôm 4:11. 25Gah Ismael nă ñu dŏng, pah r̂ăng tr̂ĕ br̂ơi klĭ ñu, ñu hmâo ayŭ 13 thŭn boih. 26Abrahăm dăp Ismael nă ñu, r̂ăng tr̂ĕ br̂ơi klĭ gơñu hr̂ŏm ha r̂ơi nŭn mơ̆n. 27Môt đahkơi a pơpôn mơ̆ng sang ñu, dăp môt đahkơi ñu blơi mơ̆ng len mơ̆ng môt sô̆n-sat pơkŏn, bih-tih môt đahkơi dŏ tăm sang ñu, r̂ăng tr̂ĕ br̂ơi klĭ tơgr̂ư̆ gơñu, hr̂ŏm ha r̂ơi nŭn mơ̆n.
Избрани в момента:
Phŭn Blŭng 17: JKB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2024, Wycliffe Bible Translators, Inc.